‏1 إِرُوحْ مُوسَا ؤُشَا إِسِّيوڒْ س وَاوَاڒنْ-أَ أَكْ-ذ مَارَّا إِسْرَائِيل، ‏2 إِنَّا أَسنْ: ”أَسّْ-أَ نشّْ غَارِي مْيَا ؤُ-عِيشْرِينْ ن إِسڭّْوُوسَا. وَارْ زمَّارغْ عَاذْ أَذْ فّْغغْ ؤُڒَا أَذْ أَذْفغْ ؤُشَا سِيذِي إِنَّا أَيِي: ’وَارْ ثْژكّْوِيذْ إِغْزَارْ-أَ ن لْ'ؤُرْذُونْ!‘ ^▪   ‏3 سِيذِي، أَربِّي نّكْ، أَذْ إِژْوَا زَّاثْ إِ وُوذمْ نّكْ. نتَّا أَذْ يَاردّدْجْ ڒڭْنُوسْ-أَ زَّاثْ إِ وُوذمْ نّكْ ؤُشَا أَذْ ثطّْفذْ ڒْوَارْثْ نْسنْ. يَاشُووَا، ذ ونِّي إِ غَا إِژْوَانْ زَّاثْ إِ وُوذمْ نّكْ، أَمْ مَامّشْ إِنَّا سِيذِي. ^▪   ‏4 سِيذِي أَذْ كِيسنْ إِڭّْ أَمْ مَامّشْ إِڭَّا أَكْ-ذ سِيحُونْ ذ عُوجْ، إِجدْجِيذنْ ن إِمُورِييّنْ، ؤُ أَكْ-ذ ثمُّورْثْ نْسنْ. نتَّا يَاردّدْجْ إِ-ثنْ. ^▪   ‏5 خْمِي ثنْ إِ غَا إِسلّمْ سِيذِي زَّاثْ إِ وُوذمْ نْومْ، أَذْ كِيسنْ ثڭّمْ عْلَاحْسَابْ مَارَّا ثَاوْصيّثْ نِّي زِي كنِّيوْ وصِّيغْ^▪   ‏6 إِڒِيمْ ذ إِرْيَازنْ ؤُ إِڒِيمْ ثْمحْضمْ، وَارْ تّڭّْوذمْ، وَارْ تَّارْجِيجّمْ شَا زَّاثْ إِ وُوذمْ نْسنْ، مِينْزِي سِيذِي، أَربِّي نّكْ، ذ ونِّي أَكِيذكْ إِڭُّورنْ. نتَّا وَارْ ذَايكْ إِسمّحْ نِيغْ شكْ إِتّجِّي.“ ^▪  

‏7 ؤُشَا مُوسَا إِڒَاغَا إِ يَاشُووَا، إِنَّا أَسْ زَّاثْ إِ ثِيطَّاوِينْ ن مَارَّا إِسْرَائِيل: ”إِڒِي ذ أَرْيَازْ ؤُ إِڒِي ثْمحْضذْ، مِينْزِي أَذْ ثَاذْفذْ أَكْ-ذ ڒْڭنْسْ-أَ غَارْ ثمُّورْثْ نِّي إِجِّيدْجْ سِيذِي إِ إِبَابَاثنْ نْسنْ أَذْ أَسنْ ت-إِ-د-إِوْشْ ؤُشَا شكْ أَذْ ثنْ ثجّذْ أَذْ ت طّْفنْ ذ ڒْوَارْثْ. ‏8 سِيذِي ذ ونِّي يُويُورنْ زَّاثْ إِ وُوذمْ نّكْ، ذ نتَّا إِ غَا يِيڒِينْ أَكِيذكْ، وَارْ شكْ إِتّتُّو شَا نِيغْ أَذْ ذَايكْ إِسْمحْ. وَارْ تّڭّْوذْ ؤُ وَارْ تَّارْجِيجِّي.“ ^▪  

‏9 يُورَا مُوسَا شَّارِيعَا أَيَا ؤُشَا إِوْشَا إِ-ت إِ إِكهَّاننْ، أَيْثْ ن لَاوِي، إِنِّي يَارْپُونْ تَّاپُوثْ ن ڒْعَاهْذْ ن سِيذِي، ؤُ إِ مَارَّا إِمْغَارنْ ن إِسْرَائِيل.

‏10 مُوسَا يُومُورْ إِ-ثنْ، إِنَّا: ”أَوَارْنِي إِ سبْعَا ن إِسڭّْوُوسَا، ذِي ڒْوقْثْ إِتّْوَاڭّنْ ن ؤُسڭّْوَاسْ ن ؤُفكِّي ن إِمرْوُوسنْ ذِي ڒْعِيذْ ن إِعُوشُّوثنْ،

‏11 خْمِي إِ غَا إِمُونْ مَارَّا إِسْرَائِيل مَاحنْذْ أَذْ إِحْضَارْ زَّاثْ إِ وُوذمْ ن سِيذِي، أَربِّي نّكْ، ذڭْ ومْشَانْ نِّي إِ غَا إِخْضَارْ نتَّا، أَذْ ثْغَارذْ س جّهْذْ شَّارِيعَا أَيَا زَّاثْ إِ مَارَّا إِسْرَائِيل ذڭْ إِمزُّوغنْ نْسنْ. ^▪  

‏12 أجّْ أَذْ إِمُونْ ڒْڭنْسْ، إِرْيَازنْ ذ ثمْغَارِينْ ذ إِحنْجِيرنْ ذ إِبَارَّانِييّنْ نِّي إِدْجَانْ غَارْ ذَاخڒْ ن ثوُّورَا نّكْ حِيمَا أَذْ سْڒنْ ؤُ حِيمَا أَذْ ڒمْذنْ أَذْ ڭّْوذنْ سِيذِي، أَربِّي نْومْ ؤُشَا أَذْ حْضَانْ مَارَّا أَوَاڒنْ ن شَّارِيعَا أَيَا

‏13 ؤُ حِيمَا إِحنْجِيرنْ نْسنْ نِّي وَارْ ت إِسِّيننْ، أَذْ سْڒنْ ؤُشَا أَذْ ڒمْذنْ أَذْ ڭّْوذنْ سِيذِي، أَربِّي نْومْ مَارَّا ؤُسَّانْ نِّي إِ غَا ثدَّارمْ خْ ثمُّورْثْ نِّي غَارْ إِ غَا ثژْوَامْ خْ لْ'ؤُرْذُونْ مَاحنْذْ أَذْ ت ثطّْفمْ ذ ڒْوَارْثْ.“

‏14 سِيذِي إِنَّا إِ مُوسَا: ”أَقَا إِوْضنْ-د وُوسَّانْ نّكْ إِ ذِي غَا ثمّْثذْ. ڒَاغَا إِ يَاشُووَا ؤُ سّْبدّمْ إِخفْ نْومْ ذڭْ ؤُقِيضُونْ ن ؤُمْسَاڭَارْ حِيمَا أَذْ ث ؤُمُورغْ.“ مُوسَا ذ يَاشُووَا رُوحنْ، بدّنْ ذڭْ ؤُقِيضُونْ ن ؤُمْسَاڭَارْ.

‏15 خنِّي إِبَانْ-د سِيذِي ذڭْ ؤُقِيضُونْ، ذڭْ إِجّْ ن ؤُقلِّيجْ ن ؤُسيْنُو، ؤُشَا إِبدّْ ؤُقلِّيجْ ن ؤُسيْنُو سنّجْ إِ وَاذَافْ ن ؤُقِيضُونْ.

‏16 سِيذِي إِنَّا إِ مُوسَا: ”أَقَا شكْ أَذْ ثتّْوَاسْمُونذْ أَكْ-ذ ڒجْذُوذْ نّكْ ؤُشَا خنِّي ڒْڭنْسْ-أَ أَذْ إِكَّارْ أَذْ إِسّفْسذْ إِخفْ نّسْ أَمْ إِ غَا يُويُورْ أَوَارْنِي إِ إِربِّيثنْ ن إِبَارَّانِييّنْ ن ثمُّورْثْ نِّي غَارْ إِ غَا يَاذفْ أَڒْ ڒْوسْثْ نّسْ ؤُشَا ڒْڭنْسْ أَذْ ذَايِي إِسْمحْ، أَذْ يَارْژْ ڒْعَاهْذْ إِنُو ونِّي كِيذْسنْ ڭِّيغْ.

‏17 ذڭْ وَاسّْ نِّي أَذْ يَارغْ وغْضَابْ إِنُو خْ ڒْڭنْسْ ؤُشَا أَذْ ثنْ جّغْ، أَذْ زَّايْسنْ فَّارغْ ؤُذمْ إِنُو ؤُشَا أَذْ إِتّْوَاصَّارْضْ ڒْڭنْسْ ؤُشَا أَذْ خَاسْ د-أَسنْ وَاطَّاسْ ن إِشڒْوَاونْ ذ ڒحْصَارَاثْ، أَڒْ غَا يِينِي ذڭْ وَاسّْ نِّي: ’مَا وَارْ خَافِي د-ؤُسِينْ إِشڒْوَاونْ-أَ، مِينْزِي أَربِّي وَارْ كِيذِي إِدْجِي؟‘ ^▫  

‏18 ذڭْ وَاسّْ نِّي أَذْ فَّارغْ ؤُذمْ إِنُو مَارَّا ذِي سِّيبّثْ ن ڒْغَارْ نِّي إِڭَّا ؤُمِي إِذْوڒْ غَارْ إِربِّيثنْ نّغْنِي.

‏19 ڒخُّو خنِّي، أَرِي ثِيزْڒِيثْ-أَ إِ يِيخفْ نْومْ ؤُشَا سڒْمذْ إِ-ت إِ أَيْثْ ن إِسْرَائِيل، أڭّْ إِ-ت ذڭْ ؤُقمُّومْ نْسنْ، حِيمَا ثِيزْڒِيثْ-أَ أَذْ ثِيڒِي ذ أَشهَّاذْ ذِي طّْوعْ إِنُو ضِيدّْ إِ إِسْرَائِيل، ‏20 مِينْزِي نشّْ أَذْ سِّيذْفغْ ڒْڭنْسْ-أَ غَارْ ثمُّورْثْ نِّي خْ جُّودْجغْ إِ إِبَابَاثنْ نْسنْ أَذْ أَسنْ ت وْشغْ، إِشْثْ ن ثمُّورْثْ نِّي إِفيّْضنْ س ؤُغِي ذ ثَامّنْثْ، ؤُشَا أَذْ شّنْ، أَذْ جِّيوْننْ، أَذْ ذوْڒنْ قْپُوبّْزنْ. خنِّي أَذْ ذوْڒنْ غَارْ إِربِّيثنْ نّغْنِي، أَذْ خَاسنْ سخَّارنْ ؤُشَا أَذْ أَيِي سّْذُوقْزنْ، أَذْ أَرْژنْ ڒْعَاهْذْ إِنُو. ‏21 ؤُشَا أَذْ إِمْسَارْ ؤُمِي ذ أَسْ د-ؤُسِينْ إِ ڒْڭنْسْ-أَ أَطَّاسْ ن إِشڒْوَاونْ ذ ڒحْصَارَاثْ، أَقَا خنِّي ثِيزْڒِيثْ-أَ أَذْ د-ثَارّْ ذڭْ وُوذمْ نّسْ أَمشْنَاوْ إِجّْ ن ؤُشهَّاذْ، مِينْزِي وَارْ ثتِّيڒِي ثتّْوَاتُّو زڭْ ؤُقمُّومْ ن ثَارْوَا نّسْ، مِينْزِي نشّْ سّْنغْ أَخَارّصْ نِّي عَاذْ إِحطَّا أَسّْ-أَ، قْبڒْ مَا أَذْ ث سِّيذْفغْ ذِي ثمُّورْثْ نِّي خْ جُّودْجغْ أَذْ أَسنْ ت وْشغْ.“ ^▫  

‏22 ذڭْ وَاسّْ نِّي، يُورَا مُوسَا ثِيزْڒِيثْ-أَ ؤُشَا إِسّڒْمذْ إِ-ت إِ أَيْثْ ن إِسْرَائِيل. ‏23 ؤُشَا نتَّا يُومُورْ إِ يَاشُووَا، مِّيسْ ن نُونْ، إِنَّا: ”إِڒِي ذ أَرْيَازْ ؤُ إِڒِي ثْمحْضذْ، مِينْزِي أَذْ ثسِّيذْفذْ أَيْثْ ن إِسْرَائِيل ذِي ثمُّورْثْ نِّي خْ ذ أَسنْ جُّودْجغْ مَاحنْذْ أَذْ أَسنْ ت وْشغْ ؤُشَا نشّْ أَذْ أَكِيذكْ إِڒِيغْ.“ ^▪  

‏24 ؤُشَا إِمْسَارْ ؤُمِي إِكمّڒْ مُوسَا ثِيرَا ن وَاوَاڒنْ ن شَّارِيعَا أَيَا ذڭْ إِجّْ ن وذْلِيسْ إِتّْوَانّْضنْ، أَڒْ أَنڭَّارْ نْسنْ، ‏25 أَقَا مُوسَا يُومُورْ إِلَاوِييّنْ نِّي يَارْپُونْ تَّاپُوثْ ن ڒْعَاهْذْ ن سِيذِي، إِنَّا: ‏26 ”كْسِيمْ أَذْلِيسْ-أَ ن شَّارِيعَا إِتّْوَانّْضنْ ؤُشَا ثڭّمْ ث زَّاثْ إِ تَّاپُوثْ ن ڒْعَاهْذْ ن سِيذِي، أَربِّي نْومْ، مَاحنْذْ أَذْ ذِينْ يِيڒِي ذ أَشهَّاذْ ضِيدّْ نْومْ، ^▪   ‏27 مِينْزِي نشّْ سّْنغْ أَغوّغْ نْومْ ذ ثْغنَّانْثْ نْومْ. خْزَارْ، ؤُمِي نشّْ دَّارغْ عَاذْ أَكِيذْومْ أَسّْ-أَ، كنِّيوْ أَقَا ثْغوّْغمْ خْ سِيذِي، مشْحَاڒْ عَاذْ كْثَارْ إِ غَا ثڭّمْ أَوَارْنِي إِ ڒْموْثْ إِنُو! ‏28 سْمُونمْ-د غَارِي مَارَّا إِمْغَارنْ ن ثْقبَّاڒْ نْومْ ذ إِوقَّافنْ نْومْ، خنِّي أَذْ سِّيوْڒغْ أَوَاڒنْ-أَ ذڭْ إِمزُّوغنْ نْسنْ ؤُشَا ڭِّيغْ خَاسنْ إِجنْوَانْ ذ ثمُّورْثْ ذ ڒشْهُوذْ ضِيدّْ نْسنْ، ‏29 مِينْزِي نشّْ سّْنغْ أَقَا أَوَارْنِي ڒْموْثْ إِنُو أَذْ ثْفسْذمْ نِيشَانْ ؤُشَا أَذْ ثفّْغمْ خْ وبْرِيذْ نِّي خْ كنِّيوْ ؤُمُورغْ. ذڭْ ؤُنڭَّارْ ن وُوسَّانْ، أَذْ ثڭّمْ ڒْغَارْ ذِي ثِيطَّاوِينْ ن سِيذِي أَڒْ غَا ث ثسْعَارمْ س ڒْخذْمثْ إِ ثڭِّيمْ س إِفَاسّنْ نْومْ.“

‏30 خنِّي إِسِّيوڒْ مُوسَا ذڭْ إِمزُّوغنْ ن مَارَّا أَڭْرَاوْ ن ڒْڭنْسْ ن إِسْرَائِيل س وَاوَاڒنْ ن ثِيزْڒِيثْ-أَ أَڒَامِي ثنْ إِكمّڒْ.