ⵄⵓⴱⴰⴷⵢⴰ
ⴰⵡⴰⵍ ⵅ ⵉⴷⵓⵎ
1
1 ⵜⴰⵎⴻⵥⵔⴰ ⵏ ⵄⵓⴱⴰⴷⵢⴰ. “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵅ ⵉⴷⵓⵎ:
‘ⵏⴻⵛⵛⵉⵏ ⵏⴻⵙⵍⴰ ⵉⵊⵊ ⵏ ⵍⴻⵅⴱⴰⵔ ⵥⵉ ⵙⵉⴷⵉ,
ⵓ ⵉⵊⵊ ⵏ ⵓⵎⵙⴻⴽⴽⵉ ⵉⵜⵜⵡⴰⵙⵙⴻⴽⴽ ⵖⴰⵔ ⵍⴻⴳⵏⵓⵙ:
ⴽⴽⴰⵔ, ⵊⵊⴻⵎ ⴰⵏⴻⵖ ⴰⴷ ⵅⴰⵙ ⵏⵖⴻⵡⵡⴻⵖ, ⴰⴷ ⵏⴻⵎⵏⴻⵖ ⴰⴽⵉⴷⴻⵙ!’
2 ⵅⵥⴰⵔ, ⵏⴻⵛⵛ ⴳⴳⵉⵖ ⵛⴻⴽ ⴷ ⴰⵎⴻⵥⵢⴰⵏ ⵊⴰⵔ ⵍⴻⴳⵏⵓⵙ,
ⵛⴻⴽ ⵜᵉⵜⵜⵡⴰⵙⴻⵃⵇⴰⵔⴻⴷ ⴰⵟⵟⴰⵙ.
3 ⵏⵏⴼⴰⵅⴻⵜ ⵏ ⵡⵓⵍ ⵏⵏⴻⴽ ⵜⴻⵛⵎⴻⵜ ⵉ ⵛⴻⴽ,
ⵛⴻⴽ ⴷ ⵡⴻⵏⵏⵉ ⴷⵉⵏ ⵉⵥⴻⴷⴷⵖⴻⵏ ⴷⴻⴳ ⵉⵎⵓⵛⴰⵏ ⵏ ⵓⴷⵓⵔⵔⵉ ⵊⴰⵔ ⵜⵚⵓⴹⴰⵔ,
ⴷⵉ ⵜⵥⴻⴷⴷⵉⵖⵜ ⵏⵏⴻⴽ ⵢⵓⵄⵍⴰⵏ,
ⵛⴻⴽ ⴷ ⵡⴻⵏⵏⵉ ⵉⵇⵇⴰⵔⴻⵏ ⴷⴻⴳ ⵡⵓⵍ ⵏⵏⴻⴽ:
‘ⵎⴰⵏ ⵡⴻⵏ ⴷ ⴰⵢⵉ ⵖⴰ ⵉⵖⴻⴹⵍⴻⵏ ⵖⴰⵔ ⵜⴻⵎⵎⵓⵔⵜ?’
4 ⵎⴰⵍⴰ ⵜⴻⵙⵙⴳⴻⵄⵄⴷⴻⴷ ⵉⵅⴻⴼ ⵏⵏⴻⴽ ⴰⵎ ⵓⴳⵉⴷⴻⵔ,
ⵏⵉⵖ ⵜⴻⴳⴳⵉⴷ ⵍⵄⵓⵛⵛ ⵏⵏⴻⴽ ⵊⴰⵔ ⵉⵜⵔⴰⵏ,
ⵏⴻⵛⵛ ⴰⴷ ⵛⴻⴽ ⴷⴷ ⵙⵙⴻⵏⵏⵉ ⵙⵙⴻⵀⵡⵉⵖ,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.” ■
5 “ⵎⴰⵍⴰ ⵓⴷⴼⴻⵏ-ⴷⴷ ⵖⴰⵔⴻⴽ ⵉⵛⴻⴼⴼⴰⵔⴻⵏ,
ⵏⵉⵖ ⵉⵅⴻⵡⵡⴰⵏⴻⵏ ⵙ ⴵⵉⵍⴻⵜ,
ⵎⵉⵏ ⵉⵎⵙⴰⵔⴻⵏ ⴰⵍⴰⵎⵉ ⵛⴻⴽ ⵙⵙⴱⴻⴽⴽⴰⵎⴻⵏ!
ⵎⴰ ⵡⴰⵔ ⵜⵜⴰⵛⴰⵔⴻⵏ ⴰⵍ ⵖⴰⵔⵙⴻⵏ ⵉ ⵖⴰ ⵢⵉⵍⵉ ⵎⵉⵏ ⵉⴽⴼⴰⵏ?
ⵎⴰⵍⴰ ⵓⵙⵉⵏ-ⴷⴷ ⵖⴰⵔⴻⴽ ⵉⵏⵏⵉ ⵉ ⵖⴰ ⵉⵍⴻⵇⴹⴻⵏ ⴰⴹⵉⵍ,
ⵎⴰ ⴰⴷ ⵊⵊⴻⵏ ⵛⴰ ⵎⵉⵏ ⵉⵜⵜⵡⴰⵍⴻⵇⴹⴻⵏ ⴰⵡⴰⵔⵏⵉ ⴰⵙⴻⵏ? ■
6 ⵎⴰⵎⵎⴻⵛ ⵉ ⵖⴰ ⴰⵔⵥⵓⵏ ⴷⵉ ⵄⵉⵙⵓ,
ⵎⴰⵎⵎⴻⵛ ⵉ ⵖⴰ ⴱⴻⵇⵇⵛⴻⵏ ⵍⴻⴽⵏⵓⵥ ⵏⵏⴻⵙ ⵉⵏⵏⵓⴼⴰⵔⴻⵏ!
7 ⵎⴰⵔⵔⴰ ⵉⵔⵢⴰⵥⴻⵏ ⵏⵏⵉ ⵉⴳⴳⵉⵏ ⵉⵊⵊ ⵏ ⵍⵄⴰⵀⴷ ⴰⴽⵉⴷⴻⴽ,
ⵄⴰⵔⵏⴻⵏ ⵛⴻⴽ ⵖⴰⵔ ⵡⴻⵢⵎⵉⵔ,
ⵉⵔⵢⴰⵥⴻⵏ ⵏⵏⵉ ⵜⵓⵖⴰ ⴰⴽⵉⴷⴻⴽ ⵉⴷⴷⴰⵔⴻⵏ ⴷⵉ ⵍⴻⵀⵏⴰ, ⵛⴻⵎⵜⴻⵏ ⵛⴻⴽ,
ⵏⵉⵜⵏⵉ ⵥⴻⵎⵎⴰⵔⴻⵏ ⵅⴰⴽ,
ⵉⵔⵢⴰⵥⴻⵏ ⵏⵏⵉ ⵉⵛⵛⵉⵏ ⴰⵖⵔⵓⵎ ⴰⴽⵉⴷⴻⴽ,
ⴰⵇⴰ ⵏⵉⵜⵏⵉ ⴳⴳⵉⵏ ⵉⵊⵊ ⵏ ⵓⵢⴻⵥⵥⵉⵎ ⵙⵡⴰⴷⴷⴰⵢ ⵏⵏⴻⴽ.
‘ⴰⵇⴰ ⵏⴻⵜⵜⴰ ⵡⴰⵔ ⴷⴰⵢⴻⵙ ⴱⵓ ⵍⴻⴼⵀⴰⵎⴻⵜ.’ □
8 ⵎⴰ ⵡⴰⵔ ⵉⵜⵜⵉⵍⵉ ⴷⴻⴳ ⵡⴰⵙⵙ ⵏⵏⵉ, ⵉⵏⵏⴰ ⵙⵉⴷⵉ,
ⴰⵇⴰ ⵏⴻⵛⵛ ⴰⴷ ⴰⵔⴻⴷⴷⴵⴻⵖ ⵉⵎⵉⵖⵉⵙⴻⵏ ⵥⵉ ⵉⴷⵓⵎ,
ⵓ ⵍⴻⴼⵀⴰⵎⴻⵜ ⵥⴻⴳ ⵉⴷⵓⵔⴰⵔ ⵏ ⵄⵉⵙⵓ? ■
9 ⵓⵍⴰ ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵏⵏⴻⴽ ⴰⴷ ⵜⵜⵡⴰⵃⵚⴰⵔⴻⵏ ⵥⵉ ⵜⵉⴳⴳⵯⵓⴷⵉ, ⴰ ⵜⴰⵢⵎⴰⵏ,
ⵃⵉⵎⴰ ⴽⵓⵍ ⵉⵊⵊⴻⵏ ⵥⴻⴳ ⵉⴷⵓⵔⴰⵔ ⵏ ⵄⵉⵙⵓ
ⴰⴷ ⵉⵜⵜⵡⴰⵇⴹⴻⵄ ⵙ ⵡⴻⵏⵖⴰⵢ.” ■
10 “ⵣⵉ ⵙⵙⵉⴱⴱⴻⵜ ⵏ ⵍⵄⵓⵏⴼ ⵅ ⵓⵎⴰⵛ ⵢⴰⵄⵇⵓⴱ,
ⴰⴷ ⵛⴻⴽ ⵜⴷⴻⵍ ⵍⴻⴼⴹⵉⵃⴻⵜ,
ⵓ ⴰⴷ ⵜᵉⵜⵜⵡⴰⴽⴽⵙⴻⴷ ⵉ ⵍⴻⴱⴷⴰ. ■
11 ⴷⴻⴳ ⵡⴰⵙⵙ ⵉ ⴷⵉ ⵜⵓⵖⴰ ⵅⴰⵙ ⵜⴱⴻⴷⴷⴻⴷ,
ⴷⴻⴳ ⵡⴰⵙⵙ ⵉ ⴷⵉ ⵉⴱⴰⵔⵔⴰⵏⵉⵢⵢⴻⵏ ⵉⵡⵢⴻⵏ-ⴷⴷ ⵍⵄⴻⵙⴽⴰⵔ ⵏⵏⴻⵙ ⵖⴰⵔ ⵜⵎⴻⵃⴱⴰⵙⵜ
ⵓ ⵓⴷⴼⴻⵏ ⵍⴱⴰⵔⵔⴰⵏⵉ ⵖⴰⵔ ⵜⴻⵡⵡⵓⵔⴰ ⵏⵏⴻⵙ,
ⵓ ⵏⴹⴰⵔⴻⵏ ⵜⴰⵇⴻⴷⴷⵓⵃⵜ ⵅ ⵓⵔⵛⴰⵍⵉⵎ,
ⵜⵓⵖⴰ ⵛⴻⴽ ⴰⵎ ⵢⵉⵊⵊⴻⵏ ⵥⵥⴰⵢⵙⴻⵏ. ■
12 ⵡⴰⵔ ⴷ ⴰⵛ ⵉⵄⴻⴷⴷⴻⵍ ⴰⴷ ⵜⴻⵇⵇⵉⵎⴻⴷ ⵜⵅⴻⵥⵥⴰⵔⴻⴷ ⴷⴻⴳ ⵡⴰⵙⵙ ⵏ ⵓⵎⴰⵛ,
ⴷⴻⴳ ⵡⴰⵙⵙ ⵏ ⵡⴻⵛⵜⴰⴱ ⵏⵏⴻⵙ ⴰⴱⴰⵔⵛⴰⵏ,
ⵡⴰⵔ ⵜⴻⵥⵎⵉⵔⴻⴷ ⴰⵇⴰ ⵜⴼⴰⵔⵃⴻⴷ ⵅ ⵉⵃⴻⵏⵊⵉⵔⴻⵏ ⵏ ⵢⴰⵀⵓⴷⴰ,
ⴷⴻⴳ ⵡⴰⵙⵙ ⵏ ⵡⴰⵔⴻⴷⴷⴻⴵ ⵏⵙⴻⵏ
ⵓ ⵡⴰⵔ ⵜⴻⵥⵎⵉⵔⴻⴷ ⴰⴷ ⵜⴰⵔⴻⵥⵎⴻⴷ ⴰⵇⴻⵎⵎⵓⵎ ⵏⵏⴻⴽ ⴰⵟⵟⴰⵙ
ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ,
13 ⵡⴰⵔ ⵜⴻⵥⵎⵉⵔⴻⴷ ⴰⴷ ⵜⴰⴷⴼⴻⴷ ⵖⴰⵔ ⵜⴻⵡⵡⴰⵔⵜ ⵏ ⵍⴳⴻⵏⵙ ⵉⵏⵓ
ⴷⴻⴳ ⵡⴰⵙⵙ ⵏ ⵓⵀⴻⵍⵍⴻⴽ ⵏⵙⴻⵏ
ⵡⴰⵔ ⴷ ⴰⵛ ⵉⵄⴻⴷⴷⴻⵍ ⴰⴷ ⵜⴻⵇⵇⵉⵎⴻⴷ ⵜⵅⴻⵥⵥⴰⵔⴻⴷ ⵄⴰⵡⴻⴷ
ⴷⴻⴳ ⵡⴰⵙⵙ ⵏ ⵓⴹⴻⵢⵢⴻⵄ ⵏⵙⴻⵏ
ⵓ ⵡⴰⵔ ⵜⴻⵥⵎⵉⵔⴻⴷ ⴰⴷ ⵜⴻⵙⵙⵡⵉⵥⵥⴹⴻⴷ ⵉⴼⴰⵙⵙⴻⵏ ⵏⵏⴻⴽ ⵖⴰⵔ ⵡⴰⴳⵍⴰ ⵏⵏⴻⵙ
ⴷⴻⴳ ⵡⴰⵙⵙ ⵏ ⵓⴹⴻⵢⵢⴻⵄ ⵏⵏⴻⵙ,
14 ⵡⴰⵔ ⵜⴻⵥⵎⵉⵔⴻⴷ ⴰⴷ ⵜⴱⴻⴷⴷⴻⴷ ⵖⴰⵔ ⵎⴰⵏⵉ ⵜⵜⵎⴻⵍⵇⴰⵏ ⵉⴱⵔⵉⴷⴻⵏ,
ⵎⴰⵃⴻⵏⴷ ⴰⴷ ⵜᵉⵜⵜⴻⵃⵃⵉⴷ ⵉⵏⵏⵉ ⵢⴰⵔⴻⵡⵍⴻⵏ
ⵓ ⵡⴰⵔ ⵜⴻⵥⵎⵉⵔⴻⴷ ⴰⴷ ⵜⵙⴻⵍⵍⵎⴻⴷ ⵉⵏⵏⵉ ⵜⵓⵖⴰ ⵉⵇⵇⵉⵎⴻⵏ ⴷⴷⴰⵔⴻⵏ
ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ.”
15 “ⵎⴰⵖⴰⵔ ⵢⵓⴷⴻⵙ-ⴷⴷ ⴰⵙⵙ ⵏ ⵙⵉⴷⵉ ⵅ ⵎⴰⵔⵔⴰ ⵍⴻⴳⵏⵓⵙ!
ⴰⵎ ⵜⴻⴳⴳⵉⴷ ⵛⴻⴽ, ⴰⴷ ⵥⵥⴰⵢⴻⴽ ⵉⵜⵜⵡⴰⴳⴳ,
ⴰⵅⴻⴵⴻⵚ ⵏⵏⴻⴽ ⴰⴷ ⴷⴷ-ⵉⴷⵡⴻⵍ ⵅ ⵓⵥⴻⴵⵉⴼ ⵏⵏⴻⴽ. ■
16 ⵎⴰⵖⴰⵔ ⴰⵎ ⵎⴰⵎⵎⴻⵛ ⵜⴻⵙⵡⵉⵎ ⴽⴻⵏⵏⵉⵡ ⵅ ⵡⴻⴷⵔⴰⵔ ⵉⵏⵓ ⵉⵇⴻⴷⴷⵙⴻⵏ,
ⴰⵎⵎⵓ ⴰⴷ ⵙⵡⴻⵏ ⵎⴰⵔⵔⴰ ⵍⴻⴳⵏⵓⵙ ⵍⴻⴱⴷⴰ,
ⵡⴰⵀ, ⴰⴷ ⵙⵡⴻⵏ ⴰⴷ ⵙⴻⴽⴽⴼⴻⵏ,
ⴰⴷ ⴷⴻⵡⵍⴻⵏ ⴰⵅⵎⵉ ⵄⴻⵎⵎⴰⵔⵚ ⵡⴰⵔ ⵜⵓⵖⴰ ⴵⴰⵏ.
17 ⵎⴰⵛⴰ ⵅ ⵡⴻⴷⵔⴰⵔ ⵏ ⵚⵉⵀⵢⵓⵏ ⴰⴷ ⵢⵉⵍⵉ ⵎⵉⵏ ⵉⵏⵏⴻⵊⵎⴻⵏ,
ⵓ ⵡⴰⵏⵉⵜⴰ ⴰⴷ ⵢⵉⵍⵉ ⴷ ⴰⵎⵇⴻⴷⴷⴻⵙ,
ⵓ ⵉⵏⵏⵉ ⵏ ⵜⴰⴷⴷⴰⵔⵜ ⵏ ⵢⴰⵄⵇⵓⴱ ⴰⴷ ⵟⵟⴼⴻⵏ ⵜⵉⵙⴻⵇⵇⴰⵍ ⵏ ⵍⵡⴰⵔⵜ ⵏⵙⴻⵏ.
18 ⵜⴰⴷⴷⴰⵔⵜ ⵏ ⵢⴰⵄⵇⵓⴱ ⴰⴷ ⵜⵉⵍⵉ ⴷ ⵜⵉⵎⴻⵙⵙⵉ,
ⵓ ⵜⴰⴷⴷⴰⵔⵜ ⵏ ⵢⵓⵙⵓⴼ ⴷ ⴰⵛⴻⵄⵄⴰⵍ,
ⵓⵛⴰ ⵜⴰⴷⴷⴰⵔⵜ ⵏ ⵄⵉⵙⵓ ⴰⴷ ⵜⵉⵍⵉ ⴰⵎ ⵉⵖⴻⴵ
ⵓ ⵏⵉⵜⵏⵉ ⴰⴷ ⴰⵙⴻⵏ ⵙⵙⵛⴻⵎⴹⴻⵏ ⵓ ⴰⴷ ⵜⴻⵏ ⵛⵛⴻⵏ,
ⴰⵍⴰⵎⵉ ⵡⴰⵔ ⵉⵇⵇⵉⵎ ⵓⵍⴰ ⴷ ⵉⵊⵊ ⵉⴷⴷⴰⵔ ⴷⵉ ⵜⴰⴷⴷⴰⵔⵜ ⵏ ⵄⵉⵙⵓ,
ⵎⴰⵖⴰⵔ ⵙⵉⴷⵉ ⴰⵇⴰ ⵉⵙⵙⵉⵡⴻⵍ.”
19 “ⵉⵏⵏⵉ ⵏ ⵜⴻⵎⵎⵓⵔⵜ ⵏ ⵍⵊⴰⵏⵓⴱ ⴰⴷ ⵟⵟⴼⴻⵏ ⵉⴷⵓⵔⴰⵔ ⵏ ⵄⵉⵙⵓ ⴷ ⵜⴰⵙⵖⴰⵔⵜ,
ⵓ ⵢⴻⵏⵏⵉ ⵏ ⵜⴻⵎⵎⵓⵔⵜ ⵉⵡⴰⵟⴰⵏ ⴰⴷ ⵟⵟⴼⴻⵏ ⵜⴰⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴷ ⵍⵡⴰⵔⵜ
ⵡⴰⵀ, ⵏⵉⵜⵏⵉ ⴰⴷ ⵟⵟⴼⴻⵏ ⵉⵢⵢⴰⵔ ⵏ ⵉⴼⵔⴰⵢⵉⵎ ⴷ ⵢⴻⵢⵢⴰⵔ ⵏ ⵙⴰⵎⴰⵔⵢⴰ ⴷ ⵍⵡⴰⵔⵜ,
ⵓ ⴱⵉⵏⵢⴰⵎⵉⵏ ⴰⴷ ⵉⵟⵟⴻⴼ ⵊⵉⵍⵄⴰⴷ ⴷ ⵍⵡⴰⵔⵜ,
20 ⵓ ⵉⵎⴻⵏⴼⵉⵢⵢⴻⵏ ⵥⵉ ⵍⵄⴻⵙⴽⴰⵔ-ⴰ ⵏ ⴰⵢⵜ ⵏ ⵉⵙⵔⴰⵉⵍ
ⴰⴷ ⵟⵟⴼⴻⵏ ⵜⴰⵎⵎⵓⵔⵜ ⵏ ⵉⴽⴻⵏⵄⴰⵏⵉⵢⵢⴻⵏ ⴷ ⵍⵡⴰⵔⵜ ⴰⵍ ⵚⴰⵔⴼⴰⵜ,
ⵓ ⵉⵎⴻⵏⴼⵉⵢⵢⴻⵏ ⵥⵉ ⵓⵔⵛⴰⵍⵉⵎ ⵏⵏⵉ ⵉⴵⴰⵏ ⴷⵉ ⵚⴰⴼⴰⵔⴰⴷ,
ⴰⴷ ⵟⵟⴼⴻⵏ ⵜⵉⵏⴻⴷⴷⴰⵎ ⵏ ⵜⴻⵎⵎⵓⵔⵜ ⵏ ⵍⵊⴰⵏⵓⴱ ⴷ ⵍⵡⴰⵔⵜ. □
21 ⵉⵎⵙⴻⵏⵊⴰⵎⴻⵏ ⴰⴷ ⴳⴻⵄⵄⴷⴻⵏ ⴰⴷⵔⴰⵔ ⵏ ⵚⵉⵀⵢⵓⵏ,
ⵃⵉⵎⴰ ⴰⴷ ⵃⴰⴽⵎⴻⵏ ⴰⴷⵔⴰⵔ ⵏ ⵄⵉⵙⵓ,
ⵓⵛⴰ ⵜⴰⴳⴻⵍⴷⴰ ⴰⴷ ⵜⵉⵍⵉ ⵏ ⵙⵉⴷⵉ.”