‏1 ”خْمِي خَاكْ إِ-د غَا يَاسنْثْ مَارَّا ثْمسْڒَايِينْ-أَ، لْبَارَاكَا ذ نّعْڒثْ نِّي ڭِّيغْ زَّاثكْ، ؤُشَا أَذْ ثنْثْ ثَارّذْ غَارْ وُوڒْ نّكْ جَارْ مَارَّا ڒڭْنُوسْ غَارْ مَانِي سِيذِي، أَربِّي نّكْ، خَاكْ يُوژّڒْ، ‏2 ؤُشَا أَذْ ثْعقْبذْ غَارْ سِيذِي، أَربِّي نّكْ، أَذْ ثسْڒذْ إِ ثْمِيجَّا نّسْ س مَارَّا ؤُڒْ نّكْ ؤُ س مَارَّا ڒعْمَارْ نّكْ أَنشْثْ ن مَارَّا مِينْ خْ شكْ ؤُمُورغْ أَسّْ-أَ، شكْ جْمِيعْ أَكْ-ذ إِحنْجِيرنْ نّكْ، ‏3 خنِّي سِيذِي، أَربِّي نّكْ، أَذْ إِبْضڒْ أَحبّسْ نّكْ ؤُشَا أَذْ خَاكْ يَارْحمْ ؤُشَا أَذْ شكْ إِسّْمُونْ زِي جَارْ مَارَّا ڒڭْنُوسْ غَارْ مَانِي شكْ إِبزّعْ سِيذِي، أَربِّي نّكْ. ^▪   ‏4 وَاخَّا إِنِّي خْ يُوژّْڒنْ زَّايكْ ثُوغَا أَثنْ غَارْ ؤُنڭَّارُو ن ؤُجنَّا، أَقَا سِيذِي، أَربِّي نّكْ، أَذْ شكْ إِسّْمُونْ ؤُشَا أَذْ شكْ إِنْذهْ سّنِّي. ^▪   ‏5 سِيذِي، أَربِّي نّكْ، أَذْ شكْ إِسِّيذفْ غَارْ ثمُّورْثْ نِّي وَارْثنْ إِبَابَاثنْ نّكْ ؤُشَا أَذْ ت ثكْسِيذْ عَاوذْ ذ ڒْوَارْثْ. نتَّا أَذْ ذَايكْ إِڭّْ ثْشُونِي ؤُ أَذْ ذَايكْ يَارْنِي عَاذْ كْثَارْ زِي إِبَابَاثنْ نّكْ. ‏6 سِيذِي، أَربِّي نّكْ، أَذْ إِخْثنْ ؤُڒْ نّكْ ذ وُوڒْ ن ثَارْوَا نّكْ حِيمَا أَذْ ثخْسذْ سِيذِي، أَربِّي نّكْ، س مَارَّا ؤُڒْ نّكْ ذ مَارَّا ڒعْمَارْ نّكْ، حِيمَا أَذْ ثدَّارذْ.^▪   ‏7 سِيذِي، أَربِّي نّكْ، أَذْ يَارّْ مَارَّا نّْعَاڒِي نِّي خْ ڒْعذْيَانْ نّكْ ذ خْ ينِّي شكْ إِشَارّْهنْ، إِنِّي خَاكْ د-إِذَارّْشنْ عَاوذْ. ‏8 أَذْ ثْعقْبذْ، أَذْ ثسْڒذْ إِ ثْمِيجَّا ن سِيذِي ؤُشَا أَذْ ثڭّذْ مَارَّا ڒُومُورَاثْ نِّي خْ ذ أَشْ تُّومُورغْ أَسّْ-أَ. ‏9 سِيذِي، أَربِّي نّكْ، أَذْ أَشْ إِوْشْ أَفيّضْ ذِي مَارَّا ڒْخذْمثْ ن إِفَاسّنْ نّكْ، ذِي ڒْغِيدْجثْ ن ؤُعذِّيسْ نّكْ، ذِي ڒْغِيدْجثْ ن ڒبْهَايمْ نّكْ ؤُ ذِي ڒْغِيدْجثْ ن ثمُّورْثْ نّكْ، أَيَا أَذْ يِيڒِي إِ ڒْخَارْ نّكْ، مِينْزِي سِيذِي أَذْ إِعْقبْ حِيمَا أَذْ زَّايكْ إِفَارْحْ إِ ڒْخَارْ نّكْ، أَمْ مَامّشْ ثُوغَا إِفَارْحْ إِ إِبَابَاثنْ نّكْ، ^▪  

‏10 خْمِي إِ غَا ثسْڒذْ إِ ثْمِيجَّا ن سِيذِي، أَربِّي نّكْ حِيمَا أَذْ ثحْضِيذْ ڒُومُورَاثْ نّسْ ذ ثْوصَّا نّسْ نِّي يُورِينْ ذڭْ وذْلِيسْ-أَ إِتّْوَانّْضنْ ن شَّارِيعَا ؤُشَا خْمِي د غَا ثْذوْڒذْ غَارْ سِيذِي، أَربِّي نّكْ، س مَارَّا ؤُڒْ نّكْ، س مَارَّا ڒعْمَارْ نّكْ.

‏11 مِينْزِي ڒُومُورْ-أَ إِ خْ شكْ تُّومُورغْ نشّْ أَسّْ-أَ، وَارْ إِدْجِي يُوعْڒَا خَاكْ ؤُڒَا وَارْ إِڭّْوِيجْ شَا.

‏12 وَارْ إِدْجِي ذڭْ ؤُجنَّا، حِيمَا أَذْ ثِينِيذْ: ’وِي إِ غَا إِڭعّْذنْ غَارْ ؤُجنَّا ذِي طّْوعْ نّغْ حِيمَا أَذْ أَنغْ ث-إِ-د يَاوِي إِ نشِّينْ ؤُشَا أَذْ أَسْ نْسڒْ حِيمَا أَذْ نْزمَّارْ أَذْ زَّايسْ نڭّْ؟‘ ^▪  

‏13 وَارْ إِدْجِي خْ ؤُجمَّاضْ ن ڒبْحَارْ، أَڒَامِي إِ غَا ثْزمَّارذْ أَذْ ثِينِيذْ: ’وِي إِ غَا إِژْوَانْ غَارْ ؤُجمَّاضْ ن ڒبْحَارْ حِيمَا أَذْ أَنغْ ث-إِ-د يَاوِي إِ نشِّينْ ؤُشَا أَذْ أَسْ نْسڒْ حِيمَا أَذْ نْزمَّارْ أَذْ زَّايسْ نڭّْ؟‘

‏14 مِينْزِي أَوَاڒْ-أَ يُوذسْ إِ شكْ أَطَّاسْ، أَقَا-ث ذڭْ ؤُقمُّومْ نّكْ، أَقَا-ث ذڭْ وُوڒْ نّكْ، حِيمَا أَذْ زَّايسْ ثڭّذْ.

‏15 خْزَارْ، نشّْ ڭِّيغْ زَّاثكْ أَسّْ-أَ ثُوذَارْثْ ذ ڒْخَارْ ؤُڒَا ذ ڒْموْثْ ذ ڒْغَارْ،

‏16 مِينْزِي نشّْ تُّومُورغْ شكْ أَسّْ-أَ حِيمَا أَذْ ثخْسذْ سِيذِي، أَربِّي نّكْ، أَذْ ثُويُورذْ ذڭْ إِبْرِيذنْ نّسْ ؤُشَا أَذْ ثحْضِيذْ ڒُومُورَاثْ نّسْ ذ ثْوصَّا نّسْ ذ لْفَارَايِيضْ نّسْ مَاحنْذْ أَذْ ثدَّارذْ ؤُ أَذْ ثتّْوَامَّارْنِيذْ، ؤُشَا سِيذِي، أَربِّي نّكْ، أَذْ أَشْ إِبَاركْ ذِي ثمُّورْثْ نِّي غَارْ إِ غَا ثَاذْفذْ حِيمَا أَذْ ت ثطّْفذْ ذ ڒْوَارْثْ.

‏17 مَاشَا مَاڒَا ؤُڒْ نّكْ إِتَّاڭّْوجْ ؤُشَا وَارْ ثتّسْڒِيذْ ؤُشَا أَذْ ثتّْوَاسُوفّْغذْ زڭْ وبْرِيذْ، أَذْ ثُوضَارذْ زَّاثْ إِ إِربِّيثنْ نّغْنِي ؤُشَا أَذْ أَسنْ ثْسخَّارذْ،

‏18 خنِّي نشّْ تّْبَارّْحغْ أَومْ أَسّْ-أَ بلِّي س ثِيذتّْ أَذْ ثمّْثمْ. وَارْ ثَارنّْيذْ شَا ؤُسَّانْ نّكْ خْ ثمُّورْثْ مَانِي إِ غَا ثَاذْفذْ أَوَارْنِي ڒَامِي ثژْوِيذْ لْ'ؤُرْذُونْ، حِيمَا أَذْ ت ثطّْفذْ ذ ڒْوَارْثْ.

‏19 أَسّْ-أَ نشّْ ڒَاغِيغْ إِ ؤُجنَّا ذ ثمُّورْثْ ذ ڒشْهُوذْ خَاومْ: ڭِّيغْ زَّاثكْ ثُوذَارْثْ ذ ڒْموْثْ، لْبَارَاكَا ذ نّعْڒثْ! إِخْضَارْ خنِّي ثُوذَارْثْ، حِيمَا أَذْ ثدَّارذْ، شكْ ذ زَّارِيعثْ نّكْ، ^▪   ‏20 مَاحنْذْ أَذْ ثخْسذْ سِيذِي، أَربِّي نّكْ، ؤُشَا أَذْ ثسْڒذْ إِ ثْمِيجَّا نّسْ، أَذْ أَسْ ثْڒصْقذْ، مِينْزِي نتَّا ذ ثُوذَارْثْ نّكْ ؤُڒَا ذ ثُوزّڭَارْثْ ن وُوسَّانْ نّكْ، حِيمَا أَذْ ثْزمَّارذْ أَذْ ثْزذْغذْ خْ ثمُّورْثْ نِّي خْ إِجِّيدْجْ سِيذِي إِ إِبَابَاثنْ نّكْ أَذْ أَسنْ ت-إِ-د-إِوْشْ، إِ إِبْرَاهِيمْ ذ إِسْحَاقْ ذ يَاعْقُوبْ.“