‏1 إِنَا ذ إِنِّي إِ د-إِتّْوَاخڒْقنْ زِي هَارُونْ ذ مُوسَا ذڭْ وُوسَّانْ نِّي إِسِّيوڒْ سِيذِي أَكْ-ذ مُوسَا خْ وذْرَارْ ن سِينَا. ‏2 أَقَا ذ إِنَا ذ إِسْمَاونْ ن أَيْثْ ن هَارُونْ: نَاذَابْ ذ أَمنْزُو، خنِّي أَبِيهُو، أَلِيعَازَارْ ذ إِثَامَارْ. ^▪   ‏3 أَقَا ذ إِنَا ذ إِسْمَاونْ ن أَيْثْ ن هَارُونْ، إِكهَّاننْ إِنِّي إِتّْوَاذهْننْ ؤُ إِنِّي إِتّْوَاڒقّْمنْ أَمْ إِكهَّاننْ. ‏4 مَاشَا نَاذَابْ ذ أَبِيهُو مُّوثنْ زَّاثْ إِ وُوذمْ ن سِيذِي، ؤُمِي قدّْمنْ ثِيمسِّي ثَاڒْغِيبْثْ زَّاثْ إِ وُوذمْ ن سِيذِي ذِي ڒخْڒَا ن سِينَا. وَارْ ثُوغِي غَارْسنْ أَرَّاوْ. س ؤُيَا ثُوغَا أَلِيعَازَارْ ذ إِثَامَارْ سخَّارنْ أَمْ ؤُكهَّانْ زَّاثْ إِ وُوذمْ ن بَابَاثْسنْ هَارُونْ. ^▪  

‏5 إِسِّيوڒْ سِيذِي أَكْ-ذ مُوسَا، إِنَّا:

‏6 ”سْقَارّبْ-د ثَاقْبِيتْشْ ن لَاوِي ؤُشَا أڭّْ إِ-ثنْ زَّاثْ إِ وُوذمْ ن ؤُكهَّانْ هَارُونْ، حِيمَا أَذْ خَاسْ سخَّارنْ. ^▪   ‏7 أجّْ إِ-ثنْ أَذْ ڒْهَانْ ثَاسخَّارْثْ نّسْ ذ ثْسخَّارْثْ ن مَارَّا ثَامسْمُونْثْ زَّاثْ إِ ؤُقِيضُونْ ن ؤُمْسَاڭَارْ، مَاحنْذْ أَذْ كمّْڒنْ ڒْخذْمثْ ن ثْزذِّيغْثْ. ‏8 أَذْ حْضَانْ خْ مَارَّا ڒقْشُوعْ ن ؤُقِيضُونْ ن ؤُمْسَاڭَارْ ؤُشَا أَذْ طّْفنْ أَحطُّو ن أَيْثْ ن إِسْرَائِيل مَاحنْذْ أَذْ سخَّارنْ ذِي ثْسخَّارْثْ ن ثْزذِّيغْثْ. ‏9 شكْ أَذْ ثوْشذْ إِلَاوِييّنْ إِ هَارُونْ ؤُ إِ وَارَّاونْ نّسْ. أَقَا ذ يِينَا إِ ذ أَسْ إِمّوْشنْ إِ نتَّا وَاهَا زڭْ أَيْثْ ن إِسْرَائِيل.

‏10 أَذْ ثْڒقّْمذْ هَارُونْ ذ إِحنْجِيرنْ نّسْ مَاحنْذْ أَذْ حْضَانْ خْ ثُوكهَّانْثْ. أَبَارَّانِي ونِّي إِ دّْ غَا إِقَارّْبنْ أَذْ إِتّْوَانغْ.“

‏11 إِسِّيوڒْ سِيذِي أَكْ-ذ مُوسَا، إِنَّا:

‏12 ”خْزَارْ، نشّْ كْسِيغْ إِلَاوِييّنْ زِي ڒْوسْثْ ن أَيْثْ ن إِسْرَائِيل ذڭْ ومْشَانْ ن إِمنْزَا، مَارَّا إِنِّي يَارزْمنْ ڒمْڒَاوثْ ذ أَمزْوَارُو جَارْ أَيْثْ ن إِسْرَائِيل. إِلَاوِييّنْ أَذْ إِڒِينْ إِنُو، ^▪  

‏13 مِينْزِي كُوڒْ أَمنْزُو أَقَا إِنُو. ذڭْ وَاسّْ مِينْ ذِي وْثِيغْ مَارَّا إِمنْزَا ذِي ثمُّورْثْ ن مِيصْرَا، أَقَا سّْقدّْسغْ إِ يِيخفْ إِنُو مَارَّا إِمنْزَا ذِي إِسْرَائِيل، زِي بْنَاذمْ أَڒْ ڒْمَاڒْ. نِيثْنِي أَذْ إِڒِينْ إِنُو، نشّْ ذ سِيذِي!“ ^▪  

‏14 إِسِّيوڒْ سِيذِي أَكْ-ذ مُوسَا ذِي ڒخْڒَا ن سِينَا، إِنَّا:

‏15 ”حْسبْ أَيْثْ ن لَاوِي، عْلَاحْسَابْ ثَادَّارْثْ ن إِبَابَاثنْ نْسنْ، عْلَاحْسَابْ ڒَادْجَاثْ نْسنْ. مَارَّا إِوثْمَانْ نِّي إِدْجَانْ ذ إِجّْ ن ؤُيُورْ سنّجْ، أَذْ ثنْ ثحْسبْ.“

‏16 ؤُشَا مُوسَا إِحْسبْ إِ-ثنْ خْ ڒُومُورْ ن سِيذِي، أَمْ مَامّشْ ذ أَسْ إِتّْوَاوصَّا.

‏17 ثُوغَا إِنَا ذ أَيْثْ ن لَاوِي أَكْ-ذ إِسْمَاونْ نْسنْ: جَارْشُونْ، ذ قَاهَاثْ ذ مَارَارِي. ^▪  

‏18 ثُوغَا إِنَا ذ إِسْمَاونْ ن أَيْثْ ن جَارْشُونْ، عْلَاحْسَابْ ڒَادْجَاثْ نْسنْ: لِيبْنِي ذ شِيمْعِي.

‏19 أَيْثْ ن قَاهَاثْ، عْلَاحْسَابْ ڒَادْجَاثْ نْسنْ: عَامْرَامْ ذ يِيصْهَارْ ذ حَابْرُونْ ذ عُوزِّييِيلْ.

‏20 أَيْثْ ن مَارَارِي، عْلَاحْسَابْ ڒَادْجَاثْ نْسنْ: مَاحْلِي ذ مُوشِي. ثُوغَا إِنَا ذ ڒَادْجَاثْ ن إِلَاوِييّنْ تّْوَاستّْفنْ عْلَاحْسَابْ ڒَادْجَاثْ نْسنْ.

‏21 غَارْ جَارْشُونْ ثُوغَا ثدْجْ ڒَادْجْ ن إِلِيبْنِييّنْ ذ ڒَادْجْ ن إِشِيمْعِييّنْ. ثُوغَا ثِينَا ذ ڒَادْجَاثْ ن إِجَارْشُونِييّنْ. ‏22 ثُوغَا ڒْقدّْ ن مَارَّا إِنِّي إِتّْوَاحسْبنْ ن مَارَّا إِوثْمَانْ زڭْ إِجّْ ن ؤُيُورْ سنّجْ: ثُوغَا ڒْقدّْ ن ينِّي زَّايْسنْ إِتّْوَاحسْبنْ سبْعَا-أَڒَافْ ؤُ-خمْسَا-مْيَا. ‏23 وْثِينْثْ ڒَادْجَاثْ ن إِجَارْشُونِييّنْ إِقِيضَانْ نْسنْ غَارْ ضفَّارْ ن ثْزذِّيغْثْ، غَارْ ڒْغَارْبْ . ‏24 ثُوغَا إِلْيَاسَافْ، مِّيسْ ن لَايِيلْ، ذ أَمقّْرَانْ ن ثَادَّارْثْ ن بَابَاثْسنْ ن ڒَادْجَاثْ ن إِجَارْشُونِييّنْ. ‏25 زِي جِّيهثْ ن ؤُقِيضُونْ ن ؤُمْسَاڭَارْ حْضَانْ أَيْثْ ن جَارْشُونْ خْ ثْزذِّيغْثْ، خْ ؤُقِيضُونْ أَكْ-ذ ثْسقَّافِينْ نّسْ، خْ وَارْوَاقْ غَارْ وَاذَافْ ن ؤُقِيضُونْ ن ؤُمْسَاڭَارْ، ‏26 خْ ڒِيزَارَاثْ ن ڒمْرَاحْ ذ وَارْوَاقْ غَارْ وَاذَافْ ن ڒمْرَاحْ إِ زِي ثتّْوَانّضْ ثْزذِّيغْثْ ذ ؤُعَالْطَارْ، ؤُ خْ إِفِيڒَانْ نّسْ، ؤُڒَا خْ مَارَّا مِينْ إِ د-إِتَّاسنْ أَكْ-ذ ثْسخَّارْثْ نِّي.

‏27 زِي قَاهَاثْ ثُوغَا إِقَّارْسْ-د ڒَادْجْ ن إِعَامْرَامِييّنْ ذ ڒَادْجْ ن إِصْهَارِييّنْ ذ ڒَادْجْ ن إِحِيبْرُونِييّنْ ذ ڒَادْجْ ن إِعَازِييِيلِييّنْ ثُوغَا ثِينَا ذ ڒَادْجَاثْ ن إِقَاهَاثِييّنْ. ‏28 ثُوغَا ڒْقدّْ ن مَارَّا إِوثْمَانْ زڭْ إِجّْ ن ؤُيُورْ سنّجْ ثمْنْ-أَڒَافْ ؤُ-ستَّا-مْيَا. نِيثْنِي حْضَانْ خْ زَّاوشْثْ إِقدّْسنْ. ‏29 وْثِينْثْ ڒَادْجَاثْ ن أَيْثْ ن قَاهَاثْ إِقِيضَانْ نْسنْ غَارْ ؤُغزْذِيسْ ن ثْزذِّيغْثْ، غَارْ لْجَانُوبْ. ‏30 إِلِيصَافَانْ، مِّيسْ ن عُوزِّييِيلْ، ثُوغَا ذ أَمقّْرَانْ ن ثَادَّارْثْ ن بَابَاثْسنْ ن ڒَادْجَاثْ ن إِقُوهَاثِييّنْ. ‏31 أَذْ حْضَانْ خْ تَّاپُوثْ ذ ثْزوْضَا ذ ڒْقنْذِيڒْ ذ إِعَالْطَارنْ ؤُشَا خْ ڒقْشُوعْ ن زَّاوشْثْ إِقدّْسنْ إِ غَا سّْخذْمنْ ؤُ خْ ؤُڒحَّافْ، وَاهْ أَذْ حْضَانْ خْ مَارَّا مِينْ إِ د-إِتَّاسنْ أَكْ-ذ ثْسخَّارْثْ نِّي.

‏32 ثُوغَا أَلِيعَازَارْ، مِّيسْ ن ؤُكهَّانْ هَارُونْ، ذ أَمقّْرَانْ قَاعْ خْ مَارَّا إِمقّْرَاننْ ن لَاوِي. نتَّا إِطّفْ أَشْبَارْ خْ ينِّي ثُوغَا إِحطَّانْ خْ زَّاوشْثْ إِقدّْسنْ.

‏33 زِي مَارَارِي ثُوغَا إِقَارْسْ ڒَادْجْ ن إِمَاحْلِييّنْ ذ ڒَادْجْ ن إِمُوشِييّنْ. ثُوغَا ثِينَا ذ ڒَادْجَاثْ ن مَارَارِي. ‏34 ثُوغَا ڒْقدّْ ن يِينِّي زَّايْسنْ إِتّْوَاحسْبنْ، ن مَارَّا إِوثْمَانْ زڭْ إِجّْ ن ؤُيُورْ سنّجْ، ستَّا-أَڒَافْ ؤُ-مِيثَايْنْ. ‏35 ثُوغَا سُورِييِيلْ، مِّيسْ ن أَبِيخَايِيلْ، ذ أَمقّْرَانْ ن ثَادَّارْثْ ن بَابَاثْسنْ ن ڒَادْجَاثْ ن مَارَارِي. نِيثْنِي وْثِينْ إِقِيضَانْ نْسنْ غَارْ ؤُغزْذِيسْ ن ثْزذِّيغْثْ، غَارْ شَّامَالْ. ‏36 أَيْثْ ن مَارَارِي أَذْ طّْفنْ أَشْبَارْ مَاحنْذْ أَذْ وْشنْ ثَايْنِيثْ إِ مَارَّا ثِيفڒْوِينْ ن ثْزذِّيغْثْ، إِ ثْحنْيَا ن ؤُعَارّضْ، إِ إِبِيلَارنْ نّسْ، إِ ثْيَارْسَاوِينْ نّسْ ؤُ إِ مَارَّا ڒقْشُوعْ نّسْ، وَاهْ إِ مَارَّا مِينْ د-إِتَّاسنْ أَكْ-ذ ثْسخَّارْثْ نِّي، ‏37 ؤُڒَا إِ إِبِيلَارنْ نِّي د-إِنّْضنْ إِ ڒمْرَاحْ أَكْ-ذ ثْيَارْسَاوِينْ نْسنْ ذ ڒوْثَاذْ نْسنْ ذ إِفِيڒَانْ نْسنْ.

‏38 مُوسَا ذ هَارُونْ أَكْ-ذ إِحنْجِيرنْ نّسْ وْثِينْ إِقِيضَانْ نْسنْ زَّاثْ إِ وُوذمْ ن ثْزذِّيغْثْ، زَّاثْ إِ وُوذمْ ن ؤُقِيضُونْ ن ؤُمْسَاڭَارْ، غَارْ شَّارْقْ مَانِيسْ د-ثْنقَّارْ ثْفُوشْثْ، ؤُشَا نِيثْنِي حْضَانْ خْ زَّاوشْثْ إِقدّْسنْ ذِي طّْوعْ ن أَيْثْ ن إِسْرَائِيل. أَبَارَّانِي ونِّي د-إِقَارّْبنْ، ثُوغَا إِتّْخصَّا أَذْ إِتّْوَانغْ. ^▪  

‏39 مَارَّا إِنِّي إِتّْوَاحسْبنْ ن إِلَاوِييّنْ، إِنِّي إِحْسبْ مُوسَا أَكْ-ذ هَارُونْ عْلَاحْسَابْ ڒُومُورْ ن سِيذِي، عْلَاحْسَابْ ڒَادْجَاثْ نْسنْ، مَارَّا إِوثْمَانْ زڭْ إِجّْ ن ؤُيُورْ سنّجْ، أَقَا أَثنْ ذِي ثْنَاينْ ؤُ-عِيشْرِينْ-أَڒفْ.

‏40 إِنَّا سِيذِي إِ مُوسَا: ”حْسبْ مَارَّا إِمنْزَا ن إِوثْمَانْ ن أَيْثْ ن إِسْرَائِيل، زڭْ إِجّْ ن ؤُيُورْ سنّجْ، ؤُشَا كْسِي ڒْقدّْ ن إِسْمَاونْ نْسنْ. ‏41 أَذْ ثكْسِيذْ إِلَاوِييّنْ إِ نشّْ ذڭْ ومْشَانْ ن مَارَّا إِمنْزَا جَارْ أَيْثْ ن إِسْرَائِيل ؤُڒَا ذ ڒبْهَايمْ ن إِلَاوِييّنْ ذڭْ ومْشَانْ ن مَارَّا إِمنْزَا جَارْ ڒبْهَايمْ ن أَيْثْ ن إِسْرَائِيل، نشّْ ذ سِيذِي!“ ‏42 ؤُشَا مُوسَا إِحْسبْ مَارَّا إِمنْزَا جَارْ أَيْثْ ن إِسْرَائِيل أَمْ مَامّشْ إِ ذ أَسْ يُومُورْ سِيذِي. ‏43 ڒْقدّْ ن إِسْمَاونْ ن مَارَّا إِمنْزَا إِوثْمَانْ ن إِجّْ ن ؤُيُورْ سنّجْ، ن يِينِّي زَّايْسنْ إِتّْوَاحسْبنْ، أَقَا أَثنْ ذِي ثْنَاينْ ؤُ-عِيشْرِينْ-أَڒفْ ؤُ-مِيثَايْنْ ؤُ-ثْڒَاثَا ؤُ-سبْعِينْ.

‏44 إِسِّيوڒْ سِيذِي أَكْ-ذ مُوسَا، إِنَّا:

‏45 ”كْسِي إِلَاوِييّنْ ذڭْ ومْشَانْ ن مَارَّا إِمنْزَا جَارْ أَيْثْ ن إِسْرَائِيل ؤُڒَا ذ ڒبْهَايمْ ن إِلَاوِييّنْ ذڭْ ومْشَانْ ن ڒبْهَايمْ نْسنْ، مِينْزِي إِلَاوِييّنْ أَذْ إِڒِينْ إِنُو. أَقَا نشّْ ذ سِيذِي. ‏46 زِي جِّيهثْ ن مِيثَاينْ ؤُ-ثْڒَاثَا ؤُ-سبْعِينْ، إِنِّي إِتّْخصَّا أَذْ تّْوَافْذِينْ، مَاغَارْ نِيثْنِي قِّيمنْ سنّجْ إِ إِلَاوِييّنْ ن إِمنْزَا ن أَيْثْ ن إِسْرَائِيل، ‏47 إِتّْخصَّا أَذْ ثكْسِيذْ خمْسَا ن إِشِيقْلنْ إِ كُوڒْ إِجّْ ن ؤُزدْجِيفْ، أَنشْثْ ن ؤُشِيقْلْ ن زَّاوشْثْ إِقدّْسنْ أَذْ ث ثكْسِيذْ. عِيشْرِينْ ن إِجِيرَاثْ أَقَا ذ إِجّْ ن ؤُشِيقْلْ. ^▪   ‏48 أَذْ ثوْشذْ نُّوقَارْثْ نِّي إِ هَارُونْ ؤُ إِ إِحنْجِيرنْ نّسْ، أَقَا-ت إِ تَّامَانْ ن وصْڒَاحْ ن يِينِّي إِقِّيمنْ سنّجْ إِ ڒْقدّْ ن إِلَاوِييّنْ.“

‏49 خنِّي إِكْسِي مُوسَا نُّوقَارْثْ ن وصْڒَاحْ ن يِينِّي إِقِّيمنْ سنّجْ ن يِينِّي إِتّْوَافْذِينْ س إِلَاوِييّنْ. ‏50 ؤُشَا إِطّفْ نُّوقَارْثْ نِّي زڭْ إِمنْزَا ن أَيْثْ ن إِسْرَائِيل: أَڒفْ ؤُ-ثڒْثْ-مْيَا ؤُ-خمْسَا ؤُ-ستِّينْ ن إِشِيقْلنْ، عْلَاحْسَابْ أَشِيقْلْ ن زَّاوشْثْ إِقدّْسنْ. ‏51 ؤُ مُوسَا إِوْشَا نُّوقَارْثْ ن يِينِّي إِتّْوَافْذِينْ إِ هَارُونْ ؤُ إِ إِحنْجِيرنْ نّسْ، عْلَاحْسَابْ أَوَاڒْ ن ؤُقمُّومْ ن سِيذِي، أَمْ مَامّشْ إِ ذ أَسْ يُومُورْ سِيذِي إِ مُوسَا.