‏1 إِڒَاغَا-د مُوسَا خْ مَارَّا إِسْرَائِيل، إِنَّا أَسنْ: ”كنِّيوْ أَقَا ثژْرِيمْ مَارَّا مِينْ إِڭَّا سِيذِي ذِي ثمُّورْثْ ن مِيصْرَا زَّاثْ إِ ثِيطَّاوِينْ نْومْ ذِي فِيرْعُونْ ذ مَارَّا إِمْسخَّارنْ نّسْ ذ مَارَّا ثمُّورْثْ نّسْ، ^▪   ‏2 ثِيقدْجُوبَا ثِيمقّْرَانِينْ، ثِينِّي ثژْرِيمْ س ثِيطَّاوِينْ نّكْ، ڒعْڒَامَاثْ ذ لْمُوعْجِيزَاثْ نِّي إِمْغَارنْ. ^▪   ‏3 أَڒْ أَسّْ-أَ سِيذِي وَارْ ذ أَومْ إِوْشِي ؤُڒْ حِيمَا أَذْ ثْفهْممْ ؤُڒَا ذ ثِيطَّاوِينْ حِيمَا أَذْ ثْژَارمْ ؤُڒَا ذ إِمزُّوغنْ حِيمَا أَذْ ثسْڒمْ. ‏4 ؤُيُورغْ أَكِيذْومْ ذِي ڒخْڒَا أَربْعِينْ ن إِسڭّْوُوسَا. أَرُّوضْ نْومْ وَارْ إِذْوِيڒْ ذ ڒْبَاڒِي ؤُ ثِيسِيڒَا نْومْ وَارْ دُّويْسَارنْثْ خْ إِضَارنْ نْومْ. ‏5 وَارْ ثشِّيمْ أَغْرُومْ، وَارْ ثسْوِيمْ بِينُو ؤُڒَا ذ شّْرَابْ، حِيمَا أَذْ ثسّْنمْ بلِّي نشّْ ذ سِيذِي، أَربِّي نْومْ.

‏6 ڒَامِي ثْرحّْڭمْ غَارْ ومْشَانْ-أَ، إِفّغْ-د سِيحُونْ، أَجدْجِيذْ ن حَاشْپُونْ، أَكْ-ذ عُوجْ، أَجدْجِيذْ ن بَاشَانْ، حِيمَا أَذْ كِيذْنغْ إِمْسَاڭَارْ إِ ؤُمنْغِي ؤُشَا نغْڒبْ إِ-ثنْ ^▪   ‏7 ؤُشَا نطّفْ ثَامُّورْثْ نّسْ ؤُشَا نوْشْ إِ-ت ذ ڒْوَارْثْ إِ إِرُوبِينِييّنْ ذ إِجَاذِييّنْ ؤُ إِ وزْينْ ن ثقْبِيتْشْ ن مَانَاسَّا. ^▪  

‏8 حْضَامْ أَوَاڒنْ ن ڒْعَاهْذْ-أَ، ثڭّمْ ثنْ، حِيمَا أَذْ ثَاوْضمْ س ڒعْقڒْ غَارْ مَارَّا مِينْ غَا ثڭّمْ. ‏9 أَسّْ-أَ مَارَّا كنِّيوْ ثْبدّمْ زَّاثْ إِ وُوذمْ ن سِيذِي، أَربِّي نْومْ - إِزدْجِيفنْ ن ثْقبَّاڒْ نْومْ ذ إِمْغَارنْ نْومْ ذ إِوقَّافنْ نْومْ، مَارَّا إِرْيَازنْ ن إِسْرَائِيل،

‏10 ذ إِمژْيَاننْ نْومْ، ذ ثمْغَارِينْ نْومْ، ذ إِبَارَّانِييّنْ نِّي إِزدّْغنْ ذِي ڒْوسْثْ ن ڒْمَارْڭحْ ن ڒْعسْكَارْ نْومْ - زڭْ ونِّي إِتّْقسّنْ أَكشُّوضْ أَڒْ وِي إِ ذ إِتَّايْمنْ أَمَانْ -

‏11 حِيمَا أَذْ ثَاذْفمْ غَارْ ڒْعَاهْذْ ن سِيذِي، أَربِّي نّكْ، ؤُ غَارْ ثْجَادْجِيثْ نّسْ، ثنِّي أَذْ كِيكْ إِوْثَا سِيذِي، أَربِّي نّكْ، أَسّْ-أَ،

‏12 حِيمَا أَذْ أَشْ يڭّْ أَسّْ-أَ أَذْ ثكَّارذْ أَمشْنَاوْ ڒْڭنْسْ نّسْ ؤُشَا نتَّا أَذْ أَشْ يِيڒِي ذ أَربِّي، أَمْ مَامّشْ إِ ذ أَشْ إِنَّا ؤُ أَمْ مَامّشْ إِجِّيدْجْ إِ ڒجْذُوذْ نّكْ إِبْرَاهِيمْ ذ إِسْحَاقْ ذ يَاعْقُوبْ. ^▪  

‏13 مَاشِي كِيومْ وَاهَا إِ غَا ڭّغْ ڒْعَاهْذْ-أَ ذ ثْجَادْجِيثْ-أَ،

‏14 مَاشَا أَكْ-ذ ينِّي ذَا غَارْنغْ إِحْضَارنْ أَسّْ-أَ زَّاثْ إِ وُوذمْ ن سِيذِي، أَربِّي نّغْ، أَمْ أَكْ-ذ ينِّي وَارْ ذَا غَارْنغْ إِدْجِينْ أَسّْ-أَ.

‏15 مِينْزِي كنِّيوْ ثسّْنمْ مَامّشْ ثُوغَا نْزدّغْ ذِي ثمُّورْثْ ن مِيصْرَا ؤُ مَامّشْ نژْوَا ذِي ڒْوسْثْ ن ڒڭْنُوسْ نِّي خْ د-ثكّمْ ؤُڒَا ذ كنِّيوْ،

‏16 ؤُشَا ثژْرِيمْ نّْعَاوَاثْ نْسنْ ن صَّانَامْ ذ إِميْضَا ن لْ-أَصْنَامْ نْسنْ ن وژْرُو ذ ؤُكشُّوضْ ذ نُّوقَارْثْ ذ وُورغْ، نِّي غَارْسنْ.

‏17 وَارْ إِتِّيڒِي جَارْ أَومْ أَرْيَازْ نِيغْ ثَامْغَارْثْ نِيغْ ڒَادْجْ نِيغْ ثَاقْبِيتْشْ نِّي ؤُڒْ نّسْ أَذْ يَاڭّْوجْ أَسّْ-أَ خْ سِيذِي، أَربِّي نْومْ، حِيمَا أَذْ إِسخَّارْ إِ إِربِّيثنْ ن ڒڭْنُوسْ نِّي ؤُ وَارْ إِتِّيڒِي جَارْ أَومْ أَژْوَارْ نِّي إِ غَا إِتَّارْونْ أَفْيُومْ نِيغْ شِّيحْ، ^▪  

‏18 ؤُشَا أَذْ إِمْسَارْ، ؤُمِي غَا إِسڒْ أَوَاڒنْ ن نّعْڒثْ-أَ، أَقَا نتَّا أَذْ إِسڭّمْ إِخفْ نّسْ ذڭْ وُوڒْ نّسْ، أَذْ يِينِي: ’أَذْ غَارِي يِيڒِي ڒهْنَا، وَاخَّا ڭُّورغْ ذِي ڒقْسَاحثْ ن وُوڒْ إِنُو، أَڒْ إِ غَا إِهلّكْ مِينْ إِسُّونْ أَكْ-ذ مِينْ إِفُّوذنْ.‘

‏19 سِيذِي وَارْ ذ أَسْ إِسمّحْ، مَاشَا أَغْضَابْ ن سِيذِي ذ ثُوسْمِي نّسْ أَذْ دُّوخّْننْ ذڭْ ورْيَازْ نِّي، ؤُ مَارَّا نّعْڒثْ نِّي يُورِينْ ذڭْ وذْلِيسْ-أَ إِتّْوَانّْضنْ أَذْ خَاسْ ثِيڒِي ؤُشَا سِيذِي أَذْ إِمْحَا إِسمْ نّسْ زِي سَاذُو ؤُجنَّا. ‏20 سِيذِي أَذْ ث إِحُوزْ خْ مَارَّا ثِيقبَّاڒْ ن إِسْرَائِيل إِ ڒْغَارْ، عْلَاحْسَابْ مَارَّا نّْعَاڒِي ن ڒْعَاهْذْ نِّي يُورِينْ ذڭْ وذْلِيسْ-أَ إِتّْوَانّْضنْ ن شَّارِيعَا أَيَا. ‏21 خنِّي جِّيڒْ إِ د غَا يَاسنْ، إِحنْجِيرنْ نْومْ نِّي إِ غَا إِڭعّْذنْ أَوَارْنِي أَومْ ذ ؤُبَارَّانِي نِّي إِ د غَا يَاسنْ زڭْ إِشْثْ ن ثمُّورْثْ ثِيڭّْوجْ، أَذْ إِنِينْ خْمِي إِ غَا ژَترنْ جّْرَايحْ ن ثمُّورْثْ-أَ ذ ڒهْڒَاشَاثْ إِ زِي إِسّهْڒشْ سِيذِي ثَامُّورْثْ: ‏22 ’ڒشْبَارِييّثْ ذ ثْمدْجَاحْثْ، أَقَا ثشْمضْ مَارَّا ثَامُّورْثْ، وَارْ تِّيڒِي ثتّْوَاژُّو نِيغْ ثسّْغمِّي عَاذْ ؤُ وَارْ ثسّْڭِيعِّيذْ أَفْسُو أَزِيزَا، أَمْ مَامّشْ إِمْسَارْ ذڭْ ؤُنقْڒبْ ن سَاذُومْ ذ عَامُورَّا ذ أَذْمَا ذ صَاپُويِيمْ نِّي إِسّْنقْڒبْ سِيذِي ذڭْ وغْضَابْ نّسْ ذ وسْعَارْ نّسْ!‘ ‏23 ؤُشَا عَاوذْ مَارَّا ڒڭْنُوسْ أَذْ إِنِينْ: ’مَايمِّي إِڭَّا سِيذِي مَانْ أَيَا إِ ثمُّورْثْ-أَ؟ مَانَا ڒْحَاذُوقْ ن وغْضَابْ-أَ إِمْغَارنْ؟‘^▪   ‏24 خنِّي أَذْ أَرّنْ: ’مِينْزِي نِيثْنِي جِّينْ ڒْعَاهْذْ ن سِيذِي، أَربِّي ن إِبَابَاثنْ نْسنْ، ڒْعَاهْذْ نِّي قّْننْ أَكِيذسْ ؤُمِي ثنْ د-إِسُّوفّغْ زِي ثمُّورْثْ ن مِيصْرَا. ‏25 ؤُيُورنْ سخَّارنْ إِ إِربِّيثنْ نّغْنِي ؤُشَا ؤُضَارنْ غَارْسنْ، إِ إِربِّيثنْ نِّي وَارْ سِّيننْ نِيثْنِي، وَارْ ذ أَسنْ ثنْثْ-إِ-د-إِوْشِي نتَّا. ‏26 أَغْضَابْ ن سِيذِي يَارْغَا خْ ثمُّورْثْ-أَ مَاحنْذْ أَذْ غَارسْ إِنْذهْ مَارَّا نّعْڒثْ نِّي يُورِينْ ذڭْ وذْلِيسْ-أَ إِتّْوَانّْضنْ. ‏27 سِيذِي إِقْڒعْ إِ-ثنْ زِي ثمُّورْثْ ذڭْ وغْضَابْ ذ وسْعَارْ ذ ؤُذُوقّزْ ن وغْضَابْ إِمْغَارْ ؤُشَا إِنْضَارْ إِ-ثنْ غَارْ ثمُّورْثْ نّغْنِي، أَمْ ثدْجْ أَسّْ-أَ.‘ ‏28 ثِيمسْڒَايِينْ إِنُّوفَارنْ أَقَا ثنْثْ إِ سِيذِي، أَربِّي نّغْ، مَاشَا ثِيمسْڒَايِينْ تّْوَاسَارڭْبنْثْ أَقَا ثنْثْ إِ نشِّينْ ؤُ إِ إِحنْجِيرنْ نّغْ إِ ڒبْذَا، مَاحنْذْ أَذْ تّْوَاڭّنْ مَارَّا أَوَاڒنْ ن شَّارِيعَا أَيَا.“