إِزْڒِي ن مُوسَا
32
1 ”سْڒمْ، أَ إِجنْوَانْ، أَذْ سِّيوْڒغْ! أجّْ ثَامُّورْثْ أَذْ ثْسڒْ إِ وَاوَاڒنْ ن ؤُقمُّومْ إِنُو!
2 أجّْ ثَاغُورِي إِنُو أَذْ ثُوذمْ أَمشْنَاوْ أَنْژَارْ،
أَذْ هْوَانْثْ ثِيوَاڒِينْ إِنُو أَمشْنَاوْ نّْذَا،
أَمشْنَاوْ إِشْثْ ن ثْهِيضُورْثْ خْ ؤُغمُّويْ أَزِيزَا
ؤُ أَمشْنَاوْ ثِينشْنَاشِينْ خْ وفْسُو،
3 مِينْزِي نشّْ أَذْ بَارّْحغْ إِسمْ ن سِيذِي،
أَرّمْ-د ڒمْغَارثْ إِ أَربِّي نّغْ!
4 نتَّا ذ ثَاصْضَارْثْ، ڒْخذْمثْ نّسْ نِيشَانْ،
مِينْزِي مَارَّا إِبْرِيذنْ نّسْ تّْوَاسڭّْذنْ،
إِجّْ ن أَربِّي ذ أَمْثِيقِّي بْڒَا ڒْغشّْ،
أَقَا-ث ذ أَمْسڭّذْ ذ نِيشَانْ إِ يدْجْ.
5 ڒْڭنْسْ أَقَا إِسّفْسذْ إِخفْ نّسْ،
نِيثْنِي وَارْ دْجِينْ شَا ذ إِحنْجِيرنْ نّسْ،
ڒْعِيبْ أَقَا-ث خَاسنْ،
أَقَا-ث ذ إِجّْ ن جِّيڒْ إِفَارْغْ ؤُ إِخْنُونّسْ.
6 مَا ثخْسمْ أَذْ ثڭّمْ أَيَا إِ سِيذِي،
أَ ڒْڭنْسْ أَپُوهَاڒِي ذ وفْغُورْ!
مَا وَارْ إِدْجِي نتَّا ذ بَابَاشْ نِّي شكْ إِسْغِينْ،
ذ ونِّي شكْ إِڭِّينْ ؤُ ذ ونِّي شكْ إِكوّْننْ؟
7 إِذَارمْ ؤُسَّانْ إِعْذُونْ،
خمّمْ إِسڭّْوُوسَا ن جِّيڒْ أَڒْ جِّيڒْ نّغْنِي،
سقْسَا بَابَاشْ ؤُ نتَّا أَذْ أَشْ ث إِعَاوذْ
ؤُ سقْسَا إِمْغَارنْ ؤُ نِيثْنِي أَذْ أَشْ ث إِنِينْ.
8 ؤُمِي إِوْشَا ؤُمْعُودْجِي خْ كُوڒْشِي ثَاسْغَارْثْ نّسْ إِ مَارَّا ڒڭْنُوسْ،
ؤُمِي إِبْضَا إِحنْجِيرنْ ن أَذَامْ، إِسّْڭعّذْ إِيْمِيرنْ ن ڒڭْنُوسْ
عْلَاحْسَابْ ڒْقدّْ ن أَيْثْ ن إِسْرَائِيل.
9 مِينْزِي ثَاسْغَارْثْ ن سِيذِي ذ ڒْڭنْسْ نّسْ،
يَاعْقُوبْ ذ أَفِيڒُو ن ڒعْبَارْ ن ثسْغَارْثْ نّسْ.
10 يُوفَا إِ-ث ذِي ثمُّورْثْ ن ڒخْڒَا،
ذِي ثْنزْرُوفْثْ إِخْڒَانْ أَكْ-ذ ڒوْحُوشْ إِ إِتّْزُونْ،
إِنّضْ أَسْ-د، إِسّڒْمذْ إِ-ث،
إِحْضَا إِ-ث أَمشْنَاوْ مُومُّو ن ثِيطّْ نّسْ.
11 أَمشْنَاوْ أَڭِيذرْ نِّي إِسّْفَاقنْ ڒْعُوشّْ نّسْ،
إِطَّاوْ سنّجْ إِ وَارُّوذْ نّسْ زِي سَّا غَارْ ذَا،
إِتّْبزّعْ أَفْرِيونْ نّسْ،
إِكْسِي إِ-ث ؤُشَا يَاربُّو ث خْ وَافْرِيونْ نّسْ،
12 أَمُّو إِنْذهْ إِ-ث سِيذِي وَاهَا
ؤُشَا وَارْ ثُوغِي ذِينْ أَكِيذسْ شَا ن أَربِّي ذ أَغْرِيبْ.
13 إِسّنْيَا إِ-ث خْ ثْعُوڒَاڒْ ن ثمُّورْثْ
ؤُشَا إِشَّا ڒْغِيدْجثْ ن ييَّارْ.
إِجَّا إِ-ث أَذْ إِژمّْ ثَامّنْثْ زِي جَّارْفْ،
ذ زّشْثْ زڭْ وژْرُو ن ثصْضَارْثْ، ▪
14 ثْڒُوسِّي ن ثْفُونَاسِينْ ذ ؤُغِي ن وُودْجِي،
س ثَاذُونْثْ ن إِزْمَارنْ ذ إِشَارِّييّنْ،
إِنِّي إِدْجَانْ أَمشْنَاوْ ثَارْوَا ن بَاشَانْ، ذ إِغَايْضنْ،
س مُومُّو ن وَارنْ ن إِرْذنْ.
عَاوذْ شكْ ثسْوِيذْ زڭْ إِذَامّنْ ن ؤُضِيڒْ، بِينُو إِصْفَانْ.
15 إِذْوڒْ يَاشُورُونْ إِقْپُوبّزْ ؤُشَا إِژّعْبضْ
- ’أَقَا ثْمسْڒذْ ؤُ ثقْپُوبّْزذْ، وَاهْ، س ثَاذُونْثْ ثتّْوَاذْڒذْ!‘ -
ؤُشَا إِسْمحْ ذِي أَربِّي نِّي ث د-إِخڒْقنْ
ؤُشَا إِسّحْقَارْ ثَاصْضَارْثْ ن ؤُسنْجمْ نّسْ.
16 س إِربِّيثنْ إِغْرِيبنْ سّكَّارنْ ثُوسْمِي نّسْ،
س جّْعَايفْ سْعَارنْ ث.
17 نِيثْنِي قدّْمنْ ثِيغَارْصَا إِ شّْوَاطنْ، وَارْ إِدْجِي إِ أَربِّي،
إِ إِربِّيثنْ نِّي وَارْ سِّيننْ،
إِربِّيثنْ ن جْذِيذْ، إِنِّي د-يُوسِينْ عَاذْ مَامّشْ،
وَارْ زَّايْسنْ تَّارْجِيجّنْ إِبَابَاثنْ نْومْ.
18 ثَاصْضَارْثْ نِّي شكْ د-يجِّينْ، ثْسمْحذْ ذَايسْ
ؤُ ثتُّوذْ أَربِّي نِّي إِ شكْ د-يُورْونْ س ڒوْجعْ.
19 إِژْرَا سِيذِي مَانْ أَيَا ؤُشَا إِسّهْقَارْ إِ-ثنْ،
زِي سِّيبّثْ ن ؤُسْذُوقّزْ ن إِحنْجِيرنْ نّسْ ذ يسِّيسْ.
20 نتَّا إِنَّا: ’أَذْ زَّايْسنْ فَّارغْ ؤُذمْ إِنُو،
أَذْ ژَترغْ مَامّشْ إِ غَا يِيڒِي زْمَانْ ؤُنڭَّارُو نْسنْ،
مِينْزِي نِيثْنِي ذ إِجّْ ن جِّيڒْ إِتّْنقْڒَابْ،
ذ ثَارْوَا إِ ذِي وَارْ إِدْجِي ڒْمَانثْ.
21 نِيثْنِي سّكَّارنْ ثُوسْمِي إِنُو س مِينْ وَارْ إِدْجِينْ ذ أَربِّي،
سْعَارنْ أَيِي س ڒخْيَاڒَاثْ نْسنْ إِبطِّيڒنْ.
نشّْ أَذْ سّكَّارغْ ثُوسْمِي نْسنْ س مِينْ وَارْ إِدْجِينْ ذ ڒْڭنْسْ،
س يِيجّْ ن ڒْڭنْسْ ذ أَپُوهَاڒِي أَذْ ثنْ سْعَارغْ. ▪
22 مِينْزِي س وغْضَابْ إِنُو ثكَّارْ ثْمسِّي،
أَذْ ثشْمضْ أَڒْ ڒَاخَارْثْ ذِينْ سْوَادَّايْ
ؤُشَا أَذْ ثشّْ ثَامُّورْثْ ذ ڒْغِيدْجثْ نّسْ
ؤُ أَذْ ثسّشْمضْ ثِيسِي ن إِذُورَارْ. ▪
23 نشّْ أَذْ أَسنْ أَرْنِيغْ إِشڒْوَاونْ،
أَذْ خَاسنْ نيّْشغْ فْڒِيثْشَاثْ إِنُو.
24 أَذْ تّْوَاهيّْفنْ س ڒَاژْ
ؤُشَا أَذْ تّْوَاصَارْضنْ س طَّاعُونْ ؤُ س وَاردّدْجْ أَمرْزَاڭْ
ؤُ نشّْ أَذْ ذَايْسنْ سّكّغْ ثِيغْمَاسْ ن ڒْمَاڒْ
س سّمْ إِنقّنْ ن إِفِيغْرَانْ إِنِّي إِتّْمُودْجُوغنْ ذِي ثْعجَّاجْثْ.
25 زِي بَارَّا أَذْ إِكّسْ سِّيفْ ثَارَّاوْثْ
ؤُ زڭْ وخَّامْ ن ذَاخڒْ أَذْ ثڒْقفْ ثِيڭّْوُوذِي:
أَمْ ؤُبْڒِيغْ أَمْ ثَاعْزَارشْثْ، أَسيْمِي أَكْ-ذ ؤُمشَّايْپُو.
26 ثُوغَا خْسغْ أَذْ إِنِيغْ: ’أَمْ ؤُسمِّيضْ أَذْ ثنْ فَارثْكغْ،
ڭُّورْ أَذْ سّْبدّغْ ڒِيذَارثْ نْسنْ جَارْ إِوْذَانْ‘،
27 مْڒِي وَارْ ڭّْوِيذغْ زڭْ وسْعَارْ ن ڒعْذُو،
حِيمَا إِغْرِيمنْ نْسنْ وَارْ ث نكَّارنْ ؤُشَا أَذْ إِنِينْ:
’إِفَاسّنْ نّغْ، إِنِّي إِتّْوَاسْڭعّْذنْ أَمُّو س جّهْذْ،
ڭِّينْ أَيَا مَارَّا، وَارْ إِدْجِي ذ سِيذِي.‘
28 مِينْزِي نِيثْنِي ذ إِجّْ ن ڒْڭنْسْ بْڒَا أَرَّايْ
ؤُ وَارْ ذَايْسنْ ذ ڒفْهَامثْ.
29 مْڒِي ڭِّينْ ثِيغِيثْ، خنِّي إِڭُّورْ أَذْ فهْمنْ أَيَا
ؤُ أَذْ وْشنْ ثَايْنِيثْ إِ ؤُنڭَّارْ نْسنْ.
30 مَامّشْ إِزمَّارْ أَذْ إِضْفَارْ إِجّْ ن بْنَاذمْ أَڒفْ ن إِوْذَانْ
ؤُ مَامّشْ زمَّارنْ ثْنَاينْ أَذْ أَرّنْ عشْرَا-أَڒفْ أَذْ أَروْڒنْ
مَاڒَا وَارْ ذ أَسنْ ثمّنْزْ ثصْضَارْثْ نْسنْ
ؤُشَا وَارْ ذ أَسنْ إِسلّمْ سِيذِي إِ نِيثْنِي؟
31 مِينْزِي ثَاصْضَارْثْ نْسنْ مَاشِي أَمشْنَاوْ ثَاصْضَارْثْ نّغْ.
أجّْ أَذْ حكْمنْ ڒْعذْيَانْ نّغْ س إِخفْ نْسنْ.
32 مِينْزِي ثَازَايَارْثْ نْسنْ ثدْجْ زِي ثْزَايَارْثْ ن سَاذُومْ
ؤُ زڭْ إِيَّارنْ ن عَامُورَّا
ؤُ أَضِيڒْ نْسنْ ذ أَضِيڒْ ن سّمْ
ؤُ غَارْسنْ إِزكُّوننْ شُّورنْ س ثَارْزُوڭِي. ▫
33 بِينُو نْسنْ أَمشْنَاوْ أَصُوذِي ن ثْمسِّي ن ڒْهَايْشَاثْ
ؤُ أَمشْنَاوْ سّمْ إِنقّنْ ن ثْڒفْسِيوِينْ.
34 مَا مَارَّا أَيَا وَارْ غَارِي إِتّْوَاخْزنْ،
إِتّْوَاشمّعْ ذڭْ إِخَّامنْ ن ثْخُوبَايْ إِنُو؟
35 ذ نشّْ إِ يدْجَانْ خْ نّقْمثْ ذ ڒخْڒَاصْ،
خْمِي إِ غَا إِحْڒُودْجضْ ؤُضَارْ نْسنْ.
أَسّْ ن ؤُضيّعْ نْسنْ أَقَا يُوذسْ
ؤُشَا مِينْ إِڭُّورنْ أَذْ خَاسنْ د-يِيڒِي، أَذْ إِمْسَارْ ذغْيَا. ▪
36 مِينْزِي سِيذِي أَذْ إِڭّْ ثَاسڭْذَا إِ ڒْڭنْسْ نّسْ،
ؤُشَا أَذْ إِحنّْ خْ إِمْسخَّارنْ نّسْ خْمِي إِ غَا إِژَارْ بلِّي جّهْذْ إِمّكْسِي
ؤُشَا وَارْ ذِينْ إِقِّيمْ عَاذْ ونِّي إِتّْوَاطّْفنْ ذ ونِّي إِجِّينْ. ▫
37 خنِّي أَذْ يِينِي: ’مَانِي إِدْجَانْ إِربِّيثنْ نْسنْ،
ثَاصْضَارْثْ نِّي ذِي نُّوفَارنْ،
38 إِربِّيثنْ نِّي زِي شِّينْ ثَاذُونْثْ ن ثْغَارْصَا نْسنْ،
إِنِّي زِي سسّنْ بِينُو ن ثوْهِيبِينْ ن ؤُسيّبْ نْسنْ؟ أجّْ إِ-ثنْ أَذْ كَّارنْ، أَذْ شكْ عَاوْننْ
ؤُ أجّْ إِ-ث أَذْ خَاومْ إِسّْذُوڒِي.‘
39 خْزَارمْ ڒخُّو، بلِّي نشّْ ذ نشّْ إِ دْجِيغْ،
ؤُ وَارْ ذِينْ شَا ؤُڒَا ذ إِجّْ ن أَربِّي أَكِيذِي.
نشّْ نقّغْ ؤُ نشّْ سّدَّارغْ،
نشّْ تّحِّيغْ ؤُ سّْڭنْفِيغْ
ؤُ وَارْ ذِينْ وِي إِ غَا إِنجْمنْ زڭْ ؤُفُوسْ إِنُو. ▪
40 مِينْزِي نشّْ أَذْ سّْوِيژّْضغْ أَفُوسْ إِنُو غَارْ ؤُجنَّا،
أَذْ إِنِيغْ: ’نشّْ أَقَا دَّارغْ إِ ڒبْذَا!‘
41 مَاڒَا سّْقضْعغْ سِّيفْ إِنُو إِتّْوسّْڭنْ
ؤُشَا أَفُوسْ إِنُو أَذْ إِطّفْ ذِي ڒْحُوكْمْ،
خنِّي نشّْ أَذْ نْثَاقْمغْ زِي ڒْعذْيَانْ إِنُو
ؤُ زڭْ إِنِّي ذ أَيِي إِشَارّْهنْ.
42 أَذْ سّْشَارغْ فْڒِيثْشَاثْ ن ڒْقوْسْ إِنُو س إِذَامّنْ
ؤُشَا سِّيفْ إِنُو أَذْ إِصَارْضْ أَيْسُومْ
ن إِذَامّنْ ن ونِّي إِتّْوَانْغنْ ؤُ ن ونِّي إِتّْوَاحبّْسنْ
ؤُ زڭْ ؤُزدْجِيفْ ن ڒعْذُو أَكْ-ذ إِجطَّاينْ ن ؤُشوَّافْ نّسْ. ▫ ▪
43 سْڒِيوْڒومْ، أَ ڒڭْنُوسْ!، أَكْ-ذ ڒْڭنْسْ نّسْ،
مِينْزِي نتَّا أَذْ إِنْثَاقمْ إِ إِذَامّنْ ن إِمْسخَّارنْ نّسْ
ؤُشَا أَذْ د-إِتَّارِّي نّقْمثْ خْ ڒعْذُو نّسْ
ؤُشَا أَذْ إِفْذِي خْ ثمُّورْثْ نّسْ ذ ڒْڭنْسْ نّسْ.“ ▫ ▪
44 يُوسَا-د مُوسَا ؤُشَا إِسِّيوڒْ مَارَّا أَوَاڒنْ ن ثِيزْڒِيثْ-أَ خْ إِمزُّوغنْ ن ڒْڭنْسْ، نتَّا ذ هُوشِيعَا، مِّيسْ ن نُونْ. ▫ 45 ؤُمِي إِكمّڒْ مُوسَا مَارَّا أَوَاڒنْ-أَ إِ زِي إِسِّيوڒْ غَارْ مَارَّا إِسْرَائِيل، 46 إِنَّا أَسنْ: ”أَرّمْ مَارَّا أَوَاڒنْ-أَ نِّي خْ ذ أَومْ نِّيغْ أَسّْ-أَ غَارْ وُوڒْ نْومْ، حِيمَا أَذْ ثنْ ثُومُورمْ إِ إِحنْجِيرنْ نْومْ مَاحنْذْ أَذْ حْضَانْ مَارَّا أَوَاڒنْ ن شَّارِيعَا أَيَا أَذْ زَّايْسنْ ڭّنْ، 47 مِينْزِي وَارْ إِدْجِي ذ أَوَاڒْ ن بَاطڒْ إِ كنِّيوْ، مَاشَا ذ ثُوذَارْثْ نْومْ. س وَاوَاڒْ-أَ أَذْ ثزُّوڭَّارْثمْ ؤُسَّانْ نْومْ خْ ثمُّورْثْ إِ غَارْ إِ غَا ثژْوِيمْ خْ لْ'ؤُرْذُونْ مَاحنْذْ أَذْ ت ثطّْفمْ ذ ڒْوَارْثْ.“
48 إِسِّيوڒْ سِيذِي أَكْ-ذ مُوسَا ذڭْ وَاسّْ نِّي، إِنَّا:
49 ”ڭَاعّذْ أَذْرَارْ ن أَبَارِيمْ، أَقَا-ث ذ أَذْرَارْ ن نَاپُو نِّي إِدْجَانْ ذِي ثمُّورْثْ ن مُوآبَ أَرنْذَاذْ ن أَرِيحَا، ؤُشَا خْزَارْ ثَامُّورْثْ ن كنْعَانْ نِّي إِ غَا وْشغْ ذ ڒْوَارْثْ إِ أَيْثْ ن إِسْرَائِيل، ▪ 50 ؤُشَا مّثْ خْ وذْرَارْ نِّي غَارْ إِ غَا ثْڭعّْذذْ، تّْوَاسْمُونْ غَارْ ڒجْذُوذْ نّكْ، أَمْ مَامّشْ إِمُّوثْ ؤُمَاشْ هَارُونْ خْ وذْرَارْ ن هُورْ ؤُشَا إِتّْوَاسْمُونْ غَارْ ڒجْذُوذْ نّسْ، ▪ 51 مِينْزِي كنِّيوْ ثغْذَاڒمْ زَّايِي ذِي ڒْوسْثْ ن أَيْثْ ن إِسْرَائِيل غَارْ وَامَانْ ن مَارِيبَا-قَاذَاشْ ذِي ڒخْڒَا ن صِينْ، مِينْزِي كنِّيوْ وَارْ ذ أَيِي ثسّْقدّْسمْ ذِي ڒْوسْثْ ن أَيْثْ ن إِسْرَائِيل. ▪ 52 خنِّي ڒخُّو أَذْ طْژَارذْ ثَامُّورْثْ زَّاثكْ، مَاشَا وَارْ تِّيذْفذْ شَا غَارْ ثمُّورْثْ نِّي إِ غَا وْشغْ إِ أَيْثْ ن إِسْرَائِيل.“