‏1 ”غَارْ ؤُنڭَّارْ ن سبْعَا ن إِسڭّْوُوسَا أَذْ يِيڒِي إِجّْ ن وسْمَاحْ ن إِمرْوُوسَا. ^▪   ‏2 ثَا ذ ثَامسْڒَاشْثْ ن ؤُفكِّي زڭْ إِمرْوُوسَا: كُوڒْ بَابْ ن ؤُمَارْوَاسْ ونِّي يَارضْڒنْ زڭْ ؤُفُوسْ نّسْ إِ ؤُمْقَارّبْ نّسْ، أَذْ أَسْ إِسمْحْ إِ ؤُمَارْوَاسْ. وَارْ إِتّتَّارْ شَا أَمَارْوَاسْ زڭْ ؤُمْقَارّبْ نّسْ ؤُڒَا زڭْ ؤُمَاسْ، مِينْزِي إِتّْوَابَارّحْ س ؤُفكِّي ن إِمرْوُوسَا إِ سِيذِي. ‏3 إِعدّڒْ أَذْ ثْڒَاغِيذْ أَبَارَّانِي خْ ؤُمَارْوَاسْ، مَاشَا مِينْ إِدْجَانْ نّكْ غَارْ ؤُمَاشْ، ذ مَانْ أَيَا أَذْ ذَايسْ إِسْمحْ ؤُفُوسْ نّكْ. ‏4 أَقَا وَارْ إِتّْخصِّي شَا أَذْ غَاركْ يِيڒِي ؤُڒَا ذ إِجّْ ن ؤُمزْڒُوضْ، مِينْزِي سِيذِي أَذْ شكْ إِبَاركْ أَطَّاسْ ذِي ثمُّورْثْ نِّي ذ أَشْ إِ غَا إِوْشْ، سِيذِي، أَربِّي نّكْ، ذ ثَاسْغَارْثْ إِ غَا ثْوَارْثذْ، ‏5 مَاڒَا خنِّي ثسْڒِيذْ س ثيْنِيثْ غَارْ ثْمِيجَّا ن سِيذِي، أَربِّي نّكْ، حِيمَا أَذْ ثحْضِيذْ ؤُشَا أَذْ ثڭّذْ مَارَّا ثِيوصَّا-يَا، ثِينِّي خْ ذ أَشْ وصِّيغْ أَسّْ-أَ. ‏6 مِينْزِي سِيذِي، أَربِّي نّكْ، أَذْ أَشْ إِبَاركْ أَمشْنَاوْ مَامّشْ ثُوغَا إِ ذ أَشْ إِنَّا، ؤُشَا أَطَّاسْ ن ڒڭْنُوسْ أَذْ خَاكْ أَرْضْڒنْ س وضْمَانْ، مَاشَا شكْ وَارْ ثَارطّْڒذْ وَالُو س وضْمَانْ خْ ؤُڒَا ذ يِيجّنْ زَّايْسنْ. شكْ أَذْ ثْحكْمذْ خْ وَاطَّاسْ ن ڒڭْنُوسْ، مَاشَا نِيثْنِي وَارْ خَاكْ حكّْمنْ شَا.

‏7 خْمِي ذِينْ غَاركْ إِ غَا يِيڒِي إِجّْ ن ؤُمزْڒُوضْ، إِجّْ زڭْ أَيْثْمَاشْ، غَارْ ذَاخڒْ إِ يِيشْثْ زِي ثوُّورَا ن ثمُّورْثْ نّكْ نِّي إِ ذ أَشْ غَا يوْشْ سِيذِي، أَربِّي نّكْ، خنِّي وَارْ سّقْسَاحْ شَا ؤُڒْ نّكْ ؤُ وَارْ تّْزيَّارْ شَا أَفُوسْ نّكْ خْ ؤُمَاشْ نِّي إِزڒْضنْ، ‏8 مَاشَا أَذْ أَسْ ثَارْزْمذْ أَفُوسْ نّكْ س وشْرِيمْ ؤُ أَذْ أَسْ ثَارضْڒذْ س وضْمَانْ، عْلَاحْسَابْ مِينْ إِحْوَاجْ ذڭْ ؤُزيَّارْ نّسْ. ‏9 حْضَا، وَارْ إِتِّيڒِي ذڭْ وُوڒْ نّكْ ؤُڒَا ذ إِجّْ ن ؤُخَارِّيصْ بَاطڒْ، ثقَّارذْ ذڭْ يِيخفْ نّكْ: ’أَقَا يُوذسْ-د ؤُسڭّْوَاسْ وِيسّْ سبْعَا، أَسڭّْوَاسْ ن ؤُفكِّي ن إِمرْوُوسنْ!‘، ؤُشَا خنِّي أَذْ ثخْزَارذْ س ثِيطَّاوِينْ إِخيّْقنْ خْ ؤُمَاشْ نِّي إِ ذِي إِدْجْ زڒْضْ ؤُشَا وَارْ ذ أَسْ ثتِّيشذْ وَالُو ؤُ نتَّا أَذْ زَّايكْ إِشثْشَا غَارْ سِيذِي ؤُشَا أَذْ خَاكْ يِيڒِي دّنْبْ.

‏10 إِتّْخصَّا أَذْ أَسْ ثوْشذْ ذغْيَا ؤُشَا وَارْ إِتِّيڒِي ؤُخيّقْ ذڭْ وُوڒْ نّكْ خْمِي إِ ذ أَسْ غَا ثوْشذْ، مِينْزِي خْ ؤُيَا أَذْ أَشْ إِبَاركْ سِيذِي، أَربِّي نّكْ، ذِي مَارَّا ڒْخذْمثْ نّكْ ؤُ ذِي مَارَّا مَانِي إِ غَا يَاوضْ ؤُفُوسْ نّكْ. ^▪  

‏11 مِينْزِي أَمژْڒُوضْ وَارْ إِتّْوَامحِّي زِي ثمُّورْثْ. س ؤُيَا نشّْ ؤُمُورغْ شكْ، قَّارغْ: ’أَرْزمْ أَفُوسْ نّكْ أَڒْ طَّارْفْ إِ ؤُمَاشْ، إِ ونِّي إِتّْوَاحْصَارنْ ؤُ إِ ؤُمزْڒُوضْ نِّي إِدْجَانْ ذِي ثمُّورْثْ نّكْ.‘ ^▪  

‏12 مَاڒَا ؤُمَاشْ، إِجّْ ن ؤُعِيبْرَانِي نِيغْ إِشْثْ ن ثْعِيبْرَانشْثْ، إِتّْوَازّنْزْ غَارْكْ، خنِّي أَذْ أَشْ إِخْذمْ ستَّا ن إِسڭّْوُوسَا، مَاشَا ذڭْ ؤُسڭّْوَاسْ وِيسّْ سبْعَا أَذْ أَسْ ثْسَارّْحذْ أَذْ أَسْ ثَارْخُوذْ زَّايكْ س ثْڒلِّي. ^▪  

‏13 خْمِي ذ أَسْ إِ غَا ثْسَارّْحذْ، خنِّي وَارْ ث تّجِّي أَذْ إِرَاحْ س إِفَاسّنْ خْوَانْ.

‏14 أَخْمِي ذ أَسْ غَا ثڭّذْ ثِيسدّشْثْ أَمُّو إِ ذ أَسْ غَا ثڭّذْ إِشْثْ ن ثوْهِيبْثْ زڭْ وُودْجِي ؤُ زڭْ ؤُنذْرَارْ ؤُ زِي ثْسِيرْثْ ن ؤُضِيڒْ. س مِينْ ذ أَشْ إِبَاركْ سِيذِي، أَربِّي نّكْ، أَذْ أَسْ ثوْشذْ إِ نتَّا.

‏15 ؤُشَا أَذْ ثِيذَارذْ بلِّي ثُوغَا شكْ ذ إِسْمغْ ذِي ثمُّورْثْ ن مِيصْرَا ؤُشَا سِيذِي، أَربِّي نّكْ، أَقَا أَذْ خَاكْ إِفْذِي. س ؤُيَا، نشّْ ؤُمُورغْ شكْ خْ ثْمسْڒَاشْثْ-أَ أَسّْ-أَ. ^▫  

‏16 مَاڒَا نتَّا إِنَّا أَشْ: ’وَارْ خَاكْ تَّاڭّْوِيجغْ!‘، مِينْزِي إِتّخْسْ إِ شكْ ذ ڒَادْجْ ن ثَادَّارْثْ نّكْ، مِينْزِي أَقَا نتَّا مْلِيحْ غَاركْ،

‏17 خنِّي أَذْ ثكْسِيذْ إِجّْ ن ؤُسڭْنِي ؤُشَا أَذْ ثسّْنُوقّبْ أَمزُّوغْ نّسْ ؤُڒَا ذ ثوَّارْثْ ؤُشَا أَمُّو إِ غَا يِيڒِي ذ إِسْمغْ نّكْ إِ ڒبْذَا ؤُ أَمُّو إِ غَا ثڭّذْ عَاوذْ س ثَايَّا نّكْ. ^▪  

‏18 وَارْ د-إِتّْبِينْ إِقْسحْ ذِي ثِيطَّاوِينْ نّكْ، خْمِي ث غَا ثسّكّذْ ذِي ثْڒلِّي، مِينْزِي ثُوغَا إِسخَّارْ إِ شكْ ستَّا ن إِسڭّْوُوسَا أَمشْنَاوْ أَشوَّاڒْ س ڒخْڒَاصْ ثْنَاينْ ن ثْسقَّارْ. أَمُّو إِ شكْ إِ غَا إِبَاركْ سِيذِي، أَربِّي نّكْ، ذِي مَارَّا مِينْ غَا ثڭّذْ.

‏19 أَذْ ثسّْقدّْسذْ إِ سِيذِي، أَربِّي نّكْ، مَارَّا إِمنْزَا إِوثْمَانْ إِنِّي د-إِتّْوَاخڒْقنْ جَارْ إِفُونَاسنْ ذ ثْفُونَاسِينْ نّكْ ذ وُودْجِي نّكْ. وَارْ إِعدّڒْ أَذْ ثسّْخذْمذْ أَمنْزُو ن إِفُونَاسنْ نّكْ ؤُشَا أَمنْزُو ن وُودْجِي نّكْ وَارْ ث تّدْجَاسْ. ^▪   ‏20 أَسڭّْوَاسْ أَوَارْنِي إِ ؤُسڭّْوَاسْ أَذْ ثنْ ثشّذْ، شكْ ذ ڒَادْجْ ن ثَادَّارْثْ نّكْ، زَّاثْ إِ وُوذمْ ن سِيذِي، أَربِّي نّكْ، ذڭْ ومْشَانْ إِ غَا إِخْضَارْ سِيذِي. ‏21 مَاشَا مَاڒَا ثُوغَا ذَايسْ ڒْعِيبْ، ثُوغَا-ث ذ أَقِيضَارْ نِيغْ ذ أَذَارْغَاڒْ نِيغْ مِينْ مَا ڒْغِيبْ أَعفَّانْ إِ غَارسْ إِدْجَانْ، وَارْ ذ أَسْ غَارّصْ شَا إِ سِيذِي، أَربِّي نّكْ.^▪   ‏22 ذَاخڒْ إِ ثوُّورَا نّكْ أَذْ زَّايسْ ثشّذْ، أَمْ ؤُمخْمُوجْ أَمْ ؤُمزْذَاڭْ، أَمْ مَامّشْ إِ غَا ثشّذْ زڭْ إِغَايْضْ ن وزْغَارْ ؤُ زڭْ ؤُذَاذْ. ‏23 مْغِيرْ إِذَامّنْ نّسْ، وَارْ ثنْ تّتّْ شَا، أَذْ ثنْ ثْسيّْبذْ خْ ثمُّورْثْ أَمشْنَاوْ أَمَانْ.“ ^▪