ⵜⴰⴳⴻⵍⴷⵉⵜ ⵉ ⴷ ⵖⴰ ⵢⴰⵙⴻⵏ ⵏ ⵙⵉⴷⵉ ⵥⵉ ⵚⵉⵀⵢⵓⵏ
4
1 “ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ ⴰⴷ ⵉⵎⵙⴰⵔ, ⴰⵇⴰ ⴰⴷⵔⴰⵔ ⵏ ⵜⴰⴷⴷⴰⵔⵜ ⵏ ⵙⵉⴷⵉ ⴰⴷ ⵉⴱⴻⴷⴷ ⵉⵎⵜⴻⵏ
ⵅ ⵜⵇⵉⵛⵛⴻⵜ ⵏ ⵉⴷⵓⵔⴰⵔ.
ⴰⴷ ⵢⵉⵍⵉ ⵢⵓⵄⵍⴰ ⵅ ⵜⴻⵡⵔⵉⵔⵉⵏ,
ⵓⵛⴰ ⵍⴻⴳⵏⵓⵙ ⴰⴷ ⵖⴰⵔⴻⵙ ⴷⴷ-ⴰⵥⵥⵍⴻⵏ. ■
2 ⴰⵟⵟⴰⵙ ⵏ ⵍⴻⴳⵏⵓⵙ ⴰⴷ ⴳⴻⵄⵄⴷⴻⵏ, ⴰⴷ ⵉⵏⵉⵏ:
“ⵊⵊⴻⵎ ⴰⵏⴻⵖ ⴰⴷ ⵏⴳⴻⵄⵄⴻⴷ ⵖⴰⵔ ⵡⴻⴷⵔⴰⵔ ⵏ ⵙⵉⴷⵉ
ⵓ ⵖⴰⵔ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵏ ⵢⴰⵄⵇⵓⴱ,
ⵃⵉⵎⴰ ⴰⴷ ⴰⵏⴻⵖ ⵉⵙⵙⴻⵍⵎⴻⴷ ⵥⴻⴳ ⵉⴱⵔⵉⴷⴻⵏ ⵏⵏⴻⵙ,
ⴰⴷ ⵏⵓⵢⵓⵔ ⵏⴻⵛⵛⵉⵏ ⴷⴻⴳ ⵉⵎⴻⵙⵔⴰⵇ ⵏⵏⴻⵙ,
ⵎⵉⵏⵥⵉ ⵥⵉ ⵚⵉⵀⵢⵓⵏ ⴰⴷ ⴷⴷ-ⵜⴻⴼⴼⴻⵖ ⵛⵛⴰⵔⵉⵄⴰ
ⵓ ⴰⵡⴰⵍ ⵏ ⵙⵉⴷⵉ ⵥⵉ ⵓⵔⵛⴰⵍⵉⵎ.
3 ⵏⴻⵜⵜⴰ ⴰⴷ ⵉⵛⴰⵔⵔⴻⵄ ⵊⴰⵔ ⵍⴻⴳⵏⵓⵙ ⵉⵎⵖⴰⵔⴻⵏ
ⵓ ⴰⴷ ⵉⵙⴻⴳⴳⴻⵎ ⵍⴻⴳⵏⵓⵙ ⵏⵏⵉ ⵖⴰⵔ ⵉⴵⴰ ⵜⵉⵥⴻⵎⵎⴰⵔ ⵜⵉⵎⴻⵇⵇⵔⴰⵏⵉⵏ,
ⵄⴰⴷ ⵓⵍⴰ ⴷ ⵍⴻⴳⵏⵓⵙ ⵉⴳⴳⵯⴻⵊⴻⵏ.
ⵏⵉⵜⵏⵉ ⴰⴷ ⴳⴳⴻⵏ ⵍⴻⵙⵢⵓⴼ ⵏⵙⴻⵏ ⴷ ⴷⴷⵓⵥⴰⵏ
ⵓ ⴼⵍⵉⵜⵛⴰⵜ ⵏⵙⴻⵏ ⴷ ⵍⴻⵎⵡⴰⵙ ⵏ ⵡⴻⵥⴱⴰⵔ.
ⵡⴰⵔ ⵉⵙⵙⴳⵉⵄⵄⵉⴷ ⵓⵍⴰ ⴷ ⵉⵊⵊ ⵏ ⵍⴳⴻⵏⵙ ⵄⴰⴷ ⵙⵙⵉⴼ ⵅ ⵡⴻⵏⵏⴻⵖⵏⵉ,
ⵓ ⵏⵉⵜⵏⵉ ⵡⴰⵔ ⵍⴻⵎⵎⴷⴻⵏ ⵄⴰⴷ ⴰⵎⴻⵏⵖⵉ.
4 ⵏⵉⵜⵏⵉ ⴰⴷ ⵇⵇⵉⵎⴻⵏ,
ⴽⵓⵍ ⵉⵊⵊ ⵙⴰⴷⵓ ⵜⵥⴰⵢⴰⵔⵜ ⵏⵏⴻⵙ ⵓ ⵙⴰⴷⵓ ⵡⴰⵔⵜⵓ ⵏ ⵜⴰⵥⴰⵔⵜ ⵏⵏⴻⵙ,
ⵓⵛⴰ ⵓⵍⴰ ⴷ ⵉⵊⵊⴻⵏ ⴰⴷ ⵜⴻⵏ ⵉⵙⵙⵏⴻⵅⵍⴻⵄ,
ⵎⴰⵖⴰⵔ ⴰⵇⴻⵎⵎⵓⵎ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⵇⴰ ⵉⵏⵏⴰ ⵜ.” ■
5 “ⵎⵉⵏⵥⵉ ⵎⴰⵔⵔⴰ ⵍⴻⴳⵏⵓⵙ ⴰⴷ ⵓⵢⵓⵔⴻⵏ,
ⴽⵓⵍ ⵉⵊⵊ ⵥⵥⴰⵢⵙⴻⵏ ⴷⴻⴳ ⵢⵉⵙⴻⵎ ⵏ ⴰⵔⴻⴱⴱⵉ ⵏⵏⴻⵙ,
ⵎⴰⵛⴰ ⵏⴻⵛⵛⵉⵏ ⴰⴷ ⵏⵓⵢⵓⵔ ⴷⴻⴳ ⵢⵉⵙⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ,
ⵉ ⵍⴻⴱⴷⴰ ⵇⴰⵄ.”
ⵙⵉⴷⵉ ⴰⴷ ⵉⵙⵙⴻⵏⵊⴻⵎ ⵚⵉⵀⵢⵓⵏ
6 “ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ,
ⵏⴻⵛⵛ ⴰⴷ ⵢⴰⵔⵡⴻⵖ ⵎⵉⵏ ⵉⵇⴻⵊⴷⵃⴻⵏ,
ⵓ ⴰⴷ ⵖⴰⵔⵉ ⵙⵙⵎⵓⵏⴻⵖ ⵎⵉⵏ ⵅ ⵓⵥⵥⵍⴻⵏ,
ⵓ ⵡⵉ ⴷⵉ ⴳⴳⵉⵖ ⵏⴻⵛⵛ ⵍⵖⴰⵔ. ■
7 ⵎⵉⵏ ⵉⵇⴻⵊⴷⵃⴻⵏ ⴰⴷ ⵜ ⴳⴳⴻⵖ ⴷ ⵍⴱⴰⵇⵉ,
ⵓⵍⴰ ⵎⵉⵏ ⵉⵜⵜⵡⴰⵄⴰⵔⵔⵏⴻⵏ ⵖⴰⵔ ⵍⴰⴳⴳⵯⴰⵊ,
ⴰⴷ ⵜ ⴳⴳⴻⵖ ⴷ ⵉⵊⵊ ⵏ ⵍⴳⴻⵏⵙ ⵙ ⵜⵥⴻⵎⵎⴰⵔ ⴷ ⵜⴰⵎⴻⵇⵇⵔⴰⵏⵜ,
ⵓⵛⴰ ⵙⵉⴷⵉ ⴰⴷ ⵅⴰⵙⴻⵏ ⵢⵉⵍⵉ ⴷ ⴰⵊⴻⴵⵉⴷ ⵅ ⵡⴻⴷⵔⴰⵔ ⵏ ⵚⵉⵀⵢⵓⵏ,
ⵥⵉ ⵍⴻⵅⵅⵓ ⴰⵍ ⵍⴻⴱⴷⴰ. ■
8 ⵉ ⵛⴻⵎ, ⵎⵉⴳⴷⴰⵍ-ⵄⵉⴷⵔ,
ⴰ ⵛⴻⵎ, ⵜⴰⵡⵔⵉⵔⵜ ⵏ ⵜⵢⴻⴵⵉⵜ ⵚⵉⵀⵢⵓⵏ!
ⴰⴷ ⵖⴰⵔⴻⵎ ⴷⴷ-ⵜⴰⵙ,
ⵡⴰⵀ, ⴰⴷ ⵖⴰⵔⴻⵎ ⴷⴷ-ⵜⴰⵙ ⵍⴻⵃⴽⴰⵎⴻⵜ
ⵜⴻⵏⵏⵉ ⵉ ⵜⵓⵖⴰ ⵉⴵⴰⵏ ⴷⴻⴳ ⵓⵎⴻⵥⵡⴰⵔⵓ,
ⵜⴰⴳⴻⵍⴷⵉⵜ ⵏ ⵢⴻⴵⵉⵙ ⵏ ⵓⵔⵛⴰⵍⵉⵎ.”
9 “ⵍⴻⵅⵅⵓ ⵎⴰⵛⴰ, ⵎⴰⵢⴻⵎⵎⵉ ⵜⴻⵙⵖⵓⵢⵢⵓⴷ ⴰⵎⵎⵓ ⵙ ⵊⵊⴻⵀⴷ?
ⵎⴰ ⵡⴰⵔ ⵖⴰⵔⴻⵎ ⵉⴵⵉ ⵓⵊⴻⴵⵉⴷ?
ⵎⴰ ⵉⵜⵜⵡⴰⵀⴻⵍⵍⴻⴽ ⵓⵎⵛⴰⵡⴰⵔ ⵏⵏⴻⵎ,
ⴰⵇⴰ ⵉⵟⵟⴻⴼ ⵉ ⵛⴻⵎ ⵍⴻⵃⵔⵉⵇ ⴰⵎ ⵏ ⵢⵉⵛⵜ ⵏ ⵜⴻⵎⵖⴰⵔⵜ ⵉⵜⵜⴰⵔⵡⴻⵏ? ■
10 ⵖⵏⴻⵙ ⵓ ⵜⵄⴻⴱⴱⵥⴻⴷ, ⴰ ⵛⴻⵎ ⵜⴰⵢⴻⴵⵉⵜ ⵚⵉⵀⵢⵓⵏ,
ⴰⵎ ⵉⵛⵜ ⵏ ⵜⴻⵎⵖⴰⵔⵜ ⵉⵜⵜⴰⵔⵡⴻⵏ.
ⵎⴰⵖⴰⵔ ⵡⴰⵅⵅⴰ ⵍⴻⵅⵅⵓ ⴰⴷ ⵜⴻⴼⴼⵖⴻⴷ ⵥⵉ ⵜⴻⵏⴷⵉⵏⵜ,
ⴰⴷ ⵜⵥⴻⴷⵖⴻⴷ ⴷⴻⴳ ⵉⵢⵢⴰⵔ,
ⵓⵛⴰ ⴰⴷ ⴷⴷ-ⵜⴰⵙⴻⴷ ⴰⵍ ⴱⴰⴱⵉⵍ.
ⵎⴰⵛⴰ ⴷⵉⵏ ⴰⴷ ⵜⵏⴻⵊⵎⴻⴷ,
ⴷⵉⵏⵏⵉ ⴰⴷ ⵛⴻⵎ ⵉⴼⴻⴽⴽ ⵙⵉⴷⵉ ⵥⴻⴳ ⵓⴼⵓⵙ ⵏ ⵍⵄⴻⴷⵢⴰⵏ ⵏⵏⴻⵎ.”
11 “ⵍⴻⵅⵅⵓ ⵎⴰⵛⴰ ⵎⵓⵏⴻⵏ ⵅⴰⴽ ⴰⵟⵟⴰⵙ ⵏ ⵍⴻⴳⵏⵓⵙ.
ⵏⵉⵜⵏⵉ ⵇⵇⴰⵔⴻⵏ: ‘ⵏⴻⵜⵜⴰⵜ ⴰⴷ ⵜᵉⵜⵜⵡⴰⵄⴰⵔⵔⴰ!’
ⵜⵉⵟⵟⴰⵡⵉⵏ ⵏⵏⴻⵖ ⴰⴷ ⵥⴰⵔⴻⵏⵜ ⵚⵉⵀⵢⵓⵏ.
12 ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵉⵏⵡⴰⵢⴻⵏ ⵏ ⵙⵉⴷⵉ,
ⵓ ⵡⴰⵔ ⴼⴻⵀⵀⵎⴻⵏ ⵛⴰ ⵛⵛⵡⴰⵔ ⵏⵏⴻⵙ!
ⵎⴰⵖⴰⵔ ⵏⴻⵜⵜⴰ ⵉⴽⵙⵉ ⵜⴻⵏ ⵖⴰⵔⴻⵙ
ⴰⵎ ⵜⵇⴻⴱⴱⵉⴹⵉⵏ ⵏ ⵉⵎⴻⵏⴷⵉ ⴷⴻⴳ ⵓⵏⴻⴷⵔⴰⵔ.” ■
13 “ⴽⴽⴰⵔ, ⵜⴻⵙⵙⴰⵔⴻⵡⵜⴻⴷ,
ⴰ ⵛⴻⵎ, ⵢⴻⴵⵉⵙ ⵏ ⵚⵉⵀⵢⵓⵏ,
ⵎⴰⵖⴰⵔ ⵏⴻⵛⵛ ⴰⴷ ⴰⵎ ⴰⵔⵔⴻⵖ ⵢⵉⵛⵛ ⵏⵏⴻⵎ ⴷ ⵓⵥⵥⴰⵍ,
ⵓ ⴰⴷ ⴰⵎ ⴳⴳⴻⵖ ⵜⵉⵛⴻⴹⵢⵉⵏ ⵏⵏⴻⵎ ⵥⵉ ⵏⵏⵃⴰⵙ,
ⵓ ⵛⴻⵎ ⴰⴷ ⵜⵍⴻⴱⵥⴻⴷ ⴰⵟⵟⴰⵙ ⵏ ⵍⴻⴳⵏⵓⵙ
ⵓ ⵏⴻⵛⵛ ⴰⴷ ⵃⴰⵔⵔⵎⴻⵖ ⵜⴰⴽⴻⵛⵛⴰⴹⵜ ⵏⵙⴻⵏ ⵎⴰⵔⵔⴰ ⵉ ⵙⵉⴷⵉ,
ⵓⵍⴰ ⴷ ⴰⴳⵍⴰ ⵏⵙⴻⵏ ⵉ ⵙⵉⴷⵉ ⵏ ⵎⴰⵔⵔⴰ ⵜⴰⵎⵎⵓⵔⵜ. ■
14 ⵅⴻⵏⵏⵉ ⵍⴻⵅⵅⵓ, ⵍⴻⵃⵎⴻⵎ ⵉⵊⵊⴻⵏ ⵖⴰⵔ ⵡⴻⵏⵏⴻⵖⵏⵉ,
ⴰ ⵛⴻⵎ ⵢⴻⴵⵉⵙ ⵏ ⵉⵊⵊ ⵏ ⴱⴰⵏⴷⵉⵢⵢⴰ ⵏ ⵉⵅⴻⵡⵡⴰⵏⴻⵏ!
ⵏⴻⵜⵜⴰ ⵉⵃⴻⵚⵚⴰⵔ ⴰⵏⴻⵖ.
ⵏⵉⵜⵏⵉ ⴰⴷ ⵛⵛⴰⵜⴻⵏ ⵍⵇⴰⴹⵉ ⵏ ⵉⵙⵔⴰⵉⵍ
ⵅ ⵓⵇⴰⴱⵙⵉ ⵙ ⵉⵊⵊ ⵏ ⵡⴻⵄⵎⵓⴷ.”