1 “ⴰⵍⴰⵎⵉ ⵜⵓⵖⴰ ⵉⵙⵔⴰⵉⵍ ⵄⴰⴷ ⴷ ⴰⵃⴻⵏⵊⵉⵔ ⴷ ⴰⵎⴻⵥⵢⴰⵏ, ⵜⵓⵖⴰ ⵜⵜⴻⵅⵙⴻⵖ ⵜ ⵓ ⵏⴻⵛⵛ ⵍⴰⵖⵉⵖ-ⴷⴷ ⵉ ⵎⵎⵉ ⵥⵉ ⵎⵉⵚⵔⴰ. ^■   2 ⵏⵉⵜⵏⵉ ⵍⴰⵖⴰⵏ ⵅⴰⵙⴻⵏ, ⵎⴰⵛⴰ ⵡⴰⵅⴰ ⴰⵎⴻⵏⵏⵉ ⴳⴳⵯⴻⵊⴻⵏ ⵏⵉⵜⵏⵉ ⵅ ⵉⵖⴻⵎⴱⴰⴱ ⵏⵙⴻⵏ. ⵏⵉⵜⵏⵉ ⵉⵡⵢⴻⵏ ⵜⵉⵖⴰⵔⵚⴰ ⵉ ⵉⴱⴰⵄⵍⴻⵏ ⵓ ⵉⵡⵢⴻⵏ ⵜⵉⵡⵀⵉⴱⵉⵏ ⵏ ⵍⴻⴱⵅⵓⵔ ⵉ ⵍⴻⵅⵢⴰⵍⴰⵜ ⵏⵙⴻⵏ ⵉⵏⴻⵇⵛⴻⵏ. 3 ⴷ ⵏⴻⵛⵛ ⵉ ⵜⵓⵖⴰ ⵉⵙⵙⴻⵍⵎⴰⴷⴻⵏ ⵜⵉⵛⵍⵉ ⵉ ⵉⴼⵔⴰⵢⵉⵎ. ⵏⴻⵜⵜⴰ ⵉⴽⵙⵉ ⵜⴻⵏ ⵅ ⵉⵖⴰⴵⴻⵏ ⵏⵏⴻⵙ, ⵎⴰⵛⴰ ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵛⴰ ⴰⵇⴰ ⵏⴻⵛⵛ ⴷ ⵡⴻⵏⵏⵉ ⵉ ⵜⴻⵏ ⵉⵙⵙⴳⴻⵏⴼⴰⵏ. 4 ⵙ ⵜⴻⵙⵖⵓⵏⵉⵏ ⵏ ⴱⵏⴰⴷⴻⵎ ⵊⴻⴱⴷⴻⵖ ⵜⴻⵏ-ⴷⴷ ⵖⴰⵔⵉ, ⵙ ⵜⵎⵓⵔⴰⵔ ⵏ ⵜⵎⴻⵅⵙⵉⵡⵜ, ⵓ ⵏⴻⵛⵛ ⵜⵓⵖⴰ ⵉ ⵏⵉⵜⵏⵉ ⴰⵎ ⵡⴻⵏⵏⵉ ⴷⴷ-ⵉⵙⵙⴳⴻⵄⵄⴰⴷⴻⵏ ⵥⵥⴰⵢⵍⴻⵜ ⵥⴻⴳ ⵉⵖⴻⵙⵎⵉⵔⴻⵏ ⵏⵙⴻⵏ, ⵓ ⵏⴻⵛⵛ ⵙⵙⵡⵉⵥⵥⴹⴻⵖ ⴰⵙ ⵉⴼⴰⵙⵙⴻⵏ ⵉⵏⵓ ⵎⴰⵃⴻⵏⴷ ⴰⴷ ⴰⵙ ⵡⵛⴻⵖ ⴰⴷ ⵉⵛⵛ.

5 ⵏⴻⵜⵜⴰ ⵡⴰⵔ ⴷⴷ-ⵉⵜⵜⴰⵔⵔⵉ ⵙ ⵓⵥⴻⴵⵉⴼ ⵖⴰⵔ ⵎⵉⵚⵔⴰ. ⴰⵛⵛⵓⵔ, ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵊⴻⴵⵉⴷ ⵏⵏⴻⵙ, ⵎⴰⵖⴰⵔ ⵏⵉⵜⵏⵉ ⵓⴳⵉⵏ ⴰⴷ ⴷⴷ-ⴷⴻⵡⵍⴻⵏ. 6 ⵙⵙⵉⴼ ⴰⴷ ⵉⵏⵏⴻⴹ ⴷⵉ ⵜⵏⴻⴷⴷⴰⵎ ⵏⵙⴻⵏ ⵓⵛⴰ ⴰⴷ ⵢⴰⵔⴻⴷⴻⴵ ⵉⵄⵓⵎⴰⴷ ⵏⵏⴻⵙ ⵏ ⵓⴱⴻⵍⵍⴻⵄ ⵏ ⵜⴻⵡⵡⵓⵔⴰ ⵓ ⴰⴷ ⵜⴻⵏ ⵢⴻⵛⵛ, ⵥⵉ ⵙⵙⵉⴱⴱⴻⵜ ⵏ ⵉⵅⴰⵔⵔⵉⵚⴻⵏ ⵏ ⵢⵉⵅⴻⴼ ⵏⵙⴻⵏ.

7 ⵎⴰⵖⴰⵔ ⵍⴳⴻⵏⵙ ⵉⵏⵓ ⵉⵇⵇⵉⵎ ⵉⵜⵜⴻⵟⵟⴻⴼ ⴷⴻⴳ ⵡⴻⵛⵔⴰⵀ ⵥⵉ ⵊⵊⵉⵀⴻⵜ ⵉⵏⵓ. ⴰⵎ ⵢⵉⵊⵊ ⵏ ⵡⴻⵔⵢⴰⵥ ⵜⵜⵍⴰⵖⴰⵏ ⵏⵉⵜⵏⵉ ⵖⴰⵔ ⵓⵎⵄⵓⴵⵉ ⵅ ⴽⵓⵍⵛⵉ, ⵎⴰⵛⴰ ⵏⴻⵜⵜⴰ ⵡⴰⵔ ⵜⴻⵏ ⵉⵙⵙⴳⵉⵄⵄⵉⴷ ⵛⴰ. 8 ⵎⴰⵎⵎⴻⵛ ⵥⴻⵎⵎⴰⵔⴻⵖ ⵏⴻⵛⵛ ⴰⴷ ⵛⴻⴽ ⵙⴻⵍⵍⵎⴻⵖ, ⵉⴼⵔⴰⵢⵉⵎ? ⵎⴰⵎⵎⴻⵛ ⵥⴻⵎⵎⴰⵔⴻⵖ ⵏⴻⵛⵛ ⴰⴷ ⵛⴻⴽ ⵙⴻⵍⵍⵎⴻⵖ, ⵉⵙⵔⴰⵉⵍ? ⵎⴰⵎⵎⴻⵛ ⵥⴻⵎⵎⴰⵔⴻⵖ ⵏⴻⵛⵛ ⴰⴷ ⵛⴻⴽ ⵙⴻⵍⵍⵎⴻⵖ ⴰⵎ ⴰⴷⴰⵎⴰ, ⴰⴷ ⵛⴻⴽ ⴳⴳⴻⵖ ⴷ ⴰⵎⴻⴷⵢⴰ ⴰⵎ ⵚⴰⴱⵓⵢⵉⵎ? ⵓⵍ ⵉⵏⵓ ⵉⵏⵏⴻⵃⵡⴻⵍ ⵥⵥⴰⵢⵉ, ⴰⵥⵉⴵⴻⵥ ⵉⵏⵓ ⵉⵜⵜⴻⵅⵜⵓⵅ ⵊⵎⵉⵄ. ^■   9 ⵏⴻⵛⵛ ⵡⴰⵔ ⵜⴻⵊⵊⵉⵖ ⴰⴷ ⴰⵔⵅⵓⵖ ⵍⵃⴰⴷⵓⵇ ⵏ ⵡⴻⵖⴹⴰⴱ ⵉⵏⵓ, ⵏⴻⵛⵛ ⵡⴰⵔ ⴷⴷ-ⴷⴷⵉⴽⴽⵡⵉⵍⴻⵖ ⵛⴰ ⵎⴰⵃⴻⵏⴷ ⴰⴷ ⴰⵔⴻⴷⴷⴵⴻⵖ ⵉⴼⵔⴰⵢⵉⵎ, ⵎⴰⵖⴰⵔ ⵏⴻⵛⵛ ⴷ ⴰⵔⴻⴱⴱⵉ ⵓ ⵏⴻⵛⵛ ⵡⴰⵔ ⴵⵉⵖ ⴷ ⴱⵏⴰⴷⴻⵎ, ⴰⵎⵇⴻⴷⴷⴰⵙ ⴷⵉ ⵍⵡⴻⵙⵜ ⵏⵏⴻⴽ, ⵡⴰⵔ ⴷⴷ-ⵜⵜⵉⵙⴻⵖ ⵛⴰ ⵙ ⵉⵙⵏⴻⵅⵍⵉⵄⴻⵏ.

10 ⵏⵉⵜⵏⵉ ⴰⴷ ⴳⴳⵓⵔⴻⵏ ⴰⵡⴰⵔⵏⵉ ⵉ ⵙⵉⴷⵉ. ⵏⴻⵜⵜⴰ ⴰⴷ ⵉⵙⵙⵎⵓⵀⵔⵓⵜ ⴰⵎ ⵢⵉⵊⵊ ⵏ ⵡⴻⵢⵔⴰⴷ, ⵎⴰⵖⴰⵔ ⴰⴷ ⵉⵙⵙⵎⵓⵀⵔⵓⵜ ⵏⴻⵜⵜⴰ ⵓⵛⴰ ⵉⵃⴻⵏⵊⵉⵔⴻⵏ ⴰⴷ ⴷⴷ-ⴰⵙⴻⵏ ⵜⵜⴰⵔⵊⵉⵊⵊⵉⵏ ⵥⵉ ⵜⵎⴰ ⵏ ⵍⴻⴱⵃⴰⵔ.

11 ⴰⵎ ⵉⵊⴹⴰⴹ ⴰⴷ ⴷⴷ-ⴰⵙⴻⵏ ⵜⵜⴰⵔⵊⵉⵊⵊⵉⵏ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⵓ ⴰⵎ ⵜⴻⴷⴱⵉⵔⵜ ⵥⵉ ⵜⴻⵎⵎⵓⵔⵜ ⵏ ⴰⵛⵛⵓⵔ ⵓ ⵏⴻⵛⵛ ⴰⴷ ⵜⴻⵏ ⵙⵙⵥⴻⴷⴻⵖ ⴷⵉ ⵜⵓⴷⵔⵉⵏ ⵏⵙⴻⵏ, ⵉⵏⵏⴰ ⵙⵉⴷⵉ.”