ⵎⵉⵅⴰ ⵉⵥⵔⴰ ⵜⵓⵄⴻⴼⴼⵏⴰ ⵉ ⵉⴵⴰⵏ ⴷⵉ ⵍⴳⴻⵏⵙ
7
1 “ⵓⵛⵜ ⵉⵏⵓ, ⵎⴰⵖⴰⵔ ⵏⴻⵛⵛ ⴰⵇⴰ ⴰⵢⵉ ⴰⵎⴻⵛⵏⴰⵡ ⵖⴰⵔ ⵜⵎⴻⵢⵔⴰ ⵏ ⵜⵉⵏⵉ ⵏ ⵓⵏⴻⴱⴷⵓ,
ⴰⵎⴻⵛⵏⴰⵡ ⵖⴰⵔ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ ⵏ ⵡⴻⵍⵇⴰⴹ ⵏ ⵓⴹⵉⵍ .
ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏ ⵓⵥⴻⴽⴽⵓⵏ ⵏ ⵓⴹⵉⵍ ⵉ ⵎⴰⵛⵛⴰ.
ⵍⴻⵄⵎⴰⵔ ⵉⵏⵓ ⴷⴰⵢⴻⵙ ⵎⴻⵥⵔⵉ ⵏ ⵍⴱⴰⵛⵓⵔ ⵇⴱⴻⵍ ⵍⵡⴻⵇⵜ.
2 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵡⴰⵔ ⵜⴻⵇⵇⵉⵎ ⴷⵉ ⵜⴻⵎⵎⵓⵔⵜ,
ⵓⵛⴰ ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏ ⵓⵚⴻⴱⵃⴰⵏ ⵊⴰⵔ ⵉⵡⴷⴰⵏ.
ⵏⵉⵜⵏⵉ ⵎⴰⵔⵔⴰ ⵜⵜⵃⴰⵎⴰⵏ ⵅ ⵉⴷⴰⵎⵎⴻⵏ,
ⵉⵊⵊⴻⵏ ⵉⵢⴻⵎⵎⴰⵔ ⵡⴻⵏⵏⴻⵖⵏⵉ ⵙ ⵜⵔⴰⵛⵛⴰ. ■
3 ⵉⴼⴰⵙⵙⴻⵏ ⵏⵙⴻⵏ ⵡⴻⵊⴷⴻⵏ ⵙ ⵜⵏⴰⵢⴻⵏ ⵎⴰⵃⴻⵏⴷ ⴰⴷ ⴳⴳⴻⵏ ⵍⵖⴰⵔ.
ⵍⵃⴰⴽⴻⵎ ⵉⵜⵜⴰⵔ ⵓ ⵍⵇⴰⴹⵉ ⵉⵜⵜⴻⴳⴳ ⵉ-ⵜⵜ ⴷⵉ ⵟⵟⵡⴻⵄ ⵏ ⵓⵅⴻⴵⴻⵚ,
ⵓ ⵡⴻⵏⵏⵉ ⴰⵎⴻⵇⵇⵔⴰⵏ ⵉⵙⵙⴰⵡⴰⵍ ⵄⵍⴰⵃⵙⴰⴱ ⵎⴻⵥⵔⵉ ⴰⵄⴻⴼⴼⴰⵏ ⵏ ⵍⴻⵄⵎⴰⵔ ⵏⵏⴻⵙ
ⵓ ⴰⵎⵎⵓ ⵉ ⵙⵙⴼⴰⵔⵖⴻⵏ ⵏⵉⵜⵏⵉ ⵜⴰⵎⴻⵙⵍⴰⵛⵜ. ■
4 ⵡⴻⵏⵏⵉ ⵥⵥⴰⵢⵙⴻⵏ ⴷ ⴰⵚⴻⴱⵃⴰⵏ ⴰⵟⵟⴰⵙ ⴰⵇⴰ-ⵜ ⴰⵎ ⵉⵊⵊ ⵏ ⵛⴱⴰⵔⵇ ⵏ ⵉⵙⴻⵏⵏⴰⵏⴻⵏ,
ⵡⴻⵏⵏⵉ ⴷ ⴰⵚⴷⵉⵇ ⵏ ⵡⵓⵍ ⵇⴰⵄ ⵥⵥⴰⵢⵙⴻⵏ ⴰⵇⴰ-ⵜ ⵎⴰⵀⵓ ⵅ ⵉⵊⵊ ⵏ ⵡⴻⴼⵔⴰⵢ ⵏ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ.
ⴰⵙⵙ ⵏ ⵉⵄⴻⵙⵙⴰⵙⴻⵏ ⵏⵏⴻⴽ, ⴰⵙⵙ ⵏ ⵓⵅⴻⴵⴻⵚ, ⵢⵓⵙⴰ-ⴷⴷ.
ⵍⴻⵅⵅⵓ ⴰⴷ ⵏⵅⴻⵍⵄⴻⵏ.”
ⵎⵉⵅⴰ ⴰⴷ ⵉⵔⴰⵊⴰ ⴰⵙⴻⵏⵊⴻⵎ ⵏ ⵙⵉⴷⵉ
5 “ⵡⴰⵔ ⵜⵓⵎⵉⵏⴻⴷ ⴷⴻⴳ ⵉⵊⵊ ⵏ ⵓⵎⴻⴷⴷⵓⴽⴽⴻⵍ,
ⵡⴰⵔ ⵜᵉⵜⵜⴻⵛⵍⴻⴷ ⵅ ⵓⵎⴻⴷⴷⵓⴽⴽⴻⵍ ⵏⵏⴻⴽ ⵉⵄⵉⵥⵥⴻⵏ.
ⵃⴹⴰ ⵜⵉⵡⵡⵓⵔⴰ ⵏ ⵓⵇⴻⵎⵎⵓⵎ ⵏⵏⴻⴽ
ⵥⵉ ⵜⴻⵏⵏⵉ ⵉⴵⴰⵏ ⵖⴰⵔ ⵡⴻⵃⵙⵉⵏ ⵏⵏⴻⴽ.
6 ⵎⴰⵖⴰⵔ ⵎⵎⵉⵙ ⵉⵙⵙⴻⵃⵇⴰⵔⴰ ⴱⴰⴱⴰⵙ,
ⵢⴻⴵⵉⵙ ⵜᵉⵜⵜⴹⴰⴷⴷⴰ ⵢⴻⵎⵎⴰⵙ,
ⵜⴰⵙⵍⵉⵜ ⵅ ⵍⴰⵍⵍⴰⵙ,
ⵍⵄⴻⴷⵢⴰⵏ ⵏ ⵉⵊⵊ ⵏ ⵡⴻⵔⵢⴰⵥ ⴰⵇⴰ ⴷ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⵙ.” ■
7 “ⵎⴰⵛⴰ ⵏⴻⵛⵛ ⴰⴷ ⵅⵥⴰⵔⴻⵖ ⵖⴰⵔ ⵙⵉⴷⵉ,
ⴰⴷ ⵔⴰⵊⵉⵖ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ.
ⴰⵔⴻⴱⴱⵉ ⵉⵏⵓ ⴰⴷ ⵖⴰⵔⵉ ⴷⴷ-ⵉⵙⴻⵍ.”
8 “ⵡⴰⵔ ⴷ ⴰⵢⵉ ⵙⴼⴰⵔⵔⴻⵃ, ⴰ ⵜⴰⵎⵖⴰⵔⵜ ⵏⵏⵉ ⴷ ⵍⴻⵄⴷⵓ ⵉⵏⵓ!
ⵎⴰⵖⴰⵔ ⵎⴰⵍⴰ ⵡⴹⵉⵖ, ⴰⴷ ⴽⴽⴰⵔⴻⵖ ⵄⴰⵡⴻⴷ,
ⵎⴰⵍⴰ ⵇⵇⵉⵎⴻⵖ ⴷⵉ ⵜⴰⴵⴻⵙⵜ,
ⴰⴷ ⵢⵉⵍⵉ ⵙⵉⴷⵉ ⴷ ⵜⴰⴼⴰⵡⵜ ⵉ ⵏⴻⵛⵛ.
9 ⵏⴻⵛⵛ ⴰⴷ ⴽⵙⵉⵖ ⴰⵙⵅⴻⴹ ⵏ ⵙⵉⴷⵉ,
ⵎⵉⵏⵥⵉ ⵏⴻⵛⵛ ⵅⴹⵉⵖ ⴰⴽⵉⴷⴻⵙ,
ⵖⴰⵔⴻⵙ ⴰⵍ ⵅⴰⴼⵉ ⵉ ⵖⴰ ⵉⵡⵡⴻⵜ ⵏⴻⵜⵜⴰ ⵅ ⴷⴷⴻⵄⵡⴻⵜ ⵉⵏⵓ
ⵓ ⴰⴷ ⴰⵢⵉ ⵢⴰⵖ ⵜⴰⵙⵖⴰⵔⵜ ⵉⵏⵓ.
ⵏⴻⵜⵜⴰ ⴰⴷ ⴰⵢⵉ ⵉⵙⵙⵓⴼⴼⴻⵖ ⵖⴰⵔ ⵜⴼⴰⵡⵜ,
ⵏⴻⵛⵛ ⴰⴷ ⵥⴰⵔⴻⵖ ⵜⴰⵙⴻⴳⴷⴰ ⵏⵏⴻⵙ. ■
10 ⵜⴰⵎⵖⴰⵔⵜ ⵜⴻⵏⵏⵉ ⴷ ⵍⴻⵄⴷⵓ ⵉⵏⵓ ⴰⴷ ⵜⵥⴰⵔ ⴰⵢⴰ.
ⵎⵍⵉ ⴷ ⴰⵙ ⵉ ⵖⴰ ⵜⴷⴻⵍ ⵍⴻⵃⵢⴰ ⵉ ⵜⴻⵏⵏⵉ ⴷ ⴰⵢⵉ ⵉⵇⵇⴰⵔⴻⵏ:
‘ⵎⴰⵏⵉ ⵉⴵⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ?’
ⵜⵉⵟⵟⴰⵡⵉⵏ ⵉⵏⵓ ⴰⴷ ⵖⴰⵔⴻⵙ ⵅⵥⴰⵔⴻⵏⵜ!
ⵍⴻⵅⵅⵓ ⴰⴷ ⵜᵉⵜⵜⵡⴰⴷⴷⴻⵥ ⵏⴻⵜⵜⴰⵜ,
ⴰⵎ ⵓⴱⴻⴵⴰⵄ ⴷⵉ ⵥⵥⵏⴰⵇⵉ.” ■
11 “ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⵉⴱⵏⴰ ⵏⴻⵜⵜⴰ ⵍⴻⵃⵢⵓⴹ ⵏⵏⴻⴽ ⵄⴰⵡⴻⴷ,
ⴷⴻⴳ ⵡⴰⵙⵙ ⵏⵏⵉ ⴰⴷ ⵜⵜⵔⴰⵃ ⵜⴻⵡⵚⴻⵢⵢⴻⵜ ⵖⴰⵔ ⵍⴰⴳⴳⵯⴰⵊ ⴰⵟⵟⴰⵙ.
12 ⴷⴻⴳ ⵡⴰⵙⵙ ⵏⵏⵉ ⴰⴷ ⴷⴷ-ⴰⵙⴻⵏ,
ⵥⵉ ⴰⵛⵛⵓⵔ ⴷ ⵜⵏⴻⴷⴷⴰⵎ ⵏ ⵎⵉⵚⵔⴰ,
ⵓ ⵥⵉ ⵎⵉⵚⵔⴰ ⴰⵍ ⵉⵖⵥⴰⵔ ⵏ ⵍⴼⵓⵔⴰⵟ,
ⵓ ⵥⵉ ⵍⴻⴱⵃⴰⵔ ⴰⵍ ⵍⴻⴱⵃⴰⵔ ⵓ ⵥⴻⴳ ⵡⴻⴷⵔⴰⵔ ⴰⵍ ⵡⴻⴷⵔⴰⵔ ⵏⵏⴻⵖⵏⵉ.
13 ⵎⴰⵛⴰ ⴷⴷⵓⵏⴻⵛⵜ ⴰⴷ ⵜⴻⴷⵡⴻⵍ ⴷ ⵍⵅⴰⵔⴱⴻⵜ,
ⵥⵉ ⵙⵙⵉⴱⴱⴻⵜ ⵏ ⵉⵎⴻⵥⴷⴰⵖ ⵏⵏⴻⵙ,
ⵥⵉ ⵙⵙⵉⴱⴱⴻⵜ ⵏ ⵍⵖⵉⴵⴻⵜ ⵏ ⵜⵎⴻⴳⴳⴰ ⵏⵙⴻⵏ.” ■
14 “ⴰⵔⵡⴻⵙ ⵍⴳⴻⵏⵙ ⵏⵏⴻⴽ ⵙ ⵜⴻⵖⵖⴰⵔⵛⵜ ⵏⵏⴻⴽ,
ⵓⴵⵉ ⵏ ⵜⴻⵙⵖⴰⵔⵜ ⵏⵏⴻⴽ,
ⵜⴻⵏⵏⵉ ⵉⴵⴰⵏ ⵡⴻⵃⵃⴷⴻⵙ ⴷⴻⴳ ⵡⴻⵥⵖⴰⵔ,
ⴷⵉ ⵍⵡⴻⵙⵜ ⵏ ⴽⴰⵔⵎⵉⵍ.
ⴻⵊⵊ ⵉ-ⵜⴻⵏⵜ ⴰⴷ ⴰⵔⴻⵡⵙⴻⵏ ⴷⵉ ⴱⴰⵛⴰⵏ ⴷ ⵊⵉⵍⵄⴰⴷ,
ⴰⵎ ⴷⴻⴳ ⵡⵓⵙⵙⴰⵏ ⵏ ⵡⴻⵛⵃⴰⵍ ⵓⵢⴰ. ■
15 ⵏⴻⵛⵛ ⴰⴷ ⴰⵙ ⵙⵙⴻⵛⵛⵏⴻⵖ ⵍⵎⵓⵄⵊⵉⵥⴰⵜ,
ⴰⵎ ⴷⴻⴳ ⵡⵓⵙⵙⴰⵏ ⵍⴰⵎⵉ ⴷⴷ-ⵜⴻⴼⴼⵖⴻⴷ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. ■
16 ⵍⴻⴳⵏⵓⵙ ⴳⴳⵓⵔ ⴰⴷ ⵜ ⵜⵡⴰⵍⵉⵏ,
ⵓ ⴰⴷ ⵙⵙⴻⴹⵃⴰⵏ ⵥⵉ ⵙⵙⵉⴱⴱⴻⵜ ⵏ ⵎⴰⵔⵔⴰ ⵜⵉⵥⴻⵎⵎⴰⵔ ⵏⵙⴻⵏ,
ⵏⵉⵜⵏⵉ ⴰⴷ ⵙⵙⴰⵔⵙⴻⵏ ⴰⴼⵓⵙ ⵅ ⵓⵇⴻⵎⵎⵓⵎ,
ⵉⵎⴻⵥⵥⵓⵖⴻⵏ ⵏⵙⴻⵏ ⴳⴳⵓⵔ ⴰⴷ ⴷⴷⵓⵀⵛⴰⵔⴻⵏ.
17 ⵏⵉⵜⵏⵉ ⴰⴷ ⵍⴻⵙⵃⴻⵏ ⵜⴰⵄⴻⵊⵊⴰⵊⵜ ⴰⵎ ⵓⴼⵉⵖⴰⵔ,
ⴰⴷ ⴷⴷ-ⴼⴼⵖⴻⵏ ⵥⵉ ⵍⴱⵓⵔⵊⴰⵜ ⵏⵙⴻⵏ ⴰⵎ ⵉⵎⵓⴷⴷⴰⵔ ⵏ ⵜⴻⵎⵎⵓⵔⵜ ⵉⵜⵜⴱⵓⵄⴻⵏ.
ⴰⴷ ⴷⴷ ⴰⵙⴻⵏ ⵜⵜⴰⵔⵊⵉⵊⴻⵏ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ,
ⵓ ⴰⴷ ⵥⵥⴰⵢⴻⴽ ⴳⴳⵯⴻⴷⴻⵏ.” ■
ⵜⴰⵢⵔⵉ ⵏ ⴰⵔⴻⴱⴱⵉ ⴷ ⴰⵔⵔⴻⵃⵎⴻⵜ ⵏⵏⴻⵙ
18 “ⵎⴰⵏ ⵡⴻⵏ ⵉⴵⴰⵏ ⴷ ⴰⵔⴻⴱⴱⵉ ⴰⵎ ⵛⴻⴽ, ⵡⴻⵏⵏⵉ ⵉⵖⴻⴼⴼⴰⵔⴻⵏ ⵍⵎⵓⵄⵚⵉⵢⵢⴻⵜ,
ⵡⴻⵏⵏⵉ ⵉⵄⴻⴷⴷⵓⵏ ⵅ ⵓⵅⴻⵟⵟⵓ ⵏ ⵎⵉⵏ ⵉⵇⵇⵉⵎⴻⵏ ⵥⵉ ⵜⴻⵙⵖⴰⵔⵜ ⵏⵏⴻⵙ?
ⵏⴻⵜⵜⴰ ⵡⴰⵔ ⵉⵎⴻⵏⵏⴻⵄ ⵉ ⵍⴻⴱⴷⴰ ⴷⴻⴳ ⵡⴻⵖⴹⴰⴱ ⵏⵏⴻⵙ,
ⵎⴰⵖⴰⵔ ⵢⴰⵔⴹⴰ ⴰⵙ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ. ■
19 ⵏⴻⵜⵜⴰ ⴰⴷ ⵅⴰⵏⴻⵖ ⵢⴰⵔⵃⴻⵎ ⵄⴰⵡⴻⴷ,
ⵏⴻⵜⵜⴰ ⴰⴷ ⵉⵄⴼⴻⵙ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵖ,
ⵡⴰⵀ, ⵛⴻⴽ ⴰⴷ ⵜⴻⵏⴹⴰⵔⴻⴷ ⵎⴰⵔⵔⴰ ⴷⴷⵏⵓⴱ ⵏⵙⴻⵏ
ⴷⵉ ⵍⴰⴵⴰⵖ ⵏ ⵍⴻⴱⵃⴰⵔ.
20 ⵉⵍⵉ ⵛⴻⴽ ⴰⴷ ⵜⴻⵙⵙⴻⵛⵏⴻⴷ ⵍⴰⵎⴰⵏ ⵉ ⵢⴰⵄⵇⵓⴱ
ⵓ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵉ ⵉⴱⵔⴰⵀⵉⵎ,
ⴰⵎ ⵎⴰⵎⵎⴻⵛ ⵜⴻⵊⵊⵓⴵⴻⴷ ⵉ ⵉⴱⴰⴱⴰⵜⴻⵏ ⵏⵏⴻⵖ
ⵥⴻⴳ ⵡⵓⵙⵙⴰⵏ ⵏ ⵎⴻⵛⵃⴰⵍ ⵓⵢⴰ.”