‏1 ”مَاڒَا ذِينْ إِجّْ ن ؤُمْشُوبّشْ جَارْ إِرْيَازنْ ؤُشَا إِتّْخصَّا أَسنْ أَذْ ؤُيُورنْ غَارْ ڒْمحْكَامَا، أَذْ خَاسنْ حكْمنْ، خنِّي أَذْ بَارّْحنْ خْ ونِّي غَارْ إِدْجْ ڒْحقّْ ؤُشَا أَذْ حكْمنْ خْ ؤُمذْنَابْ. ^▫   ‏2 مَاڒَا أَمذْنُوبْ إِسّْذَاهدْجْ ثِييِّيثَا، خنِّي ڒْقَاضِي أَذْ يجّْ أَذْ ث غضْڒنْ غَارْ ثمُّورْثْ ؤُشَا أَذْ ث فَارْشنْ زَّاثْ إِ وُوذمْ نّسْ أَنشْثْ إِتُّورْسْ ذِي ڒحْسَابْ ن ڒْغشّْ نّسْ. ‏3 إِعدّڒْ أَذْ أَسْ إِوْشْ أَربْعِينْ ن ثيِّيثَا، وَارْ غَارْسنْثْ يَارنِّي شَا، مِينْزِي مَاڒَا أَذْ ث إِفَارْشْ عَاذْ كْثَارْ سنّجْ إِ ثِييِّيثَا-يَا، أَقَا ؤُمَاشْ أَذْ أَشْ د-إِبَانْ ذ أَمحْڭُورْ جَارْ ثِيطَّاوِينْ نّكْ. ^▪  

‏4 وَارْ ثڭّذْ ثَاشْمَانْثْ إِ ؤُفُونَاسْ خْمِي إِسَّارْوَاثْ. ^▪  

‏5 خْمِي زدّْغنْ وَاوْمَاثنْ أَكْ-ذ وَايَاوْيَا ؤُشَا إِمُّوثْ إِجّْ زَّايْسنْ، ؤُشَا وَارْ د-يجِّي بُو مِّيسْ، خنِّي ثَامْغَارْثْ ن ؤُمتِّينْ وَارْ ثْمدْجشْ شَا أَكْ-ذ ؤُبَارَّانِي. أَذْ خَاسْ يَاذفْ وڒْوسْ ؤُشَا أَذْ ت إِڭّْ ذ ثَامْغَارْثْ نّسْ ؤُشَا أَذْ أَسْ يڭّْ خنِّي لْوَاجِيبْ ن وڒْوسْ. ^▫  ▪   ‏6 ؤُشَا أَمنْزُو نِّي إِ د غَا ثَارُووْ، أَذْ إِخْڒفْ إِسمْ ن ؤُمَاسْ إِمُّوثنْ، حِيمَا إِسمْ ن وَا وَارْ إِمحِّي شَا زِي إِسْرَائِيل. ‏7 مَاشَا مَاڒَا أَرْيَازْ وَارْ إِخْسْ أَذْ إِكْسِي ثَامْغَارْثْ ن ؤُمَاسْ، أَذْ ثْڒَاهْ خنِّي ثمْغَارْثْ ن ؤُمَاسْ غَارْ ثوَّارْثْ، غَارْ إِمْغَارنْ، أَذْ ثِينِي: ’أَضڭّْوَاڒْ إِنُو يُوڭِي أَذْ إِخْڒفْ إِجّْ ن يِيسمْ إِ ؤُمَاسْ ذِي إِسْرَائِيل، وَارْ إِخْسْ أَذْ إِڭّْ لْوَاجِيبْ ن وڒْوسْ.‘ ^▪   ‏8 خنِّي إِمْغَارنْ ن ثنْذِينْثْ نِّي أَذْ أَسْ د-ڒَاغَانْ ؤُشَا أَذْ أَكِيذسْ سِّيوْڒنْ. مَاڒَا نتَّا إِمْنعْ ذڭْ وَاوَاڒْ نّسْ ؤُشَا إِنَّا: ’وَارْ خْسغْ شَا أَذْ ت أَوْيغْ!‘، ‏9 أَذْ غَارسْ د-ثْقَارّبْ خنِّي ثسْڒِيفْثْ زَّاثْ إِ ثِيطَّاوِينْ ن إِمْغَارنْ، أَذْ أَسْ ثكّسْ ثْسِيڒِيثْ نّسْ زڭْ ؤُضَارْ ؤُشَا أَذْ خَاسْ ثسُّوسفْ خْ ؤُغمْپُوبْ، أَذْ ثْبَارّحْ أَذْ ثِينِي: ’أَمُّو إِ إِتّْوَاڭّْ ذڭْ ورْيَازْ نِّي وَارْ إِخْسنْ أَذْ إِبْنَا ثَادَّارْثْ ن ؤُمَاسْ!‘

‏10 ؤُشَا أَذْ أَسْ وْشنْ إِسمْ نّسْ ذِي إِسْرَائِيل: ’ثَادَّارْثْ ن ونِّي ؤُمِي ثتّْوَاكّسْ ثْسِيڒِيثْ.‘

‏11 مَاڒَا ذِينْ إِرْيَازنْ مْشُوبُّوشنْ ؤُشَا ثْرحّڭْ-د ثمْغَارْثْ ن شَا ن إِجّْ حِيمَا أَذْ ثسّنْجمْ أَرْيَازْ نّسْ زڭْ ؤُفُوسْ ن وِي ث إِشَّاثنْ ؤُشَا نتَّاثْ ثسّْوِيژّضْ أَفُوسْ نّسْ ؤُشَا ثطّفْ إِ-ث زِي ثْفُولِينْ ن ؤُسضْحِي نّسْ،

‏12 أَذْ أَسْ ثْقسّذْ خنِّي أَفُوسْ نّسْ، وَارْ ذ أَمْ تّزِّيدْجِيزْ.

‏13 وَارْ غَاركْ إِتِّيڒِي ذِي ثْخَانْشثْ نّكْ إِجّْ ن وژْرُو ن ڒوْزنْ ذ إِجّْ ن وژْرُو نّغْنِي، ذ أَمقّْرَانْ ؤُ ذ أَمژْيَانْ.

‏14 وَارْ غَاركْ إِتِّيڒِي ذِي ثَادَّارْثْ نّكْ، ڒْمُوذْ ن إِجّْ ن إِفَا ؤُڒَا ذ إِجّْ ن إِفَا نّغْنِي، ذ أَمقّْرَانْ ؤُ ذ أَمژْيَانْ.

‏15 إِجّْ ن وژْرُو ن ڒوْزنْ إِوَاطَا ؤُ إِسڭّمْ أَذْ غَاركْ يِيڒِي ؤُڒَا ذ إِجْ ن ڒْمُوذْ ن يِيجّْ ن إِفَا نِيشَانْ ؤُ إِوَاطَا، حِيمَا ؤُسَّانْ نّكْ أَذْ زُّوڭَّارْثنْ خْ ثمُّورْثْ نِّي ذ أَشْ إِ غَا إِوْشْ، سِيذِي، أَربِّي نّكْ.

‏16 مِينْزِي مَارَّا وِي إِ غَا إِڭِّينْ مَانْ أَيَا، مَارَّا وِي إِ غَا إِڭِّينْ ڒْغشّْ، أَقَا نتَّا ذ نّْعِي غَارْ سِيذِي، أَربِّي نّكْ. ^▪  

‏17 إِذَارْ مِينْ زَّايكْ إِڭَّا عَامَالِيقْ ذڭْ وبْرِيذْ، ؤُمِي د-ثفّْغذْ زِي مِيصْرَا، ^▪  

‏18 مَامّشْ د-إِفّغْ غَارْ ؤُمْسَاڭَارْ أَكِيذكْ ذڭْ وبْرِيذْ ؤُشَا إِهْجمْ خَاكْ زِي ضفَّارْ مَانِي دْجَانْ مَارَّا إِمضْعَافنْ، ؤُمِي شكْ ثُوغَا ثُوحْڒذْ، ثفْنِيذْ ؤُشَا نتَّا وَارْ إِڭّْوِيذْ شَا أَربِّي.

‏19 أَذْ إِمْسَارْ، خْمِي سِيذِي، أَربِّي نّكْ، أَذْ شكْ إِسَّاريّحْ زِي مَارَّا ڒْعذْيَانْ إِ ذ أَشْ-د إِنّْضنْ ذِي ثمُّورْثْ إِ ذ أَشْ غَا إِوْشْ سِيذِي، أَربِّي نّكْ، ذ ڒْوَارْثْ، حِيمَا أَذْ ت ثكْسِيذْ، أَقَا أَذْ ثمْحِيذْ ڒِيذَارثْ ن عَامَالِيقْ زِي سَاذُو أَجنَّا. وَارْ ث تّتُّو!“