1 ⵙⵙⴳⴻⵄⵄⴷⴻⵖ ⵜⵉⵟⵟⴰⵡⵉⵏ ⵉⵏⵓ ⵜⵡⴰⵍⴰ ⵏⵏⴻⵖⵏⵉ ⵓⵛⴰ ⵥⵔⵉⵖ, ⵓ ⵅⵥⴰⵔ, ⴰⵇⴰ ⴷⵉⵏ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⵉⵟⵟⴰⵡ. 2 ⵏⴻⵜⵜⴰ ⵉⵏⵏⴰ ⴰⵢⵉ: “ⵎⵉⵏ ⵜᵉⵜⵜⵡⴰⵍⵉⴷ ⵛⴻⴽ?” ⵏⴻⵛⵛ ⵏⵏⵉⵖ: “ⵏⴻⵛⵛ ⵜⵜⵡⴰⵍⵉⵖ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⵉⵟⵟⴰⵡ ⵙ ⵢⵉⵊⵊ ⵏ ⵜⵓⵥⵥⴻⴳⴳⴰⵔⵜ ⵏ ⵄⵉⵛⵔⵉⵏ ⵏ ⵉⵖⴰⴵⴻⵏ ⴷ ⵉⵛⵜ ⵏ ⵜⵉⵔⵓ ⵏ ⵄⴻⵛⵔⴰ ⵏ ⵉⵖⴰⴵⴻⵏ.” 3 ⵅⴻⵏⵏⵉ ⵉⵏⵏⴰ ⴰⵢⵉ: “ⵜⴰ ⴷ ⵏⵏⴻⵄⵍⴻⵜ ⵏⵏⵉ ⵉ ⵖⴰ ⵉⴼⴼⵖⴻⵏ ⵅ ⵎⴰⵔⵔⴰ ⵜⴰⵎⵎⵓⵔⵜ, ⵎⴰⵖⴰⵔ ⵎⴰⵔⵔⴰ ⵡⴻⵏⵏⵉ ⵉ ⵖⴰ ⵢⴰⵛⴰⵔⴻⵏ, ⴰⴷ ⵉⵜⵜⵡⴰⵇⴹⴻⵄ ⵥⵉ ⵙⵙⵉⴱⴱⴻⵜ ⵏ ⵎⵉⵏ ⵢⵓⵔⴰⵏ ⵅ ⵓⵖⴻⵥⴷⵉⵙ-ⴰ ⵓ ⴽⵓⵍ ⵉⵊⵊ ⵡⴻⵏⵏⵉ ⵉ ⵖⴰ ⵉⵊⵊⴰⴵⴻⵏ ⵥⵓⵔ ⴰⴷ ⵉⵜⵜⵡⴰⵇⴹⴻⵄ ⵥⵉ ⵙⵙⵉⴱⴱⴻⵜ ⵏ ⵎⵉⵏ ⵢⵓⵔⴰⵏ ⵅ ⵓⵖⴻⵥⴷⵉⵙ ⵏⵏⴻⵖⵏⵉ. 4 ⵏⴻⵛⵛ ⴰⴷ ⴰⵔⵔⴻⵖ ⵏⵏⴻⵄⵍⴻⵜ ⴰⴷ ⴷⴷ-ⵜⴻⴼⴼⴻⵖ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵃⵉⵎⴰ ⴰⴷ ⴷⴷ-ⵜⴰⵙ ⴷⵉ ⵜⴰⴷⴷⴰⵔⵜ ⵏ ⵓⵛⴻⴼⴼⴰⵔ ⵓ ⴷⵉ ⵜⴰⴷⴷⴰⵔⵜ ⵏ ⵢⵉⵏⵏⵉ ⵉⵜⵜⵊⴰⴵⴰⵏ ⵥⵓⵔ ⵙ ⵢⵉⵙⴻⵎ ⵉⵏⵓ, ⵓ ⵏⴻⵜⵜⴰⵜ ⴰⴷ ⵜⴻⵙⵙⴻⵏⵙ ⴷⵉ ⵍⵡⴻⵙⵜ ⵏ ⵜⴰⴷⴷⴰⵔⵜ ⵏⵏⴻⵙ ⵓ ⵏⴻⵜⵜⴰⵜ ⴰⴷ ⵜⵜ ⵢⴻⵛⵛ ⵙ ⵓⴽⴻⵛⵛⵓⴹ ⵏⵏⴻⵙ ⴷ ⵉⵥⵔⴰ ⵏⵏⴻⵙ.”

5 ⵉⴼⴼⴻⵖ-ⴷⴷ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ, ⵉⵏⵏⴰ ⴰⵢⵉ: “ⵙⴳⴻⵄⵄⴻⴷ ⵜⵉⵟⵟⴰⵡⵉⵏ ⵏⵏⴻⴽ ⵓ ⵅⵥⴰⵔ ⵎⵉⵏ ⴷⵉⵏ ⴷⴷ-ⵉⵜⵜⴱⴰⵏⴻⵏ!” 6 ⵏⴻⵛⵛ ⵏⵏⵉⵖ: “ⵎⴰⵏⴰⵡⵢⴰ?” ⵏⴻⵜⵜⴰ ⵉⵏⵏⴰ: “ⵡⴰ ⴷ ⵉⵊⵊ ⵏ ⵍⵎⵓⴷ ⵏ ⵉⴼⴰ ⵏⵏⵉ ⴷⴷ-ⵉⵜⵜⴱⴰⵏⴻⵏ.” ⵅⴻⵏⵏⵉ ⵉⵏⵏⴰ: “ⵜⴰ ⴷ ⴼⵓⵔⵎⴰ ⵏⵙⴻⵏ ⵅ ⵎⴰⵔⵔⴰ ⵜⴰⵎⵎⵓⵔⵜ.” 7 ⵓ ⵅⵥⴰⵔ, ⴰⵇⴰ ⵜᵉⵜⵜⵡⴰⵙⴳⴻⵄⵄⴻⴷ ⵜⵇⴻⴱⴱⴰⵔⵜ ⵏ ⵍⴻⵅⴼⵉⴼ ⴷ ⵜⴰⵇⵓⵔⴰⵔⵉⵔⵜ ⵓ ⵜⴻⵇⵇⵉⵎ ⵉⵛⵜ ⵏ ⵜⴻⵎⵖⴰⵔⵜ ⴷⵉ ⵍⵡⴻⵙⵜ ⵏ ⵉⴼⴰ. 8 ⵏⴻⵜⵜⴰ ⵉⵏⵏⴰ: “ⵜⴰ ⴷ ⵜⴰⵄⴻⴼⴼⴰⵏⵜ!” ⵓⵛⴰ ⵉⵏⴹⴰⵔ ⵉ-ⵜⵜ ⵄⴰⵡⴻⴷ ⴷⴻⴳ ⵉⴼⴰ ⵏⵏⵉ ⵓⵛⴰ ⵉⵏⴹⴰⵔ ⴰⵥⵔⵓ ⵏ ⵍⴻⵅⴼⵉⴼ ⵅ ⵓⵇⴻⵎⵎⵓⵎ ⵏⵏⴻⵙ. 9 ⵏⴻⵛⵛ ⵙⵙⴳⴻⵄⵄⴷⴻⵖ ⵜⵉⵟⵟⴰⵡⵉⵏ ⵉⵏⵓ ⵓⵛⴰ ⵥⵔⵉⵖ, ⵓ ⵅⵥⴰⵔ ⵜⵏⴰⵢⴻⵏ ⵏ ⵜⴻⵎⵖⴰⵔⵉⵏ ⵓⵙⵉⵏⵜ-ⵉ-ⴷⴷ ⵖⴰⵔ ⵥⵥⴰⵜ ⵓ ⴰⵚⴻⵎⵎⵉⴹ ⵉⵛⵛⵓⵔ ⴰⴼⵔⵉⵡⴻⵏ ⵏⵙⴻⵏⵜ. ⵏⵉⵜⴻⵏⵜⵉ ⵜⵓⵖⴰ ⵖⴰⵔⵙⴻⵏⵜ ⴰⴼⵔⵉⵡⴻⵏ ⴰⵎ ⵡⴰⴼⵔⵉⵡⴻⵏ ⵏ ⵓⴱⴻⵍⵍⴰⵔⵊ ⵓ ⵏⵉⵜⴻⵏⵜⵉ ⵙⵙⴳⴻⵄⵄⴷⴻⵏⵜ ⵉⴼⴰ ⵏⵏⵉ ⵊⴰⵔ ⵜⴻⵎⵎⵓⵔⵜ ⴷ ⵓⵊⴻⵏⵏⴰ.

10 ⵅⴻⵏⵏⵉ ⵏⵏⵉⵖ ⵉ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ: “ⵎⴰⵏⵉ ⵉ ⵖⴰ ⵢⴰⵡⵢⴻⵏⵜ ⵉⴼⴰ ⴰⵢⴰ?”

11 ⵏⴻⵜⵜⴰ ⵉⵏⵏⴰ ⴰⵢⵉ: “ⵎⴰⵃⴻⵏⴷ ⴰⴷ ⴰⵙ ⴱⵏⴰⵏ ⵉⵛⵜ ⵏ ⵜⴰⴷⴷⴰⵔⵜ ⴷⵉ ⵜⴻⵎⵎⵓⵔⵜ ⵏ ⵛⵉⵏⴰⵔ. ⵎⴰⵍⴰ ⵜᵉⵜⵜⵡⴰⴽⴻⵎⵎⴻⵍ, ⴰⴷ ⵜᵉⵜⵜⵡⴰⵙⴱⴻⴷⴷ ⴷⵉⵏ ⴷⴻⴳ ⵡⴻⵎⵛⴰⵏ ⵏⵏⴻⵙ.”