9
1 إِ ؤُمقّْرَانْ ن إِمغْنَاجنْ. س ثغْنِينْثْ ن ’ڒْموْثْ ن ممِّي‘. أَزهّذْ ن ذَاوُوذْ. 2 أَذْ قَاذِيغْ سِيذِي س مَارَّا ؤُڒْ إِنُو،
أَذْ بَارّْحغْ مَارَّا لْمُوعْجِيزَاثْ نّكْ.
3 أَذْ زَّايكْ فَارْحغْ أَذْ زَّايكْ سْڒِيوْڒِيوغْ.
نشّْ أَذْ زهّْذغْ إِ يِيسمْ نّكْ،
أَ شكْ، أَمْعُودْجِي خْ كُوڒْشِي!
4 ؤُمِي ڒْعذْيَانْ إِنُو ذوْڒنْ غَارْ ضفَّارْ،
وْضَانْ ؤُ غڒْينْ زَّاثْ إِ وُوذمْ نّكْ.
5 مَاغَارْ شكْ ثْونِّيذْ أَيِي ثَاسْغَارْثْ إِنُو ؤُ ثْبلّْعذْ دّعْوثْ إِنُو،
ثقِّيمذْ خْ ڒْعَارْشْ، أَ شكْ، ذ ڒْقَاضِي ذ أَمْسڭّذْ.
6 شكْ ثْوبّْخذْ ڒڭْنُوسْ، ثْهلّْكذْ أَعفَّانْ،
ثمْحِيذْ إِسمْ نْسنْ إِ ڒبْذَا قَاعْ.
7 ڒعْذُو، أَقَا نِيثْنِي تّْوَاقْضَانْ، أَقَا أَثنْ ذ ڒْخِيرْبَاثْ إِ ڒبْذَا.
ثْغضْڒذْ ثِيندَّامْ نْسنْ، ڒِيذَارثْ نْسنْ ثفْنَا.
8 سِيذِي إِتّْغِيمَا إِ ڒبْذَا.
أَقَا إِسّْبدّْ ڒْعَارْشْ نّسْ إِ ڒحْكَامْ.
9 نتَّا أَذْ إِشَارّعْ دُّونشْثْ س ثْسڭْذَا،
أَذْ إِحْكمْ شُّوعُوبْ س ڒْحقّْ. ▪
10 سِيذِي ذ لْپُورْجْ يُوعْڒَانْ إِ ونِّي إِمّنْضَارنْ،
إِجّْ ن لْپُورْجْ يُوعْڒَانْ ذڭْ وَاكُوذنْ ن ڒحْصَارثْ. ▪
11 إِنِّي إِسّْننْ إِسمْ نّكْ، أَذْ خَاكْ تّشْڒنْ،
مَاغَارْ إِنِّي خَاكْ يَارزُّونْ، وَارْ ذَايْسنْ ثْسمّْحذْ، أَ سِيذِي.
12 زهّْذمْ إِ سِيذِي، ونِّي إِزدّْغنْ خْ وذْرَارْ ن صِيهْيُونْ،
بَارّْحمْ س ثْمڭَّا نّسْ جَارْ ڒڭْنُوسْ.
13 مِينْزِي نتَّا يَارزُّو خْ ؤُسِيزّڒْ ن إِذَامّنْ، إِتّْخَارَّاصْ ذَايْسنْ.
وَارْ إِتُّو شَا إِغُويَّانْ ن يِينِّي إِتّْوَاحصَّارنْ.
14 حِينّْ خَافِي، أَ سِيذِي،
خْزَارْ غَارْ ڒغْبنْ إِنُو إِ د-يُوسِينْ زڭْ إِنِّي ذ أَيِي إِشَارّْهنْ،
شكْ ذ ونِّي ذ أَيِي غَا إِسّْڭعّْذنْ زِي ثوُّورَا ن ڒْموْثْ،
15 حِيمَا أَذْ بَارّْحغْ س مَارَّا شَّانْ نّكْ،
ذِي ثوُّورَا ن يدْجِيسْ ن صِيهْيُونْ.
نشّْ فَارّْحغْ خْ ؤُسنْجمْ نّكْ.
16 ڒڭْنُوسْ وْضَانْ ذڭْ وحْفُورْ إِ إِڭِّينْ نِيثْنِي،
أَضَارْ نْسنْ إِتّْوَاشدّْ ذِي ثْرَاشَّا، ثنِّي سّْنُوفَّارنْ سِيمَانْثْ نْسنْ. ▪
17 سِيذِي إِذْوڒْ إِتّْوَاسّنْ.
نتَّا يُوغَا ثَاسْغَارْثْ،
أَعفَّانْ إِنُّوغْ ذِي ثْمڭَّا ن إِفَاسّنْ نّسْ.
أجّْ إِفِيڒَانْ أَذْ ذنْدّْننْ. سِيلَاهْ.
18 إِعفَّاننْ أَذْ د-ذوْڒنْ غَارْ ڒَاخَارْثْ،
مَارَّا ڒڭْنُوسْ نِّي إِتُّونْ أَربِّي.
19 مَاشَا أَمزْڒُوضْ وَارْ إِتّْوَاتُّو إِ ڒبْذَا،
وَارْ إِتّْوَاقطّعْ ڒَايَاسْ ن يِينِّي إِتّْوَاحْصَارنْ إِ ڒبْذَا.
20 كَّارْ، أَ سِيذِي، حِيمَا وَارْ إِذِّيكّْوِيڒْ بْنَاذمْ إِجْهذْ كْثَارْ.
أجّْ ڒڭْنُوسْ أَذْ تّْوَاشَارّْعنْ زَّاثْ إِ وُوذمْ نّكْ.
21 سِيڭّْوذْ إِ-ثنْ، أَ سِيذِي،
أجّْ ڒڭْنُوسْ أَذْ سّْننْ أَقَا أَثنْ ذ بْنَاذمْ! سِيلَاهْ.