ڒْحَارْضْ وِيسّْ ثْنَاينْ ن إِلِيفَازْ خْ ؤُعفَّانْ
15
1 خنِّي يَارَّا-د إِلِيفَازْ، ونِّي د-يُوسِينْ زِي ثَايْمَانْ، إِنَّا: 2 مَا إِتَّارَّا-د إِجّْ ن ؤُمِيغِيسْ س ثُوسّْنَا إِخْوَانْ؟
مَا أَذْ إِشُّورْ أَعذِّيسْ نّسْ س ؤُسمِّيضْ إِ د-إِتَّاسنْ زِي مَانِيسْ د-ثْنقَّارْ ثْفُوشْثْ؟
3 مَا إِتّْشَارَّاعْ س ڒْهَارْضْ وَارْ إِنفّْعنْ،
س وَاوَاڒنْ نِّي وَارْ إِتَّاكّْوَاضنْ؟
4 شكْ مَاشَا، ثَارْژِيذْ ثِيڭّْوُوذِي ن أَربِّي،
ؤُ ثكّْسذْ ثَاژَادْجِيثْ زَّاثْ إِ وُوذمْ ن أَربِّي.
5 مَاغَارْ أَقمُّومْ نّكْ إِسَّارْڭبْ ڒْمُوعْصِييّثْ نّكْ،
أَقَا إِتّعْجِيبْ أَشْ ڒْهَارْذْ س ثْحْرَايْمشْثْ س يِيڒسْ نّكْ.
6 أَقمُّومْ نّكْ أَذْ شكْ إِحْكمْ، وَارْ إِدْجِي نشّْ،
إِينْشِيشنْ نّكْ أَذْ خَاكْ شهْذنْ.
7 مَا شكْ ذ بْنَاذمْ ذ أَمزْوَارُو نِّي د-إِتّْوَاخڒْقنْ؟
نِيغْ ثتّْوَارْوذْ-د قْبڒْ ثِيوْرِيرِينْ؟
8 مَا ثسّْحسّذْ إِ وڭْرَاوْ ن إِمْشَاوَارنْ إِمْثِيقَّانْ ن أَربِّي،
مَا ثْجبّْذذْ ثِيغِيثْ غَاركْ؟ ▪
9 مِينْ ثسّْنذْ شكْ، نشِّينْ وَارْ ث نسِّينْ؟
مِينْ ثْفهّْمذْ شكْ إِنْقسْ أَرْنغْ؟
10 ؤُڒَا جَارْ أَنغْ ذ أَمْشَايْپُو ذ ؤُوسَّارْ،
نِيثْنِي ذ إِمْغَارنْ ذڭْ وُوسَّانْ خْ بَابَاشْ. ▪
11 مَا أَسْفوّجْ ن أَربِّي ذْرُوسْ غَاركْ،
نِيغْ إِجّْ ن وَاوَاڒْ سِّيوْڒنْ ث أَكِيذكْ س ثرْغغْ؟
12 مَايمِّي شكْ إِسّثْلَاعْ وُوڒْ نّكْ،
مَايمِّي قدْجْعنْثْ ثِيطَّاوِينْ نّكْ،
13 أَقَا شكْ ثسّْنقْڒَابذْ بُوحْبڒْ نّكْ خْ أَربِّي،
أَڒَامِي ثسُّوفُّوغذْ مَارَّا أَوَاڒنْ نِّي زڭْ ؤُقمُّومْ نّكْ؟
14 مِينْ إِعْنَا بْنَاذمْ أَقَا نتَّا أَذْ يِيڒِي ذ أَمزْذَاڭْ،
ؤُ مِينْ إِعْنَا ونِّي د-إِتّْوَاخڒْقنْ زِي ثمْغَارْثْ،
أَقَا نتَّا أَذْ يِيڒِي ذ أَمْسڭّذْ؟ ▪
15 خْزَارْ، إِمْقدَّاسنْ نّسْ وَارْ خَاسنْ إِتّْشِيڒْ،
ؤُڒَا ذ إِجنْوَانْ وَارْ دْجِينْ صْفَانْ ذِي ثِيطَّاوِينْ نّسْ. ▪
16 أَهْثَاثْ عَاذْ إِجّْ ن نّْعِي ن بْنَاذمْ ذ بُو-ؤُفسَّاذْ،
ونِّي إِسسّنْ مِينْ وَارْ إِحْڒِينْ أَمْ وَامَانْ!
17 نشّْ خْسغْ أَذْ أَشْ ث سّشْنغْ، سڒْ-د غَارِي،
خنِّي أَذْ عَاوْذغْ مِينْ ژْرِيغْ،
18 مِينْ عَاوْذنْ إِمِيغِيسنْ،
ؤُشَا وَارْ ث سّْنُوفَّارنْ ن إِبَابَاثنْ نْسنْ.
19 إِ نِيثْنِي وَاهَا ؤُمِي ثمّوْشْ ثمُّورْثْ،
ؤُڒَا ذ إِجّْ ن ڒْبَارَّانِي وَارْ خَاسْ إِعْذُو.
20 مَارَّا ؤُسَّانْ إِ إِدَّارْ ؤُعفَّانْ، إِمَارّثْ إِخفْ نّسْ،
ؤُ إِتّْوَاڭّْ أَيْمِيرْ إِ ڒْقدّْ ن إِسڭّْوُوسَا إِ إِتّْوَاخمّْڒنْ إِ بُو-ڒخْشُونثْ.
21 يُوذفْ-د ڒْحسّْ ن إِغُويَّانْ إِسّْنخْڒَاعنْ غَارْ إِمزُّوغنْ نّسْ.
عَاذْ ذِي ڒْوقْثْ ن ڒهْنَا أَذْ خَاسْ إِوْضَا ؤُمْثحَّايْ. ▪
22 نتَّا وَارْ إِتّْرِيجِي أَذْ د-إِعْقبْ زِي ثَادْجسْثْ،
مَاشَا أَقَا نتَّا إِتّْوَاڭّْ إِ سِّيفْ.
23 نتَّا إِتّمْهَافَا ذَا ذ ذِيهَا خْ وغْرُومْ. ’أَ، مَانِي إِ يدْجْ؟‘
نتَّا إِسّنْ أَقَا إِتّْرَاجَا إِ-ث وَاسّْ ذ أَبَارْشَانْ ذغْيَا. ▪
24 ضِّيقثْ ذ ڒحْصَارثْ سَّاڭّْوَاذنْثْ نتَّا،
أَرْنِينْ نِيثْنِي أَمْ إِجّْ ن ؤُجدْجِيذْ إِوْجذْ إِ ؤُمنْغِي.
25 مَاغَارْ غَارْ أَربِّي إِسّْوِيژَّاضْ نتَّا أَفُوسْ نّسْ،
ؤُ أَكْ-ذ ؤُمْزمَّارْ خْ كُوڒْشِي إِمنّعْ ثَاغنَّانْثْ ثَامقّْرَانْثْ.
26 س يِيرِي إِمحْضنْ إِتَّازّڒْ غَارسْ،
س إِپُوطُوننْ إِڭْذَارنْ خْ ثْسدَّارْثْ نّسْ ن ؤُعسْكَارِي.
27 مَاغَارْ إِڒحّفْ إِ ؤُغمْپُوبْ نّسْ س ثَاذُونْثْ،
إِڭَّا ثَاذُونْثْ إِ ثجْعِينَّا نّسْ.
28 إِزدّغْ ذِي ثْندَّامْ إِتّْوَاهذْمنْ،
ؤُ ذِي ثُوذْرِينْ وَارْ ذَايْسنْثْ إِزدّغْ عَاذْ ؤُڒَا ذ إِجّنْ،
ثِينِّي يُورَانْ مَاحنْذْ أَذْ ذوْڒنْثْ ذ ڒْخِيرْبَاثْ.
29 نتَّا وَارْ إِذِّيكّْوِيڒْ ذ بُو-وَاڭْڒَا ؤُ أَڭْڒَا نّسْ وَارْ إِتّْغِيمِي،
مَاڒَا مِينْ د-إِكْسبْ وَارْ يَارنِّي خْ ثمُّورْثْ.
30 نتَّا وَارْ إِنجّمْ إِ ثَادْجسْثْ،
أَشعَّاڒْ ن ثْمسِّي أَذْ يشّْ ڒفْرُوعْ نّسْ،
أَذْ إِفْنَا س ڒعْوِينْ ن ؤُقمُّومْ نّسْ.
31 أجّْ إِ-ث وَارْ إِتّْشِيڒِي خْ مِينْ إِبضْڒنْ،
مَاغَارْ خنِّي ؤُڒَا ذ ڒْمُونثْ نّسْ أَذْ ثبْضڒْ.
32 مِينْثْڒَا وَارْ د-يُوسِي عَاذْ وَاسّْ نّسْ، أَذْ إِتّْوَاكمّڒْ،
مَاغَارْ ثَاسطَّا ن ثِينِي نّسْ وَارْ ثْزيْزِيوْ. ▪
33 أَذْ إِسّغْضڒْ أَضِيڒْ وَارْ إِسّْنذْينْ نّسْ أَمْ ثْزَايَارْثْ،
أَذْ إِمّنْضَارْ نُّووَارْ نّسْ أَمْ ثْزِيثُونْثْ. ▫
34 مَاغَارْ أَبَارُّو ن إِمْنَافْقنْ أَقَا-ث بْڒَا ڒْغِيدْجثْ،
ؤُ ثِيمسِّي ثتّتّْ إِقِيضَانْ إِ إِشُّورنْ س ڒْغشّْ. ▫
35 أَقَا أَثنْ س دّيْسثْ زِي ثَامَارَا، تُّورْونْ ڒْغشّْ،
ؤُ ڒخْذعْ أَقَا-ث ذڭْ ؤُعذِّيسْ نْسنْ. ▪