‏1 ”خنِّي نذْوڒْ-د ؤُشَا نْڭعّذْ أَبْرِيذْ ن بَاشَانْ. إِفّغْ-د عُوجْ، أَجدْجِيذْ ن بَاشَانْ، إِ ؤُمْسَاڭَارْ أَكِيذْنغْ، نتَّا ذ مَارَّا ڒْڭنْسْ نّسْ، إِ ڭَارَّا ذِي إِذْرَاعِي.^▪   ‏2 خنِّي إِنَّا أَيِي سِيذِي: ’وَارْ زَّايسْ تّڭّْوذْ شَا، مِينْزِي سلّْمغْ ث، نتَّا ذ مَارَّا ڒْڭنْسْ نّسْ ذ ثمُّورْثْ نّسْ، غَارْ إِفَاسّنْ نّكْ ؤُشَا أَذْ زَّايسْ ثڭّذْ أَمْ مَامّشْ ثڭِّيذْ س سِيحُونْ، أَجدْجِيذْ ن إِمُورِييّنْ نِّي ثُوغَا إِزدّْغنْ ذِي حَاشْپُونْ.‘ ^▪  

‏3 ؤُشَا سِيذِي، أَربِّي نّغْ، إِسلّمْ عُوجْ، أَجدْجِيذْ ن بَاشَانْ ذ مَارَّا ڒْڭنْسْ نّسْ غَارْ إِفَاسّنْ نّغْ ؤُشَا نَارْنِييْ ث أَڒْ مَانِي وَارْ إِقِّيمْ ؤُڒَا ذ إِجّنْ إِدَّارْ. ‏4 ذِي ڒْوقْثْ نِّي نطّفْ مَارَّا ثِيندَّامْ. وَارْ ذِينْ ثُوغِي ؤُڒَا ذ إِشْثْ ن ثنْذِينْثْ وَارْ زَّايْسنْ ت نطِّيفْ: ستِّينْ ن ثْندَّامْ ذ مَارَّا جِّيهثْ ن أَرْجُوبْ، ثَاڭلْذِيثْ ن عُوجْ ذِي بَاشَانْ. ‏5 مَارَّا ثِيندَّامْ نِّي تّْوَافَارْينْثْ س ڒحْيُوضْ ذ ثِيوُّورَا ذ إِزكْرُوننْ. سنّجْ إِ ؤُيَا ثُوغَا ذِينْ أَطَّاسْ ن ثْندَّامْ ذڭْ إِيَّارنْ. ‏6 ؤُشَا نْحَارّمْ إِ-ثنْثْ إِ ؤُثحِّي، أَمْ مَامّشْ نڭَّا زِي سِيحُونْ، أَجدْجِيذْ ن حَاشْپُونْ. ذِي كُوڒْ ثَانْذِينْثْ أَقَا نْحَارّمْ إِرْيَازنْ ذ ثمْغَارِينْ ذ إِحنْجِيرنْ إِ ؤُثحِّي. ‏7 مَاشَا نكْسِي إِ يِيخفْ نّغْ مَارَّا ڒبْهَايمْ ذ مِينْ نْكشّضْ زِي ثْندَّامْ ذ ثَاكشَّاضْثْ. ‏8 أَمُّو إِ نطّفْ ذِي ڒْوقْثْ نِّي ثَامُّورْثْ زِي ثْنَاينْ ن إِجدْجِيذنْ ن إِمُورِييّنْ نِّي إِدْجَانْ خْ ؤُجمَّاضْ ن لْ'ؤُرْذُونْ، زِي ثغْزَارْثْ ن أَرْنُونْ أَڒْ أَذْرَارْ ن حَارْمُونْ، ‏9 - ثنِّي ؤُمِي قَّارنْ إِصَايْذُونِييّنْ س يِيسمْ ن هِيرْمُونْ سِيرْيُونْ ؤُ إِمُورِييّنْ قَّارنْ أَسْ سِينِيرْ - ،

‏10 مَارَّا ثِيندَّامْ ن ڒْوَاطَا يُوعْڒَانْ ذ مَارَّا جِيلْعَاذْ ذ مَارَّا بَاشَانْ أَڒْ سَالْخَا ذ إِذْرَاعِي، مَارَّا ثِيندَّامْ ن ثْڭلْذِيثْ ن عُوجْ ذِي بَاشَانْ.

‏11 مِينْزِي مْغِيرْ عُوجْ، أَجدْجِيذْ ن بَاشَانْ، ثُوغَا إِقِّيمْ زِي مِينْ إِقِّيمنْ ن إِرَافَاوِييّنْ. خْزَارْ، قَامَا نّسْ ذ إِشْثْ ن قَامَا ن وُوزَّاڒْ، مَا وَارْ إِدْجِي ذِي رَابَّا ن أَيْثْ ن عَامُّونْ؟ ثُوزّڭَّارْثْ نّسْ ثسْعَا ن إِغَادْجنْ ؤُ ثِيرُو نّسْ أَربْعَا ن إِغَادْجنْ، عْبَارنْ ت س ؤُغِيڒْ ن إِجّْ ن ورْيَازْ.

‏12 ذِي ڒْوقْثْ نِّي نكْسِي ثَامُّورْثْ-أَ ذ ڒْوَارْثْ ؤُشَا وْشِيغْ ت إِ إِرُوبِينِييّنْ ذ إِجَاذِييّنْ زِي عَارُوعِيرْ، نِّي إِدْجَانْ غَارْ ثغْزَارْثْ ن أَرْنُونْ، ؤُڒَا ذ أَزْينْ ن إِذُورَارْ ن جِيلْعَاذْ أَكْ-ذ ثْندَّامْ نّسْ. ^▪  

‏13 مِينْ إِقِّيمنْ ن جِيلْعَاذْ ذ مَارَّا بَاشَانْ، ثَاڭلْذِيثْ ن عُوجْ، وْشِيغْ ت إِ وزْينْ ن ثقْبِيتْشْ ن مَانَاسَّا، مَارَّا جِّيهثْ ن أَرْجُوبْ أَكْ-ذ مَارَّا بَاشَانْ ؤُمِي قَّارنْ ثَامُّورْثْ ن إِرَافَاوِييّنْ.

‏14 يَا‘إِرْ، مِّيسْ ن مَانَاسَّا، إِطّفْ مَارَّا ثَامُّورْثْ ن أَرْجُوبْ أَڒْ ويْمِيرْ إِ إِدْجَانْ أَكْ-ذ إِجَاشُورِييّنْ ذ إِمَاعْكِييّنْ ؤُشَا إِڒَاغَا جّْوَايهْ نِّي س يِيسمْ نّسْ: جِّيهثْ ن بَاشَانْ، ذْشُورَاثْ ن يَا‘إِرْ. ذ وَا ذ إِسمْ نْسنْ أَڒْ أَسّْ-أَ.

‏15 إِ مَاكِيرْ وْشِيغْ أَسْ جِيلْعَاذْ.

‏16 إِ إِرُوبِينِييّنْ ذ إِجَاذِييّنْ وْشِيغْ أَسنْ ثَامُّورْثْ-أَ ن جِيلْعَاذْ: زِي ثغْزَارْثْ ن أَرْنُونْ نِّي زِي ڒْوسْثْ ن ثغْزُورْثْ ذ أَيْمِيرْ، أَڒْ ثِيغْزَارْثْ ن يَابُّوقْ نِّي إِدْجَانْ ذ أَيْمِيرْ أَكْ-ذ أَيْثْ ن عَامُّونْ.

‏17 عَاوذْ ڒوْضَا ذ لْ'ؤُرْذُونْ، أَقَا-ث ذ أَيْمِيرْ نِّي إِدْجَانْ زِي كِينَّارَاثْ أَڒْ ڒبْحَارْ ن ڒوْضَا، ڒبْحَارْ أَمدْجَاهْ، وَادَّايْ ن ثيْسَارِينْ ن وذْرَارْ ن فِيسْجَا، غَارْ شَّارْقْ. ^▫  

‏18 ذِي ڒْوقْثْ نِّي وصِّيغْ كنِّيوْ، نِّيغْ: ’سِيذِي، أَربِّي نْومْ، إِوْشَا أَومْ ثَامُّورْثْ-أَ، حِيمَا أَذْ ت ثطّْفمْ ذ ڒْوَارْثْ. إِتّْخصَّا أَذْ ثژْوَامْ ثْوجْذمْ إِ ؤُمنْغِي زَّاثْ إِ أَيْثْمَاثْومْ، أَيْثْ ن إِسْرَائِيل، مَارَّا أَيْثْ ن ؤُمنْغِي. ^▪  

‏19 مْغِيرْ ثمْغَارِينْ نْومْ ذ إِحنْجِيرنْ نْومْ ذ ڒبْهَايمْ نْومْ - أَقَا سّْنغْ بلِّي غَارْومْ أَطَّاسْ ن ڒبْهَايمْ - زمَّارنْ أَذْ قِّيمنْ ذِي ثْندَّامْ نْومْ نِّي ذ أَومْ وْشِيغْ نشّْ، ‏20 أَڒْ إِ غَا إِوْشْ سِيذِي أَرَّاحثْ إِ أَيْثْمَاثْومْ ؤُشَا، أَمْ ث ثڭّمْ كنِّيوْ، ؤُڒَا ذ نِيثْنِي أَذْ كْسِينْ ثَامُّورْثْ نِّي ذ أَسنْ إِ غَا إِوْشْ سِيذِي، أَربِّي نْومْ ذ ڒْوَارْثْ، خْ ؤُجمَّاضْ ن يغْزَارْ ن لْ'ؤُرْذُونْ. خنِّي إِعدّڒْ أَذْ د-ثْذوْڒمْ، كُوڒْ إِجّْ غَارْ ثسْغَارْثْ إِ ذ أَومْ وْشِيغْ نشّْ.‘ ‏21 ذِي ڒْوقْثْ نِّي وصِّيغْ إِ يَاشُووَا، نِّيغْ: ’ثِيطَّاوِينْ نّكْ ژْرِينْثْ مَارَّا مِينْ إِڭَّا سِيذِي، أَربِّي نْومْ، س ثْنَاينْ ن إِجدْجِيذنْ-أَ. أَمُّو إِ غَا يڭّْ سِيذِي س مَارَّا ثِيڭلْذِيوِينْ إِ غَارْ إِ غَا ثژْوِيذْ. ^▪   ‏22 وَارْ زَّايْسنْ ثڭّْوْذمْ، مِينْزِي سِيذِي، أَربِّي نْومْ، أَذْ إِمْنغْ ذِي طّْوعْ نْومْ.‘

‏23 ؤُشَا ژُودْجغْ غَارْ سِيذِي ذِي ڒْوقْثْ نِّي، نِّيغْ: ‏24 ’سِيذِي إِنُو، سِيذِي! شكْ ثبْذِيذْ أَذْ ثسّشْنذْ إِ ؤُمْسخَّارْ نّكْ ڒمْغَارثْ نّكْ ذ ؤُفُوسْ نّكْ إِجهْذنْ، مِينْزِي مَانْ أَربِّي إِ ذِينْ ذڭْ ؤُجنَّا نِيغْ ذِي ثمُّورْثْ إِزمَّارْ أَذْ يڭّْ ڒخْذَايمْ ذ جّهْذْ أَمْ مَامّشْ ثنْ ثتّڭّذْ شكْ؟ ^▪   ‏25 أجّْ أَيِي أَذْ ژْوِيغْ، زَاوْڭغْ شكْ، ؤُشَا أَذْ ژَترْغْ ثَامُّورْثْ إِشْنَانْ نِّي إِدْجَانْ خْ ؤُجمَّاضْ ن لْ'ؤُرْذُونْ، أَقَا إِذُورَارْ نِّي إِشْنَانْ ذ لُوبْنَانْ!‘ ‏26 مَاشَا سِيذِي إِصْخضْ خَافِي أَفُوڭمْ نّسْ ذِي طّْوعْ نْومْ ؤُشَا وَارْ ذ أَيِي إِسْڒِي. إِنَّا أَيِي سِيذِي: ’شْفَا مِينْ ذ أَيِي ثتَّارذْ، أَقَا ذ أَطَّاسْ. وَارْ كِيذِي سِّيوِيڒْ عَاذْ خْ ثْمسْڒَاشْثْ-أَ. ^▪   ‏27 أَڒِي غَارْ ثْقِيشَّاثْ ن فِيسْجَا ؤُشَا سْڭعّذْ ثَامُوغْڒِي نّكْ غَارْ ڒْغَارْبْ، غَارْ شَّامَالْ، عَارْ لْجَانُوبْ ؤُ غَارْ شَّارْقْ ؤُ خْزَارْ إِ ت س إِخفْ ن ثِيطَّاوِينْ نّكْ، مِينْزِي وَارْ ثْژكّْوِّيذْ شَا لْ'ؤُرْذُونْ-أَ. ‏28 سلّمْ ڒُومُورْ إِ يَاشُووَا، أڭّْ ذَايسْ ؤُڒْ ؤُ سجْهذْ إِ-ث، مِينْزِي نتَّا أَذْ إِژْوَا زَّاثْ إِ وُوذمْ ن ڒْڭنْسْ-أَ ؤُشَا نتَّا أَذْ ثنْ يَارّْ أَذْ وَارْثنْ ثَامُّورْثْ إِ غَا ثْژَارذْ ذِينْ.‘ “

‏29 ؤُشَا نقِّيمْ ذِي ثغْزُورْثْ زَّاثْ إِ بَايْثْ-فَاغُورْ.