‏1 ”أَذْ إِمْسَارْ، مَاڒَا ثسْڒِيذْ مْلِيحْ إِ ثْمِيجَّا ن سِيذِي، أَربِّي نّكْ، أَذْ ثحْضِيذْ مَارَّا ثِيوصَّا نّسْ نِّي خْ ذ أَشْ تُّومُورغْ أَسّْ-أَ حِيمَا أَذْ ثنْثْ ثڭّذْ، خنِّي أَذْ شكْ إِسُّوعْڒَا سِيذِي، أَربِّي نّكْ، خْ مَارَّا ڒڭْنُوسْ ن ثمُّورْثْ. ^▪   ‏2 مَارَّا لْبَارَاكَاثْ-أَذْ خَاكْ د-أَسنْثْ، أَذْ أَشْ-د أَوْضنْثْ، مَاڒَا ثسْڒِيذْ إِ ثْمِيجَّا ن سِيذِي، أَربِّي نّكْ.

‏3 أَذْ ثتّْوَابَارْكذْ ذِي ثنْذِينْثْ ؤُ أَذْ ثتّْوَابَارْكذْ ذڭْ إِيَّارْ.

‏4 أَذْ ثتّْوَابَاركْ ڒْغِيدْجثْ ن ؤُعذِّيسْ نّكْ ذ ڒْغِيدْجثْ ن ثمُّورْثْ نّكْ ذ ڒْغِيدْجثْ ن ڒبْهَايمْ نّكْ ذ ثْوَارُورَا ن ثْفُونَاسِينْ نّكْ ذ إِمژْيَاننْ ن وُودْجِي نّكْ.

‏5 أَذْ ثتّْوَابَاركْ ثْسُودْجثْ نّكْ ذ ثبْقشْثْ نّكْ.

‏6 أَذْ ثتّْوَابَارْكذْ غَارْ وَاذَافْ نّكْ، أَذْ ثتّْوَابَارْكذْ ذڭْ وُوفُّوغْ نّكْ.

‏7 سِيذِي أَذْ إِسلّمْ ڒْعذْيَانْ نّكْ نِّي خَاكْ إِ غَا إِكَّارنْ ذ إِبَارْحَاضْ زَّاثْ إِ وُوذمْ نّكْ. أَذْ خَاكْ د-فّْغنْ ذڭْ وبْرِيذْ ذ إِجّْ ؤُشَا أَذْ أَروْڒنْ زَّاثْ إِ وُوذمْ نّكْ خْ سبْعَا ن إِبْرِيذنْ.

‏8 سِيذِي أَذْ أَشْ يُومُورْ س لْبَارَاكَا ذِي ثسْرَافِينْ نّكْ ؤُ خْ مَارَّا مِينْ إِڭَّا ؤُفُوسْ نّكْ. نتَّا أَذْ شكْ إِبَاركْ ذِي ثمُّورْثْ نِّي ذ أَشْ إِ غَا إِوْشْ سِيذِي، أَربِّي نّكْ.

‏9 سِيذِي أَذْ شكْ يَارّْ أَذْ ثكَّارذْ أَمْ إِجّْ ن ڒْڭنْسْ إِقدّْسنْ إِ يِيخفْ نّسْ أَمْ مَامّشْ إِ ذ أَشْ إِجِّيدْجْ، خْمِي إِ غَا ثحْضِيذْ ثِيوصَّا ن سِيذِي، أَربِّي نّكْ، ؤُشَا أَذْ ثُويُورذْ ذڭْ إِبْرِيذنْ نّسْ.

‏10 مَارَّا ڒڭْنُوسْ ن ثمُّورْثْ أَذْ ژَترنْ بلِّي إِسمْ ن سِيذِي إِتّْوَاذنَّا خَاكْ ؤُشَا أَذْ زَّايكْ ڭّْوذنْ.

‏11 سِيذِي أَذْ أَشْ إِوْشْ ڒْخَارْ س ؤُفيّضْ ذِي ڒْغِيدْجثْ ن ؤُعذِّيسْ نّكْ ؤُ ذِي ڒْغِيدْجثْ ن ڒبْهَايمْ نّكْ ؤُ ذِي ڒْغِيدْجثْ ن ثمُّورْثْ نّكْ، ذِي ثمُّورْثْ نِّي إِجِّيدْجْ سِيذِي أَذْ أَشْ ت-إِ-د-إِوْشْ. ^▪  

‏12 سِيذِي أَذْ أَشْ يَارْزمْ ثَاوَّارْثْ ن وخَّامْ ن ثْخُوبَايْ إِصڒْحنْ، إِجنْوَانْ، حِيمَا أَذْ إِوْشْ أَنْژَارْ إِ ثمُّورْثْ نّكْ ذِي ڒْوقْثْ نّسْ ؤُ حِيمَا أَذْ إِبَاركْ مَارَّا ڒْخذْمثْ ن ؤُفُوسْ نّكْ. أَذْ ثَارْضْڒذْ إِ وَاطَّاسْ ن ڒڭْنُوسْ، مَاشَا شكْ وَارْ خَاسنْ أَرطّڒْ.

‏13 سِيذِي أَذْ شكْ يَارّْ ذ أَزدْجِيفْ، وَارْ إِدْجِي ذ ؤُنوَّارْ، ؤُشَا شكْ وَاهَا أَذْ ثِيڒِيذْ سنّجْ، وَارْ ثتِّيڒِيذْ سْوَادَّايْ، مَاڒَا ثسْڒِيذْ إِ ثْوصَّا ن سِيذِي، أَربِّي نّكْ، نِّي إِ ذ أَشْ تُّومُورغْ أَسّْ-أَ حِيمَا أَذْ ثنْثْ ثحْضِيذْ ؤُشَا أَذْ زَّايْسنْثْ ثڭّذْ.

‏14 وَارْ تّْحيِّيذْ شَا غَارْ يفُّوسْ ؤُڒَا غَارْ ؤُزڒْمَاضْ خْ مَارَّا أَوَاڒنْ نِّي ذ أَشْ ؤُمُورغْ أَسّْ-أَ أَڒَامِي إِ غَا ثضْفَارذْ إِربِّيثنْ نّغْنِي، أَذْ خَاسنْ ثْسخَّارذْ.

‏15 مَاشَا أَذْ إِمْسَارْ، مَاڒَا وَارْ ثسْڒِيذْ إِ وَاوَاڒْ ن سِيذِي، أَربِّي نّكْ، حِيمَا أَذْ ثحْضِيذْ مَارَّا ڒُومُورَاثْ ذ ثْوصَّا نّسْ إِ خْ ذ أَشْ تُّومُورغْ أَسّْ-أَ، حِيمَا أَذْ زَّايْسنْثْ ثڭّذْ، خنِّي مَارَّا نّْعَاڒِي أَيَا أَذْ خَاكْ د-هْوَانْثْ ؤُ أَذْ شكْ ڒقْفنْثْ. ^▪  

‏16 أَذْ ثِيڒِيذْ ذ أَمنْعُوڒْ ذِي ثنْذِينْثْ ؤُ أَذْ ثِيڒِيذْ ذ أَمنْعُوڒْ ذڭْ إِيَّارْ.

‏17 ثَاسُودْجثْ نّكْ ذ ثبْقشْثْ نّكْ أَذْ إِڒِينْثْ تّْوَانعْڒنْثْ.

‏18 ذ ثَامنْعُوڒْثْ إِ غَا ثِيڒِي ڒْغِيدْجثْ ن ؤُعذِّيسْ نّكْ ذ ڒْغِيدْجثْ ن ثمُّورْثْ نّكْ ؤُ ثْوَارُورَا ن ثْفُونَاسِينْ نّكْ ذ ؤُمَارْنِي ن وُودْجِي نّكْ.

‏19 أَذْ ثِيڒِيذْ ذ أَمنْعُوڒْ غَارْ وَاذَافْ نّكْ ؤُ أَذْ ثِيڒِيذْ ذ أَمنْعُوڒْ ذڭْ ؤُفُّوغْ نّكْ.

‏20 أَذْ أَشْ د-إِسّكّْ سِيذِي نّعْڒثْ ذ ؤُخَارْوضْ ذ ؤُهذِّي غَارْ مَارَّا مَانِي إِسّْوِيژّذْ ؤُفُوسْ نّكْ، أَڒْ غَا ثتّْوَامْحِيذْ ؤُ أَذْ ثفْنِيذْ ذغْيَا زَّاثْ إِ وُوذمْ إِنُو ذِي سِّيبّثْ ن ڒخْذَايمْ نّكْ ثِيعفَّانِينْ ثِينِّي خْ ذ أَيِي ثجِّيذْ. ‏21 سِيذِي أَذْ ذَايكْ إِسّڒْصقْ طَّاعُونْ أَڒْ شكْ إِ غَا إِقْضَا زِي ثمُّورْثْ نِّي غَارْ إِ غَا ثَاذْفذْ حِيمَا أَذْ ت ثكْسِيذْ ذ ڒْوَارْثْ.

‏22 سِيذِي أَذْ شكْ إِوّثْ س بُو-ذدْجِيسْ، س ثْمسِّي ن أَرْوَاحْ ذ ؤُڭيّحْ، س ڒحْمُو ذ ڒَاژَاغْ، س إِمنْذِي إِتّْوَاسْشمْضنْ زڭْ ؤُسمِّيضْ ؤُڒَا ذ جّْرِيحشْثْ ن ثْشجَّارْثْ. إِنَا أَذْ شكْ ضْفَارنْ أَڒْ غَا ثْهلّْكذْ. ^▪   ‏23 أَجنَّا نِّي إِدْجَانْ ثِيوَا إِ ؤُزدْجِيفْ نّكْ أَذْ يِيڒِي ذ نّْحَاسْ ؤُ ثَامُّورْثْ نِّي إِدْجَانْ سَاذُو نّكْ ذ ؤُزَّاڒْ. ^▪  

‏24 أَذْ يَارّْ سِيذِي، أَربِّي نّكْ، أَنْژَارْ ن ثمُّورْثْ نّكْ ذ إِجّْ ن ؤُسيْنُو ن ڒعْجَاجْ ذ إِبْقُوقنْ ن ڒعْجَاجْ. مَانْ أَيَا أَذْ خَاكْ د-إِهْوَا أَڒْ غَا ثتّْوَاثحِّيذْ.

‏25 سِيذِي أَذْ شكْ يَارّْ ثتّْوَاغڒْبذْ زَّاثْ إِ وُوذمْ ن ڒْعذْيَانْ نّكْ. ذڭْ إِجّْ ن وبْرِيذْ أَذْ غَارسْ د-ثفّْغذْ ؤُشَا أَذْ ثَاروْڒذْ زَّاثْ إِ وُوذمْ نّسْ خْ سبْعَا ن إِبْرِيذنْ ؤُشَا مَارَّا ثِيڭلْذِيوِينْ ن دُّونشْثْ أَذْ خَاكْ أَژّْرنْثْ. ‏26 ڒْخشْبثْ نّكْ أَذْ ثِيڒِي ذ مَاشَّا إِ إِجْضَاضْ ن ؤُجنَّا ؤُ إِ مَارَّا ڒْمَاڒْ خْ ثمُّورْثْ ؤُشَا ؤُڒَا ذ إِجّْ وَارْ إِزمَّارْ أَذْ ثنْ إِسِّيڭّْوذْ.

‏27 سِيذِي أَذْ شكْ إِوّثْ س ثْحبَّا ن مِيصْرَا، س إِعبُّوزنْ، س جْذَامْ، س وَاجِّيضْ أَڒْ غَا ثَافْ وَارْ ثْزمَّارذْ أَذْ ثڭّنْفِيذْ. ^▪  

‏28 سِيذِي أَذْ شكْ إِوّثْ س ثُوبُّوهڒْيَا، س ثُودَّارْغتْشْ ؤُ س أَرْجفْ ن وُوڒْ. ‏29 ذڭْ وزْينْ ن ؤُزِيڒْ أَذْ ثْحَاذِيذْ أَمشْنَاوْ أَحَاذِي ن ؤُذَارْغَاڒْ ذِي ثَادْجسْثْ. إِبْرِيذنْ نّكْ وَارْ تِّيڒِينْ صڒْحنْ، وَاهْ، أَذْ ثِيڒِيذْ ثتّْوَاحْصَارذْ ؤُ ثتّْوَاكشّْضذْ مَارَّا ؤُسَّانْ ن ثُوذَارْثْ نّكْ ؤُشَا وَارْ إِتِّيڒِي وِي شكْ إِ غَا إِسّنْجْمنْ.

‏30 أَذْ ثْخضْبذْ إِشْثْ ن ثمْغَارْثْ ؤُشَا إِجّْ ن ورْيَازْ نّغْنِي أَذْ ت إِسّْنُوقّبْ، أَذْ ثبْنِيذْ ثَادَّارْثْ إِ يِيخفْ نّكْ ؤُشَا وَارْ ذَايسْ ثْزدّْغذْ، أَذْ ثڭِّيذْ إِجّْ ن ؤُمَارْجُوعْ ن ؤُضِيڒْ أَذْ ذَايسْ ثژُّوذْ ثِيزَايَارِينْ مَاشَا وَارْ زَّايْسنْثْ ثسْثنْفِيعذْ. ‏31 أَفُونَاسْ نّكْ أَذْ إِتّْوَاغَارْصْ زَّاثْ إِ ثِيطَّاوِينْ نّكْ ؤُشَا وَارْ زَّايسْ ثتّتّذْ، أَغْيُوڒْ نّكْ أَذْ ث ؤُشَارنْ زَّاثْ إِ وُوذمْ نّكْ ؤُشَا وَارْ ذ أَشْ د-إِتّْعِيقِّيبْ. ؤُدْجِي نّكْ أَذْ ث وْشنْ إِ ڒْعذْيَانْ نّكْ ؤُشَا وَارْ غَاركْ إِتِّيڒِي وِي إِ غَا إِسّنْجْمنْ. ‏32 أَذْ مّوْشنْ إِحنْجِيرنْ نّكْ ذ ثْحنْجِيرِينْ نّكْ إِ يِيجّْ ن ڒْڭنْسْ نّغْنِي. ثِيطَّاوِينْ نّكْ أَذْ ثْوَاڒَانْثْ ؤُشَا أَذْ ذَايْسنْ ثمّژْرذْ أَسّْ إِكْمڒْ ؤُشَا وَارْ إِتِّيڒِي جّهْذْ ذڭْ ؤُفُوسْ نّكْ. ‏33 ڒْغِيدْجثْ ن ثمُّورْثْ نّكْ ذ مَارَّا ڒْخذْمثْ نّكْ أَذْ ث إِشّْ إِجّْ ن ڒْڭنْسْ إِ وَارْ ثسِّينذْ ؤُشَا أَذْ ثِيڒِيذْ ثحْصَارذْ ؤُ أَذْ ثْڒبْزذْ وَاهَا مَارَّا ؤُسَّانْ ن ثُوذَارْثْ نّكْ. ‏34 أَذْ ثْذوْڒذْ ذ أَپُوهَاڒِي زِي سِّيبّثْ ن مِينْ غَا ثْژَارذْ س ثِيطَّاوِينْ نّكْ.

‏35 سِيذِي أَذْ شكْ إِوّثْ س ثْحبَّا ثِيعفَّانِينْ غَارْ إِفَادّنْ ؤُ غَارْ إِضَارنْ إِ زِي وَارْ ثْزمَّارذْ أَذْ زَّايْسنْ ثڭّنْفِيذْ، زِي ثْڒقَّا ن ؤُضَارْ نّكْ أَڒْ أَشقُّوفْ ن ؤُزدْجِيفْ نّكْ.

‏36 سِيذِي أَذْ شكْ يَارّْ جْمِيعْ أَكْ-ذ ؤُجدْجِيذْ نّكْ، ونِّي شكْ إِ غَا ثڭّذْ خْ يِيخفْ نّكْ، أَذْ ثْرَاحذْ غَارْ إِجّْ ن ڒْڭنْسْ نِّي وَارْ ثسِّينذْ شَا ؤُڒَا ذ إِبَابَاثنْ نّكْ ؤُشَا ذِينْ إِ غَا ثْسخَّارذْ إِ إِربِّيثنْ نّغْنِي ن ؤُكشُّوضْ ذ وژْرُو. ‏37 أَذْ ثِيڒِيذْ ذ إِجّْ ن ڒخْيَاڒْ ن ثِيڭّْوُوذِي، ذ إِجّْ ن ؤُمذْيَا ذ إِشْثْ ن ڒْقشْعثْ ن ؤُسْثهْزِي إِقسْحنْ جَارْ مَارَّا ڒڭْنُوسْ مَانِي شكْ إِ غَا إِنْذهْ سِيذِي.

‏38 أَذْ ثسُّوفّْغذْ أَطَّاسْ ن زَّارِيعثْ غَارْ ييَّارْ ؤُشَا أَذْ ثْڒقْضذْ ذْرُوسْ، مِينْزِي ثَامُورْغِي أَذْ ت ثحْڒُووْ. ^▪   ‏39 أَذْ ثڭِّيذْ إِمَارْجَاعنْ ن ؤُضِيڒْ أَذْ ذَايْسنْ ثژُّوذْ ثِيزَايَارِينْ ؤُشَا أَذْ ثنْثْ ثْعَارّْصذْ، مَاشَا وَارْ ثْسسّذْ بِينُو ؤُشَا وَارْ ثْڒقّْضذْ وَالُو، مِينْزِي أَذْ ثنْثْ إِشّْ ؤُكشَّا. ‏40 أَذْ غَاركْ إِڒِينْ إِزمُّورنْ ذِي مَارَّا ثَامُّورْثْ نّكْ، مَاشَا وَارْ ثْذهّْنذْ إِخفْ نّكْ س زّشْثْ، مِينْزِي أَذْ إِوْضَا زِّيثُونْ زڭْ ؤُزمُّورْ نّكْ قْبڒْ ڒْوقْثْ. ‏41 أَذْ د-ثجّذْ إِحنْجِيرنْ ذ ثْحنْجِيرِينْ، مَاشَا وَارْ تِّيڒِينْ شَا نّكْ، مِينْزِي أَذْ رُوحنْ ذِي ثْمحْبَاسْثْ. ‏42 مَارَّا ثِيشجِّيرَا ذ ڒْغِيدْجثْ ن ثمُّورْثْ نّكْ أَذْ ثنْثْ ثطّفْ ثْمُورْغِي ذ ثَاسْغَارْثْ نّسْ.

‏43 أَبَارَّانِي نِّي إِدْجَانْ ذِي ڒْوسْثْ نّكْ، أَذْ خَاكْ إِسُّوعْڒَا إِخفْ نّسْ، سنّجْ ؤُ سنّجْ عَاذْ، ؤُشَا شكْ أَذْ ثتّْوَاسّهْوِيذْ غَارْ ثمُّورْثْ، سْوَادَّايْ غَارْ وَادَّايْ.

‏44 نتَّا أَذْ أَشْ يَارْضڒْ، مَاشَا شكْ وَارْ ذ أَسْ ثَارطّْڒذْ. نتَّا أَذْ يِيڒِي ذ أَزدْجِيفْ، شكْ أَذْ ثِيڒِيذْ ذ أَنوَّارْ. ‏45 ؤُشَا أَذْ خَاكْ د-هْوَانْثْ مَارَّا نّْعَاڒِي أَيَا، أَذْ شكْ ضْفَارنْثْ، أَذْ شكْ ڒقْفنْثْ أَڒْ غَا ثتّْوَامْحِيذْ، ؤُمِي وَارْ ثسْڒِيذْ إِ ثْمِيجَّا ن سِيذِي، أَربِّي نّكْ، حِيمَا أَذْ ثحْضِيذْ ڒُومُورَاثْ نّسْ ذ ثِيوصَّا نّسْ، إِنِّي ذ أَشْ يُومُورْ نتَّا. ‏46 أَذْ إِڒِينْثْ ذ إِشْثْ ن ڒعْڒَامثْ ذ إِشْثْ لْمُوعْجِيزَا إِ شكْ ؤُ إِ زَّارِيعثْ نّكْ إِ ڒبْذَا.

‏47 مِينْزِي وَارْ ثْسخَّارذْ إِ سِيذِي، أَربِّي نّكْ س ڒفْرَاحثْ ذ ثْشُونِي ن وُوڒْ زِي سِّيبّثْ ن ؤُفيّضْ ن مَارَّا مِينْ ذِينْ إِدْجَانْ، ‏48 أَذْ ثْسخَّارذْ إِ ڒْعذْيَانْ، إِنِّي خَاكْ إِ غَا إِسّكّْ سِيذِي، س ڒَاژْ ذ ؤُفَاذِي، س ثُوعَّارْينْثْ ذ ڒخْصصْ ن مَارَّا ثِيمسْڒَايِينْ ؤُشَا نتَّا أَذْ إِڭّْ أَزَايْڒُو ن وُوزَّاڒْ خْ يِيرِي نّكْ، أَڒْ شكْ إِ غَا إِمْحَا. ‏49 سِيذِي أَذْ خَاكْ د-إِسّْڭعّذْ إِجّْ ن ڒْڭنْسْ إِڭّْوجْ، زڭْ ؤُنڭَّارُو ن ثمُّورْثْ، أَمشْنَاوْ إِجّْ ن ؤُڭِيذرْ إِطَّاونْ، إِجّْ ن ڒْڭنْسْ إِ ؤُمِي وَارْ ثْزمَّارذْ أَذْ ثْفهْمذْ إِڒسْ نّسْ، ^▫   ‏50 إِجّْ ن ڒْڭنْسْ غَارسْ ؤُذمْ إِقْضعْ، وَارْ إِتّْوقَّارْ أَوسَّارْ، وَارْ يَارحّمْ خْ ؤُحنْجِيرْ. ‏51 أَذْ يشّْ ڒْغِيدْجثْ ن ڒبْهَايمْ نّكْ ذ ڒْغِيدْجثْ ن ثمُّورْثْ نّكْ، أَڒْ غَا ثتّْوَامْحِيذْ، مِينْزِي وَارْ ذ أَشْ إِتّجِّي إِرْذنْ، نِيغْ بِينُو ن جْذِيذْ، نِيغْ زّشْثْ ن طّْرِي، نِيغْ ثْوَارُورَا ن ثْفُونَاسِينْ نّكْ نِيغْ أَمَارْنِي ن وُودْجِي، أَڒْ شكْ إِ غَا يَاردّدْجْ. ‏52 أَذْ شكْ إِحْصَارْ جَارْ مَارَّا ثوُّورَا نّكْ، أَڒْ غَا وْضَانْ ڒحْيُوضْ يُوعْڒَانْ إِمثْننْ، إِنِّي خْ ثُوغَا ثتّشْڒذْ ذِي مَارَّا ثَامُّورْثْ نّكْ. أَذْ شكْ إِحْصَارْ جَارْ مَارَّا ثوُّورَا نّكْ ذِي مَارَّا ثَامُّورْثْ نِّي ذ أَشْ إِوْشَا سِيذِي، أَربِّي نّكْ. ‏53 خْمِي إِ ذ أَكْ-د غَا إِنّْضنْ ؤُ ذِي ڒحْصَارثْ إِ زِي شكْ إِ غَا إِحْصَارنْ ڒْعذْيَانْ نّكْ، أَذْ ثشّذْ ڒْغِيدْجثْ ن ؤُعذِّيسْ نّكْ ذ ويْسُومْ ن إِحنْجِيرنْ نّكْ ذ ثْحنْجِيرِينْ نّكْ نِّي ذ أَشْ إِ غَا إِوْشْ سِيذِي، أَربِّي نّكْ. ^▪   ‏54 أَرْيَازْ نِّي إِ يَارضْبنْ ؤُ ونِّي إِضبْعنْ أَطَّاسْ أَذْ ثِيڒِي ثَامُوغْڒِي نّسْ ذ ثَاعفَّانْثْ غَارْ ؤُمَاسْ ؤُ غَارْ ثمْغَارْثْ ن وُوڒْ نّسْ ؤُ غَارْ مِينْ ذ أَسْ إِقِّيمنْ زڭْ إِحنْجِيرنْ نّسْ، ‏55 مَاحنْذْ وَارْ إِتِّيشْ ؤُڒَا إِ يِيجّْ زَّايْسنْ شَا ن ويْسُومْ ن إِحنْجِيرنْ نّسْ، إِنِّي إِ غَا يشّْ ؤُمِي وَارْ ذ أَسْ إِقِّيمْ شَا زِي مَارَّا مَانْ أَيَا ذِي ڒحْصَارثْ ؤُ ذِي ضِّيقَا إِ زِي خَاكْ إِ غَا إِبزّزْ ڒعْذُو نّكْ ذِي مَارَّا ثِيوُّورَا نّكْ. ‏56 ثَامْغَارْثْ إِ يَاڒضْبنْ ؤُ ثنِّي إِضبْعنْ أَطَّاسْ، عمَّارْصْ وَارْ ثڭِّي ثْڒقَّا ن ؤُضَارْ نّسْ خْ ثمُّورْثْ ذِي سِّيبّثْ ن وَاڒْضَابْ ؤُ ن وضْبعْ نّسْ، أَذْ ثِيڒِي ثْمُوغْڒِي نّسْ ذ ثَاعفَّانْثْ غَارْ ورْيَازْ ن وُوڒْ نّسْ ؤُ غَارْ مِّيسْ ذ يدْجِيسْ، ‏57 ذِي سِّيبّثْ ن لُّوفَانْ نِّي د-إِفّْغنْ جَارْ إِضَارنْ نّسْ ؤُ ذِي سِّيبّثْ ن إِحنْجِيرنْ نِّي ثُورُووْ، مِينْزِي أَذْ ثنْ ثشّْ س ثْنُوفّْرَا ذِي سِّيبّثْ ن ڒخْصصْ ن مَارَّا ذِي ڒحْصَارثْ ؤُ ذِي ضِّيقَا إِ خَاكْ إِ غَا إِبزّزْ ڒعْذُو نّكْ ذِي مَارَّا ثِيوُّورَا نّكْ.

‏58 مَاڒَا وَارْ ثحْضِيذْ مَارَّا أَوَاڒنْ ن شَّارِيعَا أَيَا نِّي يُورَانْ ذڭْ وذْلِيسْ-أَ إِتّْوَانّْضنْ مَاحنْذْ أَذْ ثڭّْوذذْ إِسمْ-أَ إِعُودْجَانْ، إِسَّاڭّْوَاذنْ، سِيذِي، أَربِّي نّكْ، ‏59 خنِّي أَذْ يَارّْ سِيذِي جّْرَايحْ نّكْ ذ جّْرَايحْ جَارْ زَّارِيعثْ نّكْ ذ إِجّْ ن أَرْجفْ أَڒْ طَّارْفْ. أَذْ إِڒِينْثْ ذ جّْرَايحْ مْغَارنْثْ، أَذْ ذُومنْثْ، ؤُشَا أَذْ إِڒِينْ ڒهْڒَاشَاثْ إِعفّْننْ إِ غَا إِقِّيمنْ غَارْ زَّاثْ. ‏60 نتَّا أَذْ غَاركْ د-يَارّْ مَارَّا ڒهْڒَاشَاثْ ن مِيصْرَا إِ زِي ثُوغَا ثڭّْوْذذْ ؤُشَا أَذْ ذَايكْ ڒصْقنْثْ. ‏61 أَمنِّي أَذْ غَاركْ د-يَارّْ سِيذِي مَارَّا ڒهْڒَاشَاثْ ذ مَارَّا جّْرَايحْ نِّي وَارْ يُورِينْ ذڭْ وذْلِيسْ إِتّْوَانّْضنْ ن شَّارِيعَا-يَا، أَڒْ غَا ثتّْوَامْحِيذْ. ‏62 أَذْ ثقِّيمذْ أَكْ-ذ إِجّْ ن وُورُو ن يرْيَازنْ ذڭْ ومْشَانْ إِ ذِي إِ غَا ثِيڒِيمْ أَمشْنَاوْ إِثْرَانْ ن ؤُجنَّا ذڭْ وَاطَّاسْ، ؤُمِي وَارْ ثسْڒِيذْ إِ ثْمِيجَّا ن سِيذِي، أَربِّي نّكْ. ‏63 أَمْ مَامّشْ زَّايْومْ إِفَارْحْ سِيذِي حِيمَا أَذْ ذَايْومْ إِڭّْ ثْشُونِي ؤُ أَذْ أَومْ إِتّْمَارْنِي، أَمُّو زَّايْومْ إِ غَا إِفَارْحْ سِيذِي مَاحنْذْ أَذْ كنِّيوْ إِهلّكْ ؤُ مَاحنْذْ أَذْ كنِّيوْ إِثحَّا ؤُشَا كنِّيوْ أَذْ ثتّْوَاقڒْعمْ زِي ثمُّورْثْ نِّي غَارْ إِ غَا ثَاذْفذْ حِيمَا أَذْ ت ثكْسِيذْ ذ ڒْوَارْثْ. ^▪   ‏64 سِيذِي أَذْ أَشْ إِبزّعْ خْ مَارَّا ڒڭْنُوسْ، زڭْ ؤُجمَّاضْ ن دُّونشْثْ أَڒْ ؤُجمَّاضْ نّغْنِي ن دُّونشْثْ ؤُشَا ذِينْ أَذْ ثْسخَّارذْ إِ إِربِّيثنْ نّغْنِي ن ؤُكشُّوضْ ذ وژْرُو نِّي وَارْ ثسِّينذْ شكْ نِيغْ إِبَابَاثنْ نّكْ. ^▪   ‏65 وَارْ ثتِّيفذْ ڒْهُوذْنثْ جَارْ ڒڭْنُوسْ-أَ ؤُشَا ثَاڒقَّا ن ؤُضَارْ نّكْ وَارْ ثتِّيفْ أَريَّاحْ، مِينْزِي سِيذِي أَذْ أَشْ إِوْشْ ذِينْ ؤُڒْ يَارْجْفنْ ذ ثْمُوغْڒِي ثْخسِّي ذ إِجّْ ن ڒعْمَارْ إِسْڒَاونْ. ‏66 ثُوذَارْثْ نّكْ أَذْ أَشْ ثِيڒِي أَمشْنَاوْ ثُويڒْ زَّاثْ نّكْ، أَذْ ثِيڒِيذْ ثڭّْوذذْ دْجِيڒثْ ذ وَاسّْ ؤُشَا وَارْ إِتِّيڒِي وضْمَانْ خْ ثُوذَارْثْ نّكْ. ‏67 Ƴأَرْ ضّْبحْ أَذْ ثِينِيذْ ’أَ، إِڒِي أَذْ ثِيڒِي ذ دْجِيڒثْ!‘ ؤُ ذِي دْجِيڒثْ أَذْ ثِينِيذْ: ’أَ، إِڒِي أَذْ يِيڒِي ذْ ضّْبحْ!‘ زِي سِّيبّثْ ن ثِيڭّْوُوذِي ذڭْ وُوڒْ نّكْ نِّي ذ أَشْ إِسِّيڭّْوِيذنْ ؤُ زِي سِّيبّثْ ن مِينْ غَا ثْوَاڒِينْثْ ثِيطَّاوِينْ نّكْ. ‏68 سِيذِي أَذْ شكْ يَارّْ غَارْ مِيصْرَا ذڭْ إِغُورُّوبَا خْ وبْرِيذْ مِينْ خفْ ذ أَشْ نِّيغْ: ’وَارْ ث ثْژَارّذْ عمَّارْصْ!‘، ؤُشَا ذِينْ أَذْ ثزّنْزمْ إِخفْ نْومْ إِ ڒْعذْيَانْ نّكْ ذ إِسمْغَانْ ذ ثْسمْغِينْ ؤُشَا وَارْ إِتِّيڒِي وِي كنِّيوْ إِ غَا إِسْغنْ.“

‏69 إِنَا ذ أَوَاڒنْ ن ڒْعَاهْذْ نِّي يُومُورْ سِيذِي إِ مُوسَا حِيمَا أَذْ ث إِڭّْ أَكْ-ذ أَيْثْ ن إِسْرَائِيل ذِي ثمُّورْثْ ن مُوآبَ، سنّجْ إِ ڒْعَاهْذْ إِ كِيذْسنْ إِڭَّا غَارْ حُورِيبْ.