‏1 إِ ؤُمقّْرَانْ ن إِمغْنَاجنْ. زڭْ أَيْثْ ن قُورَاحْ.

س لْهَارْبَاثْ إِتّْوَارِّيڭْلَانْ غَارْ سنّجْ. إِزْڒِي.

‏2 أَربِّي ذ أَمْشَانْ ن ثَاروْڒَا ذ جّهْذْ إِ نشِّينْ.

أَقَا إِبَانْ-د إِتِّيشْ أَفُوسْ أَطَّاسْ ذِي ڒحْصَارَاثْ.

‏3 س ؤُينِّي وَارْ نتّڭّْوذْ شَا،

وَاخَّا أَذْ ثْبدّڒْ ثَامُّورْثْ،

أَذْ نْهزَّانْ إِذُورَارْ ذڭْ وُوڒْ نْ ڒبْحُورْ،

‏4 أَذْ هَاجَانْثْ ڒْحمْڒَاثْ نّسْ، أَذْ ڭّنْثْ أَكُوفُّو،

أَذْ نْهزّنْ إِذُورَارْ س ؤُنّقْڒبْ نّسْ! سِيلَاهْ.

‏5 ثِيغْزَارِينْ ن يغْزَارْ أَذْ سّْفَارّْحنْثْ ثَانْذِينْثْ ن أَربِّي،

زَّاوشْثْ إِقدّْسنْ ن ثْزذِّيغِينْ ن ؤُمْعُودْجِي خْ كُوڒْشِي.

‏6 أَربِّي أَقَا-ث ذِي ڒْوسْثْ نّسْ، وَارْ ثتّنْهزَّا،

أَربِّي أَذْ أَسْ إِوْشْ أَفُوسْ خْمِي د غَا ثسِّيجْ ثُوفُّوثْ.

‏7 ڒڭْنُوسْ مُوزَّارنْ، ثِيڭلْذِيوِينْ نْهزّنْثْ.

نتَّا إِڭَّا ثْمِيجَّا نّسْ أَذْ ثتّْوَاسڒْ، ثَامُّورْثْ أَقَا ثفْسِي.

‏8 سِيذِي ن ڒْعسْكَارَاثْ أَقَا-ث أَكِيذْنغْ،

أَربِّي ن يَاعْقُوبْ ذ لْپُورْجْ نّغْ يُوعْڒَانْ. سِيلَاهْ.

‏9 أَسمْ-د، خْزَارمْ ثِيمڭَّا ن سِيذِي،

نتَّا إِ إِڭِّينْ ثِيمسْڒَايِينْ إِسَّاڭّْوَاذنْ خْ ثمُّورْثْ.

‏10 نتَّا إِسّْبدَّا إِمنْغَانْ غَارسْ أَڒْ أَنڭَّارْ ن ثمُّورْثْ،

نتَّا أَذْ يَارْژْ ڒْقوْسْ ؤُ إِشَّاثْ لَانْسَا ذِي إِوثْوِيثنْ،

إِكَارُّوثنْ إِسّشْمَاضْ إِ-ثنْ س ثْمسِّي.

‏11 سْبدّْ، سْنمْ إِلَّا أَقَا نشّْ ذ أَربِّي.

نشّْ أَذْ تّْوَاسْڭعّْذغْ جَارْ ڒڭْنُوسْ،

نشّْ أَذْ تّْوَاسْڭعّْذغْ خْ ثمُّورْثْ.

‏12 سِيذِي ن ڒْعسْكَارَاثْ أَقَا-ث أَكِيذْنغْ،

أَربِّي ن يَاعْقُوبْ ذ لْپُورْجْ يُوعْڒَانْ إِ نشِّينْ. سِيلَاهْ.