‏1  إِسِّيوڒْ سِيذِي أَكْ-ذ مُوسَا، إِنَّا:

‏2 ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ: ’ڒعْيُوذَاثْ إِتّْوَاڭّنْ ن سِيذِي، إِنِّي إِ خْ غَا ثْبَارّْحمْ، أَذْ إِڒِينْ ذ إِمُونِيثنْ إِقدّْسنْ. أَقَا أَثنْثْ ذ ڒعْيُوذَاثْ إِنُو إِتّْوَاڭّنْ. ‏3 ستَّا ن وُوسَّانْ أَذْ ثْخذْممْ، مَاشَا ذڭْ وَاسّْ وِيسّْ سبْعَا أَذْ يِيڒِي ذ سّبْثْ إِ أَرَّاحثْ، إِجّْ ن ؤُمُونِي إِقدّْسنْ. وَارْ ذَايسْ ثْخدّْممْ. أَقَا ذ سّبْثْ إِ سِيذِي ذِي مَارَّا ثِيزذِّيغِينْ نْومْ. ^▪  

‏4 أَقَا ذ إِنَا ذ ڒعْيُوذَاثْ إِتّْوَاڭّنْ ن سِيذِي، إِمُونِيثنْ إِقدّْسنْ، إِنِّي إِ غَا ثْبَارّْحمْ ذڭْ وُوسَّانْ نْسنْ إِتّْوَاڭّنْ.

‏5 ذڭْ ؤُيُورْ أَمزْوَارُو، ذڭْ وَاسّْ وِيسّْ أَرْبعْطَاشْ ن ؤُيُورْ، جَارْ بدُّو ن وزْينْ ن وَاسّْ أَڒْ د-ثوْضَا ثْمذِّيثْ، أَقَا-ت ذ ثَاغَارْصْثْ ن ؤُسعْذُو ن سِيذِي. ^▪   ‏6 ذڭْ وَاسّْ وِيسّْ خمّسْطَاشْ ن ؤُيُورْ نِّيثْ، أَذْ يِيڒِي ذ ڒْعِيذْ ن وغْرُومْ بْڒَا أَنْثُونْ إِ سِيذِي. سبْعَا ن وُوسَّانْ أَذْ ثشّمْ أَغْرُومْ بْڒَا أَنْثُونْ. ‏7 أَسّْ أَمزْوَارْ أَذْ ثڭّمْ إِجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ن ڒْخذْمثْ إِ إِتّْخصَّانْ أَذْ ثتّْوَاڭّْ. ‏8 سبْعَا ن وُوسَّانْ كمّْڒنْ أَذْ ثَاوْيمْ إِشْثْ ن ثوْهِيبْثْ ن ثْمسِّي إِ سِيذِي ؤُشَا ذڭْ وَاسّْ وِيسّْ سبْعَا أَذْ ذِينْ يِيڒِي إِجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ن ڒْخذْمثْ إِ إِتّْخصَّانْ أَذْ ثتّْوَاڭّْ.“

‏9 إِسِّيوڒْ سِيذِي أَكْ-ذ مُوسَا، إِنَّا:

‏10 ”سِيوڒْ أَكْ-ذ أَيْثْ ن إِسْرَائِيل، إِنِي أَسنْ: ’مَاڒَا ثِيوْضمْ غَارْ ثمُّورْثْ نِّي ذ أَومْ غَا وْشغْ ؤُشَا أَذْ ثمْجَارمْ صَّابثْ نّسْ، خنِّي أَذْ ثَاوْيمْ إِشْثْ ن ثْقبِّيضْثْ زِي ثْمزْوَارُوثْ ن صَّابثْ نْومْ غَارْ ؤُكهَّانْ.

‏11 ؤُشَا نتَّا أَذْ إِسّنْهزّْ ثَاقبِّيضْثْ نِّي زِي سَّا غَارْ ذَا زَّاثْ إِ وُوذمْ ن سِيذِي مَاحنْذْ أَذْ زَّايسْ ثتّْوَاقبْڒمْ. ذِي ثُوفُّوثْ أَوَارْنِي سّبْثْ أَذْ ت إِسّنْهزّْ ؤُكهَّانْ.

‏12 ذڭْ وَاسّْ مِينْ ذِي إِ غَا ثنْهزّمْ ثَاقبِّيضْثْ، ڭُّورْ كنِّيوْ أَذْ ثسّْوجْذمْ عَاوذْ إِجّْ ن إِزْمَارْ إِشْنَانْ قَاعْ ن إِجّْ ن ؤُسڭّْوَاسْ أَمْ إِشْثْ ن ثْغَارْصْثْ ن وشْمَاضْ إِ سِيذِي.

‏13 أَذْ ثِيڒِي ثوْهِيبْثْ ن ڒْغِيدْجثْ زِي ثْنَاينْ ن ثعْشُورَايْ ن إِجّْ ن إِفَا ن وَارنْ أَزْذَاذْ إِخدْجْضنْ س زّشْثْ، أَقَا-ت ذ إِشْثْ ن ثوْهِيبْثْ ن ثْمسِّي س إِشْثْ ن ڒفْوَاحثْ إِتّْفُوحنْ إِ سِيذِي، ؤُ ثَاوْهِيبْثْ نّسْ ن ؤُسيّبْ أَذْ ثِيڒِي ذ بِينُو، إِجّْ ن أَرْبعْ زڭْ إِجّْ ن ؤُهِينُو.

‏14 وَارْ تّتّمْ أَغْرُومْ ؤُڒَا ذ ثِيذْرِينْ يُورْفنْ نِيغْ ثِيزِيزَاوِينْ أَڒْ أَسّْ مِينْ ذِي د-ثِيوْيمْ ثَاوْهِيبْثْ نْومْ غَارْ أَربِّي. أَقَا-ت ذ إِشْثْ ن ثوْصيّثْ إِ ڒبْذَا إِ مَارَّا جِّيڒَاثْ نْومْ مَانِي مَا ثْزدّْغمْ.

‏15 أَوَارْنِي أَسْ ڭُّورْ أَذْ ثْحسْبمْ س ڒْمقْڒُوبْ إِ يِيخفْ نْومْ زِي ضّْبحْ أَوَارْنِي إِ سّبْثْ، زڭْ وَاسّْ مِينْ ذِي د-ثِيوْيمْ ثَاقبِّيضْثْ ن ثوْهِيبْثْ ن ونْهزِّي. إِتّْخصَّا أَذْ إِڒِينْ سبْعَا ن وُوسَّانْ ن سّبْثْ كمّْڒنْ. ^▪  

‏16 أَذْ ثْحسّْبمْ خمْسِينْ ن وُوسَّانْ أَڒْ ثُوفُّوثْ ن سّبْثْ وِيسّْ سبْعَا. خنِّي أَذْ ثَاوْيمْ إِشْثْ ن ثوْهِيبْثْ ن ڒْغِيدْجثْ ن جْذِيذْ إِ سِيذِي.

‏17 أَذْ د-ثَاوْيمْ ثْنَاينْ ن ثشْنِيفِينْ ن وغْرُومْ إِ ونْهزِّي زڭْ إِمُوشَانْ مَانِي ثْزدّْغمْ. أَذْ إِڒِينْثْ زِي ثْنَاينْ ن ثعْشُورَايْ ن يِيجّْ ن إِفَا ن وَارنْ أَزْذَاذْ، ڭّْوِينْثْ س ونْثُونْ. أَقَا أَثنْثْ ذ ثِيمنْزَا إِ سِيذِي.

‏18 كنِّيوْ أَذْ د-ثسّْقَارّْبمْ أَكْ-ذ وغْرُومْ عَاوذْ سبْعَا ن إِزْمَارنْ شْنَانْ قَاعْ ن إِجّْ ن ؤُسڭّْوَاسْ ذ إِجّْ ن ؤُينْذُوزْ، أَمژْيَانْ ن ؤُفُونَاسْ، ذ ثْنَاينْ ن إِشَارِّييّنْ. أَذْ إِڒِينْ إِ ثْغَارْصْثْ ن وشْمَاضْ إِ سِيذِي أَكْ-ذ ثوْهِيبْثْ نْسنْ ن ڒْغِيدْجثْ ذ ثوْهِيبِينْ نْسنْ ن ؤُسيّبْ، مَانْ أَيَا ذ إِشْثْ ن ثوْهِيبْثْ ن ثْمسِّي س إِشْثْ ن ڒفْوَاحثْ إِتّْفُوحنْ إِ سِيذِي.

‏19 أَذْ ثسّْوجْذمْ عَاوذْ إِجّْ ن إِغَايْضْ ذ أَمژْيَانْ ذ ثَاغَارْصْثْ ن دّنْبْ ؤُ ثْنَاينْ ن إِزْمَارنْ ن إِجّْ ن ؤُسڭّْوَاسْ ذ ثْغَارْصْثْ نْ ڒهْنَا. ‏20 أَذْ ثنْ إِسّنْهزّْ ؤُكهَّانْ أَكْ-ذ وغْرُومْ ن ثَامنْزُوثْ زِي سَّا غَارْ ذَا أَمْ إِشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي، ؤُشَا ؤُڒَا ذ ثْنَاينْ ن إِزْمَارنْ. أَذْ إِڒِينْ إِقدّْسنْ إِ سِيذِي، إِ ؤُكهَّانْ. ‏21 ذڭْ وَاسّْ نِّيثْ أَذْ ثْبَارّْحمْ إِ يِيجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ن ڒْخذْمثْ إِ إِتّْخصَّانْ أَذْ ثتّْوَاڭّْ. أَقَا-ت ذ إِشْثْ ن ثوْصيّثْ إِ ڒبْذَا مَانِي مَا إِ غَا ثْزذْغمْ إِ مَارَّا جِّيڒَاثْ نْومْ.

‏22 خْمِي إِ غَا ثمْجَارمْ ڒْغِيدْجثْ ن ثمُّورْثْ نْومْ، وَارْ مجَّارْ أَڒْ أَنڭَّارْ ن طَّارْفْ ن ييَّارْ نّكْ، ؤُ مِينْ إِقِّيمنْ ن ڒْغِيدْجثْ نّكْ وَارْ ث ثْكسّذْ شَا. إِتّْخصَّا أَذْ ثجّمْ شْوَايْثْ إِ ؤُمزْڒُوضْ ؤُ إِ ؤُبَارَّانِي. نشّْ ذ سِيذِي، أَربِّي نْومْ!“ ^▪  

‏23 إِسِّيوڒْ سِيذِي أَكْ-ذ مُوسَا، إِنَّا:

‏24 ”سِيوڒْ أَكْ-ذ أَيْثْ ن إِسْرَائِيل، إِنِي أَسنْ: ’ذڭْ ؤُيُورْ وِيسّْ سبْعَا، ذڭْ وَاسّْ أَمزْوَارُو ن ؤُيُورْ، أَذْ يِيڒِي ذ سّبْثْ إِ كنِّيوْ، إِجّْ ن وَاسّْ ن ڒِيذَارثْ أَكْ-ذ ؤُصُوضِي س وسْرُودّحْ ذِي ڒْپُوقْ، إِجّْ ن ؤُمُونِي إِقدّْسنْ. ^▪   ‏25 وَارْ تّڭّمْ ؤُڒَا ذ إِشْثْ ن ڒْخذْمثْ إِ إِتّْخصَّانْ أَذْ ثتّْوَاڭّْ. أَذْ د-ثسْقَارّْبمْ إِشْثْ ن ثوْهِيبْثْ ن ثْمسِّي إِ سِيذِي.“

‏26 إِسِّيوڒْ سِيذِي أَكْ-ذ مُوسَا، إِنَّا:

‏27 ”ذڭْ وَاسّْ وِيسّْ عشْرَا ن ؤُيُورْ وِيسّْ سبْعَا أَذْ يِيڒِي ذ أَسّْ ن وصْڒَاحْ. أَذْ ثْبَارّْحمْ س يِيجّْ ن ؤُمُونِي إِقدّْسنْ. أَذْ ثسّْوَاضْعمْ إِخفْ نْومْ ؤُشَا أَذْ د-ثسّْقَارّْبمْ إِشْثْ ن ثوْهِيبْثْ ن ثْمسِّي إِ سِيذِي. ^▪   ‏28 وَارْ تّڭّمْ ؤُڒَا ذ إِشْثْ ن ڒْخذْمثْ ذڭْ وَاسّْ نِّي نِّيثْ، مِينْزِي أَقَا-ث ذ أَسّْ ن وصْڒَاحْ مَاحنْذْ أَذْ خَاومْ إِتّْوَافْذِي زَّاثْ إِ وُوذمْ ن سِيذِي، أَربِّي نْومْ. ‏29 مِينْزِي مَارَّا بْنَاذمْ نِّي وَارْ إِسّْوَاضْعنْ إِخفْ نّسْ ذڭْ وَاسّْ نِّي، أَذْ إِتّْوَاقسّْ زِي ڒْڭنْسْ نّسْ. ‏30 كُوڒْ بْنَاذمْ نِّي إِ غَا إِڭِّينْ شَا ن ڒْخذْمثْ ذڭْ وَاسّْ نِّي نِّيثْ، نشّْ أَذْ ثحِّيغْ بْنَاذمْ نِّي زِي ڒْوسْثْ ن ڒْڭنْسْ نّسْ. ^▫   ‏31 وَارْ تّڭّمْ ؤُڒَا ذ إِشْثْ نْ ڒْخذْمثْ. أَقَا-ت ذ إِشْثْ ن ثوْصيّثْ إِ ڒبْذَا إِ مَارَّا جِّيڒَاثْ نْومْ مَانِي مَا إِ غَا ثْزذْغمْ. ‏32 أَذْ يِيڒِي ذ إِجّْ ن سّبْثْ ن أَرَّاحثْ ثْمُونْ إِ كنِّيوْ. أَذْ ثسّْوَاضْعمْ إِخفْ نْومْ. ذڭْ وَاسّْ وِيسّْ ثسْعَا ن ؤُيُورْ، ذِي دْجِيڒثْ، زڭْ ؤُعشِّي غَارْ ؤُعشِّي نّغْنِي أَذْ ثحْضَامْ أَرَّاحثْ نْومْ ن سّبْثْ.“

‏33 إِسِّيوڒْ سِيذِي أَكْ-ذ مُوسَا، إِنَّا:

‏34 ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي: ’ذڭْ وَاسّْ وِيسّْ خمّسْطَاشْ ن ؤُيُورْ وِيسّْ سبْعَا أَذْ يِيڒِي ذ ڒْعِيذْ ن إِعُوشُّوثنْ إِ سِيذِي. ^▪   ‏35 ذڭْ وَاسّْ أَمزْوَارُو أَذْ يِيڒِي يِيجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ن ڒْخذْمثْ إِ إِتّْخصَّانْ أَذْ ثتّْوَاڭّْ. ‏36 سبْعَا ن وُوسَّانْ أَذْ د-ثسّْقَارّْبمْ ثِيوْهِيبِينْ ن ثْمسِّي غَارْ سِيذِي. ذڭْ وَاسّْ وِيسّْ ثْمنْيَا أَذْ ذِينْ يِيڒِي يِيجّْ ن ؤُمُونِي إِقدّْسنْ ؤُشَا أَذْ ثَاوْيمْ إِشْثْ ن ثوْهِيبْثْ ن ثْمسِّي إِ سِيذِي. أَقَا ذ إِجّْ ن ؤُمُونِي إِفَارْزنْ ذ أَمْقدّسْ، وَارْ تّڭّمْ ؤُڒَا ذ إِشْثْ نْ ڒْخذْمثْ إِ إِتّْخصَّانْ أَذْ ثتّْوَاڭّْ. ^▪  

‏37 إِنَا ذ ڒعْيُوذَاثْ إِتّْوَاڭّنْ ن سِيذِي إِنِّي زِي غَا ثْبَارّْحمْ ذ إِمُونِيثنْ إِقدّْسنْ مَاحنْذْ أَذْ د-ثسّْقَارّْبمْ إِشْثْ ن ثوْهِيبْثْ ن ثْمسِّي عَارْ سِيذِي، إِشْثْ ن ثْغَارْصْثْ ن وشْمَاضْ ذ إِشْثْ ن ثوْهِيبْثْ ن ڒْغِيدْجثْ، إِشْثْ ن ثوْهِيبْثْ إِ ثْغَارْصْثْ ذ ثوْهِيبِينْ ن ؤُسيّبْ، كُوڒْ أَسّْ مِينْ إِتّْوَاڭّنْ إِ وَاسّْ نِّي، ‏38 بَارَّا إِ ثْغَارْصَا نْومْ ن وُوسَّانْ ن سّبْثْ ن سِيذِي ذ ثوْهِيبِينْ نْومْ ن لْوُوعُوذْ نْومْ ذ ثوْهِيبِينْ نْومْ س ڒْخَاضَارْ، إِنِّي ثتّْنَامَامْ أَذْ ثنْثْ ثوْشمْ إِ سِيذِي. ‏39 مَاشَا ذڭْ وَاسّْ وِيسّْ خمّسْطَاشْ ن ؤُيُورْ وِيسّْ سبْعَا، خْمِي إِ غَا ثسّْمُونمْ ڒْغِيدْجثْ ن ثمُّورْثْ، خنِّي أَذْ ثْعيّْذمْ ڒْعِيذْ ن سِيذِي سبْعَا ن وُوسَّانْ. ذڭْ وَاسّْ أَمزْوَارُو أَذْ يِيڒِي يِيجّْ ن وَاسّْ ن سّبْثْ ؤُڒَا ذڭْ وَاسّْ وِيسّْ ثْمنْيَا أَذْ ذِينْ يِيڒِي يِيجّْ ن وَاسّْ ن سّبْثْ. ‏40 ذڭْ وَاسّْ أَمزْوَارُو أَذْ ثكْسِيمْ ڒفْرُوعْ س ڒْغِيدْجثْ ن ثْشجِّيرَا إِشوَّارنْ: ثِيسضْوِينْ ن ثِينِي ذ ثِيسضْوَا ن ثْشجِّيرَا س ثفْرَايْ أَطَّاسْ ذ ثْسضْوِينْ ن ثْشجَّارْثْ ن ثْنمْڒَاتْشْ ن ثْغزْرَاثِينْ. سبْعَا ن وُوسَّانْ أَذْ ثْفَارْحمْ زَّاثْ إِ وُوذمْ ن سِيذِي، أَربِّي نْومْ. ^▫   ‏41 أَذْ ثْعيّْذمْ ڒْعِيذْ ن إِعُوشُّوثنْ سبْعَا ن وُوسَّانْ ذڭْ ؤُسڭّْوَاسْ إِ سِيذِي. أَقَا-ت ذ إِشْثْ ن ثوْصيّثْ إِ ڒبْذَا إِ مَارَّا جِّيڒَاثْ نْومْ. أَذْ ث ثْعيّْذمْ ذڭْ ؤُيُورْ وِيسّْ سبْعَا. ‏42 أَذْ ثْزذْغمْ سبْعَا ن وُوسَّانْ ذڭْ إِعُوشُّوثنْ. مَارَّا إِنِّي د-إِتّْوَاخڒْقنْ ذِي إِسْرَائِيل أَذْ زذْغنْ ذڭْ إِعُوشُّوثنْ، ‏43 حِيمَا أَذْ سّْننْ مَارَّا جِّيڒَاثْ نْومْ، بلِّي نشّْ ڭِّيغْ أَذْ زذْغنْ أَيْثْ ن إِسْرَائِيل ذڭْ إِعُوشُّوثنْ، ؤُمِي ثنْ سُّوفّْغغْ زِي ثمُّورْثْ ن مِيصْرَا. نشّْ ذ سِيذِي، أَربِّي نْومْ!“

‏44 أَمُّو إِ إِسِّيوڒْ مُوسَا أَكْ-ذ أَيْثْ ن إِسْرَائِيل خْ ڒعْيُوذَاثْ إِتّْوَاڭّنْ ن سِيذِي.