22
1 إِسِّيوڒْ سِيذِي أَكْ-ذ مُوسَا، إِنَّا: 2 ”سِيوڒْ أَكْ-ذ هَارُونْ ؤُ أَكْ-ذ إِحنْجِيرنْ نّسْ، مَاحنْذْ وَارْ تِّيوْضنْ غَارْ ثوْهِيبِينْ إِقدّْسنْ ن أَيْثْ ن إِسْرَائِيل ثِينِّي ذ أَيِي سّْقدّْسنْ، حِيمَا وَارْ سّْعِيدْجْثنْ إِسمْ أَمْقدَّاسْ إِنُو. نشّْ ذ سِيذِي! 3 إِنِي أَسنْ: ’مَارَّا أَرْيَازْ زِي زَّارِيعثْ نْومْ ذِي مَارَّا جِّيڒَاثْ نْومْ، ونِّي د غَا إِقَارّْبنْ غَارْ ثوْهِيبِينْ إِقدّْسنْ، نِّي قدّْسنْ أَيْثْ ن إِسْرَائِيل إِ سِيذِي، أَمْ إِخْمجْ نتَّا، أَقَا أَذْ إِتّْوَاقسّْ ورْيَازْ نِّي زَّاثْ إِ وُوذمْ إِنُو. نشّْ ذ سِيذِي. 4 ؤُڒَا ذ إِجّنْ زِي زَّارِيعثْ ن هَارُونْ نِّي ذِي إِدْجْ ڒْبَارْصْ نِيغْ ونِّي غَارْ إِدْجْ ؤُسِيزّڒْ، وَارْ إِتّتّْ زِي ثوْهِيبِينْ إِقدّْسنْ أَڒْ غَا يِيڒِي إِزْذِيڭْ، ؤُڒَا ذ إِجّنْ ونِّي إِحَاذَانْ شَا زِي مِينْ إِتّْوَاسْخمْجنْ س إِجّْ ن ؤُمتِّينْ نِيغْ س إِجّْ ن ورْيَازْ نِّي س ؤُسيّڒْ ن وَادْجُو، ▪ 5 نِيغْ س ورْيَازْ نِّي إِحَاضَانْ شَا مِينْ إِتّْپُوعنْ إِ زِي إِذْوڒْ إِخْمجْ نِيغْ إِحَاذَا إِجّْ ن بْنَاذمْ إِ زِي إِذْوڒْ إِخْمجْ، مَامّشْ مَا ثڭَّا ثخْمُوجِي ن بْنَاذمْ نِّي. 6 بْنَاذمْ نِّي ث إِحَاذَانْ أَذْ يِيڒِي إِخْمجْ أَڒْ ثَامذِّيثْ ؤُشَا وَارْ إِتّتّْ زِي ثوْهِيبِينْ إِقدّْسنْ، مْغِيرْ أَوَارْنِي إِ غَا إِسِّيرْذْ أَرِّيمثْ نّسْ س وَامَانْ. 7 خْمِي د غَا ثغْڒِي ثْفُوشْثْ، أَذْ يِيڒِي إِزْذِيڭْ. أَوَارْنِي أَيَا أَذْ يشّْ زِي ثوْهِيبِينْ إِقدّْسنْ، مِينْزِي أَقَا أَثنْثْ ذ مَاشَّا نّسْ. 8 وَارْ إِتّتّْ زڭْ إِشْثْ ن ڒْخشْبثْ نِيغْ زڭْ إِجّْ ن ؤُمُودَّارْ إِمزّْقنْ مِينْزِي زَّايسْ إِ غَا إِذْوڒْ إِخْمجْ. نشّْ ذ سِيذِي! ▪ 9 أَذْ حْضَانْ مِينْ خفْ ثنْ وصِّيغْ حِيمَا وَارْ سَّاربُّونْ خْ يِيخفْ نْسنْ دّنْبْ ؤُ خنِّي أَذْ زَّايسْ مّْثنْ خْمِي إِ غَا سّْعِيدْجْثنْ أَيَا. نشّْ ذ سِيذِي ونِّي ثنْ إِسّْقدّْسنْ.
10 ؤُڒَا ذ إِجّْ ن ؤُبَارَّانِي وَارْ إِتّتّْ زِي ثوْهِيبْثْ إِقدّْسنْ. أَمْعزّبْ إِ إِزدّْغنْ جَارْ إِكهَّاننْ ؤُڒَا ذ أَشوَّاڒْ وَارْ تّتّنْ زِي ثوْهِيبْثْ إِقدّْسنْ.
11 مَاشَا مَاڒَا أَكهَّانْ إِسْغَا إِجّنْ س نُّوقَارْثْ نّسْ، أَقَا إِعدّڒْ إِ وَا مَاحنْذْ أَذْ زَّايسْ يشّْ ؤُڒَا إِ ينِّي د-إِتّْوَاخڒْقنْ ذِي ثَادَّارْثْ نّسْ أَذْ شّنْ مَاشَّا ن ثوْهِيبْثْ نّسْ.
12 مَاڒَا يدْجِيسْ ن ؤُكهَّانْ ثذْوڒْ ذ ثَامْغَارْثْ ن إِجّْ ن ؤُبَارَّانِي، وَارْ ثتّتّْ شَا زِي ثوْهِيبْثْ إِ د-إِتّْوَاسّْڭعّْذنْ زِي ثوْهِيبِينْ إِقدّْسنْ.
13 مَاشَا مَاڒَا يدْجِيسْ ن ؤُكهَّانْ أَقَا-ت ذ ثَاجَّاتْشْ نِيغْ ثتّْوَادْجفْ زڭْ ورْيَازْ نّسْ ؤُشَا وَارْ غَارسْ أَحنْجِيرْ ؤُشَا ثذْوڒْ-د غَارْ ثَادَّارْثْ ن بَابَاسْ، أَمشْنَاوْ ذِي ثمْژِي نّسْ، خنِّي أَذْ ثشّْ زِي مَاشَّا ن ثوْهِيبْثْ ن بَابَاسْ، مَاشَا ؤُڒَا ذ إِجّْ ن ؤُبَارَّانِي أَذْ زَّايسْ يشّْ. ▪
14 مَاڒَا شَا ن يِيجّنْ إِشَّا زِي ثوْهِيبْثْ إِقدّْسنْ س ؤُودَّارْ، خنِّي أَذْ غَارسْ يَارْنِي ثَاسْغَارْثْ ن ثخْمُوسشْثْ ؤُشَا أَذْ يَارّْ ثَاوْهِيبْثْ إِقدّْسنْ غَارْ ؤُكهَّانْ.
15 نِيثْنِي وَارْ زمَّارنْ أَذْ سّْعِيدْجْثنْ ثِيوْهِيبِينْ إِقدّْسنْ ن أَيْثْ ن إِسْرَائِيل، ثِينِّي سّْڭعّْذنْ غَارْ سِيذِي
16 ؤُشَا خنِّي أَذْ خَاسنْ سَّارْپُونْ أَمَارْوَاسْ س ڒْمُوعْصِييّثْ نْسنْ ؤُمِي غَا شّنْ زِي ثوْهِيبِينْ نْسنْ إِقدّْسنْ، مِينْزِي نشّْ ذ سِيذِي، ونِّي ثنْ إِسّْقدّْسنْ.“
ثِيغَارْصَا إِ إِطّوْعنْ أَيْثْ ن إِسْرَائِيل
17 إِسِّيوڒْ سِيذِي أَكْ-ذ مُوسَا إِنَّا:
18 ”سِيوڒْ أَكْ-ذ هَارُونْ ذ إِحنْجِيرنْ نّسْ ؤُ أَكْ-ذ مَارَّا أَيْثْ ن إِسْرَائِيل ؤُشَا إِنِي أَسنْ: ’ذ مَانْ أَيَا إِڭُّورْ إِ كُوڒْ إِجّنْ زِي ثَادَّارْثْ ن إِسْرَائِيل ؤُ إِ إِبَارَّانِييّنْ ذِي إِسْرَائِيل نِّي يِيوْينْ ثَاوْهِيبْثْ نّسْ ثنِّي د-يُوسِينْ أَكْ-ذ مَارَّا ڒوْعُوذْ نْسنْ ذ مَارَّا ثِيوْهِيبِينْ نْسنْ نِّي وْشِينْ س ڒْخَاضَارْ، ثنِّي د-سّْقَارّْبنْ نِيثْنِي أَمْ ثْغَارْصْثْ ن وشْمَاضْ إِ سِيذِي:
19 مَاحنْذْ أَذْ كنِّيوْ يَارّْ أَذْ ثِيڒِيمْ ثتّْوَاقبّْڒمْ إِتّْخصَّا أَذْ يِيڒِي ذ إِجّْ ن ووْثمْ إِشْنَانْ قَاعْ زڭْ إِفُونَاسنْ نِيغْ زڭْ إِزْمَارنْ نِيغْ زڭْ إِشَارِّييّنْ. 20 وَارْ إِزمَّارْ أَذْ د-ثسّْقَارّْبمْ شَا ن ڒْحَاجّثْ ذَايسْ أَنعْضَابْ، مِينْزِي أَيَا وَارْ كنِّيوْ د-إِتَّارِّي أَذْ ذَايْومْ إِتّْوَافْ أَرْضَا.
21 مَاڒَا إِجّْ ن ورْيَازْ إِسّْقَارّبْ-د ثَاغَارْصْثْ ن ڒهْنَا غَارْ سِيذِي مَاحنْذْ أَذْ إِكمّڒْ إِجّْ ن لْوَاعْذْ نِيغْ أَمْ إِشْثْ ن ثوْهِيبْثْ س ڒْخَاضَارْ، خنِّي أَذْ ثِيڒِي ثَاغَارْصْثْ ذ إِجّْ ن ؤُمُودَّارْ إِشْنَانْ قَاعْ زِي ڒبْهَايمْ نِيغْ زڭْ وُودْجِي، حِيمَا أَذْ ذَايسْ إِتّْوَافْ أَرْضَا. وَارْ إِعدّڒْ أَذْ ذَايسْ يِيڒِي ؤُڒَا ذ إِجّْ ن ڒْعِيبْ. ▪ 22 مِينْ إِدْجَانْ ذ أَذَارْغَاڒْ نِيغْ مِينْ إِتّْوَارْژنْ نِيغْ ذ أَنعْضَابْ نِيغْ مِينْ ذِي دْجَانْثْ ثْفِيضْڒِيوِينْ نِيغْ جْذَامْ نِيغْ شَّامثْ ثخْصَارْ وَارْ ث-إِ-د ثسّْقَارَّابمْ شَا غَارْ سِيذِي ؤُشَا وَارْ زَّايسْ تِّيوْيمْ ثوْهِيبْثْ ن ثْمسِّي إِ سِيذِي خْ ؤُعَالْطَارْ.
23 مَاشَا أَفُونَاسْ نِيغْ إِجّنْ زڭْ وُودْجِي إِ إِقبْحنْ زِي سِّيبّثْ ن ثُوزّڭَّارْثْ نِيغْ ثُوقُوضضْثْ أَطَّاسْ، إِعدّڒْ أَذْ ث-إِ-د ثسّْوجْذذْ أَمْ إِشْثْ ن ثوْهِيبْثْ س ڒْخَاضَارْ، مَاشَا إِ يِيجّْ ن لْوَاعْذْ وَارْ إِسدْجْحنْ إِ أَرْضَا. 24 مِينْ إِذْڭدّْڭنْ، مِينْ إِڒبْزنْ، مِينْ إِمزّْقنْ، مِينْ إِتّْوَاقسّنْ وَارْ د ث ثسّْقَارَّابمْ غَارْ سِيذِي، وَارْ تّڭّمْ أَيَا ذِي ثمُّورْثْ نْومْ. 25 زڭْ ؤُفُوسْ ن مِّيسْ ن ؤُبَارَّانِي وَارْ تّْقدَّاممْ شَا زِي مَارَّا مَانْ أَيَا مَاشَّا ذ ثَاوْهِيبْثْ إِ أَربِّي، مِينْزِي ذَايسْ ڒْغشّْ نْسنْ ؤُڒَا ذ نّقْصَانْ ذَايسْ، مَانْ أَيَا وَارْ إِتّْوَاقبِّيڒْ شَا ذِي طّْوعْ نْومْ.“
26 إِسِّيوڒْ سِيذِي أَكْ-ذ مُوسَا، إِنَّا:
27 ”خْمِي د-إِخدْجقْ ؤُفُونَاسْ نِيغْ إِزْمَارْ نِيغْ إِغَايْضْ، خنِّي أَذْ يِيڒِي سَاذُو حطُّو ن يمَّاسْ سبْعَا ن وُوسَّانْ. زڭْ وَاسّْ وِيسّْ ثْمنْيَا ؤُ أَوَارْنِي أَسْ أَذْ إِصْڒحْ إِ يَارْضَا أَمْ ثوْهِيبْثْ ن ثْمسِّي إِ سِيذِي. 28 وَارْ إِعدّڒْ أَذْ ثْغَارْصذْ إِ ؤُفُونَاسْ نِيغْ إِ إِجّنْ زڭْ وُودْجِي أَكْ-ذ مِّيسْ ذڭْ وَاسّْ ذ إِجّْ. 29 خْ مِينِّي ثخْسمْ أَذْ ثْقدّْممْ ثَاوْهِيبْثْ ن ؤُقَاذِي إِ سِيذِي، قدّمْ خنِّي مِينْ إِصڒْحنْ إِ يَارْضَا نْومْ. 30 أَذْ ثتّْوَاشّْ ذڭْ وَاسّْ نِّي سِيمَانْثْ نّسْ. وَارْ زَّايسْ تّجِّيمْ شَا أَڒْ ضّْبحْ. نشّْ ذ سِيذِي! ▪
31 أَذْ ثحْضَامْ ڒُومُورَاثْ إِنُو ؤُشَا أَذْ زَّايْسنْ ثڭّمْ. نشّْ ذ سِيذِي!
32 وَارْ تّسّْعِيدْجِيثمْ إِسمْ إِنُو إِقدّْسنْ، حِيمَا نشّْ أَذْ تّْوَاقدّْسغْ ذِي ڒْوسْثْ ن أَيْثْ ن إِسْرَائِيل. نشّْ ذ سِيذِي، ونِّي كنِّيوْ إِسّْقدّْسنْ، 33 ذ ونِّي كنِّيوْ د-إِسُّوفّْغنْ زِي ثمُّورْثْ ن مِيصْرَا، حِيمَا أَذْ إِڒِيغْ ذ أَربِّي إِ كنِّيوْ. نشّْ ذ سِيذِي!“