أَعَاوذْ ن شَّارِيعَا 27

أَذْرَارْ ن عِيبَالْ ذ وذْرَارْ ن جِيرِيزِيمْ

‏1 مُوسَا، أَكْ-ذ إِمْغَارنْ ن إِسْرَائِيل، يُومُورْ ڒْڭنْسْ، إِنَّا:

”حْضَامْ مَارَّا ثِيوصَّا أَيَا نِّي ذ أَومْ ؤُمُورغْ نشّْ أَسّْ-أَ. ‏2 أَذْ إِمْسَارْ ذڭْ وَاسّْ ؤُمِي غَا ثژْوَامْ إِغْزَارْ ن لْ'ؤُرْذُونْ غَارْ ثمُّورْثْ نِّي ذ أَشْ إِ غَا إِوْشْ سِيذِي، أَربِّي نّكْ، أَقَا أَذْ ثسّْبدّذْ إِژْرَا إِمقّْرَاننْ ؤُشَا أَذْ ثنْ ثْحنّْشذْ س جَّارْ. ^▪ ‏3 أَذْ ذَايسْ ثَارِيذْ مَارَّا أَوَاڒنْ ن شَّارِيعَا-يَا، خْمِي إِ غَا ثژْوِيذْ حِيمَا أَذْ ثَاذْفذْ غَارْ ثمُّورْثْ نِّي ذ أَشْ إِ غَا إِوْشَا سِيذِي، أَربِّي نّكْ، إِشْثْ ن ثمُّورْثْ إِفيّْضنْ س ؤُغِي ذ ثَامّنْثْ، أَمْ مَامّشْ إِ ذ أَشْ إِنَّا سِيذِي، أَربِّي ن إِبَابَاثنْ نّكْ. ‏4 خْمِي إِ غَا ثژْوَامْ إِغْزَارْ ن لْ'ؤُرْذُونْ، أَذْ ثسّْبدّمْ إِژْرَا، إِنِّي خْ ذ أَومْ ؤُمُورغْ أَسّْ-أَ خْ وذْرَارْ ن عِيبَالْ ؤُشَا أَذْ ثنْ ثْحنّْشذْ س جَّارْ. ‏5 أَذْ ذِينْ ثبْنِيذْ إِجّْ ن ؤُعَالْطَارْ إِ سِيذِي، أَربِّي نّكْ، إِجّْ ن ؤُعَالْطَارْ ن يژْرَا. وَارْ خَاسْ ثسِّيڒِييذْ دُّوزَانْ ن وُوزَّاڒْ زِي سَّا غَارْ ذَا. ^▪ ‏6 إِتّْخصَّا أَذْ ثبْنِيذْ أَعَالْطَارْ ن سِيذِي، أَربِّي نّكْ، س يژْرَا كمْڒنْ وَاهَا ؤُشَا أَذْ خَاسْ ثسّْبخَّارذْ ثِيغَارْصَا ن وشْمَاضْ إِ سِيذِي، أَربِّي نّكْ. ‏7 عَاوذْ أَذْ أَسْ ثْقدّْمذْ ثِيغَارْصِي نّكْ ن ڒهْنَا. أَذْ ذِينْ ثشّذْ ؤُشَا أَذْ ثْفَارْحذْ زَّاثْ إِ وُوذمْ ن سِيذِي، أَربِّي نّكْ. ‏8 أَذْ ثَارِيذْ مَارَّا أَوَاڒنْ ن شَّارِيعَا أَيَا ذڭْ يژْرَا س ونْقَاشْ إِشوَّارنْ.“

‏9 ثُوغَا مُوسَا إِسَّاوَاڒْ أَكْ-ذ إِكهَّاننْ، إِلَاوِييّنْ، غَارْ مَارَّا إِسْرَائِيل، إِنَّا:

”سْقَارْ، سْحسّْ، أَ إِسْرَائِيل! أَسّْ-أَ ثِيوْضذْ أَذْ ثِيڒِيذْ ذ إِجّْ ن ڒْڭنْسْ إِ سِيذِي، أَربِّي نّكْ.

‏10 أَذْ ثسْڒذْ إِ ثْمِيجَّا ن سِيذِي، أَربِّي نّكْ، ؤُشَا أَذْ ثڭّذْ زِي ڒُومُورَاثْ نّسْ ذ ثْوصَّا نّسْ نِّي خْ شكْ ؤُمُورغْ أَسّْ-أَ.“

‏11 إِوصَّا مُوسَا ڒْڭنْسْ ذڭْ وَاسّْ نِّي، إِنَّا:

‏12 ”خْمِي إِ غَا ثژْوَامْ لْ'ؤُرْذُونْ أَذْ بدّنْ يِينَا خْ وذْرَارْ ن جِيرِيزِيمْ حِيمَا أَذْ بَارْكنْ ڒْڭنْسْ: شِيمْعُونْ ذ لَاوِي ذ يَاهُوذَا ذ إِسَّاكَارْ ذ يُوسُوفْ ذ بِينْيَامِينْ. ^▪

‏13 ؤُشَا إِنَا أَذْ بدّنْ خْ وذْرَارْ ن عِيبَالْ حِيمَا أَذْ نعْڒنْ: رُوبِينْ، جَاذْ ذ عَاشِيرْ ذ زَاپُولُونْ، ذَانْ ذ نَافْثَالِي.

‏14 أَذْ بَارّْحنْ إِلَاوِييّنْ ؤُشَا أَذْ إِنِينْ س ثْمِيجَّا إِجهْذنْ إِ مَارَّا أَرَّاوْ ن إِسْرَائِيل:

‏15 ’ذ أَمنْعُوڒْ أَرْيَازْ نِّي إِ غَا إِڭّنْ إِجّْ ن ڒخْيَاڒْ إِنقْشنْ نِيغْ إِفسْينْ،

- أَقَا-ث ذ جّْعِيفشْثْ إِ سِيذِي، إِشْثْ نْ ڒْخذْمثْ ن إِفَاسّنْ ن ؤُحْرَايْفِي -،

ؤُشَا أَذْ ت إِڭّْ ذڭْ إِجّْ ن ومْشَانْ إِنُّوفَّارْ.‘

ؤُشَا مَارَّا ڒْڭنْسْ أَذْ د-يَارّْ أَذْ يِينِي: ’أَمِينْ!‘

‏16 ’ذ أَمنْعُوڒْ وِي إِ غَا إِسّحْقَارنْ بَابَاسْ نِيغْ يمَّاسْ!‘