1 ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ, ⵉⵄⵇⴻⴱ-ⴷⴷ ⵓⵛⴰ ⵉⵙⵙⴼⴰⵇ ⴰⵢⵉ-ⴷⴷ ⴰⵎⴻⵛⵏⴰⵡ ⵎⴰⵎⵎⴻⵛ ⴷⴷ-ⵙⵙⴼⴰⵇⴰⵏ ⵉⵊⵊ ⵏ ⵡⴻⵔⵢⴰⵥ ⵥⴻⴳ ⵢⵉⴹⴻⵙ ⵏⵏⴻⵙ. 2 ⵏⴻⵜⵜⴰ ⵉⵏⵏⴰ ⴰⵢⵉ: “ⵎⵉⵏ ⵜⴻⵥⵔⵉⴷ?” ⵏⴻⵛⵛ ⵏⵏⵉⵖ: “ⵏⴻⵛⵛ ⵥⵔⵉⵖ, ⵓ ⵅⵥⴰⵔ, ⵉⵊⵊ ⵏ ⵍⵇⴻⵏⴷⵉⵍ ⵏ ⵡⵓⵔⴻⵖ ⵎⴰⵔⵔⴰ, ⵓ ⴰⵇⴰ ⴷⵉⵏ ⵉⵊⵊ ⵏ ⵟⵟⴻⴱⵚⵉ ⵏ ⵥⵥⴻⵛⵜ ⵅ ⵓⵥⴻⴵⵉⴼ ⵏⵏⴻⵙ ⵓ ⵅⴰⵙ ⵙⴻⴱⵄⴰ ⵏ ⵍⴻⴼⵏⴰⵔⴰⵜ, ⵙⴻⴱⵄⴰ ⵙⴻⵏⵏⴻⵊ ⵉ ⵙⴻⴱⵄⴰ ⵏ ⵉⴱⵓⴹⴻⵏ ⵉ ⵍⴻⴼⵏⴰⵔⴰⵜ ⵉ ⵉⴵⴰⵏ ⵅ ⵓⵥⴻⴵⵉⴼ ⵏⵏⴻⵙ 3 ⵓ ⵥⵥⴰⵜⴻⵙ ⴰⵇⴰ ⴷⵉⵏ ⵜⵏⴰⵢⴻⵏ ⵏ ⵉⵥⴻⵎⵎⵓⵔⴻⵏ, ⵉⵊⵊ ⵖⴰⵔ ⵓⵖⴻⵥⴷⵉⵙ ⴰⴼⵓⵙⵉ ⵏ ⵟⵟⴻⴱⵚⵉ ⵏ ⵥⵥⴻⵛⵜ ⵓ ⵉⵊⵊ ⵖⴰⵔ ⵓⵥⴻⵍⵎⴰⴹ ⵏⵏⴻⵙ.”

4 ⵏⴻⵛⵛ ⴰⵔⵔⵉⵖ-ⴷⴷ ⵓ ⵙⵙⵉⵡⵍⴻⵖ ⴰⴽ-ⴷ ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ, ⵏⵏⵉⵖ: “ⵙⵉⴷⵉ ⵉⵏⵓ, ⵎⵉⵏ ⵄⵏⴰⵏⵜ ⵜⵎⴻⵙⵍⴰⵢⵉⵏ-ⴰ?” 5 ⵍⵎⴰⵍⴰⴽ ⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ, ⵢⴰⵔⵔⴰ-ⴷⴷ, ⵉⵏⵏⴰ ⴰⵢⵉ: “ⵎⴰ ⵡⴰⵔ ⵜⴻⵙⵙⵉⵏⴻⴷ ⵛⴻⴽ, ⵎⵉⵏ ⵄⵏⴰⵏⵜ ⵜⵎⴻⵙⵍⴰⵢⵉⵏ-ⴰ?” ⵏⴻⵛⵛ ⵏⵏⵉⵖ: “ⵍⵍⴰ, ⴰ ⵙⵉⴷⵉ ⵉⵏⵓ!”

6 ⵅⴻⵏⵏⵉ ⵢⴰⵔⵔⴰ-ⴷⴷ ⵓⵛⴰ ⵉⵙⵙⵉⵡⴻⵍ-ⴷⴷ ⴰⴽⵉⴷⵉ, ⵉⵏⵏⴰ: “ⵡⴰ ⴷ ⴰⵡⴰⵍ ⵏ ⵙⵉⴷⵉ ⵉ ⵣⴰⵔⵓⴱⴱⴰⴱⵉⵍ, ⴰⵡⴰⵍ ⵏⵏⵉ ⵉⵇⵇⴰⵔ: ⵡⴰⵔ ⵉⴵⵉ ⵙ ⵊⵊⴻⵀⴷ ⵓⵍⴰ ⵙ ⵍⵄⵓⵏⴼ, ⵎⴰⵛⴰ ⴰⴷ ⵢⵉⵍⵉ ⵙ ⴰⵔⵔⵓⵃ ⵉⵏⵓ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. 7 ⵎⵉⵏ ⵜⴻⵄⵏⵉⴷ ⵛⴻⴽ, ⴰ ⴰⴷⵔⴰⵔ ⴰⵎⴻⵇⵇⵔⴰⵏ? ⴰⴷ ⵜⴷⴻⵡⵍⴻⴷ ⴷ ⵉⵛⵜ ⵏ ⵍⵡⴰⵟⴰ ⵥⵥⴰⵜ ⵉ ⵡⵓⴷⴻⵎ ⵏ ⵣⴰⵔⵓⴱⴱⴰⴱⵉⵍ, ⵎⴰⵖⴰⵔ ⵏⴻⵜⵜⴰ ⴰⴷ ⴷⴷ-ⵉⵙⵙⵓⴼⴼⴻⵖ ⴰⵥⵔⵓ ⵏ ⵏⵏⴻⵊ ⵙ ⵉⵖⵓⵢⵢⴰⵏ: ‘ⴰⵔⴹⴰ, ⴰⵔⴹⴰ ⴰⴷ ⵖⴰⵔⴻⵙ ⵢⵉⵍⵉ!’ ”

8 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:

9 “ⵉⴼⴰⵙⵙⴻⵏ ⵏ ⵣⴰⵔⵓⴱⴱⴰⴱⵉⵍ ⵙⵙⴰⵔⵙⴻⵏ ⴷⵙⴰⵙ ⵉ ⵜⴰⴷⴷⴰⵔⵜ-ⴰ, ⵉⴼⴰⵙⵙⴻⵏ ⵏⵏⴻⵙ ⴰⴷ ⵜⵜ ⴽⴻⵎⵎⵍⴻⵏ, ⵎⴰⵃⴻⵏⴷ ⴰⴷ ⵜⴻⵙⵙⵏⴻⵎ ⴰⵇⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵉⵙⵙⴻⴽⴽ ⴰⵢⵉ-ⴷⴷ ⵖⴰⵔⵡⴻⵎ.

10 ⵎⴰⵖⴰⵔ ⵎⴰⵏ ⵡⴻⵏ ⵉⵙⵙⴻⵃⵇⴰⵔⴰⵏ ⴰⵙⵙ ⵏ ⵜⵎⴻⵙⵍⴰⵢⵉⵏ ⵜⵉⵎⴻⵥⵢⴰⵏⵉⵏ? ⵏⵉⵜⵏⵉ ⴳⴳⵓⵔ ⴰⴷ ⴼⴰⵔⵃⴻⵏ, ⵅⵎⵉ ⵉ ⵖⴰ ⵥⴰⵔⴻⵏ ⴰⵥⵔⵓ ⵏ ⵜⴻⵖⵎⴰⵔⵜ ⴷⴻⴳ ⵓⴼⵓⵙ ⵏ ⵣⴰⵔⵓⴱⴱⴰⴱⵉⵍ, ⵙⴻⴱⵄⴰ ⴰⵢⴰ, ⵜⵉⵟⵟⴰⵡⵉⵏ ⵏ ⵙⵉⴷⵉ ⵏⵏⵉ ⵉⵜⵜⴻⴽⴽⴻⵏ ⵎⴰⵔⵔⴰ ⵜⴰⵎⵎⵓⵔⵜ.”

11 ⵏⴻⵛⵛ ⴰⵔⵔⴻⵖ-ⴷⴷ, ⵏⵏⵉⵖ ⴰⵙ: “ⵎⴰⵏⴰ ⵜⵏⴰⵢⴻⵏ ⵏ ⵉⵥⴻⵎⵎⵓⵔⴻⵏ ⵏⵏⵉ ⴷⵉⵏ ⵖⴰⵔ ⵓⵖⴻⵥⴷⵉⵙ ⴰⴼⵓⵙⵉ ⴷ ⵓⵥⴻⵔⵎⴰⴹ ⵏ ⵍⵇⴻⵏⴷⵉⵍ?”

12 ⴰⵔⵏⵉⵖ ⵟⵟⴼⴻⵖ ⴷⴻⴳ ⵡⴰⵡⴰⵍ, ⵏⵏⵉⵖ ⴰⵙ: “ⵎⵉⵏ ⵄⵏⴰⵏ ⵜⵏⴰⵢⴻⵏ ⵏ ⵍⴻⴼⵔⵓⵄ ⵏ ⵓⵥⴻⵎⵎⵓⵔ ⵏⵏⵉ ⵉⴵⴰⵏ ⵖⴰⵔ ⵜⵏⴰⵢⴻⵏ ⵏ ⵉⵇⵓⴷⴰⵙ ⵏ ⵡⵓⵔⴻⵖ ⵉ ⴷⴷ-ⵉⵜⵜⴼⴰⵔⵔⴰⵖⴻⵏ ⵥⵥⴻⵛⵜ ⵙ ⵜⵉⵏⵜⴰ ⵏⵏⴻⵙ ⵏ ⵡⵓⵔⴻⵖ?”

13 ⵏⴻⵜⵜⴰ ⵉⵙⵙⴰⵡⴰⵍ-ⴷⴷ ⵖⴰⵔⵉ, ⵉⵏⵏⴰ: “ⵎⴰ ⵡⴰⵔ ⵜⴻⵙⵙⵉⵏⴻⴷ ⵛⴻⴽ ⵎⵉⵏ ⵄⵏⴰⵏ ⵉⵏⴰ?” ⵏⴻⵛⵛ ⵏⵏⵉⵖ: “ⵍⵍⴰ, ⴰ ⵙⵉⴷⵉ ⵉⵏⵓ!”

14 ⵅⴻⵏⵏⵉ ⵉⵏⵏⴰ: “ⵉⵏⴰ ⴷ ⵜⵏⴰⵢⴻⵏ ⵏ ⵉⵃⴻⵏⵊⵉⵔⴻⵏ ⵏ ⵥⵥⴻⵛⵜ ⵏⵏⵉ ⵉⴱⴻⴷⴷⴻⵏ ⵥⵥⴰⵜ ⵉ ⵙⵉⴷⵉ ⵏ ⵎⴰⵔⵔⴰ ⵜⴰⵎⵎⵓⵔⵜ.”