10
1 أَ سِيذِي، مَايمِّي ثقِّيمذْ ثِيڭّْوجذْ أَمُّو؟ مَايمِّي ثسّْنُوفَّارذْ إِخفْ نّكْ ذڭْ وَاكُوذنْ ن ڒحْصَارثْ؟
2 س نّْفَاخثْ إِضفَّارْ ؤُعفَّانْ ڒْمسْكِينْ.
أَذْ تّْوَاطّْفنْ ذِي ثْمعْمَاتْشْ إِ ذِي تّْخَارّْصنْ. ▪
3 مَاغَارْ أَعفَّانْ إِسّْعُودْجْ إِخفْ نّسْ غَارْ مژْرِي ن ڒعْمَارْ نّسْ،
إِتّْبَاركْ أَضمَّاعْ، إِتّْشقَّافْ ذِي سِيذِي.
4 أَعفَّانْ أَمشْنَاوْ ونِّي إِسّْڭعَّاذنْ ثِينْزَارْثْ نّسْ غَارْ ؤُجنَّا،
وَارْ إِتّْبقّشْ.
”وَارْ ذِينْ أَربِّي“، مَانْ أَيَا ذ مَارَّا مِينْ ذِي إِزمَّارْ أَذْ إِتّْخَارّصْ. ▪
5 مَارَّا إِبْرِيذنْ نّسْ تّفّْغنْ أَسْ مْلِيحْ كُوڒْ ثْوَاڒَا.
ڒهْكَامَاثْ نّكْ تُّوعْڒَانْثْ خَاسْ.
إِتّْزَاوَارْ مَارَّا إِنِّي ث إِحصَّارنْ.
6 نتَّا إِقَّارْ ذڭْ وُوڒْ نّسْ: ”وَارْ تّنْهزِّيغْ،
زِي جِّيڒْ أَڒْ جِّيڒْ وَارْ ذ أَيِي إِڒقّفْ ؤُڒَا ذ إِجّْ ن ڒْغَارْ.“
7 أَقمُّومْ نّسْ إِشُّورْ س نّعْڒثْ ذ إِخَارِّيقنْ ذ دّدْجْ.
سَاذُو يِيڒسْ نّسْ أَقَا ذِينْ ثَامَارَا ذ ڒْمُوعْصِييّثْ. ▪
8 نتَّا إِتّْغِيمَا غَارْ وشْبَارْ ذِي ذْشُورَاثْ،
ذڭْ إِمُوشَانْ إِنُّوفَّارنْ إِنقّْ إِنِّي وَارْ إِڭِّينْ س شَا.
ثِيطَّاوِينْ نّسْ مّنْضَارنْثْ خْ ڒْمسْكِينْ.
9 إِڒْبثْ ذڭْ ومْشَانْ إِنُّوفَارنْ،
أَمْ ويْرَاذْ ذڭْ ؤُذُورِّي ن ؤُعِيشُّو نّسْ.
نتَّا إِتّْحكَّارْ حِيمَا أَذْ يَاشَارْ ڒْمسْكِينْ.
إِتَّاشَارْ ڒْمسْكِينْ ؤُمِي ث إِجبّذْ ذِي ثْرَاشَّا نّسْ.
10 نتَّا إِهكّْوَا-د غَارْ وَادَّايْ، إِتَّاضَارْ،
ؤُ ڒْمسْكِينْ إِوطَّا جَارْ وَاشَّارنْ نّسْ إِجهْذنْ.
11 إِقَّارْ ذڭْ وُوڒْ نّسْ: ”أَربِّي إِتُّو،
نتَّا إِسّْنُوفَّارْ ؤُذمْ نّسْ،
عمَّارْصْ أَذْ ث إِژَارْ.“ ▪
12 كَّارْ، أَ سِيذِي، أَربِّي، سْڭعّذْ أَفُوسْ نّكْ،
وَارْ تّتُّو ڒْمُوسَاكِينْ.
13 مَايمِّي إِتّْشقَّافْ ؤُعفَّانْ ذِي أَربِّي،
مَايمِّي إِقَّارْ ذڭْ وُوڒْ نّسْ:
”شكْ وَارْ ثتّْبقَّاشذْ!“؟
14 أَقَا شكْ ثژْرِيذْ، مِينْزِي ثتّْوَاڒِيذْ ثَامَارَا ذ وشْضَانْ،
مَاحنْذْ أَذْ ثنْ ثسَّارْسذْ ذڭْ ؤُفُوسْ نّكْ.
ڒْمسْكِينْ إِتَّارّْ-د غَاركْ س ؤُزدْجِيفْ.
شكْ ذ أَمْعَاونْ ن ؤُيُوجِيڒْ. ▫
15 أَرْژْ أَغِيڒْ ن ؤُعفَّانْ،
خْڒفْ ڒْغَارْ زڭْ ونِّي إِتّڭّنْ ثُوعفّْنَا،
أَڒْ وَارْ ثتِّيفذْ وَالُو عَاذْ.
16 سِيذِي ذ أَجدْجِيذْ إِ ڒبْذَا قَاعْ.
تّْوَاثحَّانْ ڒڭْنُوسْ زِي ثمُّورْثْ نّسْ. ▪
17 أَ سِيذِي، شكْ ثسْڒِيذْ إِ مژْرِي ن إِمْوَاضْعنْ،
أَذْ ثسّْجهْذذْ ؤُڒَاونْ نْسنْ،
أَذْ غَارْسنْ ثْميّْڒذْ أَمزُّوغْ نّكْ،
18 حِيمَا أَذْ ثَاغذْ ثَاسْغَارْثْ إِ ؤُيُوجِيڒْ ؤُ إِ ونِّي إِتّْوَاحصَّارنْ،
مَاحنْذْ ؤُڒَا ذ إِجّْ ن بْنَاذمْ خْ ثمُّورْثْ وَارْ إِتّْغِيمِي إِسَّاڭّْوَاذْ عَاذْ ؤُڒَا ذ إِجّْ.