ⵍⵃⵓⴽⵎ ⵅ ⵍⵄⴻⴷⵢⴰⵏ ⵏ ⵉⵙⵔⴰⵉⵍ
9
1 ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵏ ⵡⴰⵡⴰⵍ ⵏ ⵙⵉⴷⵉ ⵅ ⵜⴻⵎⵎⵓⵔⵜ ⵏ ⵃⴰⴷⵔⴰⵅ, ⵍⵃⵓⴽⵎ ⵏⵏⵉ ⵢⴰⵔⵙⴰⵏ ⵅ ⴷⵉⵎⴰⵛⵇ, - ⵎⴰⵖⴰⵔ ⵙⵉⴷⵉ ⵉⵃⴻⵟⵟⴰ ⵅ ⴱⵏⴰⴷⴻⵎ ⵓ ⵅ ⵎⴰⵔⵔⴰ ⵜⵉⵇⴻⴱⴱⴰⵍ ⵏ ⵉⵙⵔⴰⵉⵍ - ,
2 ⵓⵍⴰ ⵅ ⵃⴰⵎⴰⵜ ⵉ-ⵜⵜ-ⴷⴷ-ⵉⵍⴻⵙⵇⴻⵏ,
ⵅ ⵚⵓⵔ ⴷ ⵚⵉⴷⵓⵏ, ⵡⴰⵅⵅⴰ ⵏⵉⵜⴻⵏⵜⵉ ⴷ ⵜⵉⵎⵉⵖⵉⵙⵉⵏ ⴰⵟⵟⴰⵙ.
3 ⵜⴻⴱⵏⴰ ⵚⵓⵔ ⵉⵊⵊ ⵏ ⵍⴱⵓⵔⵊ ⵉ ⵢⵉⵅⴻⴼ ⵏⵏⴻⵙ
ⵓ ⵜⴻⵢⵔⵓ ⵏⵏⵓⵇⴰⵔⵜ ⴰⵎ ⵜⵄⴻⵊⵊⴰⵊⵜ
ⴷ ⵡⵓⵔⴻⵖ ⵉⵇⵇⵓⵔⴻⵏ ⴰⵎ ⵓⴱⴻⴵⴰⵄ ⵏ ⵉⵎⴻⵙⵔⴰⵇ.
4 ⵅⵥⴰⵔ, ⵙⵉⴷⵉ ⴰⴷ ⵜⵜ ⵉⵟⵟⴻⴼ
ⵓ ⴰⴷ ⵉⵡⵡⴻⵜ ⵍⴱⴰⵔⴰⵊ ⵏⵏⴻⵙ ⵖⴰⵔ ⵍⴻⴱⵃⴰⵔ,
ⵓⵛⴰ ⴰⴷ ⵜⵜ ⵜⴻⵛⵛ ⵜⵎⴻⵙⵙⵉ.
5 ⴰⵛⴽⴻⵍⵓⵏ ⴰⴷ ⵜⵜ ⵜⵥⴰⵔ, ⴰⴷ ⵜⴻⴷⵡⴻⵍ ⵜⴻⴳⴳⵯⴻⴷ,
ⴰⵎⵎⵓ ⵓⵍⴰ ⴷ ⵖⴰⵥⵥⴰ, ⴰⴷ ⵜⴰⵔⵊⵉⵊ ⴰⵟⵟⴰⵙ,
ⵓⵍⴰ ⴷ ⵄⴰⵇⵔⵓⵏ, ⵎⴰⵖⴰⵔ ⴰⴷ ⵉⴼⵛⴻⵍ ⵓⵔⴰⵊⵉ ⵏⵏⴻⵙ.
ⴰⴷ ⵉⵜⵜⵡⴰⵜⴻⵃⵃⴰ ⵓⵊⴻⴵⵉⴷ ⵥⵉ ⵖⴰⵥⵥⴰ
ⵓ ⵜⴰⵏⴷⵉⵏⵜ ⵏ ⴰⵛⵇⴰⵍⵓⵏ ⵡⴰⵔ ⵜᵉⵜⵜⵡⴰⵥⴻⴷⴷⴻⵖ.
6 ⵎⵎⵉⵙ ⵏ ⵍⴻⵃⵔⴰⵎ ⴰⴷ ⵉⵥⴷⴻⵖ ⴷⵉ ⴰⵛⴷⵓⴷ,
ⵓ ⵏⴻⵛⵛ ⴰⴷ ⵜⴻⵃⵃⵉⵖ ⵏⵏⴼⴰⵅⴻⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. □
7 ⵏⴻⵛⵛ ⴰⴷ ⴽⵙⵉⵖ ⵉⴷⴰⵎⵎⴻⵏ ⵥⴻⴳ ⵓⵇⴻⵎⵎⵓⵎ ⵏⵏⴻⵙ
ⵓⵍⴰ ⴷ ⵏⵏⵄⴰⵡⴰⵜ ⵥⵉ ⵊⴰⵔ ⵜⵉⵖⵎⴰⵙ ⵏⵏⴻⵙ
ⵓ ⴰⵎⵎⵓ ⵉ ⵖⴰ ⵉⵇⵇⵉⵎ ⵓⵍⴰ ⴷ ⵏⴻⵜⵜⴰ ⵉ ⴰⵔⴻⴱⴱⵉ ⵏⵏⴻⵖ.
ⵏⴻⵜⵜⴰ ⴰⴷ ⵢⵉⵍⵉ ⴰⵎ ⵉⵊⵊ ⵏ ⵡⴻⵎⵖⴰⵔ ⴷⵉ ⵢⴰⵀⵓⴷⴰ
ⵓ ⵄⴰⵇⵔⵓⵏ ⴰⵎ ⵉⵊⵊ ⵏ ⵓⵢⴰⴱⵓⵙⵉ.
8 ⵏⴻⵛⵛ ⴰⴷ ⴳⴳⴻⵖ ⵍⵎⴰⵔⴳⴻⵃ ⵉⵏⵓ ⴷⴻⴳ ⵡⴻⵏⵏⴻⴹ ⵏ ⵜⴰⴷⴷⴰⵔⵜ ⵉⵏⵓ,
ⴹⵉⴷⴷ ⵏ ⵡⴻⵏⵏⵉ ⵉ ⵖⴰ ⵉⵥⵡⴰⵏ ⵓ ⴹⵉⴷⴷ ⵏ ⵡⴻⵏⵏⵉ ⴷⴷ ⵖⴰ ⵉⴷⴻⵡⵍⴻⵏ,
ⵃⵉⵎⴰ ⵡⴻⵏⵏⵉ ⵉⵃⴻⵚⵚⴰⵔⴻⵏ ⵡⴰⵔ ⵅⴰⵙ ⵉⵄⴻⴷⴷⵓ ⵛⴰ ⵄⴰⴷ,
ⵎⴰⵖⴰⵔ ⵍⴻⵅⵅⵓ ⵥⵍⵉⵖ ⵜ ⵙ ⵜⵉⵟⵟⴰⵡⵉⵏ ⵉⵏⵓ.
ⴰⵊⴻⴵⵉⴷ ⵉ ⴷⴷ ⵖⴰ ⵢⴰⵙⴻⵏ
9 ⴼⴰⵔⵃ, ⴰ ⵜⴰⵢⴻⴵⵉⵜ ⵚⵉⵀⵢⵓⵏ, ⵙⵍⵉⵡⵍⴻⵡ, ⴰ ⵜⴰⵢⴻⴵⵉⵜ ⵓⵔⵛⴰⵍⵉⵎ!
ⵅⵥⴰⵔ, ⴰⵊⴻⴵⵉⴷ ⵏⵏⴻⵎ ⵢⵓⵙⴰ-ⴷⴷ ⵖⴰⵔⴻⵎ,
ⵏⴻⵜⵜⴰ ⴷ ⴰⵎⵙⴻⴳⴳⴻⴷ ⵓ ⴰⵇⴰ ⵉⵡⵊⴻⴷ ⵃⵉⵎⴰ ⴰⴷ ⵉⵙⵙⴻⵏⵊⴻⵎ,
ⵏⴻⵜⵜⴰ ⴷ ⴰⵎⵡⴰⴹⴻⵄ ⵓ ⵉⵏⵢⴰ ⵅ ⵉⵊⵊ ⵏ ⵡⴻⵖⵢⵓⵍ,
ⵅ ⵉⵊⵊ ⵏ ⵡⴻⵥⵄⵓⵇ, ⴰⵙⵏⵓⵙ ⵏ ⵉⵛⵜ ⵏ ⵜⴻⵖⵢⵓⵞ.
10 ⵏⴻⵛⵛ ⴰⴷ ⵇⴹⵉⵖ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ ⵥⵉ ⵉⴼⵔⴰⵢⵉⵎ
ⵓⵍⴰ ⴷ ⵉⵢⵙⴰⵏ ⵥⵉ ⵓⵔⵛⴰⵍⵉⵎ.
ⴰⴷ ⵉⵜⵜⵡⴰⵇⵍⴻⵄ ⵓⵍⴰ ⴷ ⵍⵇⴻⵡⵙ.
ⵏⴻⵜⵜⴰ ⴰⴷ ⵉⴱⴰⵔⵔⴻⵃ ⵙ ⵍⴻⵀⵏⴰ ⵉ ⵔⴻⴳⵏⵓⵙ
ⵓ ⵚⵚⵓⵍⵟⴰ ⵏⵏⴻⵙ ⴰⴷ ⵜⵉⵍⵉ ⵥⵉ ⵍⴻⴱⵃⴰⵔ ⴰⵍ ⵍⴻⴱⵃⴰⵔ
ⵓ ⵥⴻⴳ ⵉⵖⵥⴰⵔ ⵏ ⵍⴼⵓⵔⴰⵟ ⴰⵍ ⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ.
11 ⵓⵍⴰ ⴷ ⵛⴻⵎ, ⴰ ⵢⴻⴵⵉⵙ ⵏ ⵚⵉⵀⵢⵓⵏ, ⵥⵉ ⵙⵙⵉⴱⴱⴻⵜ ⵏ ⵉⴷⴰⵎⵎⴻⵏ ⵏ ⵍⵄⴰⵀⴷ ⵏⵏⴻⵎ
ⴼⴻⴽⴽⴻⵖ-ⴷⴷ ⵉⵎⴻⵃⴱⴰⵙ ⵏⵏⴻⵎ ⵥⴻⴳ ⵡⴰⵏⵓ ⵢⵓⵥⵖⴻⵏ ⵉ ⵡⴰⵔ ⴷⵉ ⴵⵉⵏ ⵡⴰⵎⴰⵏ. ■
12 ⵄⴻⵇⴱⴻⵎ ⵖⴰⵔ ⵍⴱⵓⵔⵊ ⵏⵡⴻⵎ, ⴽⴻⵏⵏⵉⵡ ⵉⵎⴻⵃⴱⴰⵙ ⵉⵏⵏⵉ ⵖⴰⵔ ⵉⴵⴰ ⵓⵙⵉⵜⴻⵎ.
ⵓⵍⴰ ⴷ ⴰⵙⵙ-ⴰ ⵏⴻⵛⵛ ⵜⵜⴱⴰⵔⵔⵃⴻⵖ: ⴰⵇⴰ ⵏⴻⵛⵛ ⴰⴷ ⵖⴰⵔⴻⵎ ⴷⴷ-ⴰⵔⵔⴻⵖ ⵜⵏⴰⵢⴻⵏ ⵏ ⵜⵙⴻⵇⵇⴰⵔ,
13 ⵎⴰⵖⴰⵔ ⵏⴻⵛⵛ ⴰⴷ ⵎⴻⵃⴹⴻⵖ ⵢⴰⵀⵓⴷⴰ ⴰⵎ ⵉⵊⵊ ⵏ ⵍⵇⴻⵡⵙ
ⵓ ⴰⴷ ⴳⴳⴻⵖ ⵉⴼⵔⴰⵢⵉⵎ ⵅ ⵍⵇⴻⵡⵙ.
ⵏⴻⵛⵛ ⴰⴷ ⵙⵙⴻⴽⴽⴰⵔⴻⵖ ⵉⵃⴻⵏⵊⵉⵔⴻⵏ ⵏⵏⴻⵎ, ⴰ ⵚⵉⵀⵢⵓⵏ,
ⴹⵉⴷⴷ ⵉ ⵉⵃⴻⵏⵊⵉⵔⴻⵏ ⵏⵏⴻⴽ, ⴰ ⵍⵢⵓⵏⴰⵏ,
ⵓ ⵏⴻⵛⵛ ⴰⴷ ⵛⴻⴽ ⴰⵔⵔⴻⵖ ⴰⵎⴻⵛⵏⴰⵡ ⵙⵙⵉⴼ ⵏ ⵉⵊⵊ ⵏ ⴱⵓ-ⵜⴻⵖⵔⵓⴹⵜ. □
ⵙⵉⴷⵉ ⴰⴷ ⵉⵙⵙⴻⵏⵊⴻⵎ ⵍⴳⴻⵏⵙ ⵏⵏⴻⵙ
14 ⵙⵉⴷⵉ ⴰⴷ ⵉⴱⴰⵏ ⵙⴻⵏⵏⴻⵊ ⵏⵙⴻⵏ
ⵓ ⴼⵍⵉⵜⵛⴰⵜ ⵏⵏⴻⵙ ⴰⴷ ⵉⵍⵉⵏⵜ ⵜⵜⵡⴻⵙⵙⴳⴻⵏⵜ ⴰⵎ ⵡⴰⵙⵙⴰⵎ
ⵓ ⵙⵉⴷⵉ ⵉⵏⵓ, ⵙⵉⴷⵉ, ⴰⴷ ⵉⵚⵓⴹ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ,
ⴰⴷ ⵢⵓⵢⵓⵔ ⴰⴽ-ⴷ ⵜⵃⴰⵔⵢⴰⴹⵉⵏ ⵏ ⵓⵚⴻⵎⵎⵉⴹ ⵏ ⵍⵊⴰⵏⵓⴱ. ■
15 ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⴷ ⵜⴻⵏ ⵉⵙⵙⴷⵓⵍⵉ ⵓ ⵏⵉⵜⵏⵉ ⴰⴷ ⵛⵛⴻⵏ.
ⴰⴷ ⴷⴷⵥⴻⵏ ⵉⵥⵔⴰ ⵏ ⵉⴵⵉⵢ ⵓⵛⴰ ⴰⴷ ⵙⵡⴻⵏ,
ⴰⴷ ⴳⴳⴻⵏ ⴷⴷⵔⵉⵥ ⴰⵎ ⵖⴰⵔ ⴱⵉⵏⵓ
ⵓ ⴰⴷ ⴷⴻⵡⵍⴻⵏ ⵛⵛⵓⵔⴻⵏ ⵙ ⵉⴷⴰⵎⵎⴻⵏ ⴰⵎ ⵟⵟⴰⵡⵢⴰ ⵏ ⵓⵔⵓⵛⵛⵉ,
ⴰⵎ ⵜⵖⴻⵎⵎⴰⵔ ⵏ ⵓⵄⴰⵍⵟⴰⵔ.
16 ⵙⵉⴷⵉ, ⴰⵔⴻⴱⴱⵉ ⵏⵡⴻⵎ ⴰⴷ ⵜⴻⵏ ⵉⵙⵙⴻⵏⵊⴻⵎ ⴷⴻⴳ ⵡⴰⵙⵙ ⵏⵏⵉ
ⴰⵎ ⵡⵓⴵⵉ ⵏ ⵍⴳⴻⵏⵙ ⵏⵏⴻⵙ,
ⵎⴰⵖⴰⵔ ⵏⵉⵜⵏⵉ ⴰⵎⴻⵛⵏⴰⵡ ⵉⵥⵔⴰ ⵉⵖⵍⴰⵏ
ⵉⵜⵜⵉⵙⵙⵉⵇⴻⵏ ⵅ ⵜⴻⵎⵎⵓⵔⵜ ⵏⵏⴻⵙ.
17 ⵎⴰⵖⴰⵔ ⵎⴻⵛⵀⴰⵍ ⵎⴰ ⵉⵎⵖⴰⵔ ⴰⴷ ⵢⵉⵍⵉ ⵍⵅⴰⵔ ⵏⵏⴻⵙ
ⵓ ⵎⴻⵛⵀⴰⵍ ⵎⴰ ⵉⵎⵖⴰⵔ ⴰⴷ ⵢⵉⵍⵉ ⵡⴰⵥⵍⵉ ⵏⵏⴻⵙ!
ⵉⵎⴻⵏⴷⵉ ⴰⴷ ⵉⵙⵙⴻⵖⵎⵉ ⵉⵃⵓⴷⵔⵉⵢⵢⴻⵏ
ⵓⵍⴰ ⴱⵉⵏⵓ ⵏ ⵊⴷⵉⴷ ⵜⵉⵄⵥⴰⵔⵉⵢⵢⵉⵏ.