5
1 إِڒَاغَا مُوسَا إِ مَارَّا إِسْرَائِيل ؤُشَا إِنَّا أَسنْ: ”سْڒمْ، أَ إِسْرَائِيل، إِ ثْوصَّا ذ لْفَارَايِيضْ إِنِّي سِّيوْڒغْ نشّْ أَسّْ-أَ ذڭْ إِمزُّوغنْ نْومْ، حِيمَا أَذْ ثنْثْ ثْڒمْذمْ ؤُ أَذْ ثنْثْ ثحْضَامْ مَاحنْذْ أَذْ زَّايْسنْثْ ثڭّمْ. 2 سِيذِي، أَربِّي نّغْ، إِڭَّا إِجّْ ن ڒْعَاهْذْ أَكِيذْنغْ ذِي حُورِيبْ. ▪ 3 وَارْ إِدْجِي أَكْ-ذ إِبَابَاثنْ نّغْ إِ إِڭَّا أَربِّي ڒْعَاهْذْ-أَ، مَاشَا أَكِيذْنغْ، نشِّينْ إِنِّي ذَا إِبدّنْ دَّارنْ مَارَّا أَسّْ-أَ. 4 ؤُذمْ أَكْ-ذ وُوذمْ إِسِّيوڒْ سِيذِي أَكِيذْومْ خْ وذْرَارْ، زِي ڒْوسْثْ ن ثْمسِّي 5 - ثُوغَا أَيِي ذِي ڒْوقْثْ نِّي بدّغْ جَارْ سِيذِي ذ كنِّيوْ حِيمَا أَذْ كنِّيوْ سَّارڭْبغْ خْ وَاوَاڒْ ن سِيذِي، مِينْزِي ثُوغَا كنِّيوْ ثڭّْوْذمْ زِي ثْمسِّي ؤُ وَارْ ثْڭعَّاذمْ شَا غَارْ وذْرَارْ - ؤُشَا نتَّا إِنَّا: ▪ 6 ’نشّْ ذ سِيذِي، أَربِّي نّكْ، ونِّي شكْ-د إِسُّوفّْغنْ زِي ثمُّورْثْ ن مِيصْرَا، زِي ثَادَّارْثْ ن ثسْمُوغِي. ▪ 7 وَارْ غَاركْ تِّيڒِينْ شَا ن إِربِّيثنْ نّغْنِي زَّاثْ إِ وُوذمْ إِنُو. 8 وَارْ تّڭّْ إِ يِيخفْ نّكْ إِجّْ ن ڒخْيَاڒْ إِنقْشنْ نِيغْ مِينْ مَا صِّيفّثْ ن مِينْ ذِينْ إِدْجَانْ سنّجْ ذڭْ ؤُجنَّا نِيغْ سْوَادَّايْ خْ ثمُّورْثْ نِيغْ ذڭْ وَامَانْ سَاذُو ثمُّورْثْ. 9 وَارْ ڭُّورْ أَذْ أَسنْ ثَاضَارذْ ؤُ أَذْ ثنْ ثْسخَّارذْ، مِينْزِي نشّْ، سِيذِي، أَربِّي نّكْ، ذ إِجّْ ن أَربِّي إِتَّاسْمنْ، ونِّي د-يَارزْفنْ ڒْمُوعْصِييّثْ ن إِبَابَاثنْ ذڭْ إِحنْجِيرنْ أَڒْ جِّيڒْ وِيسّْ ثْڒَاثَا ؤُ وِيسّْ أَربْعَا ن يِينِّي ذ أَيِي إِشَارّْهنْ، ▪
10 ذ ونِّي إِسّشْننْ ثَامخْسِيوْثْ إِشوَّارنْ إِ ڒُوڒُوفْ ن يِينِّي ذ أَيِي إِتّخْسنْ ؤُ حطَّانْ ثِيوصَّا إِنُو.
11 وَارْ نطّقْ س يِيسمْ ن سِيذِي، أَربِّي نّكْ، ذِي ڒْبَاطڒْ، مِينْزِي سِيذِي وَارْ إِتّْبَارِّي ونِّي إِ غَا إِنطْقنْ س يِيسمْ نّسْ ذِي ڒْبَاطڒْ. ▪
12 حْضَا أَسّْ ن سّبْثْ حِيمَا أَذْ ث ثسّْقدّْسذْ أَمْ مَامّشْ ذ أَشْ يُومُورْ سِيذِي، أَربِّي نّكْ. ▪
13 ستَّا ن وُوسَّانْ أَذْ ثْخذْمذْ، أَذْ ثڭّذْ مَارَّا ڒْخذْمثْ نّكْ،
14 مَاشَا أَسّْ وِيسّْ سبْعَا ذ وَاسّْ ن سّبْثْ ن سِيذِي، أَربِّي نّكْ. وَارْ ذَايسْ ثتّڭّذْ ؤُڒَا ذ إِشْثْ ن ڒْخذْمثْ، شكْ ذ مِّيشْ ذ يدْجِيشْ ذ يِيسْمغْ نّكْ ذ ثَايَّا نّكْ ذ ؤُفُونَاسْ نّكْ ذ وغْيُوڒْ نّكْ ذ ڒبْهَايمْ نّكْ ؤُڒَا ذ أَبَارَّانِي نِّي أَكِيكْ إِدْجَانْ ذَاخڒْ إِ ثوُّورَا نّكْ، حِيمَا إِسْمغْ نّكْ ذ ثَايَّا نّكْ أَذْ أَريّْحنْ أَمْ شكْ.
15 أَذْ ثْعقْڒمْ بلِّي ثُوغَا شكْ ذ إِسْمغْ ذِي ثمُّورْثْ ن مِيصْرَا ؤُ سِيذِي، أَربِّي نّكْ، أَقَا إِسُّوفّغْ إِ شكْ-د سّنِّي س يِيجّْ ن ؤُفُوسْ إِجهْذنْ ذ إِجّْ ن ؤُغِيڒْ إِسّْوِيژّْذنْ. س ؤُينِّي يُومُورْ شكْ سِيذِي، أَربِّي نّكْ، أَذْ ثحْضِيذْ أَسّْ ن سّبْثْ.
16 وقَّارْ بَابَاشْ ذ يمَّاشْ، أَمْ مَامّشْ إِ ذ أَكْ يُومُورْ سِيذِي، أَربِّي نّكْ مَاحنْذْ ؤُسَّانْ ن ثُوذَارْثْ نّكْ زمَّارنْ أَذْ زُّوڭَّارْثنْ ؤُشَا أَذْ إِفّغْ ؤُمدُّورْ نّكْ مْلِيحْ ذِي ثمُّورْثْ إِ ذ أَشْ غَا إِوْشْ سِيذِي، أَربِّي نّكْ. ▪
17 وَارْ نقّْ. ▪
18 وَارْ زنَّا. ▪
19 وَارْ تَّاشَارْ.
20 وَارْ شهّذْ س ژُورْ ضِيدّْ إِ ؤُمْقَارّبْ نّكْ. 21 وَارْ تّڭّْ مژْرِي ذِي ثمْغَارْثْ ن ؤُمْقَارّبْ نّكْ ؤُ وَارْ ضمّعْ ذِي ثَادَّارْثْ ن ؤُمْقَارّبْ نّكْ، نِيغْ ذڭْ إِيَّارْ نّسْ، نِيغْ ذڭْ يِيسْمغْ نّسْ، نِيغْ ذِي ثَايَّا نّسْ، نِيغْ ذڭْ ؤُفُونَاسْ نّسْ، نِيغْ ذڭْ وغْيُوڒْ نّسْ، نِيغْ ذِي شَا زِي مَارَّا مِينْ إِدْجَانْ غَارْ ؤُمْقَارّبْ نّكْ.‘ ▪
22 إِسِّيوڒْ سِيذِي أَوَاڒنْ-أَ أَكْ-ذ مَارَّا أَڭْرَاوْ نْومْ ن ڒْڭنْسْ س إِشْثْ ن ثْمِيجَّا إِجهْذنْ خْ وذْرَارْ، زِي ڒْوسْثْ ن ثْمسِّي، زڭْ إِسيْنُوثنْ ؤُ زڭْ ؤُسيْنُو إِبُّومْبسْ ؤُ وَارْ إِمَّارْنِي شَا كْثَارْ. يُورِي ثنْ خْ ثْنَاينْ ن ثڒْوِيحِينْ ن وژْرُو ؤُشَا إِوْشَا إِ-ثنْثْ إِ نشّْ. 23 ؤُشَا إِمْسَارْ، ؤُمِي ثسْڒِيمْ كنِّيوْ إِ ثْمِيجَّا زِي ڒْوسْثْ ن ثَادْجسْثْ ؤُشَا أَذْرَارْ إِشمّضْ س ثْمسِّي، أَقَا ثْقَارّْبمْ-د غَارِي، مَارَّا إِزدْجِيفنْ ن ثْقبَّاڒْ نْومْ ذ إِمْغَارنْ نْومْ، 24 ثنَّامْ أَيِي: ’خْزَارْ، سِيذِي، أَربِّي نّغْ، إِسّْشنْ أَنغْ-د أَعُودْجِي نّسْ ذ ڒمْغَارثْ نّسْ ؤُشَا نسْڒَا إِ ثْمِيجَّا نّسْ زِي ڒْوسْثْ ن ثْمسِّي. أَسّْ-أَ نژْرَا بلِّي سِيذِي إِسِّيوڒْ أَكْ-ذ بْنَاذمْ ؤُشَا وَا إِقِّيمْ إِدَّارْ. 25 ڒخُّو خنِّي، مَايمِّي إِ غَا نمّثْ؟ مِينْزِي ثِيمسِّي أَيَا إِمْغَارنْ أَذْ أَنغْ ثشّْ. مَاڒَا نقِّيمْ نتّسْڒَا إِ ثْمِيجَّا ن سِيذِي، أَربِّي نّغْ، أَذْ نمّثْ. 26 مِينْزِي مَانْ ونْ إِ يدْجَانْ جَارْ مَارَّا مِينْ غَارسْ أَرِّيمثْ، ونِّي إِسْڒَانْ إِ ثْمِيجَّا ن أَربِّي إِدَّارنْ ثسِّيوڒْ-د زِي ڒْوسْثْ ن ثْمسِّي أَمْ نشِّينْ، ذ ونِّي إِدَّارنْ عَاذْ؟ ▪ 27 أَذْ د-ثْقَارّْبذْ شكْ ؤُ أَذْ ثسْڒذْ غَارْ مَارَّا مِينْ غَا يِينِي سِيذِي، أَربِّي نّغْ، ؤُشَا خنِّي أَذْ ثسِّيوْڒذْ شكْ أَكِيذْنغْ خْ مَارَّا مِينْ ذ أَشْ غَا إِسِّيوڒْ سِيذِي، أَربِّي نّغْ، ؤُ نشِّينْ أَذْ أَسْ نْسڒْ ؤُشَا أَذْ زَّايسْ نڭّْ.‘ ▪
28 إِسْڒَا سِيذِي إِ ثْمِيجَّا ن وَاوَاڒنْ نْومْ ؤُمِي كِيذِي ثسِّيوْڒمْ ؤُشَا إِنَّا أَيِي سِيذِي: ’سْڒِيغْ إِ ثْمِيجَّا ن وَاوَاڒنْ ن ڒْڭنْسْ-أَ، أَوَاڒنْ نِّي كِيكْ سِّيوْڒنْ. أَقَا ڭِّينْ مْلِيحْ ؤُمِي كِيكْ سِّيوْڒنْ مَارَّا أَيَا. 29 إِڒِي أَذْ أَسنْ إِمّوْشْ إِجّْ ن وُوڒْ أَمُّو مَاحنْذْ أَذْ أَيِي ڭّْوذنْ ؤُشَا أَذْ حْضَانْ ثِيوصَّا إِنُو مَارَّا ؤُسَّانْ قَاعْ حِيمَا نِيثْنِي ذ وَارَّاوْ نْسنْ أَذْ إِڒِينْ مْلِيحْ إِ ڒبْذَا! 30 رُوحْ، ثِينِيذْ أَسنْ: ذوْڒمْ-د غَارْ إِقِيضَانْ نْومْ! 31 ؤُشَا شكْ، بدّْ ذَا كِيذِي، حِيمَا أَذْ أَكِيذكْ سِّيوْڒغْ ثِيوصَّا ذ لْفَارَايِيضْ نِّي ذ أَسنْ غَا ثسّْڒمْذذْ حِيمَا أَذْ زَّايْسنْثْ ڭّنْ ذِي ثمُّورْثْ نِّي إِ ذ أَسنْ غَا وْشغْ ذ ڒْوَارْثْ.‘ 32 حْضَامْ حِيمَا أَذْ ثڭّمْ أَمْ مَامّشْ إِ ذ أَومْ يُومُورْ سِيذِي، أَربِّي نْومْ، وَارْ تّْحيّْذمْ خْ مَانْ أَيَا، وَارْ إِدْجِي غَارْ يفُّوسْ ؤُڒَا غَارْ ؤُزڒْمَاضْ. 33 أَذْ ثُويُورمْ مَارَّا أَبْرِيذْ نِّي ذ أَومْ يُومُورْ سِيذِي، أَربِّي نْومْ، حِيمَا أَذْ ثدَّارمْ ؤُشَا أَذْ ثِيڒِيمْ مْلِيحْ ؤُ حِيمَا أَذْ زُّوڭَّارْثنْ ؤُسَّانْ نْومْ ذِي ثمُّورْثْ نِّي إِ غَا ثكْسِيمْ ذ ڒْوَارْثْ.‘ “