‏1 ”وَارْ إِعدّڒْ إِ ورْيَازْ أَذْ إِكْسِي ثَامْغَارْثْ ن بَابَاسْ ؤُ وَارْ إِعدّڒْ أَذْ إِسّْعَارِّي خْ وَارُّوضْ ن بَابَاسْ.

‏2 وَارْ إِعدّڒْ إِ ونِّي ؤُمِي تّْوَادّْزنْ إِمدْجَاڒنْ نِيغْ ونِّي ؤُمِي تّْوَاكّْسنْ إِمنْيَارنْ أَذْ يَاذفْ غَارْ وڭْرَاوْ ن ڒْڭنْسْ ن سِيذِي.

‏3 وَارْ إِعدّڒْ إِ مِّيسْ ن ڒحْرَامْ أَذْ يَاذفْ غَارْ وڭْرَاوْ ن ڒْڭنْسْ ن سِيذِي. وَاخَّا أَڒْ جِّيڒْ وِيسّْ عشْرَا نّسْ عَاذْ ؤُڒَا ذ إِجّْ زَّايسْ وَارْ ذ أَسْ إِعدّڒْ أَذْ يَاذفْ غَارْ ثْمسْمُونْثْ ن سِيذِي. ‏4 وَارْ إِعدّڒْ إِ يِيجّْ ن أَعْمُونِي نِيغْ إِ يِيجّْ ن أَمُو‘أَبِي أَذْ يَاذفْ غَارْ وڭْرَاوْ ن ڒْڭنْسْ ن سِيذِي. وَاخَّا أَڒْ جِّيڒْ وِيسّْ عشْرَا نّسْ عَاذْ وَارْ إِعدّڒْ إِ ؤُڒَا ذ إِجّْ زَّايْسنْ أَذْ يَاذفْ غَارْ وڭْرَاوْ ن ڒْڭنْسْ ن سِيذِي إِ ڒبْذَا،^▪   ‏5 مِينْزِي نِيثْنِي وَارْ د-فِّيغنْ حِيمَا أَذْ كِيذْومْ مْسَاڭَارنْ غَارْ وبْرِيذْ س وغْرُومْ ذ وَامَانْ ؤُمِي د-ثفّْغمْ زِي مِيصْرَا ؤُشَا ؤُمِي نتَّا خَاكْ إِشْرَا بَالْعَامْ، مِّيسْ ن بَاعُورْ، زِي فَاثُورْ ذِي أَرَامْ-نَاهْرَايْنْ، مَاحنْذْ أَذْ شكْ إِنْعڒْ. ^▫  ▪   ‏6 مَاشَا سِيذِي، أَربِّي نّكْ، وَارْ إِخْسْ أَذْ إِسڒْ إِ بَالْعَامْ ؤُشَا سِيذِي، أَربِّي نّكْ، يَارَّا نّعْڒثْ ذ لْبَارَاكَا مِينْزِي سِيذِي، أَربِّي نّكْ، ثُوغَا إِتّخْسْ إِ شكْ.

‏7 وَارْ ثَارزُّوذْ خْ ڒهْنَا نْسنْ ذ ڒْخَارْ نْسنْ، مَارَّا ؤُسَّانْ ن ثُوذَارْثْ نّكْ، أَڒْ إِ ڒبْذَا.

‏8 وَارْ شَارّهْ أَذُومِي، مِينْزِي نتَّا ذ ؤُمَاشْ، وَارْ شَارّهْ أَمِيصْرِي، مِينْزِي ثُوغَا شكْ ذ أَبَارَّانِي ذِي ثمُّورْثْ نّسْ. ‏9 إِحنْجِيرنْ إِ د أَسنْ إِتّْوُورْونْ زمَّارنْ أَذْ أَذْفنْ غَارْ وڭْرَاوْ ن ڒْڭنْسْ ن سِيذِي زِي جِّيڒْ وِيسّْ ثْڒَاثَا.

‏10 ؤُمِي د غَا ثفّْغذْ س ڒْعسْكَارْ ضِيدّْ إِ ڒْعذْيَانْ نّكْ، أَذْ ثحْضِيذْ إِخفْ نّكْ زِي مَارَّا ڒْغَارْ.

‏11 مَاڒَا ذِينْ إِجّْ ن ورْيَازْ أَكِيذكْ، وَارْ إِدْجِي شَا ذ أَمزْذَاڭْ، أَكْ-ذ مِينْ إِمْسَارنْ ذِي دْجِيڒثْ، أَذْ إِفّغْ بَارَّا إِ ڒْمَارْڭحْ ن ڒْعسْكَارْ. وَارْ ذ أَسْ إِعدّڒْ مَاحنْذْ أَذْ يَاذفْ غَارْ ذَاخڒْ ن ڒْمَارْڭحْ.

‏12 Ƴأَرْ ؤُوطُّو ن ثْمذِّيثْ، أَذْ إِسِّيرْذْ إِخفْ نّسْ س وَامَانْ ؤُ أَوَارْنِي إِ ؤُغدْجَايْ ن ثْفُوشْثْ إِزمَّارْ أَذْ يَاذفْ عَاوذْ غَارْ ڒْمَارْڭحْ.

‏13 إِتّْخصَّا أَذْ غَاركْ يِيڒِي ومْشَانْ بَارَّا إِ ڒْمَارْڭحْ ن ڒْعسْكَارْ مَانِي غَارْ إِ غَا ثفّْغذْ ذِي بَارَّا.

‏14 أَذْ غَاركْ يِيڒِي عَاوذْ جَارْ ڒقْشُوعْ نّكْ إِجّْ ن ؤُجِيجْ ؤُشَا خْمِي إِ غَا ثقِّيمذْ بَارَّا، أَذْ زَّايسْ ثْخبْشذْ إِجّْ ن وحْفُورْ، أَذْ ثنْقڒْبذْ ؤُ أَذْ ثْخمّْڒذْ إِسُوفّْغَانْ نّكْ.

‏15 مِينْزِي سِيذِي، أَربِّي نّكْ، إِڭُّورْ ذِي ڒْمَارْڭحْ نّكْ ن ڒْعسْكَارْ حِيمَا أَذْ شكْ إِسّنْجمْ ؤُ حِيمَا أَذْ أَشْ إِسلّمْ ڒْعذْيَانْ نّكْ زَّاثْ إِ وُوذمْ نّكْ. ثَاسْقِيفْثْ نّكْ أَثْ ثِيڒِي ثْقدّسْ، حِيمَا نتَّا وَارْ ذَايكْ إِتّْوِيڒِي شَا ن ڒفْضِيحثْ ؤُشَا أَذْ خَاكْ إِنّقْڒبْ أَوَارْنِي أَشْ.

‏16 إِسْمغْ إِ غَاركْ يَاروْڒنْ زِي بَابْ نّسْ، وَارْ ثْزمَّارذْ أَذْ ث ثْسلّْمذْ عَاوذْ إِ بَابْ نّسْ.

‏17 أَذْ كِيكْ إِزْذغْ ذِي ڒْوسْثْ نّكْ، ذڭْ ومْشَانْ نِّي إِ غَا إِخْضَارْ غَارْ ذَاخڒْ إِ يِيشْثْ زِي ثوُّورَا نّكْ، مَانِي إِ غَا يِيڒِي مْلِيحْ. وَارْ إِعدّڒْ أَذْ ث ثْضڒْمذْ.

‏18 وَارْ ثتِّيڒِي ؤُڒَا ذ إِشْثْ ن ثمْغَارْثْ ن فَارْقْ-شّْغڒْ ن زَّاوشْثْ جَارْ يسِّيسْ ن إِسْرَائِيل ؤُشَا وَارْ إِتِّيڒِي ؤُڒَا ذ إِجّْ ن مِّيسْ ن فَارْقْ-شّْغڒْ ن زَّاوشْثْ جَارْ أَيْثْ ن إِسْرَائِيل.

‏19 مَامّشْ مَا ثڭَّا ثْموْشِيثْ ن وَاوَاڒْ، وَارْ إِعدّڒْ أَذْ د-ثَاوْيذْ ڒْمُونثْ ن فَارْقْ-شّْغڒْ نِيغْ تَّامَانْ ن وقْزِينْ غَارْ ثَادَّارْثْ ن سِيذِي، أَربِّي نّكْ، مِينْزِي أَقَا أَثنْ س ثْنَاينْ ذ إِشْثْ ن جّْعِيفشْثْ غَارْ سِيذِي، أَربِّي نّكْ. ^▫  

‏20 وَارْ تّڭّْ أَرِّيبَا خْ ؤُمَاشْ، وَارْ إِدْجِي أَرِّيبَا خْ نُّوقَارْثْ، وَارْ إِدْجِي أَرِّيبَا خْ مَاشَّا، وَارْ إِدْجِي أَرِّيبَا خْ مَارَّا ثَامسْڒَاشْثْ نِّي إِزمَّارنْ أَذْ د-ثَاوِي أَرِّيبَا. ^▫  ▪   ‏21 ثْزمَّارذْ أَذْ ثڭّذْ أَرِّيبَا خْ ؤُبَارَّانِي، مَاشَا وَارْ ثْزمَّارذْ أَذْ ثڭّذْ أَرِّيبَا خْ ؤُمَاشْ، حِيمَا أَذْ أَشْ إِبَاركْ سِيذِي، أَربِّي نّكْ، ذِي مَارَّا ڒْخذْمثْ ن إِفَاسّنْ نّكْ ذِي ثمُّورْثْ مَانِي إِ غَا ثْرَاحذْ حِيمَا أَذْ ت ثكْسِيذْ ذ ڒْوَارْثْ.

‏22 خْمِي إِ غَا ثڭّذْ إِجّْ ن لْوَاعْذْ إِ سِيذِي، أَربِّي نّكْ، وَارْ ثذِّيكّْوِيڒذْ شَا غَارْ ضفَّارْ ذڭْ ؤُكمّڒْ ن ڒخْڒَاصْ، مِينْزِي سِيذِي، أَربِّي نّكْ، أَذْ زَّايكْ إِتَّارْ أَذْ ث ثْكمّْڒذْ، مَاڒَا لَّا أَذْ خَاكْ يِيڒِي ذ دّنْبْ. ^▪   ‏23 مَاڒَا وَارْ ثڭِّيذْ إِجّْ ن لْوَاعْذْ، وَارْ خَاكْ إِتِّيڒِي دّنْبْ. ‏24 مِينْ د-إِفّْغنْ زِي جَارْ إِينْشِيشنْ نّكْ، أَذْ ث ثْكمّْڒذْ س ثِيذتّْ، أَمْ ثوْهِيبْثْ س ڒْخَاضَارْ نِّي زِي ثْوَاعْذذْ سِيذِي، أَربِّي نّكْ، ثنِّي خْ ثسِّيوْڒذْ س ؤُقمُّومْ نّكْ.

‏25 خْمِي إِ غَا ثَاذْفذْ غَارْ ؤُمَارْجُوعْ ن ؤُضِيڒْ ن ؤُمْقَارَّابْ نّكْ، أَذْ ثْزمَّارذْ أَذْ ثشّذْ أَضِيڒْ عْلَاحْسَابْ مژْرِي ن ڒعْمَارْ نّكْ، مَاشَا إِتّْخصَّا وَارْ ثتّڭّذْ وَالُو ذِي ثْسُودْجثْ نّكْ.

‏26 مَاڒَا ثُوذْفذْ غَارْ إِمنْذِي إِبدّنْ ن ؤُمْقَارّبْ نّكْ، ثْزمَّارذْ أَذْ ثكْسِيذْ ثِيذْرِينْ س إِفَاسّنْ نّكْ، مَاشَا وَارْ إِعدّڒْ أَذْ ثوْثذْ أَمْجَارْ ذڭْ إِمنْذِي إِبدّنْ ن ؤُمْقَارّبْ نّكْ.“ ^▪