76
1 إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ. أَزهّذْ ن أَسَافْ، إِزْڒِي.
2 أَربِّي إِتّْوَاسّنْ ذِي يَاهُوذَا،
إِسمْ نّسْ ذ أَمقّْرَانْ ذِي إِسْرَائِيل.
3 أَعُوشِّي نّسْ أَقَا-ث ذِي شَالِيمْ،
ثَازذِّيغْثْ نّسْ ذِي صِيهْيُونْ.
4 ذِينِّي يَارْژَا فْڒِيثْشَاثْ يَارقّنْ ن ڒْقوْسْ،
ثَاسدَّارْثْ ن ؤُسڒْقِي ذ سِّيفْ ؤُڒَا ذ أَمنْغِي. سِيلَاهْ.
5 ثسَّاڭّْوَاذذْ ؤُ ثْجهْذذْ إِ ثدْجِيذْ
خْ إِذُورَارْ نِّي إِمّژْرنْ ذِي ثْكشَّاضْثْ.
6 إِنِّي إِجهْذنْ ذڭْ وُوڒْ تّْوَاكشّْضنْ.
نِيثْنِي نُّوذْمنْ، طّْصنْ،
ؤُڒَا ذ إِجّْ زڭْ إِرْيَازنْ إِمحْضنْ وَارْ إِزمَّارْ أَذْ إِمّْعَاڒَا.
7 س ؤُودّبْ نّكْ، أَ أَربِّي ن يَاعْقُوبْ،
إِغَارْقْ ؤُكَارُّو ذ ؤُيِيسْ ذڭْ يِيضسْ.
8 شكْ، وَاهْ شكْ ثسَّاڭّْوَاذذْ،
وِي إِزمَّارنْ أَذْ إِقِّيمْ إِبدّْ زَّاثْ إِ وُوذمْ نّكْ،
خْمِي د غَا إِكَّارْ وغْضَابْ نّكْ؟
9 زڭْ ؤُجنَّا ثڭِّيذْ أَذْ إِتّْوَاسڒْ ڒْحُوكْمْ.
ثطّفْ ثڭّْوُوذِي ثَامُّورْثْ ؤُشَا ثسّغْذْ،
10 ؤُمِي إِكَّارْ أَربِّي مَاحنْذْ أَذْ إِشَارّعْ،
حِيمَا أَذْ إِفكّْ مَارَّا إِمْهِيننْ ن ثمُّورْثْ. سِيلَاهْ.
11 مَاغَارْ أَفُوڭمْ ن إِوْذَانْ أَذْ شكْ إِقَاذَا،
مِينْ إِقِّيمنْ ن وسْعَارْ أَذْ ث ثْمنْعذْ.
12 وْشمْ لْوُوعُوذْ ؤُ ڭّمْ زَّايْسنْ زَّاثْ إِ سِيذِي، أَربِّي نْومْ.
أجّْ مَارَّا إِنِّي ذ أَسْ د-إِنّْضنْ
ذ أَوْينْ ضّْذَاقِي إِ ونِّي إِتّْخصَّا أَذْ زَّايسْ ڭّْوذنْ،
13 ونِّي إِتّكّْسنْ إِ ڒْحُوكَّامْ بُوحْبڒَاثْ نْسنْ،
ونِّي زَّايسْ تّڭّْوْذنْ إِجدْجِيذنْ ن ثمُّورْثْ.