1 ⴻⵊⵊ ⴽⵓⵍ ⵉⵊⵊ ⴰⴷ ⵉⵡⴰⴹⴻⵄ ⵉ ⵚⵚⵓⵍⴰⵟⴰⵜ ⵏ ⵢⵉⵏⵏⵉ ⵉⵃⴻⴽⴽⵎⴻⵏ, ⵎⵉⵏⵥⵉ ⵡⴰⵔ ⴷⵉⵏ ⵚⵚⵓⵍⵟⴰ ⵎⵖⵉⵔ ⵙ ⴰⵔⴻⴱⴱⵉ, ⴷ ⵜⵉⵏⵏⵉ ⵉⴵⴰⵏ ⴰⵇⴰ ⵉⵙⵙⴱⴻⴷⴷ ⵉ-ⵜⴻⵏⵜ ⴰⵔⴻⴱⴱⵉ. ^■   2 ⵙ ⵓⵢⴻⵏⵏⵉ ⵡⴻⵏⵏⵉ ⵉ ⵖⴰ ⵉⵎⵎⵄⴰⵍⴰⵏ ⴰⴽ-ⴷ ⵚⵚⵓⵍⵟⴰ, ⵉⵜⵜⴻⵎⵄⴰⵍⴰ ⴰⴽ-ⴷ ⵎⵉⵏ ⵉⵙⵙⴱⴻⴷⴷ ⴰⵔⴻⴱⴱⵉ, ⴷ ⵢⴻⵏⵏⵉ ⵉⵜⵜⴻⵎⵄⴰⵍⴰⵏ ⴰⴷ ⴽⵙⵉⵏ ⵍⵃⵓⴽⵎ ⵏⵙⴻⵏ. 3 ⵎⴰⵛⴰ ⵍⵃⵓⴽⴽⴰⵎ ⵡⴰⵔ ⴵⵉⵏ ⵉ ⵜⵉⴳⴳⵯⵓⴷⵉ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵅⴰⵔ, ⵎⴰⵛⴰ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ. ⵎⴰ ⵜⴻⵅⵙⴻⴷ ⴰⴷ ⵜⵉⵍⵉⴷ ⴱⵍⴰ ⵜⵉⴳⴳⵯⵓⴷⵉ ⵥⵉ ⵚⵚⵓⵍⵟⴰ? ⴻⴳⴳ ⵎⵉⵏ ⵉⵛⵏⴰⵏ, ⴰⴷ ⴰⵛ ⵢⵉⵍⵉ ⵛⵛⴰⵏ ⵥⵥⴰⵢⴻⵙ, 4 ⵎⵉⵏⵥⵉ ⵚⵚⵓⵍⵟⴰ ⴷ ⵜⴰⵎⵙⴻⵅⵅⴰⵔⵜ ⵏ ⴰⵔⴻⴱⴱⵉ ⵉ ⵍⴻⴼⴹⴻⵍ ⵏⵏⴻⴽ. ⵎⴰⵛⴰ ⵎⴰⵍⴰ ⵜⴻⴳⴳⵉⴷ ⵍⵖⴰⵔ, ⴳⴳⵯⴻⴷ, ⵎⵉⵏⵥⵉ ⵡⴰⵔ ⵜⴽⴻⵙⵙⵉ ⵛⴰ ⵙⵙⵉⴼ ⴱⴰⵟⴻⵍ ⵓⵎⵉ ⵏⴻⵜⵜⴰⵜ ⴷ ⵜⴰⵎⵙⴻⵅⵅⴰⵔⵜ ⵏ ⴰⵔⴻⴱⴱⵉ, ⴰⵇⴰ ⵜⵏⴻⵇⵇⴻⵎ ⵙ ⵡⴻⵖⴹⴰⴱ ⵉⵇⴻⵙⵃⴻⵏ ⵅ ⵢⴻⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ. 5 ⵅⴻⵏⵏⵉ ⵉⵜⵜⵅⴻⵚⵚⴰ ⴰⴷ ⵏⴻⵟⵟⴰⵄ, ⵡⴰⵔ ⵉⴵⵉ ⵅ ⵙⵙⵉⴱⴱⴻⵜ ⵏ ⵡⴻⵖⴹⴰⴱ ⵡⴰⵀⴰ, ⵎⴰⵛⴰ ⵄⴰⵡⴻⴷ ⵅ ⵙⵙⵉⴱⴱⴻⵜ ⵏ ⵜⵏⴻⴼⵙⴻⵛⵜ. 6 ⵅ ⵙⵙⵉⴱⴱⴻⵜ-ⴰ ⵜᵉⵜⵜⵅⴻⴵⵚⴻⵎ ⴹⴹⴰⵔⵉⴱⴰ ⵉ ⴽⵓⵍ ⴰⵥⴻⴵⵉⴼ ⵓⵎⵉ ⵏⵉⵜⵏⵉ ⴷ ⵉⵎⵙⴻⵅⵅⴰⵔⴻⵏ ⵏ ⴰⵔⴻⴱⴱⵉ ⵉ ⵉⵜⵜⵡⴰⴳⴳⴻⵏ ⵉ ⵎⴰⵏ ⴰⵢⴰ ⵙⵉⵎⴰⵏⵜ ⵏⵏⴻⵙ. 7 ⵡⵛⴻⵎ ⵉ ⵎⴰⵔⵔⴰ ⵎⵉⵏ ⴷ ⴰⵙⴻⵏ ⵉⵜⵜⵅⴻⵚⵚⴰⵏ: ⴹⴹⴰⵔⵉⴱⴰ ⵉ ⵡⴻⵏⵏⵉ ⵓⵎⵉ ⴷⴷ-ⵜⵓⵙⴰ ⴹⴹⴰⵔⵉⴱⴰ ⵉ ⴽⵓⵍ ⴰⵥⴻⴵⵉⴼ, ⵍⴻⵅⵍⴰⵚ ⵉ ⵡⴻⵏⵏⵉ ⵓⵎⵉ ⴷⴷ-ⵢⵓⵙⴰ ⵍⴻⵅⵍⴰⵚ, ⴰⵡⴻⵇⵇⴰⵔ ⵉ ⵡⴻⵏⵏⵉ ⵓⵎⵉ ⴷⴷ-ⵢⵓⵙⴰ ⵓⵡⴻⵇⵇⴰⵔ, ⵛⵛⴰⵏ ⵉ ⵡⴻⵏⵏⵉ ⵉⵙⴷⴰⵀⴻⴵⴻⵏ ⵛⵛⴰⵏ.

8 ⵡⴰⵔ ⵜⵜⴻⴳⴳⴻⵎ ⴰⵎⴰⵔⵡⴰⵙ ⵖⴰⵔ ⵃⴻⴷ ⵎⵖⵉⵔ ⵡⴻⵏⵏⵉ ⵏ ⵜⴰⵢⵔⵉ ⴰⴽ-ⴷ ⵡⴰⵢⴰⵡⵢⴰ, ⵎⵉⵏⵥⵉ ⵡⴻⵏⵏⵉ ⵉⵜⵜⴻⵅⵙⴻⵏ ⴰⵎⵇⴰⵔⵔⴻⴱ ⵏⵏⴻⵙ, ⴰⵇⴰ ⵉⴽⴻⵎⵎⴻⵍ ⵛⵛⴰⵔⵉⵄⴰ. ^■   9 ⵎⵉⵏⵥⵉ ⵛⵛⴰⵔⵉⵄⴰ ⵜⴻⵇⵇⴰⵔ ⵄⴰⵡⴻⴷ: “ⵡⴰⵔ ⵥⴻⵏⵏⵉ!”, “ⵡⴰⵔ ⵏⴻⵇⵇ!”, “ⵡⴰⵔ ⵜⵜⵉⵛⴰⵔ!”, “ⵡⴰⵔ ⵜⵜⴰⵙⴻⵎ!”, ⵓⵛⴰ ⵎⴰⵍⴰ ⴷⵉⵏ ⵛⴰ ⵏ ⵜⴻⵡⵚⴻⵢⵢⴻⵜ ⵏⵏⴻⵖⵏⵉ, ⴰⵇⴰ ⴰⵜⴻⵏⵜ ⵎⵓⵏⴻⵏⵜ ⴷⴻⴳ ⵡⴰⵡⴰⵍ-ⴰ: “ⴰⴷ ⵜⴻⵅⵙⴻⴷ ⴰⵎⵇⴰⵔⵔⴻⴱ ⵏⵏⴻⴽ ⴰⵎⴻⵛⵏⴰⵡ ⵉⵅⴻⴼ ⵏⵏⴻⴽ!” ^■  

10 ⵜⴰⵢⵔⵉ ⵡⴰⵔ ⵜⵜⴹⴰⵔⵔⵉ ⵛⴰ ⴰⵎⵇⴰⵔⵔⴻⴱ. ⵙ ⵓⵢⴻⵏⵏⵉ ⵜⴰⵢⵔⵉ ⵏⴻⵜⵜⴰⵜ ⴷ ⵍⴻⴽⵎⴰⵍ ⵏ ⵛⵛⴰⵔⵉⵄⴰ.

11 ⴰⵇⴰ ⵙⵙⵏⴻⵖ ⴰⵇⴰ ⵜⴰ ⴷ ⵍⵡⴻⵇⵜ ⴷ ⵜⵙⴰⵄⵄⴻⵜ ⵃⵉⵎⴰ ⴰⴷ ⵏⴼⴰⵇ ⵥⴻⴳ ⵉⴹⴻⵚ, ⵎⵉⵏⵥⵉ ⵍⴻⵅⵅⵓ ⵜⵓⴷⴰⵔⵜ ⵏⵏⴻⵖ ⵜⵓⴷⴻⵙ-ⴷⴷ ⴽⵜⴰⵔ ⵥⴻⴳ ⵡⴰⵎⵉ ⵏⵓⵎⴻⵏ. ^■  

12 ⵍⴻⵅⵅⵓ ⵜⴻⵄⴷⵓ ⴵⵉⵍⴻⵜ, ⵢⵉⵡⴻⴹ-ⴷⴷ ⵓⵥⵉⵍ. ⴻⵊⵊ ⴰⵏⴻⵖ ⴰⴷ ⵏⴻⵙⵙⴰⵔⵙ ⵍⴻⵅⴷⴰⵢⴻⵎ ⵏ ⵜⴰⴵⴻⵙⵜ, ⴰⴷ ⵏⴻⴽⵙⵉ ⵍⴻⵙⵏⴰⵃ ⵏ ⵜⴼⴰⵡⵜ. ^■  

13 ⴰⴷ ⵏⵓⵢⵓⵔ ⵙ ⵓⵛⵓⵡⵡⴰⵔ ⴰⵅⵎⵉ ⴷ ⴰⵥⵉⵍ, ⵡⴰⵔ ⵉⴵⵉ ⴷⵉ ⵥⵥⵀⵓ ⴰⴱⴰⵔⵛⴰⵏ ⴷ ⵓⵖⴻⵍⵍⵉ ⵓⵍⴰ ⴷⵉ ⵜⴻⵅⵎⵓⵊⵉ ⵏ ⴼⴰⵔⵇ-ⵛⵛⵖⴻⵍ ⵏⵉⵖ ⴷⴻⴳ ⵓⵎⴻⵏⵖⵉ ⴷ ⵍⴻⵃⵙⴻⴷ, ^■  

14 ⵎⴰⵛⴰ ⴰⵔⴹⴻⵎ ⵙⵉⴷⵉⵜⵏⴻⵖ ⵢⴻⵛⵛⵓ ⵍⵎⴰⵙⵉⵃ, ⵡⴰⵔ ⵜⵜⵉⵛⴻⵎ ⵜⴰⵢⵏⵉⵜ ⵉ ⵏⵏⴻⵛⵡⴰⵜ ⵏ ⴰⵔⵔⵉⵎⴻⵜ ⵜⴰⵎⴻⴷⵏⵓⴱⵜ. ^■