‏1 خْزَارْ، قَاعْ مَانْ أَيَا ثژْرَا إِ-ث ثِيطّْ إِنُو،

إِسْڒَا إِ-ث ؤُمزُّوغْ إِنُو، إِفْهمْ أَسْ مْلِيحْ.

‏2 مِينْ ثسّْنمْ كنِّيوْ، سّْنغْ ث ؤُڒَا ذ نشّْ،

وَارْ وطِّيغْ شَا ذڭْ ؤُسمْقُوذِّي أَكِيذْومْ.

‏3 مَاشَا نشّْ خْسغْ أَذْ سِّيوْڒغْ غَارْ ؤُمْزمَّارْ خْ كُوڒْشِي،

مژْرغْ أَذْ وْثغْ ثَامسْڒَاشْثْ إِنُو زَّاثْ إِ أَربِّي.

‏4 مَاشَا كنِّيوْ ثسُّوفُّوغمْ إِخَارِّيقنْ،

مَارَّا كنِّيوْ ذ إِضْبِيبنْ إِخْوَانْ. ^▪  

‏5 أَخْ، مْڒِي ثسّغْذمْ كنِّيوْ مَارَّا!

أَيَا أَذْ ثِيڒِي ذ ثِيغِيثْ إِ كنِّيوْ. ^▪  

‏6 سْڒمْ خنِّي مَامّشْ إِ غَا وْثغْ خْ يِيخفْ إِنُو،

حكَّارمْ خْ ؤُمْشَارَّاعْ ن إِينْشِيشنْ إِنُو!

‏7 مَا ثخْسمْ أَذْ ثِينِيمْ ڒْغشّْ إِ ڒفْضڒْ ن أَربِّي،

مَا ثخْسمْ أَذْ ثسِّيوْڒمْ إِخَارِّيقنْ ذِي ثِيزِي نّسْ؟ ^▪  

‏8 مَا ثْزمَّارمْ أَذْ ثوْثمْ ثَامسْڒَاشْثْ ذِي طّْوعْ نّسْ؟

مَا ثخْسمْ أَذْ ثْشَارّْعمْ إِ أَربِّي؟

‏9 مَا مْلِيحْ إِ كنِّيوْ مَاڒَا نتَّا أَذْ كنِّيوْ إِقدْجبْ؟

مَا ثخْسمْ أَذْ زَّايسْ ثسْثهْزَامْ

أَمْ مَامّشْ سْثهزَّانْ إِوْذَانْ زڭْ إِجّْ ن بْنَاذمْ؟

‏10 نتَّا أَذْ كنِّيوْ إِوبّخْ،

مَاڒَا كنِّيوْ ثتّڭّمْ س وُوذْمَاونْ ذِي ثْنُوفّْرَا.

‏11 مَا وَارْ كنِّيوْ إِسّْنخْڒِيعْ ؤُعُودْجِي نّسْ،

مَا وَارْ د خَاومْ ثْوطِّي ثِيڭّْوُوذِي زَّايسْ؟

‏12 أَوَاڒنْ نْومْ إِ ڒِيذَارثْ أَقَا أَثنْ ذ ڒمْثُوڒْ زِي ثْعجَّاشْثْ،

ڒڭْعُوذِي نْومْ ذ ڒڭْعُوذِي ن ؤُبدْجَاعْ.

‏13 سغْذمْ زَّاثِي، مَاحنْذْ نشّْ أَذْ سِّيوْڒغْ،

أجّْ أَذْ خَافِي د-يَاسْ مِينْ مَا د إِ غَا يَاسْ.

‏14 مَايمِّي إِ غَا طّْفغْ أَيْسُومْ ن أَرِّيمثْ إِنُو جَارْ ثغْمَاسْ إِنُو،

مَايمِّي إِ غَا طّْفغْ ثُوذَارْثْ إِنُو ذڭْ ؤُفُوسْ إِنُو؟

‏15 خْزَارْ، نتَّا إِخْسْ أَذْ أَيِي إِنغْ، نشّْ أَذْ ث رَاجِيغْ،

مَاشَا أَذْ وْثغْ خْ إِبْرِيذنْ إِنُو زَّاثسْ. ^▪  

‏16 ذ وَا إِ ذ أَيِي غَا إِذوْڒنْ ذ أَسنْجمْ،

مَاشَا أَمْنَافقْ وَارْ د-إِتِّيسْ زَّاثْ إِ ؤُغمْپُوبْ نّسْ. ^▫  

‏17 سْڒمْ مْلِيحْ غَارْ ڒْهَارْذْ إِنُو،

ؤُ س إِمزُّوغنْ يَارزْمنْ غَارْ ؤُشَارّحْ إِنُو.

‏18 خْزَارْ، نشّْ إِوْيغْ دّعْوثْ س ؤُستّفْ،

سّْنغْ أَذْ تّْوَاسڭّْذغْ.

‏19 مَانْ ونْ إِزمَّارنْ أَذْ كِيذِي إِمْشَارّْعنْ؟

خنِّي أَذْ سغْذغْ ذغْيَا، أَذْ سُّوفّْغغْ بُوحْبڒْ.

‏20 مْغِيرْ وَارْ ذ أَيِي تّڭّْ ثْنَاينْ ن ڒحْوَايجْ،

خنِّي وَارْ زَّايكْ تّْنُوفَّارِيغْ: ^▪  

‏21 أَفُوسْ نّكْ سِيڭّْوجْ إِ-ث خَافِي،

وَارْ ذ أَيِي تّسّْنخْڒِيعْ س ؤُهُوذِّي نّكْ!

‏22 ڒَاغَا شكْ، ؤُ نشّْ أَذْ خَاكْ د-أَرّغْ،

نِيغْ نشّْ أَذْ سِّيوْڒغْ ؤُ شكْ أَذْ خَافِي د-ثَارّذْ!

‏23 مشْحَاڒْ خَافِي ن ڒْمُوعْصِييّثْ ذ دّنْبْ؟

سْشنْ أَيِي أَخطُّو إِنُو ذ دّنْبْ إِنُو.

‏24 مَايمِّي ثسّْنُوفَّارذْ أَغمْپُوبْ نّكْ،

ؤُشَا ثْحسّْبذْ أَيِي ذ ڒعْذُو نّكْ؟ ^▪  

‏25 مَا ثخْسذْ أَذْ ثسّنْخڒْعذْ إِشْثْ ن ثْفَارْشْثْ إِ إِعَارّنْ ؤُصمِّيضْ سَّا غَارْ ذَا،

مَا ثخْسذْ أَذْ ثضْفَارذْ إِغدْجْ يُوژْغنْ؟

‏26 مَاغَارْ ثتَّارِيذْ خَافِي ثِيمسْڒَايِينْ ثِيمَارْزَاڭِينْ،

ؤُ ثْبطِّيذْ أَيِي دّْنُوبْ ن ثمْژِي إِنُو. ^▪  

‏27 ثسّْرُوسِيذْ إِضَارنْ إِنُو ذڭْ ؤُكشُّوضْ،

ؤُشَا ثْحطِّيذْ مَارَّا إِمسْرَاقْ إِنُو.

ثْحطِّيذْ ثِيڒقَّا ن إِضَارنْ إِنُو، ^▪  

‏28 ن ونِّي إِڭِّينْ أَمْ ؤُكشُّوضْ، شِّينْ ث إِكشَّاونْ، خنِّي يَارشَّا،

أَمْ وَارُّوضْ إِشَّا إِ-ث ثْشِينْذَا.