7
1 إِجّْ ن يزْڒِي ن ذَاوُوذْ ذڭْ وَاطَّاسْ ن ثْمِيجِّيوِينْ، إِزْڒِي نِّي إِغنّجْ إِ سِيذِي ذِي سِّيبّثْ ن وَاوَاڒنْ ن كُوشْ، زڭْ أَيْثْ ن بِينْيَامِينْ. 2 أَ سِيذِي، أَربِّي إِنُو، أَقَا خَاكْ إِ تّشْڒغْ!
سنْجمْ أَيِي زِي مَارَّا إِنِّي خَافِي إِتَّاژّْڒنْ ؤُشَا فكّْ أَيِي،
3 مَاحنْذْ نتَّا وَارْ ذ أَيِي إِزعّفْ أَمْ ويْرَاذْ، أَذْ أَيِي إِمزّقْ،
ڒَامِي وَارْ ذِينْ وِي إِ غَا إِفكّنْ!
4 أَ سِيذِي، أَربِّي إِنُو، مَاڒَا نشّْ ڭِّيغْ مَانْ أَيَا،
مَاڒَا ذِينْ شَا ن ڒْغشّْ إِڒْصقْ ذڭْ إِفَاسّنْ إِنُو،
5 مَاڒَا نشّْ خڒْفغْ ونِّي أَكِيذِي إِدَّارنْ ذِي ڒهْنَا س ڒْغَارْ،
- مَاشَا ونِّي ذ أَيِي إِحصَّارنْ خْ وَالُو، جِّيغْ ث أَذْ يُويُورْ - ،
6 أجّْ خنِّي أَذْ يَاژّڒْ ڒعْذُو خْ ڒعْمَارْ إِنُو، أَذْ أَيِي إِعْذُو،
أَذْ إِعْفسْ خْ ثُوذَارْثْ إِنُو ذِي ثمُّورْثْ،
أجّْ إِ-ث أَذْ إِسّزْذغْ أَعُودْجِي إِنُو ذِي ثْعجَّاجْثْ! سِيلَاهْ.
7 كَّارْ-د، أَ سِيذِي، ذڭْ وغْضَابْ نّكْ،
سُوعْڒَا إِخفْ نّكْ خْ وهْجَامْ ن يِينِّي ذ أَيِي إِحصَّارنْ،
فَاقْ ذِي طّْوعْ إِنُو،
أَقَا ثڭِّيذْ ثُومُورذْ ڒْحقّْ.
8 إِجّْ ن ؤُبَارُّو ن ڒڭْنُوسْ أَذْ أَشْ د-نّْضنْ،
خنِّي ذْوڒْ ثِيوَا نْسنْ غَارْ سنّجْ.
9 سِيذِي أَذْ إِحَاكمْ ڒڭْنُوسْ.
أَغْ أَيِي ثَاسْغَارْثْ، أَ سِيذِي، عْلَاحْسَابْ ثَاسڭْذَا إِنُو،
عْلَاحْسَابْ ڒكْمَارثْ إِ ذَايِي.
10 سْبدّْ ثُوعفّْنَا ن إِعفَّاننْ، سمْثنْ أَمْسڭّذْ،
شكْ، ونِّي إِقدْجْبنْ ؤُڒَاونْ ذ ثِيژَّاڒْ، أَ أَربِّي إِسڭّْذنْ! ▫ ▪
11 ثَاسدَّارْثْ إِنُو إِ ؤُسڒْقِي غَارْ أَربِّي،
أَمْسنْجمْ ن إِمْسڭّْمنْ ن وُوڒَاونْ.
12 أَربِّي ذ إِجّْ ن ڒْقَاضِي إِسڭّْذنْ،
إِجّْ ن أَربِّي نِّي إِسخّْضنْ كُوڒْ أَسّْ.
13 مَاڒَا نتَّا وَارْ د-إِعْقِيبْ، أَذْ إِسّقْضعْ نتَّا سِّيفْ نّسْ،
أَذْ إِمْحضْ ڒْقوْسْ نّسْ ؤُشَا أَذْ خَاسْ إِنيّشْ.
14 إِڭَّا خَاسْ ڒسْنَاحْ إِنقّنْ،
أَذْ يَارّْ فْڒِيثْشَاثْ نّسْ ذ إِصفْضَاونْ يَارقّنْ.
15 خْزَارْ، أَقَا وْضَانْ-د خَاسْ ڒوْجعْ ن ثَارُوثْ ن ڒْمُوعْصِييّثْ،
إِكْسِي دّيْسثْ ن ثَامَارَا،
ؤُشَا أَذْ يَارُو إِخَارِّيقنْ. ▪
16 إِقَّازْ إِجّْ ن وحْفُورْ ؤُشَا إِسُّودْجغْ إِ-ث،
مَاشَا ذ نتَّا س يِيخفْ نّسْ إِ إِوْضَانْ ذڭْ وحْفُورْ نِّي إِڭَّا. ▪
17 أَرْبرْ نّسْ أَذْ غَارسْ د-إِذْوڒْ أَڒْ أَزدْجِيفْ نّسْ،
ڒخْشُونثْ نّسْ أَذْ د-ثهْوَا خْ ؤُشقُّوفْ نّسْ.
18 أَذْ قَاذِيغْ سِيذِي خْ ثْسڭْذَا نّسْ،
أَذْ زهّْذغْ إِ يِيسمْ ن سِيذِي، أَمْعُودْجِي خْ كُوڒْشِي.