1 ⵉⵎⵙⴰⵔ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⴻⵏⵄⴰⵛ, ⴷⴻⴳ ⵓⵢⵓⵔ ⵡⵉⵙⵙ ⵜⴻⵏⵄⴰⵛ, ⴷⴻⴳ ⵡⴰⵙⵙ ⴰⵎⴻⵥⵡⴰⵔⵓ ⵏ ⵓⵢⵓⵔ, ⴰⵇⴰ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵙⴳⴻⵄⵄⴻⴷ ⵉⵊⵊ ⵏ ⵢⴻⵥⵍⵉ ⵏ ⵡⴻⵛⴹⴰⵏ ⵅ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ, ⵓⵛⴰ ⵉⵏⵉ ⴰⵙ:

ⵜⵓⵖⴰ ⵛⴻⴽ ⴰⵎⴻⵛⵏⴰⵡ ⴰⵢⵔⴰⴷ ⴷ ⴰⵎⴻⵥⵢⴰⵏ ⵊⴰⵔ ⵍⴻⴳⵏⵓⵙ,

ⵓ ⵜⵓⵖⴰ ⵛⴻⴽ ⴰⵎ ⵍⵀⴰⵢⵛⴻⵜ ⴷⵉ ⵍⴻⴱⵃⵓⵔ.

ⵜⵖⴻⴹⵍⴻⴷ ⵉⵅⴻⴼ ⵏⵏⴻⴽ ⴷⴻⴳ ⵉⵖⴻⵥⵔⴰⵏ,

ⵜⴻⵙⵙⴻⵏⵀⴻⵥⵥⴻⴷ ⴰⵎⴰⵏ ⵙ ⵉⴹⴰⵔⴻⵏ ⵏⵏⴻⴽ,

ⵓⵛⴰ ⵜⴻⵙⵙⴻⴼⵙⴰⴷ ⵉⵖⴻⵥⵔⴰⵏ ⵏⵙⴻⵏ. ^■  

3 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:

ⵏⴻⵛⵛ ⴰⴷ ⵅⴰⴽ ⵙⵙⵡⵉⵥⵥⴹⴻⵖ ⵜⵔⴰⵛⵛⴰ ⵉⵏⵓ,

ⵙ ⵢⵉⵊⵊ ⵏ ⵡⴻⴳⵔⴰⵡ ⵏ ⵍⴻⴳⵏⵓⵙ ⴰⵟⵟⴰⵙ.

ⵏⵉⵜⵏⵉ ⴰⴷ ⵛⴻⴽ ⵙⵙⵉⵍⵢⴻⵏ ⴰⴽ-ⴷ ⵜⵔⴰⵛⵛⴰ ⵉⵏⵓ. ^■  

4 ⵏⴻⵛⵛ ⴰⴷ ⵛⴻⴽ ⵊⵊⴻⵖ ⴷⵉ ⵜⴻⵎⵎⵓⵔⵜ,

ⴰⴷ ⵛⴻⴽ ⵏⴹⴰⵔⴻⵖ ⵅ ⵡⵓⴷⴻⵎ ⵏ ⵢⴻⵢⵢⴰⵔ.

ⴰⴷ ⵅⴰⴽ ⵙⵙⵥⴻⴷⵖⴻⵖ ⵎⴰⵔⵔⴰ ⵉⵊⴹⴰⴹ ⵏ ⵓⵊⴻⵏⵏⴰ,

ⵓⵛⴰ ⴰⴷ ⵥⵥⴰⵢⴻⴽ ⵙⵙⵊⵉⵡⵏⴻⵖ ⵉⵎⵓⴷⴷⴰⵔⴻⵏ ⵥⵉ ⵎⴰⵔⵔⴰ ⵜⴰⵎⵎⵓⵔⵜ.

5 ⴰⴷ ⴳⴳⴻⵖ ⵡⴻⵢⵙⵓⵎ ⵏⵏⴻⴽ ⵅ ⵉⴷⵓⵔⴰⵔ,

ⵓⵛⴰ ⴰⴷ ⵛⵛⵓⵔⴻⵖ ⵜⵉⵖⵥⵓⵔⵉⵏ ⵙ ⵍⴻⴳⵄⵓⴷⵉ ⵏ ⵡⴰⵔⵔⴰⵢⴻⵎ ⵏⵏⴻⴽ.

6 ⵏⴻⵛⵛ ⴰⴷ ⵙⵙⴻⵙⵡⴻⵖ ⵜⴰⵎⵎⵓⵔⵜ,

ⴰⴷ ⵜⴻⴷⵡⴻⵍ ⴷ ⵍⴻⴱⵃⴰⵔ ⵏ ⵉⴷⴰⵎⵎⴻⵏ ⵏⵏⴻⴽ ⵖⴰⵔⴻⵙ ⴰⵍ ⵜⵉⵇⵉⵛⵛⴰⵜⵉⵏ ⵏ ⵉⴷⵓⵔⴰⵔ,

ⵓⵛⴰ ⵜⵉⵖⴻⵥⵔⴰⵜⵉⵏ ⴰⴷ ⵛⵛⵓⵔⴻⵏⵜ ⵥⵥⴰⵢⴻⴽ

7 ⵏⴻⵛⵛ ⴰⴷ ⵙⵙⴷⵓⵍⵢⴻⵖ ⴰⵊⴻⵏⵏⴰ ⵅⵎⵉ ⵛⴻⴽ ⵖⴰ ⵙⵙⵅⴻⵙⵢⴻⵖ,

ⵓⵛⴰ ⴰⴷ ⵙⵙⴱⴰⵔⵔⴻⵛⵏⴻⵖ ⵉⵜⵔⴰⵏ.

ⵏⴻⵛⵛ ⴰⴷ ⵙⵙⴷⵓⵍⵢⴻⵖ ⵜⴰⴼⵓⵛⵜ ⵙ ⵉⵙⴻⵢⵏⵓⵜⴻⵏ,

ⵓⵛⴰ ⵜⴰⵥⵉⵔⵉ ⵡⴰⵔ ⵜⵜⴻⵊⵊⵉ ⵄⴰⴷ ⵜⴰⴼⴰⵡⵜ ⵏⵏⴻⵙ ⴰⴷ ⵜⴰⵔⵖⴰ. ^■  

8 ⵎⴰⵔⵔⴰ ⵜⵉⴼⴰⵡⵉⵏ ⵢⴰⵔⴻⵇⵇⴻⵏ ⴷⴻⴳ ⵓⵊⴻⵏⵏⴰ

ⴰⴷ ⵜⴻⵏⵜ ⵙⵙⴱⴰⵔⵔⴻⵛⵏⴻⵖ ⴷⵉ ⵟⵟⵡⴻⵄ ⵏⵏⴻⴽ,

ⵓⵛⴰ ⴰⴷ ⵙⵙⴻⴽⴽⴻⵖ ⵜⴰⴵⴻⵙⵜ ⵅ ⵜⴻⵎⵎⵓⵔⵜ ⵏⵏⴻⴽ!,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.

9 ⵏⴻⵛⵛ ⴰⴷ ⵖⴻⵥⵥⵉⵖ ⵓⵍ ⵏ ⵡⴰⵟⵟⴰⵙ ⵏ ⵍⴻⴳⵏⵓⵙ,

ⵓⵎⵉ ⵉ ⵖⴰ ⵢⴰⵡⵢⴻⵖ ⵍⴻⵅⴱⴰⵔ ⵏ ⵜⵔⴻⵥⵥⵉⵜ ⵏⵏⴻⴽ ⵖⴰⵔ ⵍⴻⴳⵏⵓⵙ,

ⵖⴰⵔ ⵜⴻⵎⵎⵓⵔⴰ ⵉ ⵡⴰⵔ ⵜⴻⵏⵜ ⵜⴻⵙⵙⵉⵏⴻⴷ ⵛⴰ.

10 ⵏⴻⵛⵛ ⴰⴷ ⵙⵙⵏⴻⵅⵍⵄⴻⵖ ⴰⵟⵟⴰⵙ ⵏ ⵍⴻⴳⵏⵓⵙ ⴷⵉ ⵙⵙⵉⴱⴱⴻⵜ ⵏⵏⴻⴽ,

ⵓ ⴰⵛⴻⵡⵡⴰⴼ ⵏ ⵉⵊⴻⴵⵉⴷⴻⵏ ⵏⵙⴻⵏ ⴰⴷ ⴳⴻⵄⵄⴷⴻⵏ ⵥⴻⴳ ⵡⴰⵔⵊⴻⴼ ⴷⵉ ⵟⵟⵡⴻⵄ ⵏⵏⴻⴽ,

ⵅⵎⵉ ⵉ ⵖⴰ ⵙⵙⴻⵏⵀⴻⵥⵥⴻⵖ ⵙⵙⵉⴼ ⵉⵏⵓ ⵙⵙⴰ ⴷ ⵙⵙⴰ ⵥⵥⴰⵜ ⵉ ⵡⵓⴷⵎⴰⵡⴻⵏ ⵏⵙⴻⵏ.

ⵏⵉⵜⵏⵉ ⴰⴷ ⴰⵔⵊⵉⵊⴻⵏ ⵍⴻⴱⴷⴰ,

ⴽⵓⵍ ⵉⵊⵊ ⴷⵉ ⵙⵙⵉⴱⴱⴻⵜ ⵏ ⵜⵓⴷⴰⵔⵜ ⵏⵏⴻⵙ,

ⴷⴻⴳ ⵡⴰⵙⵙ ⵏ ⵓⵡⴻⵟⵟⵓ ⵏⵏⴻⴽ. ^□  

11 ⵎⵉⵏⵥⵉ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:

ⵙⵙⵉⴼ ⵏ ⵓⵊⴻⴵⵉⴷ ⵏ ⴱⴰⴱⵉⵍ ⴰⴷ ⵅⴰⴽ ⵢⴻⵎⵎⴰⵔⵙ.

12 ⵙ ⵍⴻⵙⵢⵓⴼ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⴰⴷ ⵖⴻⴹⵍⴻⵖ ⵍⵖⴰⵛⵉ ⵏⵏⴻⴽ ⵉⵏⵀⴻⵡⵍⴻⵏ,

ⵍⴻⴳⵏⵓⵙ ⵉⵇⴻⵙⵃⴻⵏ ⴰⵟⵟⴰⵙ ⵎⴰⵔⵔⴰ.

ⵏⵉⵜⵏⵉ ⴰⴷ ⵇⴹⴰⵏ ⵅ ⵏⵏⴼⴰⵅⴻⵜ ⵏ ⵎⵉⵚⵔⴰ,

ⵓⵛⴰ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ ⴰⴷ ⵜ ⵜⴻⵃⵃⴰⵏ. ^■  

13 ⵏⴻⵛⵛ ⴰⴷ ⵇⴹⵉⵖ ⵅ ⵉⵎⵓⴷⴷⴰⵔⴻⵏ ⵏⵏⴻⵙ ⵉⵏⵏⵉ ⵉⴵⴰⵏ ⵖⴰⵔ ⵡⴰⵟⵟⴰⵙ ⵏ ⵡⴰⵎⴰⵏ,

ⵓⵍⴰ ⴷ ⵉⵊⵊ ⵏ ⵓⴹⴰⵔ ⵏ ⴱⵏⴰⴷⴻⵎ ⵉⵥⴻⵎⵎⴰⵔ ⴰⴷ ⵜⴻⵏ ⵉⵙⵙⴰⵔⵡⵉ ⵄⴰⵡⴻⴷ,

ⵓⵛⴰ ⵓⵍⴰ ⴷ ⵉⵛⵜ ⵏ ⵜⴻⵛⴹⴻⵛⵜ ⵏ ⵍⵎⴰⵍ ⵜⵥⴻⵎⵎⴰⵔ ⴰⴷ ⵜⴻⵏ ⵜⴻⵙⵙⴰⵔⵡⵉ ⵄⴰⴷ.

14 ⵅⴻⵏⵏⵉ ⴰⴷ ⵙⵙⴻⵀⵡⵉⵖ ⴰⵎⴰⵏ ⵏⵙⴻⵏ ⴰⵍⴰⵎⵉ ⵉ ⵖⴰ ⵚⴼⴰⵏ

ⵓ ⵏⴻⵛⵛ ⴰⴷ ⴳⴳⴻⵖ ⵉⵖⴻⵥⵔⴰⵏ ⵏⵙⴻⵏ ⴰⴷ ⵙⵙⵉⵥⵥⵍⴻⵏ ⴰⵎ ⵥⵥⴻⵛⵜ!’,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.

15 ⴰⵍⴰⵎⵉ ⴳⴳⵉⵖ ⵜⴰⵎⵎⵓⵔⵜ ⵏ ⵎⵉⵚⵔⴰ ⴷ ⴰⵔⴻⴷⴷⴻⴵ,

ⵓⵛⴰ ⴰⴷ ⵜⵉⵍⵉ ⵜⴻⵎⵎⵓⵔⵜ ⵜᵉⵜⵜⵡⴰⵔⴻⴷⴷⴻⴵ, ⵜⴻⵃⴼⴰ ⵥⵉ ⵎⴰⵔⵔⴰ ⵎⵉⵏ ⴷⴰⵢⴻⵙ,

ⴰⵍⴰⵎⵉ ⵡⵜⴻⵖ ⵎⴰⵔⵔⴰ ⵉⵏⵏⵉ ⴷⴰⵢⴻⵙ ⵉⵥⴻⴷⴷⵖⴻⵏ,

ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.

16 ⵡⴰ ⴷ ⵉⵥⵍⵉ ⵏ ⵡⴻⵛⴹⴰⵏ ⵓⵛⴰ ⴰⴷ ⵜ ⵖⴻⵏⵏⵊⴻⵏ ⴰⵎ ⵢⴻⵥⵍⵉ ⵏ ⵡⴻⵛⴹⴰⵏ, ⵢⴻⵙⵙⵉⵜⵙⴻⵏⵜ ⵏ ⵜⴻⵎⵎⵓⵔⴰ ⴰⴷ ⵜ ⵖⴻⵏⵏⵊⴻⵏⵜ ⴰⵎ ⵢⴻⵥⵍⵉ ⵏ ⵡⴻⵛⴹⴰⵏ, ⴰⴷ ⵜ ⵖⴻⵏⵏⵊⴻⵏⵜ ⴰⵎ ⵢⴻⵥⵍⵉ ⵏ ⵡⴻⵛⴹⴰⵏ ⵅ ⵎⵉⵚⵔⴰ ⵓ ⵅ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ!, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”

17 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⴻⵏⵄⴰⵛ, ⴷⴻⴳ ⵡⴰⵙⵙ ⵡⵉⵙⵙ ⵅⴻⵎⵎⴻⵙⵟⴰⵛ ⵏ ⵓⵢⵓⵔ, ⵉⵎⵙⴰⵔ ⴱⴻⵍⵍⵉ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:

18 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵡⵡⴻⵜ ⴰⴳⴻⵊⴷⵓⵔ ⵅ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵎⵉⵚⵔⴰ. ⴻⵊⵊ ⵉ-ⵜ ⴰⴷ ⵉⵀⵡⴰ, ⵎⵉⵚⵔⴰ ⴷ ⵢⴻⵙⵙⵉⵙ ⵏ ⵍⴻⴳⵏⵓⵙ ⵉⵊⴻⵀⴷⴻⵏ, ⴷⵉ ⵍⴰⴵⴰⵖ ⵏ ⵜⴻⵎⵎⵓⵔⵜ, ⴰⴽ-ⴷ ⵢⴻⵏⵏⵉ ⵉⵀⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.

19 ⵎⴰ ⵛⴻⴽ ⵉⵄⵉⵥⵥⴻⵏ ⵅ ⵎⴰⵏ ⵎⵎⴰ?

ⵀⵡⴰ, ⴻⵊⵊ ⴰⴷ ⵛⴻⴽ ⵙⵙⴰⵔⵙⴻⵏ ⴰⴽ-ⴷ ⵢⴻⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ.

20 ⴰⴷ ⵡⴹⴰⵏ ⴷⵉ ⵍⵡⴻⵙⵜ ⵏ ⵢⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ.

ⴰⵇⴰ ⵉⵎⵎⴻⵡⵛ ⵙⵙⵉⴼ.

ⵊⴰⵔⵔ ⵎⵉⵚⵔⴰ ⵥⴻⴳ ⵡⴻⴱⵔⵉⴷ ⴰⴽ-ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ.

21 ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ ⴰⵟⵟⴰⵙ ⵥⴻⴳ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⴰⴷ ⴽⵉⵙ ⵙⵙⵉⵡⵍⴻⵏ

ⵥⵉ ⵍⵡⴻⵙⵜ ⵏ ⵍⴰⵅⴰⵔⵜ.

ⵀⵡⴰⵏ ⵏⵉⵜⵏⵉ, ⴰⵇⴰ ⵥⵥⵍⴻⵏ ⴷⵉⵏⵏⵉ,

ⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ,

ⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ.

22 ⴷⵉⵀⴰ ⵉⴵⴰ ⴰⵛⵛⵓⵔ ⴰⴽ-ⴷ ⵎⴰⵔⵔⴰ ⴰⴳⵔⴰⵡ ⵏⵏⴻⵙ,

ⵏⵏⴹⴻⵏ ⴰⵙ-ⴷⴷ ⵉⵎⴻⴹⵍⴰⵏ ⵏⵏⴻⵙ.

ⵎⴰⵔⵔⴰ ⵏⵉⵜⵏⵉ ⵜⵜⵡⴰⵏⵖⴻⵏ, ⵡⴹⴰⵏ ⵙ ⵙⵙⵉⴼ.

23 ⵉⵎⴻⴹⵍⴰⵏ ⵏⵏⴻⵙ ⴰⵇⴰ ⴰⵜⴻⵏ ⴷⵉ ⵜⵖⴻⵎⵎⴰⵔ ⵏ ⵡⴻⵃⴼⵓⵔ ⵏ ⵡⴻⵏⴹⴻⵍ

ⵓ ⴰⴳⵔⴰⵡ ⵏⵏⴻⵙ ⴰⵇⴰ-ⵜ ⴷⴻⴳ ⵡⴻⵏⵏⴻⴹ ⵏ ⵡⴻⵏⴹⴻⵍ ⵏⵏⴻⵙ.

ⵎⴰⵔⵔⴰ ⵏⵉⵜⵏⵉ ⵜⵜⵡⴰⵙⵏⵓⵇⵇⴱⴻⵏ, ⵡⴹⴰⵏ ⵙ ⵙⵙⵉⴼ,

ⵉⵏⵏⵉ ⵜⵓⵖⴰ ⵉⵙⵙⴰⴳⴳⵯⴰⴷⴻⵏ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.

24 ⴷⵉⵀⴰ ⵄⵉⵍⴰⵎ ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ ⴷⴻⴳ ⵡⴻⵏⵏⴻⴹ ⵏ ⵡⴻⵏⴹⴻⵍ ⵏⵏⴻⵙ.

ⵎⴰⵔⵔⴰ ⵏⵉⵜⵏⵉ ⵜⵜⵡⴰⵙⵏⵓⵇⵇⴱⴻⵏ, ⵡⴹⴰⵏ ⵙ ⵙⵙⵉⴼ,

ⵀⵡⴰⵏ ⴱⵍⴰ ⴰⵅⵜⴰⵏ ⴷⵉ ⵍⴰⴵⴰⵖ ⵏ ⵜⴻⵎⵎⵓⵔⵜ,

ⵉⵏⵏⵉ ⵜⵓⵖⴰ ⵉⵙⵙⴰⴳⴳⵯⴰⴷⴻⵏ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.

ⵏⵉⵜⵏⵉ ⵉⵡⵢⴻⵏ ⵍⴻⴼⴹⵉⵃⴻⵜ ⵏⵙⴻⵏ ⴰⴽⵉⴷⵙⴻⵏ,

ⴰⴽ-ⴷ ⵢⴻⵏⵏⵉ ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.

25 ⴳⴳⵉⵏ ⴰⵙ ⵉⵊⵊ ⵏ ⴰⵔⵔⵓⴼ ⴷⵉ ⵍⵡⴻⵙⵜ ⵏ ⵢⵉⵏⵏⵉ ⵉⵜⵜⵡⴰⵏⵖⴻⵏ,

ⵖⴰⵔ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ.

ⵉⵎⴻⴹⵍⴰⵏ ⵏⵏⴻⵙ ⵏⵏⴹⴻⵏ ⴰⵙ-ⴷⴷ.

ⵎⴰⵔⵔⴰ ⵏⵉⵜⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ, ⵡⴹⴰⵏ ⵙ ⵙⵙⵉⴼ,

ⵎⵉⵏⵥⵉ ⵜⵓⵖⴰ ⵙⵙⴰⴳⴳⵯⴰⴷⴻⵏ ⵉⵡⴷⴰⵏ ⵥⴻⴳ ⵢⵉⵅⴻⴼ ⵏⵙⴻⵏ

ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.

ⵏⵉⵜⵏⵉ ⵉⵡⵢⴻⵏ ⵍⴻⴼⴹⵉⵃⴻⵜ ⵏⵙⴻⵏ ⴰⴽⵉⴷⵙⴻⵏ,

ⵊⵎⵉⵄ ⴰⴽ-ⴷ ⵢⴻⵏⵏⵉ ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.

ⴰⵇⴰ ⵏⴻⵜⵜⴰ ⵉⵜⵜⵡⴰⵙⵙⴰⵔⵙ ⴷⵉ ⵍⵡⴻⵙⵜ ⵏ ⵢⵉⵏⵏⵉ ⵉⵜⵜⵡⴰⵏⵖⴻⵏ.

26 ⴷⵉⵀⴰ ⵎⴰⵛⵉⵅ-ⵜⵓⴱⴰⵍ ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵏⵀⴻⵡⵍⴻⵏ.

ⵏⵏⴹⴻⵏ ⴰⵙ-ⴷⴷ ⵉⵎⴻⴹⵍⴰⵏ ⵏⵏⴻⵙ.

ⵎⴰⵔⵔⴰ ⵏⵉⵜⵏⵉ ⵡⴰⵔ ⵜⵜⵡⴰⵅⴻⵜⵏⴻⵏ,

ⵜⵜⵡⴰⵙⵏⵓⵇⵇⴱⴻⵏ ⵙ ⵙⵙⵉⴼ,

ⵎⴰⵖⴰⵔ ⵏⵉⵜⵏⵉ ⵜⵓⵖⴰ ⵙⵙⴰⴳⴳⵯⴰⴷⴻⵏ ⵉⵡⴷⴰⵏ ⵥⴻⴳ ⵢⵉⵅⴻⴼ ⵏⵙⴻⵏ

ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.

27 ⵡⴰⵔ ⵥⵥⵉⵍⴻⵏ ⴰⴽ-ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ,

ⵉⵏⵏⵉ ⵉⵡⴹⴰⵏ ⵥⴻⴳ ⵢⴻⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ,

ⵉⵏⵏⵉ ⵉⵀⵡⴰⵏ ⵖⴰⵔ ⵍⴰⵅⴰⵔⵜ ⴰⴽ-ⴷ ⵍⴻⵙⵏⴰⵃ ⵏⵙⴻⵏ ⵏ ⵓⵎⴻⵏⵖⵉ.

ⵎⵎⴰⵔⵙⴻⵏ ⵍⴻⵙⵢⵓⴼ ⵏⵙⴻⵏ ⵙⴰⴷⵓ ⵉⵥⴻⴵⵉⴼⴻⵏ ⵏⵙⴻⵏ

ⵓⵛⴰ ⵍⵎⵓⵄⵚⵉⵢⵢⴻⵜ ⵏⵙⴻⵏ ⴰⵇⴰ-ⵜⵜ ⵅ ⵢⴻⵢⵙⴰⵏ ⵏⵙⴻⵏ,

ⵡⴰⵅⵅⴰ ⵜⵓⵖⴰ ⵏⵉⵜⵏⵉ ⴷ ⵜⵉⴳⴳⵯⵓⴷⵉ ⵉ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.

28 ⵓⵍⴰ ⴷ ⵛⴻⴽ ⴰⴷ ⵜⵉⵍⵉⴷ ⵜⴰⵔⵥⴻⴷ ⴷⵉ ⵍⵡⴻⵙⵜ ⵏ ⵢⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ

ⵓⵛⴰ ⴰⴷ ⵜⴻⵥⵥⵍⴻⴷ ⴰⴽ-ⴷ ⵢⴻⵏⵏⵉ ⵉⵜⵜⵡⴰⵙⵏⵓⵇⴱⴻⵏ ⵙ ⵙⵙⵉⴼ.

29 ⴷⵉⵀⴰ ⵉⴷⵓⵎ, ⵉⵊⴻⴵⵉⴷⴻⵏ ⵏⵏⴻⵙ ⴷ ⵎⴰⵔⵔⴰ ⵍⵃⵓⴽⴽⴰⵎ ⵏⵏⴻⵙ,

ⵉⵏⵏⵉ ⵉ ⴷⵉⵏ ⵉⵥⵥⵍⴻⵏ ⵙ ⵎⴰⵔⵔⴰ ⵚⵚⵓⵍⵜⴰ ⵏⵙⴻⵏ

ⴰⴽ-ⴷ ⵢⴻⵏⵏⵉ ⵉⵜⵜⵡⴰⵙⵏⵓⵇⵇⴱⴻⵏ ⵙ ⵙⵙⵉⴼ.

ⵣⵥⵍⴻⵏ ⴷⵉⵏⵏⵉ ⴰⴽ-ⴷ ⵢⴻⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ

ⵓ ⴰⴽ-ⴷ ⵢⴻⵏⵏⵉ ⵉⵀⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.

30 ⴷⵉⵀⴰ ⴰⵢⵜ ⵏ ⴱⵓ-ⵚⵚⵓⵍⵟⴰ ⵥⵉ ⵛⵛⵎⴰⵍ, ⵎⴰⵔⵔⴰ ⵏⵉⵜⵏⵉ,

ⵓ ⵎⴰⵔⵔⴰ ⴰⵢⵜ ⵏ ⵚⵉⴷⵓⵏ, ⵉⵏⵏⵉ ⵉⵀⵡⴰⵏ ⴰⴽ-ⴷ ⵢⴻⵏⵏⵉ ⵉⵜⵜⵡⴰⵏⵖⴻⵏ.

ⴰⵇⴰ ⵜⵜⵙⴻⴹⵃⴰⵏ ⴷⵉⵏⵏⵉ, ⵡⴰⵅⵅⴰ ⵜⵓⵖⴰ ⵙⵙⴰⴳⴳⵯⴰⴷⴻⵏ ⵉⵡⴷⴰⵏ

ⵙ ⵜⴻⵔⵢⴰⵙⵜ ⵏⵙⴻⵏ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ.

ⴰⵇⴰ ⵥⵥⵍⴻⵏ ⴷⵉⵏⵏⵉ ⴰⴽ-ⴷ ⵢⴻⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ

ⵓⵛⴰ ⴰⵔⴻⴱⴱⵓⵏ ⵍⴻⴼⴹⵉⵃⴻⵜ ⵏⵙⴻⵏ

ⴰⴽ-ⴷ ⵢⴻⵏⵏⵉ ⵉⵀⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.

31 ⴼⵉⵔⵄⵓⵏ ⴰⴷ ⵜⴻⵏ ⵉⵥⴰⵔ ⵓⵛⴰ ⴰⴷ ⵉⵜⵜⵡⴰⵙⴼⴻⵡⵡⴻⵊ

ⵥⵉ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ, ⵉⵏⵏⵉ ⵉⵜⵜⵡⴰⵙⵏⵓⵇⵇⴱⴻⵏ ⵙ ⵙⵙⵉⴼ,

ⴼⵉⵔⵄⵓⵏ ⴷ ⵎⴰⵔⵔⴰ ⵍⵄⴻⵙⴽⴰⵔ ⵏⵏⴻⵙ!’,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.

32 ⵎⵉⵏⵥⵉ ⵏⴻⵛⵛ ⵊⵊⵉⵖ ⵜ ⴰⴷ ⵉⵙⵙⵉⴳⴳⵯⴻⴷ ⵉⵏⵏⵉ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.

ⵏⴻⵜⵜⴰ ⴰⴷ ⵉⵎⵎⴰⵔⵙ ⴷⵉ ⵍⵡⴻⵙⵜ ⵏ ⵢⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ,

ⵖⴰⵔ ⵢⴻⵏⵏⵉ ⵉⵜⵜⵡⴰⵙⵏⵓⵇⵇⴱⴻⵏ ⵙ ⵙⵙⵉⴼ,

ⴼⵉⵔⵄⵓⵏ ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ!,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”