‏1 ”حْضَا أَيُورْ ن أَبِيبْ، أَذْ ثسّْوجْذذْ ثَاغَارْصْثْ ن ؤُسعْذُو إِ سِيذِي، أَربِّي نّكْ، مِينْزِي ذڭْ ؤُيُورْ ن أَبِيبْ إِسُّوفّغْ إِ شكْ-د سِيذِي، أَربِّي نّكْ، زِي ثمُّورْثْ ن مِيصْرَا س دْجِيڒثْ. ^▪   ‏2 أَذْ ثْغَارْصذْ إِ ثَاغَارْصْثْ ن ؤُسعْذُو إِ سِيذِي، أَربِّي نّكْ، ؤُدْجِي ذ إِفُونَاسنْ ذ ثْفُونَاسِينْ ذڭْ ومْشَانْ نِّي إِ غَا إِخْضَارْ سِيذِي مَاحنْذْ أَذْ ذِينْ إِسّزْذغْ إِسمْ نّسْ. ‏3 وَارْ كِيسْ تّتّْ شَا س ونْثُونْ. سبْعَا ن وُوسَّانْ أَذْ كِيسْ ثشّذْ أَغْرُومْ بْڒَا أَنْثُونْ، أَغْرُومْ ن ثَامَارَا، مِينْزِي ذغْيَا ثفّْغذْ زِي ثمُّورْثْ ن مِيصْرَا، حِيمَا أَذْ ثْعقْڒذْ خْ وَاسّْ إِ د-تّفّْغذْ زِي مِيصْرَا مَارَّا ؤُسَّانْ ن ثُوذَارْثْ نّكْ. ^▪   ‏4 وَارْ كِيكْ إِتّمْژَارْ ونْثُونْ ذِي مَارَّا جِّيهثْ نّكْ سبْعَا ن وُوسَّانْ ؤُشَا زڭْ ويْسُومْ نِّي إِ ثْغَارْصذْ غَارْ ؤُعشِّي ن وَاسّْ أَمزْوَارُو، وَارْ إِتّْنُوسِي شَا أَڒْ ثِيوشَّا نّسْ. ^▪   ‏5 وَارْ إِحدْجڒْ أَذْ ثْغَارْصذْ إِ ثْغَارْصْطْ ن ؤُسعْذُو غَارْ ذَاخڒْ إِ يِيشْثْ ن ثوُّورَا نِّي ذ أَشْ إِ غَا يوْشْ سِيذِي، أَربِّي نّكْ، ‏6 مَاشَا ذڭْ ومْشَانْ نِّي إِ غَا إِخْضَارْ سِيذِي، أَربِّي نّكْ، حِيمَا أَذْ ذِينْ إِسِّيزْذغْ إِسمْ نّسْ، ذِينْ إِ إِتّْخصَّا أَذْ ثْغَارْصذْ إِ ثْغَارْصْثْ ن ؤُسعْذُو غَارْ ؤُعشِّي خْمِي إِ غَا ثغْڒِي ثْفُوشْثْ ذِي ثْسَاعّثْ نِّي ذِي ثفّْغذْ زِي مِيصْرَا. ‏7 ؤُشَا أَذْ ت ثسّنْڭْوذْ أَذْ ت ثشّذْ ذڭْ ومْشَانْ نِّي إِ غَا إِخْضَارْ سِيذِي، أَربِّي نّكْ. غَارْ ضّْبحْ أَوَارْنِي أَسْ أَذْ ثْعقْبذْ ؤُشَا أَذْ ثْرَاحذْ غَارْ إِقِيضَانْ نّكْ.

‏8 ستَّا ن وُوسَّانْ أَذْ ثشّذْ أَغْرُومْ بْڒَا أَنْثُونْ ؤُشَا ذڭْ وَاسّْ وِيسّْ سبْعَا أَذْ يِيڒِي إِجّْ ن ؤُمُونِي إِفَارْزنْ إِ سِيذِي، أَربِّي نّكْ. خنِّي وَارْ إِحدْجڒْ أَذْ ثڭّذْ ؤُڒَا ذ إِشْثْ ن ڒْخذْمثْ إِ إِتّْخصَّا أَذْ ثتّْوَاڭّْ.

‏9 أَذْ ثْحسْبذْ سبْعَا ن سِيمَانَاثْ إِ يِيخفْ نّكْ. زڭْ وَامِي إِ غَا ثبْذِيذْ أَذْ ثڭّذْ أَمْجَارْ ذڭْ إِمنْذِي إِبدّنْ، أَذْ ثبْذِيذْ أَذْ ثْحسْبذْ سبْعَا ن سِيمَانَاثْ. ^▪  

‏10 أَذْ ثحْضِيذْ ڒْعِيذْ ن سِّيمَانَاثْ إِ سِيذِي، أَربِّي نّكْ. أَذْ ثوْشذْ إِشْثْ ن صّذْقثْ س ڒْخَاضَارْ زڭْ ؤُفُوسْ نّكْ أَمْ مَامّشْ شكْ إِبَاركْ سِيذِي، أَربِّي نّكْ.

‏11 أَذْ ثْفَارْحذْ زَّاثْ إِ وُوذمْ ن سِيذِي، أَربِّي نّكْ، شكْ، مِّيشْ، يدْجِيشْ، إِسْمغْ نّكْ، ثَايَّا نّكْ، أَلَاوِي نِّي إِتّْغِيمَانْ ذَاخڒْ إِ ثوُّورَا نّكْ، أَبَارَّانِي، أَيُوجِيڒْ ذ ثَاجَّاتْشْ نِّي إِدْجَانْ ذِي ڒْوسْثْ نّكْ، ذڭْ ومْشَانْ نِّي إِ غَا إِخْضَارْ سِيذِي، أَربِّي نّكْ، حِيمَا أَذْ ذِينْ إِسّزْذغْ إِسمْ نّسْ.

‏12 أَذْ ثْعقْڒذْ بلِّي ثُوغَا شكْ ذ إِسْمغْ ذِي مِيصْرَا ؤُشَا إِتّْخصَّا أَذْ ثحْضِيذْ ثِيوصَّا أَيَا ؤُ أَذْ ثنْ ثڭّذْ.

‏13 أَذْ ثحْضِيذْ ڒْعِيذْ ن إِعُوشُّوثنْ سبْعَا ن وُوسَّانْ، خْمِي ثْكمّْڒذْ أَسْمُونِي ن صَّابثْ ن ؤُنذْرَارْ نّكْ ذ ؤُژمِّي ن ثْسِيرْثْ نّكْ ن ؤُضِيڒْ. ^▪  

‏14 ؤُشَا أَذْ ثْفَارْحذْ ذِي ڒْعِيذْ نّكْ، شكْ، مِّيشْ، يدْجِيشْ، إِسْمغْ نّكْ، ثَايَّا نّكْ، أَلَاوِي، أَبَارَّانِي، أَيُوجِيڒْ ذ ثَاجَّاتْشْ نِّي إِتّْغِيمَانْ ذَاخڒْ إِ ثوُّورَا نّكْ.

‏15 سبْعَا ن وُوسَّانْ أَذْ ثْعيّْذذْ إِ سِيذِي، أَربِّي نّكْ، ذڭْ ومْشَانْ نِّي إِ غَا إِخْضَارْ سِيذِي، مِينْزِي سِيذِي، أَربِّي نّكْ، أَذْ شكْ إِبَاركْ ذِي مَارَّا ڒْغِيدْجثْ نّكْ ؤُ ذِي مَارَّا ڒْخذْمثْ ن إِفَاسّنْ نّكْ ؤُشَا أَذْ ثْفَارْحذْ س ثِيذتّْ.

‏16 ثْڒَاثَا ن ثْوَاڒَاوِينْ ذڭْ ؤُسڭّْوَاسْ أَذْ د-بَاننْ مَارَّا إِوثْمَانْ نّكْ زَّاثْ إِ وُوذمْ ن سِيذِي، أَربِّي نّكْ، ذڭْ ومْشَانْ نِّي إِ غَا إِخْضَارْ نتَّا: ذِي ڒْعِيذْ ن وغْرُومْ بْڒَا أَنْثُونْ، ذِي ڒْعِيذْ ن سِّيمَانَاثْ، ذِي ڒْعِيذْ ن إِعُوشُّوثنْ. وَارْ د-إِتّْبِينْ ؤُڒَا ذ إِجّْ س إِفَاسّنْ خْوَانْ زَّاثْ إِ وُوذمْ ن سِيذِي. ^▪  

‏17 كُوڒْ أَرْيَازْ أَذْ إِوْشْ أَمْ مَامّشْ مِينْ ذ أَسْ إِمّوْشنْ ذڭْ ؤُفُوسْ نّسْ، أَنشْثْ ن لْبَارَاكَا إِ ذ أَشْ إِوْشَا سِيذِي، أَربِّي نّكْ.

‏18 أَذْ ثْفَارْنذْ ڒْقُوضَاثْ ذ إِوقَّافنْ غَارْ ذَاخڒْ إِ ثوُّورَا نِّي إِ ذ أَشْ غَا إِوْشْ سِيذِي، أَربِّي نّكْ، جَارْ مَارَّا ثِيقبَّاڒْ نّكْ. نِيثْنِي أَذْ حكْمنْ جَارْ ڒْڭنْسْ س إِشْثْ ن ڒحْكَامثْ إِسڭّْذنْ.

‏19 وَارْ ثفّغْ شَا خْ وبْرِيذْ ن ثِيذتّْ، وَارْ تّڭّْ س وُوذْمَاونْ خْمِي إِ غَا ثْحكْمذْ. وَارْ تّطّفْ شَا أَرّشْوثْ، مِينْزِي أَرّشْوثْ ثسّْذَارْغَاڒْ ثِيطَّاوِينْ ن يِينِّي إِحكّْمنْ ؤُ ثسّْفَارَّاغْ أَوَاڒنْ ن يِينِّي إِقَّارنْ ثِيذتّْ. ^▪   ‏20 ثَاسڭْذَا ؤُشَا عَاوذْ ثَاسڭْذَا أَذْ ثضْفَارذْ، حِيمَا أَذْ ثدَّارذْ ؤُشَا أَذْ ثْوَارْثذْ ثَامُّورْثْ نِّي إِ ذ أَشْ غَا إِوْشْ سِيذِي، أَربِّي نّكْ.

‏21 وَارْ تّڭّْ شَا ثَاربِّيثْ ن شْوَارْثِي زِي شَا ن ثْشجَّارْثْ زَّاثْ إِ ؤُعَالْطَارْ ن سِيذِي، أَربِّي نّكْ، ونِّي إِ غَا ثڭّذْ إِ يِيخفْ نّكْ. ^▫   ‏22 وَارْ غَاركْ سّْڭعَّاذْ أَميْضَا إِقدّْسنْ، مِينْزِي ذ مَانْ أَيَا إِشَارّهْ سِيذِي، أَربِّي نّكْ.“