‏1 ”خنِّي ڒخُّو، أَ إِسْرَائِيل، سڒْ غَارْ ثْوصَّا ذ لْفَارَايِيضْ نِّي ذ أَومْ سّڒْمَاذغْ مَاⱨ أنْذْ أَذْ ثنْثْ ثڭّمْ حِيمَا أَذْ ثدَّارمْ ؤُشَا أَذْ ثَاذْفمْ ثَامُّورْثْ نِّي ذ أَومْ إِ غَا إِوْشْ سِيذِي، أَربِّي ن إِبَابَاثنْ نْومْ، ؤُشَا أَذْ ت ثْوَارْثمْ. ^▪   ‏2 وَارْ أَرنّْيمْ غَارْ وَاوَاڒْ إِ ذ أَومْ غَا ؤُمُورغْ ؤُ وَارْ زَّايسْ تّكّْسمْ، حِيمَا أَذْ ثِيڒِيمْ ثطّْفمْ ذِي ثْوصَّا ن سِيذِي، أَربِّي نْومْ، ثِينِّي زِي ذ أَومْ تُّومُورغْ. ^▪   ‏3 ثِيطَّاوِينْ نْومْ ژْرِينْثْ مِينْ إِڭَّا سِيذِي أَكْ-ذ بَاعْلْ-فَاغُورْ، مِينْزِي مَارَّا أَرْيَازْ نِّي إِضفَّارنْ بَاعْلْ-فَاغُورْ، أَقَا إِثحَّا إِ-ث سِيذِي، أَربِّي نْومْ، زِي ڒْوسْثْ نْومْ. ^▪   ‏4 مَاشَا كنِّيوْ، إِنِّي إِڒسّْقنْ غَارْ سِيذِي، أَربِّي نْومْ، أَقَا كنِّيوْ مَارَّا ثدَّارمْ عَاذْ أَسّْ-أَ. ‏5 خْزَارمْ، نشّْ سّْڒمْذغْ أَومْ ثِيوصَّا ذ لْفَارَايِيضْ أَمْ مَامّشْ ذ أَيِي يُومُورْ سِيذِي، أَربِّي إِنُو، حِيمَا أَذْ زَّايْسنْثْ ثڭّمْ ذِي ثمُّورْثْ إِ غَارْ إِ غَا ثَاذْفمْ مَاحنْذْ أَذْ ت ثْوَارْثمْ. ‏6 طّْفمْ ذَايْسنْثْ ؤُ ڭّمْ ثنْثْ، مِينْزِي ثَا أَذْ ثِيڒِي ثِيغِيثْ نْومْ ذ ڒعْقڒْ نْومْ زَّاثْ إِ ثِيطَّاوِينْ ن ڒڭْنُوسْ نِّي إِ غَا إِسْڒنْ مَارَّا ثِيوصَّا أَيَا. خنِّي أَذْ إِنِينْ نِيثْنِي: ’ڒْڭنْسْ-أَ أَمقّْرَانْ وَانِيثَا ذ ثِيذتّْ ذ إِجّْ ن ڒْڭنْسْ ذ أَمِيغِيسْ ؤُ س ڒعْقڒْ!‘ ^▫   ‏7 مِينْزِي مَانْ ڒْڭنْسْ إِمْغَارنْ إِ ذَا إِدْجَانْ، أَقَا غَارسْ أَربِّي يُوذْسنْ أَمْ سِيذِي، أَربِّي نّغْ، ڒبْذَا خْمِي خَاسْ نتّْڒَاغَا؟ ^▪   ‏8 ؤُ مَانْ ڒْڭنْسْ ذَا إِدْجَانْ إِمْغَارْ، أَقَا غَارسْ ثِيوصَّا ذ لْفَارَايِيضْ إِسڭّْمنْ أَمشْنَاوْ مَارَّا شَّارِيعَا أَيَا نِّي ذ أَومْ غَا وْشغْ أَسّْ-أَ؟

‏9 مَاشَا حْضَا خْ يِيخفْ نّكْ ؤُشَا طّفْ نِيشَانْ أَشْبَارْ خْ ڒعْمُورْ نّكْ حِيمَا وَارْ ثتُّوذْ مِينْ ژْرِينْثْ ثِيطَّاوِينْ نّكْ ؤُ حِيمَا ثِيمسْڒَايِينْ-أَ وَارْ د-تّفّْغنْثْ شَا زڭْ وُوڒَاونْ نّكْ. إِتّْخصَّا أَذْ ثنْثْ ثسَّارْڭْبذْ إِ إِحنْجِيرنْ نّكْ ؤُ إِ إِحنْجِيرنْ ن إِحنْجِيرنْ نّكْ. ^▪  

‏10 أَسّْ مِينْ ذِي ثُوغَا ثْبدّذْ غَارْ وذْرَارْ ن حُورِيبْ زَّاثْ إِ وُوذمْ ن سِيذِي، أَربِّي نّكْ، ڒَامِي ذ أَيِي إِنَّا سِيذِي: ’سْمُونْ غَارِي ڒْڭنْسْ-أَ، خنِّي نشّْ أَذْ ثنْ أَرّغْ أَذْ سْڒنْ أَوَاڒنْ إِنُو مَاحنْذْ أَذْ ثنْ سّْڒمْذنْ حِيمَا أَذْ زَّايِي ڭّْوذنْ مَارَّا ؤُسَّانْ نِّي إِدَّارنْ ذِي ثمُّورْثْ ؤُشَا حِيمَا أَذْ ثنْ سّْڒمْذنْ إِ إِحنْجِيرنْ نْسنْ.‘

‏11 خنِّي ثْقَارّْبمْ-د كنِّيوْ ؤُشَا ثْبدّمْ غَارْ إِضَارنْ ن وذْرَارْ ؤُشَا أَذْرَارْ يَارْغَا أَڒَامِي ثِيمسِّي نّسْ ثِيوضْ غَارْ ڒْوسْثْ ن ؤُجنَّا، ؤُشَا خنِّي أَقَا ذِينْ ثَادْجسْثْ ذ إِسيْنُوثنْ ذ يِيجّْ ن ؤُسيْنُو إِبُّومْبسْ. ^▫  ▪  

‏12 خنِّي إِسِّيوڒْ سِيذِي أَكِيذْومْ زِي ڒْوسْثْ ن ثْمسِّي. كنِّيوْ ثسْڒِيمْ إِ ڒْحسّْ ن وَاوَاڒنْ، مَاشَا وَارْ ثژْرِيمْ شَا أَدُّوذْ نّسْ، مْغِيرْ إِشْثْ ن ثْمِيجَّا ؤُمِي ثسْڒِيمْ وَاهَا.

‏13 نتَّا إِسَّارْڭبْ كنِّيوْ خْ ڒْعَاهْذْ نّسْ نِّي يُومُورْ أَذْ ث ثڭّمْ، عشْرَا ن وَاوَاڒنْ. يُورَا ثنْ ذِي ثْنَاينْ ن ثڒْوِيحِينْ ن وژْرُو.

‏14 إِ نشّْ عَاوذْ يُومُورْ سِيذِي ذِي ڒْوقْثْ نِّي مَاحنْذْ أَذْ كنِّيوْ سّْڒمْذغْ ثِيوصَّا ذ لْفَارَايِيضْ مَاحنْذْ أَذْ زَّايْسنْثْ ثڭّمْ ذِي ثمُّورْثْ إِ غَارْ إِ غَا ثژْوَامْ حِيمَا أَذْ ت ثْوَارْثمْ.

‏15 حْضَامْ نِيشَانْ خْ ڒعْمُورْ نْومْ، مِينْزِي كنِّيوْ وَارْ ثژْرِيمْ ؤُڒَا ذ إِجّْ ن وَادُّوذْ ذڭْ وَاسّْ ؤُمِي أَكِيذْومْ إِسِّيوڒْ سِيذِي خْ وذْرَارْ ن حُورِيبْ زِي ڒْوسْثْ ن ثْمسِّي!

‏16 وَارْ تّسّفْسَاذمْ إِخفْ نْومْ ؤُمِي غَا ثڭّمْ إِ يِيخفْ نْومْ إِجّْ ن ڒخْيَاڒْ إِنقْشنْ، أَدُّوذْ ن شَا ن إِجّْ ن صَّانَامْ، أَدُّوذْ ن شَا ن إِجّْ ن ووْثمْ نِيغْ ن إِشْثْ ن ثوْثمْثْ،

‏17 إِجّْ ن وَادُّوذْ ن شَا ن إِجّْ ن ؤُمُودَّارْ نِّي إِدْجَانْ خْ ثمُّورْثْ، نِيغْ إِجّْ ن وَادُّوذْ ن شَا ن إِجّْ ن وجْضِيضْ س وفْرِيونْ إِ إِطَّاونْ ذڭْ ؤُجنَّا،

‏18 نِيغْ إِجّْ ن وَادُّوذْ ن شَا ن إِجّْ ن ؤُمُودَّارْ نِّي إِتّْپُوعنْ خْ ثمُّورْثْ، نِيغْ إِجّْ ن وَادُّوذْ ن شَا ن إِجّْ ن وسْڒمْ نِّي إِدْجَانْ ذڭْ وَامَانْ سَاذُو ثمُّورْثْ،

‏19 ؤُ غَاركْ أَذْ ثسّْڭعّْذذْ ثَامُوغْڒِي نّكْ غَارْ ؤُجنَّا ؤُشَا خنِّي أَذْ ثْژَارذْ ثَافُوشْثْ ذ ؤُيُورْ ذ إِثْرَانْ، مَارَّا ڒْعسْكَارْ ن ؤُجنَّا، ؤُشَا خنِّي أَذْ تّْوَاعَارّْنذْ أَذْ أَسنْ ثَاضَارذْ ؤُشَا أَذْ أَسنْ ثْعبْذذْ إِ نِيثْنِي إِنِّي إِبْضَا سِيذِي، أَربِّي نّكْ، إِ مَارَّا ڒڭْنُوسْ سَاذُو مَارَّا أَجنَّا. ‏20 سِيذِي أَقَا إِقْبڒْ إِ كنِّيوْ ؤُشَا إِسُّوفّغْ إِ كنِّيوْ-د زڭْ ؤُفَارَّانْ ن وُوزَّاڒْ، زِي مِيصْرَا، حِيمَا أَذْ أَسْ ثِيڒِيمْ ذ إِجّْ ن ڒْڭنْسْ إِ إِوَارْثْ نتَّا، أَمْ ثدْجْ أَسّْ-أَ. ^▪  

‏21 عَاوذْ إِسْعَارْ خَافِي سِيذِي ذِي سِّيبّثْ ن وَاوَاڒنْ نْومْ ؤُشَا إِجِّيدْجْ بلِّي وَارْ عدُّوغْ لْ'ؤُرْذُونْ ؤُ وَارْ تِّيذْفغْ ثَامُّورْثْ إِصبْحنْ نِّي ذ أَشْ إِ غَا إِوْشْ سِيذِي، أَربِّي نّكْ، ذ ڒْوَارْثْ، ^▪   ‏22 مِينْزِي نشّْ أَذْ مّْثغْ ذِي ثمُّورْثْ-أَ، وَارْ ژكّْوِيغْ شَا لْ'ؤُرْذُونْ. كنِّيوْ أَذْ ثژْوَامْ ؤُشَا أَذْ ثطّْفمْ ثَامُّورْثْ-أَ إِشْنَانْ. ‏23 حْضَامْ وَارْ ثتُّومْ ڒْعَاهْذْ ن سِيذِي، أَربِّي نْومْ ونِّي إِڭِّينْ أَكِيذْومْ ؤُشَا حْضَامْ وَارْ تّڭّمْ إِ يِيخفْ نْومْ إِجّْ ن ڒخْيَاڒْ إِنقْشنْ ن شَا ن إِشْثْ ن ڒْحَاجّثْ نِّي ذ أَشْ إِحَارّمْ سِيذِي، أَربِّي نّكْ. ‏24 مِينْزِي سِيذِي، أَربِّي نّكْ، أَقَا-ث ذ إِشْثْ ن ثْمسِّي إِتّتّنْ، ذ إِجّْ ن أَربِّي إِتَّاسْمنْ. ^▪  

‏25 خْمِي إِ غَا ثَارْومْ أَرَّاوْ ذ أَيَّاونْ ؤُشَا أَذْ ثوْسَارمْ ذِي ثمُّورْثْ ؤُشَا خنِّي أَذْ ثْذدْجْممْ إِخفْ نْومْ، أَذْ ثڭّمْ إِجّْ ن ڒخْيَاڒْ إِنقْشنْ، صِّيفّثْ ن شَا ن ڒْحَاجّثْ ؤُشَا أَذْ ثڭّمْ ڒْغَارْ ذِي ثِيطَّاوِينْ ن سِيذِي، أَربِّي نْومْ ؤُمِي إِ ث غَا ثسْعَارمْ أَمُّو، ‏26 خنِّي نشّْ أَسّْ-أَ أَذْ ڒَاغِيغْ خْ ؤُجنَّا ذ ثمُّورْثْ ذ ڒشْهُوذْ خَاومْ، أَقَا كنِّيوْ أَذْ ثتّْوَاهلّْكمْ ذغْيَا س ثِيذتّْ ذِي ثمُّورْثْ إِ غَارْ إِ غَا ثژْوَامْ غَارْ لْ'ؤُرْذُونْ مَاحنْذْ أَذْ ت ثكْسِيمْ ذ ڒْوَارْثْ. وَارْ ذَايسْ ثتّْغِيمِيمْ كنِّيوْ شَا ن وُوسَّانْ كْثَارْ عَاذْ، مِينْزِي أَذْ ثتّْوَاثحَّامْ قَاعْ. ‏27 سِيذِي أَذْ كنِّيوْ إِبزّعْ جَارْ ڒڭْنُوسْ ؤُشَا أَذْ زَّايْومْ إِقِّيمْ إِجّْ ن وُورُو ن يرْيَازنْ وَاهَا جَارْ ڒڭْنُوسْ مَانِي كنِّيوْ إِ غَا إِنْذهْ سِيذِي. ^▪   ‏28 ذِينْ أَذْ ثْسخَّارمْ إِربِّيثنْ نِّي إِتّْوَاڭّنْ س إِفَاسّنْ ن بْنَاذمْ س ؤُكشُّوضْ ذ وژْرُو، إِنِّي وَارْ إِتّْوَاڒِينْ، وَارْ إِتّسْڒِينْ، وَارْ إِتّتّنْ ؤُ وَارْ إِتّْشمَّانْ. ^▪  

‏29 خنِّي أَذْ ثَارْزُومْ سّنِّي سِيذِي، أَربِّي نّكْ، ؤُ شكْ أَذْ ث ثَافذْ، مَاڒَا ثَارزُّوذْ خَاسْ س مَارَّا ؤُڒْ نّكْ ذ مَارَّا ڒعْمَارْ نّكْ. ^▫   ‏30 مَاڒَا شكْ ذِي ڒحْصَارثْ ؤُشَا أَذْ غَاركْ د-أَسنْ مَارَّا أَوَاڒنْ-أَ ذڭْ ؤُنڭَّارُو ن وُوسَّانْ، خنِّي أَذْ د-ثْذوْڒذْ غَارْ سِيذِي، أَربِّي نّكْ، ؤُ أَذْ ثسْڒذْ إِ ثْمِيجَّا نّسْ، ‏31 مِينْزِي سِيذِي، أَربِّي نّكْ، ذ إِجّْ ن أَربِّي يَارحّْمنْ، وَارْ شكْ إِتّجِّي ؤُ وَارْ شكْ إِتَّاردّدْجْ. وَارْ إِتّتُّو ڒْعَاهْذْ ن إِبَابَاثنْ نّكْ نِّي ذ أَسنْ إِجِّيدْجْ.

‏32 سقْسَا خنِّي خْ وُوسَّانْ إِعْذُونْ نِّي إِدْجَانْ قْبڒْ إِ شكْ، زڭْ وَاسّْ مِينْ ذِي إِڭَّا أَربِّي بْنَاذمْ خْ ثمُّورْثْ، سقْسَا زِي طَّارْفْ ن ؤُجنَّا غَارْ طَّارْفْ نّغْنِي ن ؤُجنَّا، مَا عمَّارْصْ مَا ثمْسَارْ شَا ن ڒْحَاجّثْ ثمْغَارْ أَنشْثْ ن ثَانِيثَا نِيغْ إِتّْوَاسڒْ شَا أَمْ مَانَايَا؟ ‏33 مَا عمَّارْصْ مَا إِسْڒَا شَا ن ڒْڭنْسْ ثْمِيجَّا ن أَربِّي ثسِّيوڒْ زِي ڒْوسْطْ ن ثْمسِّي، أَمْ مَامّشْ ت تّسْڒِيذْ شكْ، ؤُشَا وَاخَّا أَمنِّي إِقِّيمْ إِدَّارْ؟ ‏34 نِيغْ مَا إِقدْجبْ عمَّارْصْ إِجّْ ن أَربِّي أَذْ د-يَاسْ أَذْ إِكْسِي إِ يِيخفْ نّسْ إِجّْ ن ڒْڭنْسْ زِي ڒْوسْثْ ن إِجّْ ن ڒْڭنْسْ نّغْنِي س ثْجَارِّيبِينْ، س ڒعْڒَامَاثْ، س لْمُوعْجِيزَاثْ، س ؤُمنْغِي، س ؤُفُوسْ إِجهْذنْ، س ؤُغِيڒْ إِسّْوِيژّْضنْ ؤُ س ثْمڭَّا سِّيڭّْوِيذنْثْ مْغَارنْثْ، أَمشْنَاوْ مَارَّا مِينْ إِڭَّا سِيذِي، أَربِّي نْومْ، زَّاثْ إِ ثِيطَّاوِينْ نْومْ ذِي مِيصْرَا؟ ‏35 أَقَا إِ شكْ ؤُمِي د-إِتّْوَاسّْبَانْ أَيَا، حِيمَا أَذْ ثسّْنذْ بلِّي سِيذِي ذ أَربِّي إِ إِدْجْ. وَارْ ذِينْ شَا نّغْنِي مْغِيرْ نتَّا.^▪   ‏36 زڭْ ؤُجنَّا إِڭَّا أَذْ ثسْڒذْ إِ ثْمِيجَّا نّسْ حِيمَا أَذْ شكْ إِنبّهْ ؤُ خْ ثمُّورْثْ أَقَا إِسّْشنْ أَشْ ثِيمسِّي نّسْ إِمْغَارنْ ؤُ أَقَا ثسْڒِيذْ أَوَاڒنْ نّسْ زِي ڒْوسْثْ ن ثْمسِّي. ‏37 مِينْزِي نتَّا ثُوغَا إِخْسْ إِبَابَاثنْ نّكْ، ؤُ إِفَارْزْ زَّارِيعثْ نّسْ أَوَارْنِي أَسْ، أَقَا إِسُّوفّغْ إِ شكْ-د س وُوذمْ نّسْ زِي مِيصْرَا س جّهْذْ نّسْ إِمْغَارنْ ^▪   ‏38 حِيمَا أَذْ يَاژّڒْ خْ ڒڭْنُوسْ إِمْغَارنْ ذ يِينِّي خَاكْ إِجهْذنْ زَّاثْ إِ وُوذمْ نّكْ ؤُ حِيمَا أَذْ شكْ ذَايسْ إِسِّيذفْ ؤُ أَذْ أَشْ إِوْشْ ثَامُّورْثْ نْسنْ ذ ڒْوَارْثْ، أَمْ مَامّشْ إِ ثدْجْ أَسّْ-أَ. ‏39 خنِّي سّنْ أَسّْ-أَ ؤُشَا خَارّصْ خْ مَانْ أَيَا ذڭْ وُوڒْ نّكْ بلِّي سِيذِي ذ أَربِّي إِ يدْجْ، سنّجْ ذڭْ ؤُجنَّا ؤُ سْوَادَّايْ ذِي ثمُّورْثْ، وَارْ ذِينْ حذْ نّغْنِي! ‏40 طّفْ ذِي ثْوصَّا نّسْ ؤُ ذِي ڒُومُورَاثْ نّسْ ثِينِّي ذ أَشْ ؤُمُورغْ أَسّْ-أَ حِيمَا أَذْ إِفّغْ ؤُمدُّورْ مْلِيحْ إِ شكْ ؤُ إِ إِحنْجِيرنْ نّكْ أَوَارْنِي أَشْ ؤُشَا أَذْ ثقِّيمذْ ؤُسَّانْ كْثَارْ ذِي ثمُّورْثْ إِ ذ أَشْ إِ غَا إِوْشْ سِيذِي، أَربِّي نّكْ، مَارَّا ؤُسَّانْ.“

‏41 خنِّي إِفَارْزْ مُوسَا ثْڒَاثَا ن ثْندَّامْ خْ ؤُجمَّاضْ ن لْ'ؤُرْذُونْ مَانِيسْ د-ثْنقَّارْ ثْفُوشْثْ، ^▪   ‏42 حِيمَا أَذْ ذِينْ يَاڒْورْ ؤُقتَّاڒْ نِّي إِنْغِينْ، بْڒَا مَا أَذْ أَسْ إِڭّْ ڒحْسَابْ، أَمْقَارّبْ نّسْ ونِّي ؤُمِي وَارْ إِشَارّْهنْ عمَّارْصْ إِضنَّاضْ ؤُڒَا ذ فَارِيضنَّاضْ. وَانِيثَا إِزمَّارْ أَذْ يَارْوڒْ غَارْ إِشْثْ زِي ثْندَّامْ-أَ أَڒَامِي إِقِّيمْ إِدَّارْ نتَّا. ‏43 بَاصِيرْ ذِي ڒخْڒَا، ذِي ڒْوَاطَا يُوعْڒَانْ، إِ رُوبِينِييّنْ ؤُ رَامُوثْ ذِي جِيلْعَاذْ إِ إِجَاذِييّنْ ؤُ جُولَانْ ذ بَاشَانْ إِ إِمَانَاسِّييّنْ. ^▪  

‏44 ثَا ذ شَّارِيعَا نِّي إِڭَّا مُوسَا زَّاثْ إِ أَيْثْ ن إِسْرَائِيل. ‏45 إِنَا ذ شّْهَاذَاثْ ذ ثِيوصَّا ذ لْفَارَايِيضْ نِّي إِسِّيوڒْ مُوسَا غَارْ أَيْثْ ن إِسْرَائِيل ؤُمِي د-فّْغنْ زِي مِيصْرَا. ‏46 أَيَا ثُوغَا خْ ؤُجمَّاضْ ن لْ'ؤُرْذُونْ، ذِي ثغْزُورْثْ أَرنْذَاذْ ن بَايْثْ-فَاغُورْ، ذِي ثمُّورْثْ ن سِيحُونْ، أَجدْجِيذْ ن إِمُورِييّنْ، ونِّي ثُوغَا إِزدّْغنْ ذِي حَاشْپُونْ، ونِّي خْ إِغْڒبْ مُوسَا أَكْ-ذ أَيْثْ ن إِسْرَائِيل ؤُمِي د-فّْغنْ زِي مِيصْرَا. ^▪   ‏47 أَقَا كْسِينْ ثَامُّورْثْ نّسْ أَمْ ڒْوَارْثْ ؤُڒَا ذ ثَامُّورْثْ ن عُوجْ، أَجدْجِيذْ ن بَاشَانْ، ثِيمُّورَا ن ثْنَاينْ ن إِجدْجِيذنْ ن إِمُورِييّنْ نِّي ثُوغَا زدّْغنْ خْ ؤُجمَّاضْ ن لْ'ؤُرْذُونْ مَانِيسْ د-ثْنقَّارْ ثْفُوشْثْ، ^▪   ‏48 زِي عَارُوعِيرْ نِّي إِدْجَانْ غَارْ ثْمَا ن ثغْزَارْثْ ن أَرْنُونْ أَڒْ وذْرَارْ ن سِييُونْ نِّي إِدْجَانْ ذ وذْرَارْ ن حِيرْمُونْ، ‏49 ذ مَارَّا ڒوْضَا خْ ؤُجمَّاضْ ن لْ'ؤُرْذُونْ، غَارْ شَّارْقْ، أَڒْ ڒبْحَارْ ن ڒوْضَا نِّي إِدْجَانْ وَادَّايْ ن ثيْسَارِينْ ن وذْرَارْ ن فِيسْجَا.