1 “ⵙⵍⴻⵎ ⴰⵡⴰⵍ-ⴰ ⵉ ⴽⵉⴷⵡⴻⵎ ⵉⵙⵙⴰⵡⴰⵍ ⵙⵉⴷⵉ, ⴰ ⴰⵢⵜ ⵏ ⵉⵙⵔⴰⵉⵍ, ⴰⴽ-ⴷ ⴽⵓⵍ ⵍⴰⴵ ⵏⵏⵉ ⵙⵙⴳⴻⵄⵄⴷⴻⵖ ⵏⴻⵛⵛ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⴰⵎ ⵇⵇⴰⵔⴻⵖ: 2 ⵣⵉ ⵎⴰⵔⵔⴰ ⵜⵉⵇⴻⴱⴱⴰⵍ ⵏ ⴷⴷⵓⵏⴻⵛⵜ ⵙⵙⵏⴻⵖ ⵎⵖⵉⵔ ⴽⴻⵏⵏⵉⵡ. ⵙ ⵓⵢⴰ ⴰⴷ ⴽⴻⵏⵏⵉⵡ ⵄⴰⵇⴱⴻⵖ ⵅ ⵎⴰⵔⵔⴰ ⵍⵎⵓⵄⵚⵉⵢⵢⴰⵜ ⵏⵡⴻⵎ!

3 ⵎⴰ ⴰⴷ ⵓⵢⵓⵔⴻⵏ ⵜⵏⴰⵢⴻⵏ ⴰⴽ-ⴷ ⵡⴰⵢⴰⵡⵢⴰ, ⴱⵍⴰ ⵎⴰ ⵜⵜⴰⴼⵇⴻⵏ?

4 ⵎⴰ ⴰⴷ ⵉⵥⴻⵀⵀⴰⵔ ⵡⴰⵢⵔⴰⴷ ⴷⴻⴳ ⵡⴻⵥⵖⴰⵔ ⵍⴰⵎⵉ ⵡⴰⵔ ⵖⴰⵔⴻⵙ ⴱⵓ ⵥⵥⴰⵔⴷⴻⵜ?

ⵎⴰ ⴰⵢⵔⴰⴷ ⴷ ⴰⵎⴻⵥⵢⴰⵏ ⴰⴷ ⵢⴻⵊⵊ ⵜⵎⵉⵊⵊⴰ ⵏⵏⴻⵙ ⴰⴷ ⵜᵉⵜⵜⵡⴰⵙⴻⵍ ⵥⴻⴳ ⵢⴻⴼⵔⵉ, ⴰⵎ ⵡⴰⵔ ⵉⵎⵏⵉⵄ ⵡⴰⵍⵓ? ^□  

5 ⵎⴰ ⴰⴷ ⵉⵏⴹⴰⵔ ⵡⴻⵊⴹⵉⴹ ⴷⵉ ⵍⴼⴻⵅ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ, ⵎⴰⵍⴰ ⵡⴰⵔ ⴷⵉⵏ ⵍⴼⴻⵅ ⵉ ⵏⴻⵜⵜⴰ?

ⵎⴰ ⴰⴷ ⵉⵏⵏⵓⵔⴼⴻⵄ ⵍⴼⴻⵅ ⵥⵉ ⵜⴻⵎⵎⵓⵔⵜ ⵎⴰⵍⴰ ⵜⴻⵅⵡⴰ?

6 ⵎⴰⵍⴰ ⵃⴻⴷ ⵉⵚⵓⴹ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⴷⵉ ⵜⴻⵏⴷⵉⵏⵜ, ⵎⴰ ⵡⴰⵔ ⵉⵜⵜⴰⵔⵊⵉⵊⵉ ⵍⴳⴻⵏⵙ?

ⵎⴰⵍⴰ ⵜⴻⵎⵙⴰⵔ ⵜⵓⵄⴻⴼⴼⵏⴰ ⴷⵉ ⵜⴻⵏⴷⵉⵏⵜ, ⵎⴰ ⵡⴰⵔ ⵜⵜ ⵉⴳⴳⵉ ⵙⵉⴷⵉ? ^■  

7 ⵎⴰⵖⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵡⴰⵔ ⵉⵜⵜⴻⴳⴳ ⵓⵍⴰ ⴷ ⵉⵛⵜ ⵏ ⵍⵃⴰⵊⴻⵜ ⴱⵍⴰ ⵎⴰ ⴰⴷ ⵉⵙⵙⴰⵔⴳⴻⴱ ⵛⵛⵡⴰⵔ ⵏⵏⴻⵙ ⵉⵏⵏⵓⴼⴼⴰⵔⴻⵏ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵙ, ⵉⵏⴰⴱⵉⵢⵢⴻⵏ.

8 ⴰⵢⵔⴰⴷ ⵉⵥⴻⵀⵀⴰⵔ, ⵎⴰⵏ ⵡⴻⵏ ⵡⴰⵔ ⵉⵜⵜⴻⴳⴳⵯⴷⴻⵏ?

ⵙⵉⴷⵉ ⵉⵏⵓ, ⵙⵉⴷⵉ, ⴰⵇⴰ ⵉⵙⵙⵉⵡⴻⵍ, ⵎⴰⵏ ⵡⴻⵏ ⵡⴰⵔ ⵉⵜⵜⵏⴻⴱⴱⴰ?”

9 “ⵊⵊⴻⵎ ⴰⴷ ⵉⵜⵜⵡⴰⵙⴻⵍ ⴰⵢⴰ ⴷⵉ ⵍⴻⵇⵚⵓⵔ ⴷⵉ ⴰⵛⴷⵓⴷ ⵓ ⴷⵉ ⵍⴻⵇⵚⵓⵔ ⵏ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵉⵏⵉ: ‘ⵎⵓⵏⴻⵎ ⵅ ⵉⴷⵓⵔⴰⵔ ⵏ ⵙⴰⵎⴰⵔⵢⴰ ⵓ ⵅⵥⴰⵔⴻⵎ ⴰⵏⴻⵀⵡⴻⵍ ⴰⵎⴻⵇⵇⵔⴰⵏ ⴷⵉ ⵍⵡⴻⵙⵜ ⵏⵏⴻⵙ ⵓ ⵉⵏⵏⵉ ⴷⴰⵢⴻⵙ ⵉⵜⵜⵡⴰⵃⵚⴰⵔⴻⵏ!’

10 ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵎⴰⵎⵎⴻⵛ ⵉ ⵖⴰ ⴳⴳⴻⵏ ⵎⵉⵏ ⵉⵙⴻⴳⴳⴷⴻⵏ, ⵉⵇⵇⴰⵔ ⵙⵉⴷⵉ, ⵏⵉⵜⵏⵉ ⵉⵏⵏⵉ ⵉⵢⴰⵔⵔⵡⴻⵏ ⵍⵄⵓⵏⴼ ⴷ ⵜⴽⴻⵛⵛⴰⴹⵜ ⴷⵉ ⵍⴻⵇⵚⵓⵔ ⵏⵙⴻⵏ.

11 ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵉⵊⵊ ⵏ ⵍⴻⵄⴷⵓ! ⵏⴻⵜⵜⴰ ⵉⵜⵜⴻⵏⵏⴻⴹ ⵉ ⵜⴻⵎⵎⵓⵔⵜ ⵎⴰⵔⵔⴰ ! ⴰⴷ ⵉⵙⵙⴻⵀⵡⴰ ⵊⵊⴻⵀⴷ ⵏⵏⴻⵎ ⵓ ⵍⴻⵇⵚⵓⵔ ⵏⵏⴻⵎ ⴰⴷ ⵜⵜⵡⴰⴽⴻⵛⵛⴹⴻⵏ.

12 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ⴰⵎ ⵉⴼⴻⴽⴽ ⵉⵊⵊ ⵏ ⵓⵎⴻⴽⵙⴰⵡ ⵜⵏⴰⵢⴻⵏ ⵏ ⵉⴹⴰⵔⴻⵏ ⵏⵉⵖ ⵉⵊⵊ ⵏ ⵢⵉⵅⴻⴼ ⵏ ⵓⵎⴻⵥⵥⵓⵖ ⵥⴻⴳ ⵓⵇⴻⵎⵎⵓⵎ ⵏ ⵡⴰⵢⵔⴰⴷ, ⴰⵎⵎⵓ ⵉ ⵖⴰ ⵜⵜⵡⴰⵙⵏⴻⵊⵎⴻⵏ ⴰⵢⵜ ⵏ ⵉⵙⵔⴰⵉⵍ, ⵉⵏⵏⵉ ⵉ ⴷⵉⵏ ⵉⵜⵜⵖⵉⵎⴰⵏ ⴷⵉ ⵙⴰⵎⴰⵔⵢⴰ ⵅ ⵜⴻⵖⵎⴰⵔⵜ ⵏ ⵇⴰⵎⴰ ⵓ ⵅ ⵢⵉⵛⵜ ⵏ ⵜⵥⴻⵔⴱⵉⵢⵢⴻⵜ ⵥⵉ ⴷⵉⵎⴰⵛⵇ ⴳⴳⵉⵏ ⵜⵜ ⵅ ⵢⵉⵛⵜ ⵏ ⵍⴻⵎⵟⴰⵔⴱⴻⵜ.”

13 “ⵙⵍⴻⵎ ⵓ ⵛⴻⵀⴷⴻⵎ ⴷⵉ ⵜⴰⴷⴷⴰⵔⵜ ⵏ ⵢⴰⵄⵇⵓⴱ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ.

14 ⵎⵉⵏⵥⵉ ⴷⴻⴳ ⵡⴰⵙⵙ ⵏⵏⵉ ⴷⵉ ⵖⴰ ⵅⴻⵍⴼⴻⵖ ⵉⵅⴻⵟⵟⴰⵏ ⵏ ⵉⵙⵔⴰⵉⵍ, ⴰⴷ ⵙⵙⵉⵡⴹⴻⵖ ⵄⴰⵡⴻⴷ ⴰⵅⴻⴵⴻⵚ ⵅ ⵉⵄⴰⵍⵟⴰⵔⴻⵏ ⵏ ⴱⴰⵢⵜ-ⵉⵍ ⵓ ⴰⴷ ⵜⵜⵡⴰⵇⴻⴹⵄⴻⵏ ⵡⴰⵛⵛⴰⵡⴻⵏ ⵏ ⵓⵄⴰⵍⵟⴰⵔ, ⴰⴷ ⵡⴹⴰⵏ ⵖⴰⵔ ⵜⴻⵎⵎⵓⵔⵜ.

15 ⵏⴻⵛⵛ ⴰⴷ ⵀⴻⴷⵎⴻⵖ ⵜⴰⵥⴻⴷⴷⵉⵖⵜ ⵏ ⵜⴳⴰⵔⵙⵜ ⴷ ⵜⵥⴻⴷⴷⵉⵖⵜ ⵏ ⵓⵏⴻⴱⴷⵓ ⵓ ⵜⵓⴷⵔⵉⵏ ⵏ ⵍⵄⴰⵊ ⴰⴷ ⵜⵜⵡⴰⵇⴹⴰⵏⵜ, ⵓ ⴰⵟⵟⴰⵙ ⵏ ⵜⵓⴷⵔⵉⵏ ⴰⴷ ⵜⵜⵡⴰⵔⴻⴷⴵⴻⵏⵜ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.” ^□