‏1 ”وَارْ غَارّصْ شَا إِ ؤُفُونَاسْ نِيغْ إِ يِيجّنْ زڭْ وُودْجِي إِ ذِي إِدْجْ شَا ن ڒْعِيبْ نِيغْ شَا ن ثُوعفّْنَا إِ سِيذِي، أَربِّي نّكْ، مِينْزِي مَانْ أَيَا ذ جّْعِيفشْثْ إِ سِيذِي، أَربِّي نّكْ. ^▪  

‏2 ؤُمِي يُوفَا ذِي ڒْوسْثْ نّكْ، غَارْ ذَاخڒْ إِ ثوُّورَا نّكْ، ثِينِّي إِ ذ أَشْ إِوْشَا سِيذِي، أَربِّي نّكْ، شَا ن ورْيَازْ نِيغْ شَا ن ثمْغَارْثْ نِّي إِڭِّينْ مِينْ إِدْجَانْ ذ ڒْغَارْ ذِي ثِيطَّاوِينْ ن سِيذِي، أَربِّي نّكْ، ؤُشَا أَمُّو إِ غَا إِعدُّو خْ ڒْعَاهْذْ نّسْ، ^▪   ‏3 ؤُشَا أَذْ يُويُورْ، أَذْ إِسخَّارْ إِ إِربِّيثنْ نّغْنِي ؤُشَا أَذْ أَسنْ يَاضَارْ، إِ ثْفُوشْثْ نِيغْ إِ يُويُورْ نِيغْ إِ مَارَّا إِثْرَانْ ن ؤُجنَّا، مِينْ وَارْ خفْ ؤُمُورغْ نشّْ، ‏4 ؤُشَا يِيوضْ إِ شكْ-د ڒخْبَارْ ؤُشَا ثسْڒِيذْ ت، خنِّي إِتّْخصَّا أَذْ ت ثَارْزُوذْ مْلِيحْ، ؤُ خْزَارْ، مَاڒَا ذ ثِيذتّْ ؤُشَا ثْبَانْ بلِّي ثتّْوَاڭّْ ذِي  إِسْرَايِيلْ جّْعِيفشْثْ ثَانِيثَا، ‏5 خنِّي أَذْ ثسُّوفّْغذْ أَرْيَازْ نِّي نِيغْ ثَامْغَارْثْ نِّي إِ إِڭِّينْ ڒْغَارْ-أَ غَارْ ثوُّورَا نّكْ، أَرْيَازْ نِّي نِيغْ ثَامْغَارْثْ نِّي، ؤُشَا أَذْ ثنْ ثْحجَّارذْ س إِژْرَا أَڒْ غَا مّْثنْ.

‏6 خْ وَاوَاڒْ زڭْ ؤُقمُّومْ ن ثْنَاينْ نِيغْ ثْڒَاثَا ن ڒشْهُوذْ أَذْ إِتّْوَانغْ ونِّي إِتّْوَاحْكمْ سْ ڒْموْثْ. خْ وَاوَاڒْ زڭْ ؤُقمُّومْ ن إِجّْ ن ؤُشهَّاذْ وَارْ إِحدْجڒْ أَذْ إِتّْوَانغْ. ^▪   ‏7 أَفُوسْ ن ڒشْهُوذْ أَذْ خَاسْ وْضَانْ ذ أَمزْوَارُو مَاحنْذْ أَذْ ث نْغنْ ؤُشَا أَوَارْنِي أَسْ أَفُوسْ ن مَارَّا ڒْڭنْسْ. أَمُّو إِ غَا ثكّْسذْ ڒْغَارْ زِي ڒْوسْثْ نّكْ. ^▪  

‏8 خْمِي خَاكْ إِ غَا ثقْسحْ شَا ن ثْمسْڒَاشْثْ ذِي لْحُوكْمْ جَارْ ؤُسِيزّڒْ ن إِذَامّنْ ذ ؤُسِيزّڒْ ن إِذَامّنْ نّغْنِي، جَارْ دّعْوثْ ذ دّعْوثْ، جَارْ ثِيشْثِي ذ ثشْثِي، نِيغْ ذِي لْحُوكْمْ ذڭْ إِمْشُوبَّاشْ غَارْ ذَاخڒْ إِ ثوُّورَا نّكْ، خنِّي أَذْ ثكَّارذْ، أَذْ ثْڭعّْذذْ غَارْ ومْشَانْ نِّي إِ غَا إِخْضَارْ سِيذِي، أَربِّي نّكْ.^▪   ‏9 ؤُشَا أَذْ د-ثَاوْضذْ غَارْ إِكهَّاننْ، غَارْ إِلَاوِييّنْ، ؤُشَا خنِّي غَارْ ڒْقَاضِي نِّي ذِينْ إِدْجَانْ ذڭْ وُوسَّانْ نِّي، ؤُشَا أَذْ ثسّقْسِيذْ ؤُ نِيثْنِي أَذْ شكْ خبَّارنْ خْ ڒحْكَامْ.

‏10 أَذْ ثڭّذْ أَمشْنَاوْ ثَانْفُوتْشْ نِّي إِ شكْ إِ غَا خبَّارنْ ذڭْ ومْشَانْ نِّي إِ غَا إِخْضَارْ سِيذِي ؤُشَا أَذْ ثحْضِيذْ مَارَّا مِينْ ذ أَشْ إِ غَا سّعْذُونْ.

‏11 أَذْ ثڭّذْ عْلَاحْسَابْ أَوَاڒْ ن شَّارِيعَا نِّي ذ أَشْ إِ غَا سشّْننْ ؤُ عْلَاحْسَابْ ڒحْكَامْ نِّي ذ أَشْ إِ غَا إِنِينْ. وَارْ تّْهيِّيضْ خْ وَاوَاڒْ إِ ذ أَشْ غَا إِنِينْ غَارْ يفُّوسْ ؤُڒَا غَارْ ؤُزڒْمَاضْ.

‏12 أَرْيَازْ نِّي إِتّڭّنْ س ثُوفّثْ ؤُ وَارْ إِتّسْڒِي شَا غَارْ ؤُكهَّانْ نِّي إِ ذِينْ إِبدّنْ حِيمَا أَذْ ذِينْ إِسخَّارْ سِيذِي، أَربِّي نّكْ، نِيغْ وَارْ إِتّسْڒِي غَارْ ڒْقَاضِي، أَقَا أَرْيَازْ نِّي أَذْ إِمّثْ. إِتّْخصَّا أَذْ ثكّْسذْ ڒْغَارْ زِي إِسْرَائِيل.

‏13 مَارَّا ڒْڭنْسْ إِتّْخصَّا أَسنْ أَذْ سْڒنْ ؤُ أَذْ ڭّْوذنْ ؤُ وَارْ تُّوفّنْ عَاذْ.

‏14 خْمِي إِ غَا ثَاذْفذْ غَارْ ثمُّورْثْ نِّي ذ أَشْ إِ غَا إِوْشْ سِيذِي، أَربِّي نّكْ ؤُشَا أَذْ ت ثطّْفذْ ذ ڒْوَارْثْ ؤُشَا أَذْ ذَايسْ ثْزذْغذْ ؤُ خنِّي أَذْ ثِينِيذْ: ’أَذْ خَافِي ڭّغْ إِجّْ ن ؤُجدْجِيذْ أَمشْنَاوْ مَارَّا ڒڭْنُوسْ إِ ذ أَيِي-د إِنّْضنْ!‘،

‏15 خنِّي أَذْ خَاكْ ثڭّذْ ذ أَجدْجِيذْ إِ ونِّي إِ غَا إِخْضَارْ سِيذِي، أَربِّي نّكْ. زِي ڒْوسْثْ ن أَيْثْمَاشْ أَذْ ثڭّذْ ذ أَجدْجِيذْ خَاكْ، وَارْ خَاكْ تّڭّْ شَا أَبَارَّانِي نِّي وَارْ إِدْجِينْ شَا ذ ؤُمَاشْ.

‏16 مَاشَا وَارْ إِحدْجڒْ أَذْ يَارْنِي إِيْسَانْ إِ إِخفْ نّسْ ؤُ وَارْ إِتَّارِّي شَا ڒْڭنْسْ غَارْ مِيصْرَا مَاحنْذْ أَذْ يَارْنِي إِيْسَانْ، مِينْزِي سِيذِي إِنَّا أَومْ: ’زِي سَّا ذ ثْسَاونْثْ وَارْ د-ثْعِيقِّيبمْ عمَّارْصْ خْ وبْرِيذْ-أَ.‘

‏17 وَارْ إِكسِّي شَا إِ إِخفْ نّسْ أَطَّاسْ ن ثمْغَارِينْ، حِيمَا وَارْ إِتّْغَارِّي وُوڒْ نّسْ. وَارْ يَارنِّي شَا إِ يِيخفْ نّسْ نُّوقَارْثْ نِيغْ ؤُرغْ س وَاطَّاسْ.

‏18 خْمِي إِ غَا إِقِّيمْ خْ ڒْعَارْشْ ن ثْڭلْذِيثْ نّسْ، خنِّي أَذْ يَارِي إِ يِيخفْ نّسْ ذڭْ إِجّْ ن وذْلِيسْ إِتّْوَانّْضنْ إِشْثْ ن ؤُعَاوذْ ن ثِيرَا ن شَّارِيعَا أَيَا زڭْ وذْلِيسْ نِّي إِدْجَانْ زَّاثْ إِ وُوذمْ ن إِكهَّاننْ، إِلَاوِييّنْ.

‏19 أَذْ غَارسْ يِيڒِي وذْلِيسْ-أَ، أَذْ ذَايسْ إِغَارْ مَارَّا ؤُسَّانْ ن ثُوذَارْثْ نّسْ، حِيمَا أَذْ إِڒْمذْ أَذْ إِڭّْوذْ سِيذِي، أَربِّي نّسْ، أَذْ إِحْضَا مَارَّا أَوَاڒنْ ن شَّارِيعَا أَيَا ذ ثْوصَّا أَيَا ؤُشَا أَذْ زَّايْسنْثْ إِڭّْ. ‏20 حِيمَا وَارْ إِسِّيڒِييْ ؤُڒْ نّسْ خْ يَايْثْمَاسْ نِيغْ أَذْ إِحيّذْ خْ وبْرِيذْ ن ثوْصيّثْ، وَارْ إِدْجِي غَارْ يفُّوسْ ؤُڒَا غَارْ ؤُزڒْمَاضْ، مَاحنْذْ أَذْ زُّوڭَارْثنْ وُوسَّانْ نّسْ ذِي ثْڭلْذِيثْ نّسْ، نتَّا ذ وَارَّاوْ نّسْ، ذِي ڒْوسْثْ ن إِسْرَائِيل.“