‏1 ”خْمِي إِ غَا يَاوِي إِجّْ ن ورْيَازْ إِشْثْ ن ثمْغَارْثْ ؤُشَا إِمْڒشْ أَكِيذسْ ؤُشَا خنِّي وَارْ ذ أَسْ ثعْجِيبْ ؤُمِي ذَايسْ يُوفَا شَا ن ڒفْضِيحثْ، خنِّي أَذْ أَسْ يَارِي ثَابْرَاثْ ن ودْجَافْ، أَذْ أَسْ ت إِوْشْ ذڭْ ؤُفُوسْ نّسْ ؤُشَا أَذْ ت إِسُّوفغْ زِي ثَادَّارْثْ نّسْ. ^▪   ‏2 مَاڒَا ثفّغْ زِي ثَادَّارْثْ نّسْ، ثْرُوحْ ؤُشَا ثذْوڒْ ذ ثَامْغَارْثْ غَارْ إِجّْ ن ورْيَازْ نّغْنِي ‏3 ؤُشَا أَرْيَازْ أَنڭَّارُو إِشَارْهْ إِ-ت، خنِّي أَذْ أَسْ يَارِي ثَابْرَاثْ ن ودْجَافْ ؤُشَا أَذْ أَسْ ت إِوْشْ ذڭْ ؤُفُوسْ نّسْ ؤُشَا أَذْ ت إِسّكّْ زِي ثَادَّارْثْ نّسْ، نِيغْ أَرْيَازْ أَنڭَّارُو نِّي ت يِيوْينْ ذ ثَامْغَارْثْ نّسْ، إِمُّوثْ، ‏4 خنِّي وَارْ إِعدّڒْ إِ ورْيَازْ نّسْ ذ أَمزْوَارُو، ونِّي ذ أَسْ إِطلّْقنْ، أَذْ ت يڭّْ عَاوذْ ذ ثَامْغَارْثْ إِ يِيخفْ نّسْ، أَوَارْنِي ؤُمِي ثتّْوَاسخْمجْ نتَّاثْ، مِينْزِي مَانْ أَيَا ذ جّْعِيفشْثْ زَّاثْ إِ وُوذمْ ن سِيذِي. وَارْ إِعدّڒْ أَذْ ثتّْوَاسّفْسَاذْ ثمُّورْثْ إِ ذ أَشْ إِوْشَا سِيذِي، أَربِّي نّكْ، ذ ڒْوَارْثْ. ^▫  

‏5 خْمِي إِ غَا يِيڒِي إِجّْ ن ورْيَازْ عَاذْ أَمْ إِمْڒشْ، خنِّي وَارْ إِتّفّغْ شَا أَكْ-ذ ڒْعسْكَارْ ؤُ وَارْ خَاسْ ثتّْوَاڭّْ ؤُڒَا ذ إِشْثْ ن ثْمسْڒَاشْثْ. أَذْ يِيڒِي إِجّْ ن ؤُسڭّْوَاسْ إِ ثَادَّارْثْ نّسْ وَاهَا ؤُ أَذْ إِسّْفَارْحْ ثَامْغَارْثْ نّسْ إِ يِيوِي إِ يِيخفْ نّسْ. ^▪  

‏6 وَارْ إِعدّڒْ أَذْ ثكْسِيذْ إِژْرَا ن ثْسِيرْثْ س ثْنَاينْ ذ أَضْمَانْ نِيغْ أَژْرُو نِّي زَّايْسنْ إِتّنْهزَّانْ وَاهَا، مِينْزِي أَقَا خنِّي أَذْ يِيڒِي ڒعْمَارْ ذ أَضْمَانْ.

‏7 مَاڒَا إِتّْوَافْ إِجّْ ن ورْيَازْ يُوشَارْ شَا ن إِجّْ زڭْ وَاوْمَاثنْ نّسْ ن أَيْثْ ن إِسْرَائِيل ؤُشَا نتَّا يَارّْ إِ-ث ذ إِسْمغْ ؤُشَا إِزّنْزْ إِ-ث، خنِّي أَذْ إِمّثْ ؤُشفَّارْ نِّي. إِتّْخصَّا أَذْ ثكّْسذْ ڒْغَارْ زِي ڒْوسْثْ نّكْ. ^▪  

‏8 خْمِي ذِينْ إِ ثدْجْ جّْرِيحشْثْ ن ڒْبَارْصْ، حْضَا أَذْ ثحْضِيذْ ؤُ أَذْ ثڭّذْ نِيشَانْ عْلَاحْسَابْ مَارَّا مِينْ إِ ذ أَشْ غَا سّْڒمْذنْ إِكهَّاننْ إِلَاوِييّنْ. أَمْ مَامّشْ ثنْ ؤُمُورغْ، أَذْ ثحْضَامْ أَذْ ث ثڭّمْ. ^▪   ‏9 إِذَارْ مِينْ إِڭَّا سِيذِي، أَربِّي نّكْ، أَكْ-ذ مَارْيَامْ ذڭْ وبْرِيذْ ؤُمِي د-ثفّْغمْ زِي مِيصْرَا. ^▪  

‏10 مَاڒَا ثَارْضْڒذْ شَا إِ ؤُمْقَارّبْ نّكْ، خنِّي وَارْ تِّيذفْ غَارْ ثَادَّارْثْ نّسْ حِيمَا أَذْ زَّايسْ ثكْسِيذْ شَا ذ أَضْمَانْ إِ يِيخفْ نّكْ.

‏11 أَذْ ثقِّيمذْ بَارَّا ؤُشَا أَرْيَازْ إِ ؤُمِي ثَارْضْڒذْ، أَذْ أَشْ د-يَاوِي دِّييّثْ غَارْ بَارَّا.

‏12 مَاڒَا ثُوغَا ذ أَرْيَازْ ذ أَمزْڒُوضْ، خنِّي وَارْ ڭُّورْ أَذْ ثطّْسذْ خْ ورْهَانْ نّسْ أَمْ ثَاسُّوثْ.

‏13 أَذْ أَسْ د-ثَارّذْ دِّييّثْ نِّي نِيشَانْ غَارْ ؤُغدْجِي ن ثْفُوشْثْ حِيمَا أَذْ إِطّصْ ذِي ثَاسُّوثْ نّسْ ؤُشَا أَذْ أَشْ إِبَاركْ. مَانْ أَيَا أَذْ أَشْ ثِيڒِي ذ ثَاسڭْذَا زَّاثْ إِ وُوذمْ ن سِيذِي، أَربِّي نّكْ. ^▪  

‏14 وَارْ سْحِيسّْفمْ أَشوَّاڒْ أَمحْذَاجْ أَمزْڒُوضْ زڭْ أَيْثْمَاشْ نِيغْ زڭْ إِبَارَّانِييّنْ إِ إِزدّْغنْ ذِي ثمُّورْثْ نّكْ ؤُ ذَاخڒْ إِ ثوُّورَا نّكْ. ^▪  

‏15 أَذْ أَسْ ثوْشذْ ڒْمُونثْ نّسْ كُوڒْ أَسّْ. وَارْ خَاسْ ثْغدْجِي ثْفُوشْثْ خْ مَانْ أَيَا، مِينْزِي نتَّا ذ أَمزْڒُوضْ ؤُشَا إِمّژْرِي ذَايسْ، حِيمَا نتَّا وَارْ إِتّْڒِيغِي إِ سِيذِي ذِي سِّيبّثْ نّكْ ؤُشَا أَذْ خَاكْ يِيڒِي ذ دّنْبْ.

‏16 إِبَابَاثنْ وَارْ تّْوَانقّنْ ذِي سِّيبّثْ ن إِحنْجِيرنْ نْسنْ ؤُ إِحنْجِيرنْ وَارْ تّْوَانقّنْ ذِي سِّيبّثْ ن إِبَابَاثنْ نْسنْ. كُوڒْ إِجّْ أَذْ إِتّْوَانغْ ذِي سِّيبّثْ ن دّنْبْ نّسْ. ^▪  

‏17 وَارْ سْفَارَّاغْ ڒحْكَامْ ن ؤُبَارَّانِي ذ ؤُيُوجِيڒْ نِيغْ أَذْ ثكْسِيذْ أَرُّوضْ ن ثَاجَّاتْشْ ذ أَضْمَانْ. ^▪  

‏18 أَذْ ثْعقْڒذْ بلِّي ثُوغَا شكْ ذ إِسْمغْ ذِي مِيصْرَا ؤُشَا سّنِّي شكْ إِفْذِي سِيذِي، أَربِّي نّكْ. س ؤُيَا نشّْ تُّومُورغْ شكْ أَذْ ثڭّذْ مَانْ أَيَا. ^▫  

‏19 خْمِي ثْمجَّارذْ صَّابثْ نّكْ ذڭْ إِيَّارْ نّكْ ؤُشَا ثتُّوذْ شَا ن ثْقبِّيضْثْ ذڭْ إِيَّارْ، خنِّي وَارْ د-ثذِّيكّْوِيڒذْ مَاحنْذْ أَذْ ت ثكْسِيذْ. أَذْ ثِيڒِي ذ ثَاسْغَارْثْ إِ ؤُبَارَّانِي، إِ ؤُيُوجِيڒْ ؤُ إِ ثَاجَّاتْشْ، حِيمَا أَذْ شكْ إِبَاركْ سِيذِي، أَربِّي نّكْ، ذِي مَارَّا ڒْخذْمثْ ن إِفَاسّنْ نّكْ. ^▪  

‏20 خْمِي إِ غَا ثْژوْضذْ ثَاشجَّارْثْ نّكْ ن زِّيثُونْ، وَارْ تِّيشْ ثَايْنِيثْ عَاذْ إِ مِينْ إِقِّيمنْ أَوَارْنِي أَشْ. ذ مَانْ أَيَا أَذْ يِيڒِي إِ ؤُبَارَّانِي، إِ ؤُيُوجِيڒْ ؤُ إِ ثَاجَّاتْشْ.

‏21 أَوَارْنِي ڒَامِي ثْڒقْضذْ أَضِيڒْ ن ؤُمَارْجُوعْ نّكْ ن ؤُضِيڒْ، وَارْ أَرزُّو أَذْ ثْڒقْضذْ مِينْ إِقِّيمنْ أَوَارْنِي أَشْ عَاوذْ. أَقَا مَانْ أَيَا أَذْ يِيڒِي إِ ؤُبَارَّانِي، إِ ؤُيُوجِيڒْ ؤُ إِ ثَاجَّاتْشْ. ‏22 أَذْ ثْعقْڒذْ بلِّي ثُوغَا شكْ ذ إِسْمغْ ذِي ثمُّورْثْ ن مِيصْرَا. س ؤُيَا نشّْ تُّومُورغْ شكْ أَذْ ثڭّذْ مَانْ أَيَا.“