ⵍⵃⴰⴽⴻⵎ ⵡⴻⵏⵏⵉ ⵉ ⵖⴰ ⴷⴷ-ⵉⵅⴻⵍⵇⴻⵏ ⴷⵉ ⴱⴰⵢⵜ-ⵍⴰⵀⵎ
5
1 “ⵓ ⵛⴻⴽ, ⴱⴰⵢⵜ-ⵍⴰⵃⵎ ⵉⴼⵔⴰⵜⴰ, ⵡⴰⵅⵅⴰ ⵛⴻⴽ ⴷ ⴰⵎⴻⵥⵢⴰⵏ ⴰⵍⴰⵎⵉ ⵡⴰⵔ ⵜⵥⴻⵎⵎⴰⵔⴻⴷ ⴰⴷ ⵜⵉⵍⵉⴷ ⵊⴰⵔ ⵍⵓⵍⵓⴼ ⵏ ⵢⴰⵀⵓⴷⴰ,
ⴰⵇⴰ ⵥⵥⴰⵢⴻⴽ ⵉ ⴷⴷ ⵖⴰ ⵉⴼⴼⴻⵖ ⵏⴻⵜⵜⴰ ⵉ ⵏⴻⵛⵛ,
ⵎⴰⵃⴻⵏⴷ ⴰⴷ ⵢⵉⵍⵉ ⴷ ⵍⵃⴰⴽⴻⵎ ⵅ ⵉⵙⵔⴰⵉⵍ.
ⴰⴱⴰⵏⵉ ⵏⵏⴻⵙ ⴰⵇⴰ-ⵜ ⵥⵉ ⵎⴻⵛⵃⴰⵍ ⵓⵢⴰ,
ⵥⴻⴳ ⵡⵓⵙⵙⴰⵏ ⵏ ⵍⴻⴱⴷⴰ. ■
2 ⵅ ⵓⵢⴻⵏⵏⵉ ⵏⴻⵜⵜⴰ ⴰⴷ ⵜⴻⵏ ⵉⵙⴻⵍⵍⴻⵎ ⴰⵍ ⵍⵡⴻⵇⵜ ⵏⵏⵉ,
ⴰⵇⴰ ⵜⴻⵏⵏⵉ ⵉ ⵖⴰ ⵢⴰⵔⵡⴻⵏ, ⴰⵇⴰ ⵜⵓⵔⵓⵡ-ⴷⴷ.
ⵅⴻⵏⵏⵉ ⴰⴷ ⴷⴷ-ⵉⴷⵡⴻⵍ ⵍⴱⴰⵇⵉ ⵏ ⵢⴰⵢⵜⵎⴰⵙ,
ⵊⵎⵉⵄ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ.
3 ⵏⴻⵜⵜⴰ ⴰⴷ ⵉⴱⴻⴷⴷ ⴷⵉⵏⵏⵉ
ⵓⵛⴰ ⴰⴷ ⵢⴰⵔⵡⴻⵙ ⴷⵉ ⵊⵊⴻⵀⴷ ⵏ ⵙⵉⴷⵉ,
ⴷⵉ ⵍⵓⵄⵍⴰ ⵏ ⵢⵉⵙⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵙ.
ⵏⵉⵜⵏⵉ ⴰⴷ ⵥⴻⴷⵖⴻⵏ ⴷⵉⵏⵏⵉ,
ⵎⴰⵖⴰⵔ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⴻⵇⵇⵔⴰⵏ
ⴰⵍ ⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ. □
4 ⵡⴰⵏⵉⵜⴰ ⴰⴷ ⵢⵉⵍⵉ ⴷ ⵍⴻⵀⵏⴰ.”
“ⵅⵎⵉ ⴷⴷ ⵖⴰ ⵢⴰⵙ ⴰⵛⵛⵓⵔ ⵖⴰⵔ ⵜⴻⵎⵎⵓⵔⵜ ⵏⵏⴻⵖ,
ⵓ ⵅⵎⵉ ⴷⴷ ⵖⴰ ⵢⴰⴷⴻⴼ ⵖⴰⵔ ⵍⴻⵇⵚⵓⵔ ⵏⵏⴻⵖ,
ⵅⴻⵏⵏⵉ ⴰⴷ ⴰⵙ ⵏⴻⵙⵙⴻⵍⵇⴰ ⵙⴻⴱⵄⴰ ⵏ ⵉⵎⴻⴽⵙⴰⵡⴻⵏ
ⴷ ⵜⵎⴻⵏⵢⴰ ⵏ ⴰⵢⵜ ⵏ ⵊⵊⴻⵀⴷ ⵥⵉ ⵎⵉⴷⴷⴻⵏ. ■
5 ⵏⵉⵜⵏⵉ ⴰⴷ ⵃⴹⴰⵏ ⵅ ⵜⴻⵎⵎⵓⵔⵜ ⵏ ⴰⵛⵛⵓⵔ ⵙ ⵙⵙⵉⴼ
ⵓ ⵜⴰⵎⵎⵓⵔⵜ ⵏ ⵏⵉⵎⵔⵓⴷ ⴷⵉ ⵜⴻⵡⵡⵓⵔⴰ ⵏⵏⴻⵙ.
ⴰⵎⵎⵓ ⵏⴻⵜⵜⴰ ⴰⴷ ⴰⵏⴻⵖ ⵉⵙⵙⴻⵏⵊⴻⵎ ⵥⴻⴳ ⵓⴼⵓⵙ ⵏ ⴰⵛⵛⵓⵔ,
ⵅⵎⵉ ⴷⴷ ⵖⴰ ⵢⴰⵙ ⵡⴰⵏⵉⵜⴰ ⵖⴰⵔ ⵜⴻⵎⵎⵓⵔⵜ ⵏⵏⴻⵖ
ⵓ ⵅⵎⵉ ⴷⴷ ⵖⴰ ⵢⴰⴷⴻⴼ ⵖⴰⵔ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏⵏⴻⵖ.”
ⵍⴱⴰⵇⵉ ⵏⵏⵉ ⵉ ⵖⴰ ⵉⵏⵏⴻⵊⵎⴻⵏ
6 “ⵍⴱⴰⵇⵉ ⵏ ⵢⴰⵄⵇⵓⴱ ⴰⴷ ⵢⵉⵍⵉ ⴷⵉ ⵍⵡⴻⵙⵜ ⵏ ⵍⴻⴳⵏⵓⵙ
ⴰⵎⴻⵛⵏⴰⵡ ⵏⵏⴷⴰ ⵏ ⵙⵉⴷⵉ,
ⴰⵎⴻⵛⵏⴰⵡ ⵜⵉⴷⴷⵓⵎⵉⵏ ⵅ ⵡⴻⴼⵙⵓ ⴰⵥⵉⵥⴰ,
ⵡⴻⵏⵏⵉ ⵡⴰⵔ ⵉⵅⴻⵥⵥⴰⵔⴻⵏ ⵖⴰⵔ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵥ
ⵓ ⵡⴰⵔ ⵉⵜⵜⵔⵉⵊⵉⵏ ⵜⴰⵔⵡⴰ ⵏ ⴱⵏⴰⴷⴻⵎ.
7 ⵍⴱⴰⵇⵉ ⵏ ⵢⴰⵄⵇⵓⴱ ⴰⴷ ⵢⵉⵍⵉ ⵊⴰⵔ ⵍⴻⴳⵏⵓⵙ,
ⴷⵉ ⵍⵡⴻⵙⵜ ⵏ ⵍⴻⴳⵏⵓⵙ,
ⴰⵎⴻⵛⵏⴰⵡ ⴰⵢⵔⴰⴷ ⵊⴰⵔ ⵍⵎⴰⵍ ⵏ ⵢⴻⵥⵖⴰⵔ,
ⴰⵎⴻⵛⵏⴰⵡ ⴰⵢⵔⴰⴷ ⴷ ⴰⵎⴻⵥⵢⴰⵏ ⵊⴰⵔ ⵜⵃⵉⵎⵔⵉⵡⵉⵏ ⵏ ⵡⵓⴵⵉ,
ⵡⴻⵏⵏⵉ, ⵅⵎⵉ ⵉ ⵖⴰ ⵉⵄⴷⵓ,
ⵉⵄⴻⴼⴼⴻⵙ ⵓ ⵉⵜⵜⵛⴰⵔⵔⴰⴳ
ⵓⵛⴰ ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵉ ⵖⴰ ⵉⴼⴻⴽⴽⴻⵏ. □
8 ⴰⴼⵓⵙ ⵏⵏⴻⴽ ⴰⴷ ⵢⵉⵍⵉ ⵉⵜⵜⵡⴰⵙⴳⴻⵄⵄⴻⴷ ⵙⴻⵏⵏⴻⵊ ⵉ ⵢⴻⵏⵏⵉ ⵉ ⵛⴻⴽ ⵉⵃⴻⵚⵚⴰⵔⴻⵏ,
ⵓⵛⴰ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⴽ ⴰⴷ ⵜⵜⵡⴰⵎⵃⴰⵏ.”
9 “ⴰⴷ ⵉⵎⵙⴰⵔ ⴷⴻⴳ ⵡⴰⵙⵙ ⵏⵏⵉ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ,
ⴰⵇⴰ ⵏⴻⵛⵛ ⴰⴷ ⵜⴻⵃⵃⵉⵖ ⵉⵢⵙⴰⵏ ⵏⵏⴻⴽ ⵥⵉ ⵍⵡⴻⵙⵜ ⵏⵏⴻⴽ
ⵓ ⴰⴷ ⵙⵙⵀⴻⵍⵍⴽⴻⵖ ⵉⴽⴰⵔⵔⵓⵜⴻⵏ ⵏⵏⴻⴽ. ■
10 ⴰⴷ ⵎⵃⵉⵖ ⵜⵉⵏⴻⴷⴷⴰⵎ ⵥⵉ ⵜⴻⵎⵎⵓⵔⵜ ⵏⵏⴻⴽ,
ⵓ ⴰⴷ ⵀⴻⴷⵎⴻⵖ ⵎⴰⵔⵔⴰ ⵍⴱⵓⵔⵊⴰⵜ ⵏⵏⴻⴽ.
11 ⵏⴻⵛⵛ ⴰⴷ ⵇⴻⴹⵄⴻⵖ ⵜⴰⵙⴻⵃⵃⴰⵔⵜ ⵏⵏⴻⴽ ⵥⴻⴳ ⵓⴼⵓⵙ ⵏⵏⴻⵎ,
ⵓ ⵡⴰⵔ ⵖⴰⵔⴻⴽ ⵜⵜⵉⵍⵉⵏ ⵄⴰⴷ ⵉⴱⴻⵥⴳⴰⵡⴻⵏ.
12 ⵍⴻⵅⵢⴰⵍⴰⵜ ⵏⵏⴻⵎ ⵉⵏⴻⵇⵛⴻⵏ ⴷ ⵉⵎⴰⵢⴹⵓⵜⴻⵏ ⵏⵏⴻⴽ ⵉⵇⴻⴷⴷⵙⴻⵏ,
ⴰⴷ ⵜⴻⵏ ⵎⵃⵉⵖ ⵥⵉ ⵍⵡⴻⵙⵜ ⵏⵏⴻⴽ,
ⵃⵉⵎⴰ ⵡⴰⵔ ⵜᵉⵜⵜⵉⴹⴰⵔⴻⴷ ⵄⴰⴷ,
ⵉ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⴽ.
13 ⵜⵉⵔⴻⴱⴱⵉⵏ ⵏⵏⴻⴽ ⵏ ⵛⵡⴰⵔⵜⵉ ⴰⴷ ⵜⴻⵏⵜ ⵜⴻⵃⵃⵉⵖ ⵥⵉ ⵍⵡⴻⵙⵜ ⵏⵏⴻⴽ,
ⵓ ⴰⴷ ⵀⴻⴷⵎⴻⵖ ⵜⵉⵏⴻⴷⴷⴰⵎ ⵏⵏⴻⴽ.
14 ⵏⴻⵛⵛ ⴰⴷ ⵏⵜⴰⵇⵎⴻⵖ ⵙ ⵡⴻⵖⴹⴰⴱ ⵓ ⵙ ⵡⴻⵙⵄⴰⵔ
ⵅ ⵍⴻⴳⵏⵓⵙ ⵏⵏⵉ ⵡⴰⵔ ⵉⵜⵜⴻⵅⵙⴻⵏ ⴰⴷ ⵙⵍⴻⵏ.”