ⴰⵛⴻⵜⵛⵉ ⵏ ⵙⵉⴷⵉ ⵅ ⵍⴳⴻⵏⵙ ⵏⵏⴻⵙ ⵓ ⵅ ⵓⵔⵛⴰⵍⵉⵎ
6
1 “ⵙⵍⴻⵎ ⵅⴻⵏⵏⵉ ⵎⵉⵏ ⵉⵇⵇⴰⵔ ⵙⵉⴷⵉ: ⴽⴽⴰⵔ, ⵛⴰⵔⵔⴻⵄ ⵥⵥⴰⵜ ⵉ ⵡⵓⴷⴻⵎ ⵏ ⵉⴷⵓⵔⴰⵔ,
ⵓ ⴻⵊⵊ ⵜⵉⵡⵔⵉⵔⵉⵏ ⴰⴷ ⵙⵍⴻⵏⵜ ⵉ ⵜⵎⵉⵊⵊⴰ ⵏⵏⴻⴽ!
2 ⵙⵍⴻⵎ, ⴰ ⵉⴷⵓⵔⴰⵔ, ⵉ ⴷⴷⴻⵄⵡⴻⵜ ⵏ ⵙⵉⴷⵉ,
ⵓⵍⴰ ⴷ ⴽⴻⵏⵏⵉⵡ, ⴷⵙⵓⵙⴰ ⵉⵎⴻⵜⵏⴻⵏ ⵏ ⵜⴻⵎⵎⵓⵔⵜ,
ⵎⵉⵏⵥⵉ ⵙⵉⴷⵉ ⵖⴰⵔⴻⵙ ⵉⵛⵜ ⵏ ⴷⴷⴻⵄⵡⴻⵜ ⴰⴽ-ⴷ ⵍⴳⴻⵏⵙ ⵏⵏⴻⵙ
ⵏⴻⵜⵜⴰ ⵉⴳⴳⵓⵔ ⵖⴰⵔ ⵜⴰⴷⴷⴰⵔⵜ ⵏ ⵛⵛⵔⴻⵄ ⴰⴽ-ⴷ ⵉⵙⵔⴰⵉⵍ.” ■
3 “ⴰ ⵍⴳⴻⵏⵙ ⵉⵏⵓ, ⵎⵉⵏ ⴷ ⴰⵛ ⴳⴳⵉⵖ,
ⵓ ⵙ ⵎⴰⵏⵜⴻⵏ ⵉ ⵥⵉ ⵛⴻⴽ ⵙⵙⵉⵃⵍⴻⵖ? ⵛⴻⵀⵀⴻⴷ ⴹⵉⴷⴷ ⵉⵏⵓ!
4 ⵏⴻⵛⵛ ⵏⴻⴷⵀⴻⵖ ⵛⴻⴽ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ,
ⵥⵉ ⵜⴰⴷⴷⴰⵔⵜ ⵏ ⵜⴻⵙⵎⵓⵖⵉ.
ⵏⴻⵛⵛ ⵙⵙⴻⴽⴽⴻⵖ-ⴷⴷ ⵎⵓⵙⴰ ⴷ ⵀⴰⵔⵓⵏ ⴷ ⵎⴰⵔⵢⴰⵎ ⵥⵥⴰⵜ ⵉ ⵓⵖⴻⵎⴱⵓⴱ ⵏⵏⴻⴽ. ■
5 ⴰ ⵍⴳⴻⵏⵙ ⵉⵏⵓ, ⴼⴻⴽⴽⴰⵔ ⵎⵍⵉⵃ ⴷⵉ ⵍⵖⴰⵔ ⵉ ⵜⵓⵖⴰ ⵉⵏⴻⴽⴽⵯⴰ ⴰⴷ ⵢⴻⴳⴳ ⴱⴰⵍⴰⴽ, ⴰⵊⴻⴵⵉⴷ ⵏ ⵎⵓ’ⴰⴱ,
ⵓ ⴷⵉ ⵎⵉⵏ ⵅⴰⵙ ⴷⴷ-ⵢⴰⵔⵔⴰ ⴱⵉⵍⵄⴰⵎ, ⵎⵎⵉⵙ ⵏ ⴱⴰⵄⵓⵔ
ⵓ ⴷⵉ ⵎⵉⵏ ⵉⵎⵙⴰⵔⴻⵏ ⵥⵉ ⵙⵉⵜⵜⵉⵎ ⴰⵍ ⵊⵉⵍⵊⴰⵍ,
ⵃⵉⵎⴰ ⴰⴷ ⵜⴻⵙⵙⵏⴻⴷ ⵜⵉⵎⴻⴳⴳⴰ ⵉⵙⴻⴳⴳⴷⴻⵏ ⵏ ⵙⵉⴷⵉ.” ■
ⵎⵉⵏ ⵢⴰⵔⴻⵥⵥⵓ ⵙⵉⴷⵉ ⵥⵉ ⵊⴰⵔ ⵍⴳⴻⵏⵙ ⵏⵏⴻⵙ?
6 “ⵙ ⵎⵉⵏ ⵥⵉ ⵖⴰ ⵔⴰⵃⴻⵖ ⴰⴷ ⵎⵎⴻⵍⵇⵉⵖ ⴰⴽ-ⴷ ⵙⵉⴷⵉ,
ⴰⴷ ⴰⴹⴰⵔⴻⵖ ⵥⵥⴰⵜ ⵉ ⴰⵔⴻⴱⴱⵉ ⵢⵓⵄⵍⴰⵏ?
ⵎⴰ ⴰⴷ ⵔⴰⵃⴻⵖ ⴰⴷ ⵜ ⵎⵎⴻⵍⵇⵉⵖ ⵙ ⵜⵖⴰⵔⵚⴰ ⵏ ⵡⴻⵛⵎⴰⴹ,
ⵏⵉⵖ ⵙ ⵉⵢⴻⵏⴷⵓⵥⴻⵏ ⵏ ⵉⵊⵊ ⵏ ⵓⵙⴻⴳⴳⵯⴰⵙ? □
7 ⵎⴰ ⴰⴷ ⵢⴰⵔⴹⴰ ⵙⵉⴷⵉ ⵙ ⵍⵓⵍⵓⴼ ⵏ ⵉⵛⴰⵔⵔⵉⵢⵢⴻⵏ,
ⵙ ⵄⴻⵛⵔⴰ ⵏ ⵍⵓⵍⵓⴼ ⵏ ⵜⵖⴻⵥⵔⴰⵜⵉⵏ ⵏ ⵥⵥⴻⵛⵜ?
ⵎⴰ ⴰⴷ ⵡⵛⴻⵖ ⴰⵎⴻⵏⵥⵓ ⵉⵏⵓ ⵉ ⵓⵅⴻⵟⵟⵓ ⵉⵏⵓ,
ⵍⵖⵉⴵⴻⵜ ⵏ ⵓⵄⴻⴷⴷⵉⵙ ⵉⵏⵓ ⵉ ⴷⴷⵏⵓⴱ ⵏ ⵍⴻⵄⵎⴰⵔ ⵉⵏⵓ?
8 ⵏⴻⵜⵜⴰ ⵉⵙⵙⴰⵔⴳⴻⴱ ⵉ ⵛⴻⴽ, ⴰ ⴱⵏⴰⴷⴻⵎ, ⵎⵉⵏ ⵉⵛⵏⴰⵏ,
ⵓ ⵎⵉⵏ ⵥⵥⴰⵢⴻⴽ ⵉⵜⵜⴻⵜⵜⴰⵔ ⵙⵉⴷⵉ, ⴰⵇⴰ ⴰⴷ ⵜⴻⴳⴳⴻⴷ ⵍⵅⴰⵔ,
ⴰⴷ ⵜⴻⵅⵙⴻⴷ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ,
ⵓ ⴰⴷ ⵜⵓⵢⵓⵔⴻⴷ ⴰⴽ-ⴷ ⴰⵔⴻⴱⴱⵉ ⵏⵏⴻⴽ ⵙ ⵓⵡⴰⴹⴻⵄ!” ■
ⴰⵔⴻⴷⴷⴻⴵ ⵏ ⵉⵄⴻⴼⴼⴰⵏⴻⵏ
9 “ⵜⵎⵉⵊⵊⴰ ⵏ ⵙⵉⴷⵉ ⵜᵉⵜⵜⵍⴰⵖⴰ ⵉ ⵜⴻⵏⴷⵉⵏⵜ.
ⵉⵙⴻⵎ ⵏⵏⴻⴽ ⵉⵜⵜⴰⵡⵉ-ⴷⴷ ⵓⴼⴻⴽⴽⵉ.
ⵙⵍⴻⵎ ⵉ ⵡⴻⵄⵎⵓⴷ ⵓ ⵖⴰⵔ ⵡⴻⵏⵏⵉ ⵜ-ⵉ-ⴷⴷ ⵉⵙⵙⴻⴽⴽⴻⵏ!
10 ⵎⴰ ⴷⵉⵏ ⵄⴰⴷ ⵍⴻⵅⵥⵉⵏ ⵛⵛⵓⵔⴻⵏ ⵙ ⵍⵖⴰⵔ ⴷⵉ ⵜⴰⴷⴷⴰⵔⵜ ⵏ ⵓⵄⴻⴼⴼⴰⵏ
ⵓⵍⴰ ⴷ ⵉⵊⵊ ⵏ ⵏⵏⵄⵉ ⵏ ⵍⵎⵓⴷ ⵏ ⵉⴼⴰ ⵉⵏⵇⴻⵚ?
11 ⵎⴰ ⵉⵥⴻⵎⵎⴰⵔ ⴰⴷ ⵉⵍⵉⵖ ⴷ ⴰⵎⴻⵥⴷⴰⴳ ⵙ ⵍⵎⵉⵥⴰⵏⴰⵜ ⵏ ⵍⵖⴰⵔ,
ⵓ ⵙ ⵢⵉⵛⵜ ⵏ ⵜⴻⵛⵢⴰⵔⵜ ⵜⴻⵛⵛⵓⵔ ⵙ ⵍⴻⵡⵥⵏⴰⵜ ⵉⵖⴻⵛⵛⴻⵏ? ■
12 ⴰⵢⵜ ⴱⵓ-ⵡⴰⴳⵍⴰ ⵏⵏⴻⵙ ⴰⵇⴰ ⵛⵛⵓⵔⴻⵏ ⵙ ⵍⵄⵓⵏⴼ,
ⵓⵍⴰ ⴷ ⵉⵎⴻⵥⴷⴰⵖ ⵏⵏⴻⵙ ⵇⵇⴰⵔⴻⵏ ⵉⵅⴰⵔⵔⵉⵇⴻⵏ
ⵓ ⵉⵍⴻⵙ ⵏⵙⴻⵏ ⴰⵇⴰ ⵉⵜⵜⵖⴻⵛⵛⴰ ⴷⴻⴳ ⵓⵇⴻⵎⵎⵓⵎ ⵏⵙⴻⵏ.” ■
13 “ⵅⴻⵏⵏⵉ ⵏⴻⵛⵛ ⴰⵇⴰ ⵊⴰⵔⵃⴻⵖ ⵛⴻⵎ ⵙ ⵜⴻⵢⵢⵉⵜⴰ,
ⴰⵇⴰ ⵜᵉⵜⵜⵡⴰⵔⴻⴷⴷⴵⴻⴷ ⵥⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵏⵏⴻⵎ.
14 ⴰⴷ ⵜⴻⵛⵛⴻⴷ, ⵎⴰⵛⴰ ⵡⴰⵔ ⵜᵉⵜⵜⵊⵉⵡⵉⵏⴻⴷ,
ⵓ ⴰⴷ ⴷⴰⵢⴻⵎ ⵢⵉⵍⵉ ⵍⴰⵥ ⴷⵉ ⴷⴰⵅⴻⵍ ⵏⵏⴻⵎ.
ⴰⴷ ⵜⴻⴼⴼⵖⴻⴷ,
ⵎⴰⵛⴰ ⵡⴰⵔ ⵜⵏⴻⵊⵊⵎⴻⴷ,
ⵓ ⵎⵉⵏ ⵉⵏⴻⵊⵎⴻⵏ,
ⴰⴷ ⵜ ⵙⵙⴻⵄⴷⵓⵖ ⵉ ⵙⵙⵉⴼ. ■
15 ⴳⴳⵓⵔ ⴰⴷ ⵜⵥⴰⵔⵄⴻⴷ, ⵎⴰⵛⴰ ⵡⴰⵔ ⵜⵎⴻⵊⵊⴰⵔⴻⴷ,
ⴰⴷ ⵜⴻⴷⴷⵥⴻⴷ ⴰⵥⴻⵎⵎⵓⵔ, ⵎⴰⵛⴰ ⵡⴰⵔ ⵜⴷⴻⵀⵀⵏⴻⴷ ⵉⵅⴻⴼ ⵏⵏⴻⵎ ⵙ ⵥⵥⴻⵛⵜ
ⴰⴷ ⵜⵥⴻⵎⵎⴻⴷ ⵓⵍⴰ ⴷ ⴱⵉⵏⵓ ⵏ ⵊⴷⵉⴷ ⵥⴻⴳ ⵓⴹⵉⵍ, ⵎⴰⵛⴰ ⵡⴰⵔ ⴳⴳⵓⵔ ⴰⴷ ⵜⴻⵙⵙⵡⴻⴷ ⴱⵉⵏⵓ. ■
16 ⵎⴰⵖⴰⵔ ⵏⵉⵜⵏⵉ ⵃⴻⵟⵟⴰⵏ ⵜⵉⵡⴻⵚⵚⴰ ⵏ ⵄⵓⵎⵔⵉ
ⵓ ⵎⴰⵔⵔⴰ ⵜⵉⵎⴻⴳⴳⴰ ⵜⵉⵄⴻⴼⴼⴰⵏⵉⵏ ⵏ ⵜⴰⴷⴷⴰⵔⵜ ⵏ ⴰⵅⴰⴱ,
ⵓ ⴽⴻⵏⵏⵉⵡ ⵜⴹⴻⴼⴼⴰⵔⴻⵎ ⵍⴻⵛⵡⴰⵔ ⵏⵙⴻⵏ,
ⴰⵍⴰⵎⵉ ⵛⴻⵎ ⵉ ⵖⴰ ⵢⴰⵔⵔⴻⵖ ⵉ ⵓⵔⴻⴷⴷⴻⴵ ⵓⵍⴰ ⴷ ⵉⵎⴻⵥⴷⴰⵖ ⵏⵏⴻⵙ ⵉ ⵓⵙⴻⵎⵥⵉ.
ⴰⵎⵎⵓ ⵉ ⵖⴰ ⵢⴰⵔⴱⵓⵏ ⵏⵉⵜⵏⵉ ⵍⵃⴻⴳⵔⴰ ⵏ ⵍⴳⴻⵏⵙ ⵉⵏⵓ.” ■