أَستّفْ ن ثْقبَّاڒْ
2
1 إِسِّيوڒْ سِيذِي أَكْ-ذ مُوسَا ذ هَارُونْ، إِنَّا: 2 ”أَيْثْ ن إِسْرَائِيل أَذْ وْثنْ إِقِيضَانْ نْسنْ كُوڒْ إِجّْ غَارْ ثْعدْجَانْثْ نّسْ، غَارْ ثْعدْجِيمِينْ ن ثَادَّارْثْ ن إِبَابَاثنْ نْسنْ. أَذْ وْثنْ إِقِيضَانْ نْسنْ شْوَايْثْ غَارْ ڒَاڭّْوَاجْ غَارْ مَارَّا إِغزْذِيسنْ ن ؤُقِيضُونْ ن ؤُمْسَاڭَارْ.
3 إِنِّي إِدْجَانْ سَاذُو ن ثْعدْجَانْثْ ن ڒْمَارْڭحْ ن ڒْعسْكَارْ ن يَاهُوذَا أَذْ وْثنْ إِقِيضَانْ نْسنْ عْلَاحْسَابْ ثَارْبِيعِينْ ن ڒْعسْكَارْ نْسنْ غَارْ شَّارْقْ، غَارْ مَانِيسْ د-ثْنقَّارْ ثْفُوشْثْ، ؤُشَا نَاحْشُونْ، مِّيسْ ن عَامِّينَاذَابْ، أَذْ يِيڒِي ذ أَمْڭوّذْ ن أَيْثْ ن يَاهُوذَا. 4 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي أَربْعَا ؤُ-سبْعِينْ-أَڒفْ ؤُ-ستَّا-مْيَا.
5 زَّاثسْ أَذْ ثوّثْ ثقْبِيتْشْ ن إِسَّاكَارْ إِقِيضَانْ نّسْ. نَاثَانَايِيلْ، مِّيسْ ن صُوغَارْ، أَذْ يِيڒِي ذ أَمْڭوّذْ ن أَيْثْ ن إِسَّاكَارْ. 6 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي أَربْعَا ؤُ-خمْسِينْ-أَڒفْ ؤُ-أَربْعَا-مْيَا.
7 خنِّي ثَاقْبِيتْشْ ن زَاپُولُونْ. إِلِييَابْ، مِّيسْ ن هِيلُونْ، أَذْ يِيڒِي ذ أَمْڭوّذْ ن أَيْثْ ن زَاپُولُونْ. 8 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي سبْعَا ؤُ-خمْسِينْ-أَڒفْ ؤُ-أَربْعَا-مْيَا.
9 إِنِّي إِتّْوَاحسْبنْ إِ ڒْمَارْڭحْ ن ڒْعسْكَارْ ن يَاهُوذَا أَقَا أَثنْ مَارَّا جْمِيعْ ذِي مْيَا ؤُ-ستَّا ؤُ-ثْمَانِينْ-أَڒفْ ؤُ-أَربْعَا-مْيَا ن يرْيَازنْ، تّْوَاستّْفنْ عْلَاحْسَابْ ثَارْبِيعِينْ ن ڒْعسْكَارْ نْسنْ. أَذْ فسْينْ إِقِيضَانْ نْسنْ أَمزْوَارُو.
10 غَارْ لْجَانُوبْ أَذْ ثِيڒِي ثْعدْجَانْثْ ن ڒْمَارْڭحْ ن ڒْعسْكَارْ ن رُوبِينْ. أَذْ إِڒِينْ تّْوَاستّْفنْ عْلَاحْسَابْ ثَارْبِيعِينْ ن ڒْعسْكَارْ نْسنْ. إِلِيصُورْ، مِّيسْ ن شَاذَايُّورْ، أَذْ يِيڒِي ذ أَمْڭوّذْ ن أَيْثْ ن رُوبِينْ. ▫
11 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي ستَّا ؤُ-ربْعِينْ-أَڒفْ ؤُ-خمْسَا-مْيَا.
12 زَّاثسْ أَذْ ثوّثْ ثقْبِيتْشْ ن شِيمْعُونْ إِقِيضَانْ نّسْ. شَالُومِييِيلْ، مِّيسْ ن صُورِييْشَادَّايْ، أَذْ يِيڒِي ذ أَمْڭوّذْ ن أَيْثْ ن شِيمْعُونْ.
13 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي ثسْعَا ؤُ-خمْسِينْ-أَڒفْ ؤُ-ثڒْثْ-مْيَا.
14 خنِّي ثَاقْبِيتْشْ ن جَاذْ. إِلْيَاسَافْ، مِّيسْ ن رَاعُويِيلْ، أَذْ يِيڒِي ذ أَمْڭوّذْ ن أَيْثْ ن جَاذْ.
15 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي خمْسَا ؤُ-ربْعِينْ-أَڒفْ ؤُ-ستَّا-مْيَا ؤُ-خمْسِينْ.
16 إِنِّي إِتّْوَاحسْبنْ إِ ڒْمَارْڭحْ ن ڒْعسْكَارْ ن رُوبِينْ، أَقَا أَثنْ مَارَّا مْيَا ؤُ-وَاحِيثْ ؤُ-خمْسِينْ-أَڒفْ ؤُ-أَربْعَا-مْيَا ؤُ-خمْسِينْ ن يرْيَازنْ، تّْوَاستّْفنْ عْلَاحْسَابْ ثَارْبِيعِينْ ن ڒْعسْكَارْ نْسنْ. أَذْ فسْينْ إِقِيضَانْ نْسنْ وِيسّْ ثْنَاينْ.
17 خنِّي أَذْ إِتّْوَافْسِي ؤُقِيضُونْ ن ؤُمْسَاڭَارْ، ڒْمَارْڭحْ ن إِلَاوِييّنْ، ذِي ڒْوسْثْ ن مَارَّا ڒْعسْكَارْ. أَمْ مَامّشْ إِ غَا وْثنْ إِقِيضَانْ نْسنْ، أَمُّو إِتّْخصَّا أَذْ مُّوطِّيينْ عَاوذْ، كُوڒْ إِجّْ ذڭْ ومْشَانْ نّسْ، عْلَاحْسَابْ ثِيعدْجَانِينْ نْسنْ.
18 غَارْ ڒْغَارْبْ أَذْ ثِيڒِي ثْعدْجَانْثْ ن ڒْمَارْڭحْ ن ڒْعسْكَارْ ن إِفْرَايِيمْ. أَذْ إِڒِينْ تّْوَاستّْفنْ عْلَاحْسَابْ ثَارْبِيعِينْ ن ڒْعسْكَارْ نْسنْ. إِلِيشَامَاعْ، مِّيسْ ن عَامِّيهُوذْ، أَذْ يِيڒِي ذ أَمْڭوّذْ ن أَيْثْ ن إِفْرَايِيمْ.
19 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي أَربْعِينْ-أَڒفْ ؤُ-خمْسَا-مْيَا.
20 زَّاثسْ أَذْ ثِيڒِي ثَاقْبِيتْشْ ن مَانَاسَّا. جَامْلِييِيلْ، مِّيسْ ن فَاذَاهْصُورْ أَذْ يِيڒِي ذ أَمْڭوّذْ ن أَيْثْ ن مَانَاسَّا. 21 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي ثْنَاينْ ؤُ-ثْڒَاثِينْ-أَڒفْ ؤُ-مِيثَايْنْ.
22 خنِّي ثَاقْبِيتْشْ ن بِينْيَامِينْ. أَبِيذَانْ، مِّيسْ ن جِيذْعُونِي، أَذْ يِيڒِي ذ أَمْڭوّذْ ن أَيْثْ ن بِينْيَامِينْ. 23 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي خمْسَا ؤُ-طْڒَاثِينْ-أَڒفْ ؤُ-أَربْعَا-مْيَا.
24 إِنِّي إِتّْوَاحسْبنْ إِ ڒْمَارْڭحْ ن ڒْعسْكَارْ ن إِفْرَايِيمْ، أَقَا أَثنْ ذِي مْيَا ؤُ-ثْمنْيَا-أَڒفْ ؤُ-مْيَا ن يرْيَازنْ، تّْوَاستّْفنْ عْلَاحْسَابْ ثَارْبِيعِينْ ن ڒْعسْكَارْ نْسنْ. أَذْ فسْينْ إِقِيضَانْ نْسنْ وِيسّْ ثْڒَاثَا.
25 غَارْ شّْمَالْ أَذْ ثِيڒِي ثْعدْجَانْثْ ن ڒْمَارْڭحْ ن ڒْعسْكَارْ ن ذَانْ. أَذْ إِڒِينْ تّْوَاستّْفنْ عْلَاحْسَابْ ثَارْبِيعِينْ ن ڒْعسْكَارْ نْسنْ. أَخِيعَازَارْ، مِّيسْ ن عَامِّيشَادَّايْ، أَذْ يِيڒِي ذ أَمْڭوّذْ ن أَيْثْ ن دَان. 26 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي ثْنَاينْ ؤُ-ستِّينْ-أَڒفْ ؤُ-سبْعَا-مْيَا.
27 زَّاثسْ أَذْ ثوْثَا ثقْبِيتْشْ ن أَشِيرْ إِقِيضَانْ نّسْ. فَاجْعِييِيلْ، مِّيسْ ن عُوكْرَانْ، أَذْ يِيڒِي ذ أَمْڭوّذْ ن أَيْثْ ن أَشِيرْ. 28 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي وَاحِيثْ ؤُ-ربْعِينْ-أَڒفْ ؤُ-خمْسَا-مْيَا.
29 خنِّي ثَاقْبِيتْشْ ن نَافْثَالِي. أَخِيرَاعْ، مِّيسْ ن عِينَانْ، أَذْ يِيڒِي ذ أَمْڭوّذْ ن أَيْثْ ن نَافْثَالِي. 30 إِنِّي إِتّْوَاحسْبنْ إِ ڒْعسْكَارْ نّسْ، أَقَا أَثنْ ذِي ثْڒَاثَا ؤُ-خمْسِينْ-أَڒفْ ؤُ-أَربْعَا-مْيَا.
31 إِنِّي إِتّْوَاحسْبنْ إِ ڒْمَارْڭحْ ن ڒْعسْكَارْ ن ذَانْ، أَقَا أَثنْ ذِي مْيَا ؤُ-سبْعَا ؤُ-خمْسِينْ-أَڒفْ ؤُ-ستَّا-مْيَا ن يرْيَازنْ. نِيثْنِي أَذْ فسْينْ إِقِيضَانْ نْسنْ ذ أَنڭَّارُو، عْلَاحْسَابْ ثِيعدْجَانِينْ نْسنْ.
32 إِنَا ذ إِنِّي إِتّْوَاحسْبنْ ن أَيْثْ ن إِسْرَائِيل، عْلَاحْسَابْ ثَادَّارْثْ ن إِبَابَاثنْ نْسنْ. مَارَّا إِنِّي إِتّْوَاحسْبنْ ذِي ڒمْرَاڭحْ ن ڒْعسْكَارْ، عْلَاحْسَابْ ثَارْبِيعِينْ ن ڒْعسْكَارْ نْسنْ، أَقَا أَثنْ ستَّا-مْيَا ؤُ-ثڒْثْ-أَڒَافْ ؤُ-خمْسَا-مْيَا ؤُ-خمْسِينْ ن يرْيَازنْ. ▪
33 إِلَاوِييّنْ جَارْ أَيْثْ ن إِسْرَائِيل وَارْ تّْوَاحسْبنْ شَا، نِيشَانْ أَمْ مَامّشْ إِ ذ أَسْ يُومُورْ سِيذِي إِ مُوسَا. ▪
34 ؤُشَا ڭِّينْ أَيْثْ ن إِسْرَائِيل أَمْ مَامّشْ مَارَّا مِينْ ذ أَسْ يُومُورْ سِيذِي إِ مُوسَا: أَمشْنَاوْ مَامّشْ وْثِينْ إِقِيضَانْ نْسنْ س ؤُستّفْ غَارْ ثْعدْجَانِينْ نْسنْ، أَمُّو إِ غَا فسْينْ إِقِيضَانْ نْسنْ عَاوذْ، تّْوَاستّْفنْ عْلَاحْسَابْ ڒَادْجَاثْ نْسنْ، عْلَاحْسَابْ ثَادَّارْثْ ن إِبَابَاثنْ نْسنْ.