‏1 إِنَّا سِيذِي إِ مُوسَا: ”سِيوڒْ أَكْ-ذ إِكهَّاننْ، إِحنْجِيرنْ ن هَارُونْ، ؤُشَا إِنِي أَسنْ: ’ؤُڒَا ذ إِجّْ زَّايْومْ وَارْ إِسّخْمِيجْ إِخفْ نّسْ س إِجّْ ن ؤُمتِّينْ جَارْ ڒْڭنْسْ نّسْ. ‏2 مْغِيرْ س رَادْجْ نّسْ يُوذْسنْ، س يمَّاسْ نِيغْ س بَابَاسْ نِيغْ س مِّيسْ نِيغْ س يدْجِيسْ نِيغْ س ؤُمَاسْ. ‏3 ؤُڒَا س ؤُمَاسْ نِّي ذ ثَاعْزَارْشْثْ، ؤُڒَا ذ ڒَادْجْ نّسْ يُوذْسنْ ؤُ وَارْ غَارسْ ثُوغِي ورْيَازْ، أَقَا زَّايسْ إِ إِزمَّارْ أَذْ إِسّخْمجْ إِخفْ نّسْ. ‏4 بَابْ ن ثَادَّارْثْ وَارْ إِسّْخمَّاجْ إِخفْ نّسْ س ڒْڭنْسْ نّسْ أَڒْ غَا إِسّْعِيدْجِي إِخفْ نّسْ زَّايسْ.

‏5 وَارْ تّڭّنْ شَا ن ومْشَانْ إِقُّوشَّارْ خْ إِزدْجِيفْ نْسنْ ؤُشَا وَارْ تّْحفِّينْ طَّارْفْ ن ثْمَارْثْ نْسنْ ؤُ وَارْ شَارّْضنْ أَشَارّضْ ذڭْ ويْسُومْ نْسنْ.

‏6 أَذْ إِڒِينْ ذ إِمْقدَّاسنْ إِ أَربِّي نْسنْ ؤُشَا وَارْ فطّْحنْ إِسمْ ن أَربِّي نْسنْ، مِينْزِي أَقَا ذ نِيثْنِي إِ إِسّْقَارَّابنْ ثِيوْهِيبِينْ ن ثْمسِّي غَارْ أَربِّي، ثِينِّي ذ مَاشَّا ن ثوْهِيبْثْ ن أَربِّي نْسنْ. س ؤُيَا أَذْ إِڒِينْ ذ إِمْقدَّاسنْ.

‏7 وَارْ إِعدّڒْ أَذْ أَوْينْ ثَامْغَارْثْ نِّي إِدْجَانْ ذ لْفَاسْذَا نِيغْ إِشْثنْ ثتّْوَاغْصبْ. ؤُڒَا ذ إِشْثْ ن ثمْغَارْثْ نِّي إِتّْوَادْجْفنْ زڭْ ورْيَازْ نّسْ، وَارْ ت تِّيوْينْ، مِينْزِي أَكهَّانْ نتَّا ذ أَمْقدَّاسْ إِ أَربِّي نّسْ. ‏8 أَذْ ث ثْحسْبذْ ذ أَمْقدَّاسْ مِينْزِي نتَّا إِسّْقَارَّابْ-د مَاشَّا ن ثوْهِيبْثْ ن أَربِّي نّكْ. أَذْ يِيڒِي ذ أَمْقدَّاسْ إِ شكْ، مِينْزِي نشّْ ذ أَمْقدَّاسْ، نشّْ ذ سِيذِي ونِّي كنِّيوْ إِسّْقدّْسنْ. ‏9 مَاڒَا يدْجِيسْ ن إِجّْ ن ورْيَازْ نِّي إِدْجَانْ ذ أَكهَّانْ ثنِّي ثسّفْضحْ إِخفْ نّسْ س فَارْقْ-شّْغڒْ نّسْ، خنِّي أَقَا ثسّفْضحْ بَابَاسْ ؤُشَا إِتّْخصَّا أَسْ أَذْ ثتّْوَاسشْمضْ س ثْمسِّي.

‏10 أَرَّايْسْ ن إِكهَّاننْ جَارْ أَيْثْمَاسْ، ونِّي خْ ؤُزدْجِيفْ نّسْ ثتّْوَافَارّغْ زّشْثْ إِ وذْهَانْ ؤُ ونِّي إِتّْوَاڒقّْمنْ مَاحنْذْ أَذْ يَارْضْ أَرُّوضْ ن ؤُكهَّانْ، نتَّا وَارْ إِزمَّارْ أَذْ إِضْڒقْ إِ ؤُشوَّافْ خْ ؤُزدْجِيفْ نّسْ نِيغْ أَذْ إِشَارّڭْ أَرُّوضْ نّسْ.

‏11 وَارْ إِزمَّارْ أَذْ د-إِقَارّبْ غَارْ إِشْثْ ن ڒْخشْبثْ ؤُڒَا وَارْ إِزمَّارْ أَذْ إِسّخْمجْ إِخفْ نّسْ س بَابَاسْ ذ يمَّاسْ.

‏12 وَارْ إِتّفّغْ زِي زَّاوشْثْ إِقدّْسنْ حِيمَا وَارْ إِسّْعِيدْجِي زَّاوشْثْ إِقدّْسنْ ن أَربِّي، مِينْزِي ثَامْرِيسْثْ ن زّشْثْ ن وذْهَانْ ن أَربِّي نّسْ أَقَا-ت خَاسْ. نشّْ ذ سِيذِي!

‏13 أَذْ يَاوِي إِشْثْ ن ثعْزَارشْثْ ذ ثَامْغَارْثْ.

‏14 وَارْ إِتِّيوِي ثَاجَّاتْشْ نِيغْ ثَاندْجَافْثْ نِيغْ ثنِّي إِتّْوَاغصْبنْ ذ ثَامْغَارْثْ، مَاشَا أَذْ يَاوِي إِشْثْ ن ثعْزَارشْثْ زِي ڒْڭنْسْ نّسْ ذ ثَامْغَارْثْ.

‏15 وَارْ إِسّْعِيدْجِي زَّارِيعثْ نّسْ جَارْ ڒْڭنْسْ نّسْ، مِينْزِي نشّْ ذ سِيذِي، ونِّي ث إِسّْقدّْسنْ.“

‏16 إِسِّيوڒْ سِيذِي أَكْ-ذ مُوسَا، إِنَّا:

‏17 ”سِيوڒْ أَكْ-ذ هَارُونْ، إِنِي: ’ؤُڒَا ذ إِجّْ زِي زَّارِيعثْ نّكْ، ذِي مَارَّا جِّيڒَاثْ نْسنْ، إِ ذِي إِدْجْ شَا ن ؤُنعْضَابْ، أَذْ د-إِقَارّبْ حِيمَا أَذْ د-إِسّْقَارّبْ مَاشَّا ن ثوْهِيبْثْ ن أَربِّي نّسْ.

‏18 مِينْزِي ؤُڒَا ذ إِجّْ ن ورْيَازْ وَارْ د-إِتّْقَارِّيبْ شَا س يِيجّْ ن ڒْعِيبْ، مَا ذ أَذَارْغَاڒْ إِ إِدْجْ نِيغْ ذ أَقِيضَارْ نِيغْ س شَا وَارْ إِحْڒِي نِيغْ غَارسْ صِّيفثْ ثْفَارْغْ

‏19 نِيغْ إِجّْ ن ورْيَازْ يَارْژْ أَسْ ؤُضَارْ نِيغْ أَفُوسْ ‏20 نِيغْ بُو-ثعْرُورْثْ نِيغْ حذْ يَاڒْوسْ ذِي شَا ن يِيجّْ ن تّجَّاڒْ نِيغْ س إِشْثْ ن ثِيطّْ ثُوفّْ نِيغْ س جْذَامْ نِيغْ س إِشْثْ ن شَّامثْ ثخْصَارْ نِيغْ س إِقدْجَاڒنْ إِذْڭذْڭنْ. ‏21 وَارْ إِعدّڒْ إِ ؤُڒَا ذ إِجّْ ن ورْيَازْ زِي زَّارِيعثْ ن ؤُكهَّانْ هَارُونْ، ونِّي ذِي إِدْجْ شَا ن ڒْعِيبْ، أَذْ د-إِڒْحمْ مَاحنْذْ أَذْ د-إِسّْقَارّبْ ثِيوْهِيبِينْ ن ثْمسِّي ن سِيذِي. أَقَا ذَايسْ أَنعْضَابْ، وَارْ إِزمَّارْ أَذْ إِفّغْ مَاحنْذْ أَذْ د-إِسّْقَارّبْ مَاشَّا ن ثوْهِيبْثْ ن أَربِّي نّسْ. ‏22 زِي مَاشَّا ن ثوْهِيبْثْ ن أَربِّي نّسْ إِعدّڒْ أَذْ زَّايسْ يشّْ، زِي مِينْ إِدْجَانْ إِقدّْسنْ قَاعْ ؤُڒَا زِي مِينْ إِقدّْسنْ. ‏23 مَاشَا وَارْ إِعدّڒْ أَذْ د-إِقَارّبْ غَارْ ؤُڒحَّافْ ؤُڒَا غَارْ ؤُعَالْطَارْ، مِينْزِي ذَايسْ إِشْثْ ن ؤُنعْضَابْ، حِيمَا وَارْ إِسّْعِيدْجِي ثِيزَاوِييِّينْ إِقدّْسنْ إِنُو، مِينْزِي نشّْ ذ سِيذِي ونِّي ثنْ إِسّْقدّْسنْ.“

‏24 أَمُّو إِ إِسِّيوڒْ مُوسَا أَكْ-ذ هَارُونْ ؤُ أَكْ-ذ إِحنْجِيرنْ نّسْ ؤُ أَكْ-ذ مَارَّا أَيْثْ ن إِسْرَائِيل.