أَعَاوذْ ن شَّارِيعَا
ڒْحَارْضْ ن مُوسَا
1
1 إِنَا ذ أَوَاڒنْ نِّي إِسِّيوڒْ مُوسَا إِ مَارَّا إِسْرَائِيل خْ ؤُجمَّاضْ ن لْ'ؤُرْذُونْ، ذِي ڒخْڒَا، ذِي ڒوْضَا أَرنْذَاذْ ن صُوفْ، جَارْ فَارَانْ ذ ثُوفَالْ ذ لَابَانْ ذ حَاضَارُوثْ ذ ذِي-ذَاهَابْ. 2 زِي حُورِيبْ خْ وبْرِيذْ ن إِذُورَارْ ن سَاعِيرْ أَڒْ قَاذَاشْ-بَارْنِيعْ أَقَا-ت ذ إِشْثْ ن ثِيشْثِي ن حِيطَاشْ ن وُوسَّانْ. 3 إِمْسَارْ ذڭْ ؤُسڭّْوَاسْ وِيسّْ أَربْعِينْ، ذڭْ ؤُيُورْ وِيسّْ حِيطَاشْ، ذڭْ وَاسّْ أَمزْوَارُو ن ؤُيُورْ، مُوسَا إِسِّيوڒْ أَكْ-ذ أَيْثْ ن إِسْرَائِيل عْلَاحْسَابْ مَارَّا مِينْ خْ ثنْ إِوصَّا سِيذِي، 4 أَوَارْنِي ؤُمِي إِغْڒبْ ذِي إِذْرَاعِي خْ سِيحُونْ، أَجدْجِيذْ ن إِمُورِييّنْ ونِّي ثُوغَا إِزدّْغنْ ذِي حَاشْپُونْ، ؤُ خْ عُوجْ، أَجدْجِيذْ ن بَاشَانْ ونِّي ثُوغَا إِزدّْغنْ ذِي عَاشْثَارُوثْ. ▪ 5 خْ ؤُجمَّاضْ ن لْ'ؤُرْذُونْ، ذِي ثمُّورْثْ ن مُوآبَ، إِبْذَا مُوسَا أَذْ إِفسَّارْ شَّارِيعَا-يَا، إِنَّا: 6 ”سِيذِي، أَربِّي نّغْ، إِسِّيوڒْ أَكِيذْنغْ غَارْ حُورِيبْ، إِنَّا: ’كنِّيوْ ثقِّيمنْ أَطَّاسْ غَارْ وذْرَارْ-أَ، أَقَا ذ أَطَّاسْ. 7 ذوْڒمْ، كّْسمْ إِقِيضَانْ نْومْ ؤُشَا أَذْفمْ غَارْ إِذُورَارْ ن إِمُورِييّنْ ؤُ غَارْ مَارَّا إِمُوشَانْ يُوذْسنْ ذِي ڒوْضَا، ذِي ثمُّورْثْ ن إِذُورَارْ، ذِي ثمُّورْثْ إِوَاطَانْ، ذِي ثمُّورْثْ ن لْجَانُوبْ ؤُ غَارْ ثْمَا ن ڒبْحَارْ، ثَامُّورْثْ ن إِكنْعَانِييّنْ، ذ لُوبْنَانْ أَڒْ إِغْزَارْ أَمقّْرَانْ، إِغْزَارْ ن لْفُورَاطْ. 8 خْزَارْ، نشّْ وْشِيغْ أَومْ ثَامُّورْثْ زَّاثْ إِ وُوذمْ نْومْ. أَذْفمْ، ثطّْفمْ ثَامُّورْثْ نِّي خْ إِجِّيدْجْ سِيذِي أَذْ ت إِوْشْ إِ إِبَابَاثنْ نْومْ، إِ إِبْرَاهِيمْ، إِسْحَاقْ ذ يَاعْقُوبْ، ؤُ إِ زَّارِيعثْ نْسنْ أَوَارْنِي أَسنْ.‘ ▪ 9 ذِي ڒْوقْثْ نِّي سِّيوْڒغْ نشّْ أَكِيذْومْ، نِّيغْ: ’نشّْ وَاهَا وَارْ زمَّارغْ أَذْ أَرْپُوغْ أَمْنُوسْ خَاومْ. ▪
10 سِيذِي، أَربِّي نْومْ، إِڭَّا كنِّيوْ ذ أَطَّاسْ، ؤُشَا خْزَارْ، كنِّيوْ ڒخُّو ذ أَطَّاسْ أَمشْنَاوْ إِثْرَانْ ن ؤُجنَّا.
11 أَذْ ثَافْ أَذْ ذَايْومْ إِمَّارْنِي سِيذِي، أَربِّي نْومْ، أَمْ مَامّشْ كنِّيوْ ثدْجَامْ ڒخُّو عَاذْ أَڒفْ ن ثْوَاڒَاوِينْ، ؤُشَا أَذْ ثَافْ أَذْ كنِّيوْ إِبَاركْ أَمْ مَامّشْ ثُوغَا غَارْومْ د-إِسِّيوڒْ.
12 مَامّشْ زمَّارغْ نشّْ وحّْذِي وَاهَا أَذْ أَرْپُوغْ إِحسِّيفنْ نْومْ ذ ضّْقُوڒَاثْ نْومْ ذ إِمْشُوبّشنْ نْومْ؟
13 كْسِيمْ زِي جَارْ ثقْبِيتْشْ نْومْ إِرْيَازنْ إِمِيغِيسنْ، إِفهّْمنْ، إِنِّي إِتّْوَاسّْننْ إِشْنَانْ، حِيمَا أَذْ ثنْ ڭّغْ ذ إِزدْجِيفنْ خَاومْ.‘
14 خنِّي كنِّيوْ ثَارِّيمْ-د خَافِي ؤُشَا ثنَّامْ أَيِي: ’أَوَاڒْ إِ ثسِّيوْڒذْ، أَقَا إِبَانْ-د إِشْنَا حِيمَا أَذْ ث نڭّْ.‘
15 ؤُشَا كْسِيغْ إِزدْجِيفنْ ن ثقْبِيتْشْ نْومْ، إِرْيَازنْ إِمِيغِيسنْ، إِفهّْمنْ إِنِّي إِتّْوَاسّْننْ إِشْنَانْ، ؤُشَا ڭِّيغْ ثنْ ذ إِزدْجِيفنْ خَاومْ، أَمْ إِمقّْرَاننْ خْ أَڒفْ، إِمقّْرَاننْ خْ مْيَا، إِمقّْرَاننْ خْ خمْسِينْ ذ إِمقّْرَاننْ خْ عشْرَا، ؤُ أَمْ إِوقَّافنْ خْ ثْقبَّاڒْ نْومْ.
16 ذِي ڒْوقْثْ نِّي ؤُمُورغْ إِ ڒْقُوضَاثْ نْومْ ؤُشَا نِّيغْ: ’سْڒمْ غَارْ أَيْثْمَاثْومْ ؤُشَا حكْممْ س يِيجّْ ن ڒْحُوكْمْ إِسڭّْذنْ جَارْ ورْيَازْ ذ ؤُمَاسْ ذ ؤُبَارَّانِي نِّي كِيذسْ إِدْجَانْ. ▫ ▪
17 وَارْ تّڭّمْ س وُوذْمَاونْ ذِي ڒحْكَامْ. أَذْ ثسْڒمْ غَارْ ؤُمژْيَانْ ذ ؤُمقّْرَانْ. وَارْ ثڭّْوْذمْ زڭْ وُوذمْ ن شَا ن يِيجّنْ، مِينْزِي ڒحْكَامْ غَارْ أَربِّي. ثَامسْڒَاشْثْ نِّي ثوْعَارْ خَاومْ، أَوْيمْ ت-إِ-د غَارِي ؤُشَا نشّْ أَذْ ت سْڒغْ.‘ ▪
18 أَمُّو إِ كنِّيوْ ؤُمُورغْ ذِي ڒْوقْثْ نِّي مَارَّا ثِيمسْڒَايِينْ نِّي خَاومْ أَذْ ثنْثْ ثڭّمْ.
19 خنِّي نفْسِي إِقِيضَانْ نّغْ ؤُشَا نفّغْ زِي حُورِيبْ ؤُشَا نژْوَا مَارَّا ڒخْڒَا أَمقّْرَانْ إِسَّاڭّْوَاذنْ نِّي ثژْرِيمْ، نُويُورْ ذڭْ وبْرِيذْ ن إِذُورَارْ ن إِمُورِييّنْ أَمْ مَامّشْ ذ أَنغْ يُومُورْ سِيذِي، أَربِّي نّغْ، ؤُشَا نِيوضْ غَارْ قَاذَاشْ-بَارْنِيعْ. 20 خنِّي نِّيغْ أَومْ: ’أَقَا ثِيوْضمْ غَارْ إِذُورَارْ ن إِمُورِييّنْ نِّي ذ أَنغْ إِ غَا إِوْشْ سِيذِي، أَربِّي نّغْ. 21 خْزَارْ، سِيذِي، أَربِّي نّكْ، أَقَا إِڭَّا ثَامُّورْثْ زَّاثْ إِ وُوذمْ نّكْ. ڭَاعّذْ، طّفْ إِ-ت، أَمْ مَامّشْ غَاركْ إِسِّيوڒْ سِيذِي، أَربِّي ن إِبَابَاثنْ نْومْ. وَارْ تّڭّْوذْ ؤُ وَارْ تّجِّي أَذْ إِعْڭزْ وُوڒْ نّكْ.‘ 22 ثُوسِيمْ-د غَارِي مَارَّا كنِّيوْ، ثنَّامْ: ’أجّْ أَنغْ أَذْ نسّكّْ إِرْيَازنْ زَّاثْ إِ وُوذمْ نّغْ حِيمَا أَذْ برْڭَاڭنْ ثَامُّورْثْ مَاحنْذْ أَذْ أَنغْ خبَّارنْ خْ مَانْ أَبْرِيذْ إِ زِي غَا نْڭعّذْ ذِي ثَامُّورْثْ ؤُ مَامّشْ دْجَانْثْ ثْندَّامْ إِ غَارْ إِ د غَا نَاسْ.‘ 23 ثُوغَا أَوَاڒْ-أَ ذ لمْلِيحْ إِ نشّْ ؤُشَا كْسِيغْ ثنْعَاشْ ن يرْيَازنْ زِي ڒْوسْثْ نْومْ، زِي كُوڒْ ثَاقْبِيتْشْ إِجّْ ن ورْيَازْ. ▪ 24 نّْضنْ نِيثْنِي ؤُشَا ؤُيُورنْ خْ وبْرِيذْ غَارْ إِذُورَارْ ؤُشَا ؤُسِينْ-د غَارْ ثغْزُورْثْ ن إِشْكُولْ ؤُشَا برْڭَاڭنْ ت. ▪ 25 كْسِينْ س إِفَاسّنْ نْسنْ ڒْغِيدْجثْ ن ثمُّورْثْ ؤُشَا هْوَانْ-د غَارْنغْ. إِوْينْ أَنغْ-د ڒخْبَارْ، نَّانْ: ’ثَامُّورْثْ إِ ذ أَنغْ غَا إِوْشْ سِيذِي، أَربِّي نّغْ، ثصْبحْ.‘
26 قَاعْ أَمنِّي، وَارْ ثخْسمْ أَذْ ثْڭعّْذمْ ؤُشَا ثْغوّْغمْ ضِيدّْ إِ ڒُومُورْ ن سِيذِي، أَربِّي نْومْ. ▪ 27 ؤُشَا ثْنذْقمْ-د زڭْ إِقِيضَانْ نْومْ، ثنَّامْ: ’ذڭْ وقْڒَابْ نّسْ خَانغْ، أَقَا إِسُّوفّغْ أَنغْ سِيذِي زِي ثمُّورْثْ ن مِيصْرَا مَاحنْذْ أَذْ أَنغْ يَارّْ غَارْ إِفَاسّنْ ن إِمُورِييّنْ مَاحنْذْ أَذْ أَنغْ يَاردّدْجْ. ▫ 28 مَانِي خنِّي إِ غَا نْڭعّذْ؟ أَيْثْمَاثْنغْ سّْفسّْينْ ؤُڒَاونْ نّغْ، نَّانْ: ڒْڭنْسْ إِمْغَارْ ؤُشَا زُّوڭَارنْ خَانغْ. ثِيندَّامْ مْغَارنْثْ ؤُشَا تّْوَافَارْينْثْ أَڒْ أَجنَّا ؤُشَا نژْرَا ذِينْ ؤُڒَا ذ أَيْثْ ن عَانَاقْ.‘ ▪ 29 نشّْ نِّيغْ أَومْ: ’وَارْ ثَارْجِيجمْ شَا ؤُ وَارْ زَّايْسنْ تّڭّْوْذمْ. 30 سِيذِي، أَربِّي نْومْ، ونِّي إِڭُّورنْ زَّاثْومْ، أَذْ إِمْنغْ ذِي طّْوعْ نْومْ، أَمُّو نِيشَانْ أَمْ مَامّشْ إِڭَّا زَّاثْ إِ ثِيطَّاوِينْ نْومْ ذِي طّْوعْ نْومْ ذِي مِيصْرَا 31 ؤُڒَا ذِي رخْڒَا، مَانِي ثژْرِيذْ مَامّشْ ثُوغَا شكْ يَاربُّو سِيذِي، أَربِّي نّكْ، مَارَّا أَبْرِيذْ نِّي ثُويُورذْ، أَمشْنَاوْ إِجّْ ن ورْيَازْ يَاربُّونْ مِّيسْ، أَڒْ مَانِي د-ثِيوْضمْ غَارْ ومْشَانْ-أَ.‘ 32 مَاشَا كنِّيوْ عَاذْ وَارْ ثُومِينمْ شَا س وَاوَاڒْ-أَ ذِي سِيذِي، أَربِّي نْومْ، 33 ونِّي ثُوغَا إِڭُّورنْ زَّاثْ إِ وُوذمْ نْومْ ذڭْ وبْرِيذْ حِيمَا أَذْ أَومْ يَارْزُو مَانِي إِ غَا ثوْثمْ إِقِيضَانْ نْومْ، ؤُ ونِّي ثُوغَا إِڭُّورنْ، س دْجِيڒثْ ذِي ثْمسِّي، مَاحنْذْ أَذْ أَومْ إِسّْشنْ أَبْرِيذْ مَانِي كنِّيوْ إِتّْخصَّا أَذْ ثُويُورمْ، ؤُ س ؤُزِيڒْ ذڭْ إِجّْ ن ؤُسيْنُو. ▪ 34 سِيذِي إِسْڒَا ڒْحسّْ ن وَاوَاڒنْ نْومْ ؤُشَا إِجَّا أَغْضَابْ نّسْ أَذْ إِدُّوقّزْ، إِجِّيدْجْ، إِنَّا: 35 ’ؤُڒَا ذ إِجّْ زڭْ يرْيَازنْ-أَ ن جِّيڒْ-أَ أَعفَّانْ وَارْ إِژَارّْ ثَامُّورْثْ إِشْنَانْ نِّي خْ جُّودْجغْ أَذْ ت وْشغْ إِ إِبَابَاثنْ نْومْ، ▪ 36 مْغِيرْ كَالِيبْ، مِّيسْ ن يَافُونِّي، نتَّا أَذْ ت إِژَارْ ؤُشَا إِ نتَّا ؤُ إِ إِحنْجِيرنْ نّسْ أَذْ وْشغْ ثَامُّورْثْ نِّي خْ إِڭَّا إِضَارنْ نّسْ، مِينْزِي نتَّا ثُوغَا إِضفَّارْ سِيذِي نِيشَانْ.‘ 37 إِسْعَارْ خَافِي سِيذِي ذِي سِّيبّثْ نْومْ، إِنَّا: ’ؤُڒَا ذ شكْ وَارْ ذَايسْ تِّيذْفذْ شَا! ▪ 38 يَاشُووَا، مِّيسْ ن نُونْ، ونِّي إِبدّنْ زَّاثْ إِ وُوذمْ نّكْ، أَذْ ذَايسْ يَاذفْ. سْجهْذْ إِ-ث، مِينْزِي نتَّا ذ ونِّي ت إِ غَا إِوْشنْ ذ ڒْوَارْثْ إِ إِسْرَائِيل. 39 ؤُشَا ثَارْوَا نْومْ إِ خْ ثنَّامْ: ’أَذْ ذوْڒنْ ذ ثيْمَارْثْ!‘، إِحنْجِيرنْ نْومْ نِّي وَارْ سِّيننْ عَاذْ ڒْخَارْ نِيغْ ڒْغَارْ، نِيثْنِي أَذْ غَارسْ أَذْفنْ ؤُشَا نشّْ أَذْ أَسنْ ت-إِ-د-وْشغْ ؤُشَا نِيثْنِي أَذْ ت وَارْثنْ. 40 مَاشَا كنِّيوْ أَذْ د-ثْذوْڒمْ، أَذْ ثكّْسمْ إِقِيضَانْ نْومْ سَّا ؤُشَا أَذْ ثُويُورمْ غَارْ ڒخْڒَا غَارْ ڒبْحَارْ ن ثلْڭَا.‘ 41 كنِّيوْ ثَارِّيمْ-د، ثنَّامْ أَيِي: ’أَقَا نخْضَا أَكْ-ذ سِيذِي. أَذْ نْڭعّذْ ؤُشَا أَذْ نمْنغْ قَاعْ أَمْ مَامّشْ ذ أَنغْ يُومُورْ سِيذِي، أَربِّي نّغْ.‘ خنِّي ثْبيْسمْ، كُوڒْ إِجّْ س ڒسْنَاحْ نّسْ ن ڭَارَّا ؤُ كنِّيوْ س زّْعَامثْ نْومْ ثْبدّمْ أَذْ ثْڭعّْذمْ غَارْ وذْرَارْ. 42 خنِّي إِنَّا أَيِي سِيذِي: ’إِنِي أَسنْ: وَارْ تّْڭعّْذمْ، وَارْ تّْمنْغِيمْ، مِينْزِي نشّْ وَارْ دْجِيغْ ذِي ڒْوسْثْ نْومْ، حِيمَا وَارْ ثْخصَّارمْ زَّاثْ إِ وُوذمْ ن ڒْعذْيَانْ نْومْ.‘ 43 أَمُّو إِ كِيومْ سِّيوْڒغْ، مَاشَا كنِّيوْ وَارْ تّسْڒِيمْ ؤُشَا ثْغوّْغمْ ضِيدّْ إِ ڒُومُورْ ن سِيذِي ؤُشَا ثڭِّيمْ س ثْغنَّانْثْ، ثْڭعّْذمْ غَارْ إِذُورَارْ. 44 ؤُشَا فّْغنْ إِمُورِييّنْ نِّي ثُوغَا إِزدّْغنْ ذڭْ إِذُورَارْ ؤُشَا ؤُژّْڒنْ خَاومْ، أَمْ ث تّڭّنْثْ ثْزِيزْوَا، ؤُشَا ڒبْزنْ كنِّيوْ ذِي صَاعِيرْ أَڒْ حُورْمَا. 45 ثْذوْڒمْ-د، ثسّْغُويمْ زَّاثْ إِ وُوذمْ ن سِيذِي. سِيذِي وَارْ إِسْڒِي إِ ثْمِيجَّا نْومْ، وَارْ ذ أَومْ إِوْشِي أَمزُّوغْ، 46 ؤُشَا ثقِّيممْ ذِي قَاذَاشْ إِجّْ ن ڒْوقْثْ ذ أَزِيرَارْ، أَنشْثْ ن ڒْوقْثْ إِ ذِينِّي ثقِّيممْ.“