1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:

2 “ⵎⵉⵏ ⴽⴻⵏⵏⵉⵡ ⵢⵓⵖⵉⵏ ⴰⵍⴰⵎⵉ ⴰⴷ ⴷⴷ-ⵜⵉⵡⵢⴻⵎ ⴰⵡⴰⵍ-ⴰ ⵖⴰⵔ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏ ⵉⵙⵔⴰⵉⵍ ⵓⵛⴰ ⵜⴻⵇⵇⴰⵔⴻⵎ:

‘ⵉⴱⴰⴱⴰⵜⴻⵏ ⵛⵛⵉⵏ ⴰⴹⵉⵍ ⴰⵙⴻⵎⵎⴰⵖ ⵓⵛⴰ ⵜⵉⵖⵎⴰⵙ ⵏ ⵡⴰⵔⵔⴰⵡ ⴷⴻⵡⵍⴻⵏⵜ ⵃⴰⵔⴻⵛⵡⴻⵏⵜ’? ^■  

3 ⵙ ⵜⵉⴷⴻⵜⵜ ⴰⵎ ⴷⴷⴰⵔⴻⵖ ⵏⴻⵛⵛ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵓⵛⵜ ⵅⴰⵡⴻⵎ ⵎⴰⵍⴰ ⵄⴻⵎⵎⴰⵔⵚ ⵄⴰⴷ ⴰⴷ ⵜⴰⵡⵢⴻⵎ ⴰⵡⴰⵍ-ⴰ ⴷⵉ ⵉⵙⵔⴰⵉⵍ! 4 ⵅⵥⴰⵔ, ⵎⴰⵔⵔⴰ ⵍⴻⵄⵎⵓⵔ ⵉⵏⵓ. ⴰⵎ ⵍⴻⵄⵎⴰⵔ ⵏ ⵜⴱⴰⴱⴰⵜ, ⵓⵍⴰ ⴷ ⵍⴻⵄⵎⴰⵔ ⵏ ⵜⵎⴻⵎⵎⵉⵜ ⵉⵏⵓ. ⵍⴻⵄⵎⴰⵔ ⵏⵏⵉ ⵉⵅⴹⴰⵏ, ⴰⴷ ⵉⵎⵎⴻⵜ.

5 ⵎⴰⵍⴰ ⵛⴰ ⵏ ⵢⵉⵊⵊⴻⵏ ⴷ ⴰⵎⵙⴻⴳⴳⴻⴷ ⵉ ⵢⴻⴵⴰ, ⵉⵜⵜⴻⴳⴳ ⵍⵃⴻⵇⵇ ⴷ ⵎⵉⵏ ⵉⵙⴻⴳⴳⴷⴻⵏ, 6 - ⵡⴰⵔ ⵉⵜⵜⴻⵜⵜ ⴷⴷⴱⴰⵢⴻⵃ ⵅ ⵉⴷⵓⵔⴰⵔ, ⵡⴰⵔ ⵉⵙⵙⴳⵉⵄⵄⵉⴷ ⵜⵉⵟⵟⴰⵡⵉⵏ ⵏⵏⴻⵙ ⵖⴰⵔ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⵡⴰⵔ ⵉⵙⵙⴻⴼⵙⵉⴷ ⵜⴰⵎⵖⴰⵔⵜ ⵏ ⵓⵎⵇⴰⵔⵔⴻⴱ ⵏⵏⴻⵙ ⵓ ⵡⴰⵔ ⴷⴷ-ⵉⵜⵜⵇⴰⵔⵔⵉⴱ ⵖⴰⵔ ⵜⴻⵎⵖⴰⵔⵜ ⵏⵏⵉ ⵉⵄⴻⵥⵥⵍⴻⵏ ⵓⵎⵉ ⵅⴰⵙ ⵉⴷⴰⵎⵎⴻⵏ, ^■   7 ⵡⴰⵔ ⵉⵃⴻⵚⵚⴰⵔ ⵓⵍⴰ ⴷ ⵉⵊⵊ, ⵉⵜⵜⴰⵔⵔⴰ-ⴷⴷ ⴷⴷⵉⵢⵢⴻⵜ ⵉ ⴱⵓ-ⴰⵎⴰⵔⵡⴰⵙ, ⵡⴰⵔ ⵉⵜⵜⴽⴻⵛⵛⴰⴹ, ⵡⴻⵏⵏⵉ ⵉⴵⵓⵥⴻⵏ ⵉⵜⵜⵉⵛ ⴰⵙ ⵡⴻⵖⵔⵓⵎ ⵏⵏⴻⵙ ⵓ ⵡⴻⵏⵏⵉ ⴷ ⴰⵄⴰⵔⵢⴰⵏ ⵉⵙⵙⴷⴷⵓⵔⵉ ⵉ-ⵜ ⵙ ⵡⴰⵔⵔⵓⴹ, ^■   8 ⵏⴻⵜⵜⴰ ⵡⴰⵔ ⵢⴰⵔⴻⵟⵟⴻⵍ ⵙ ⴰⵔⵔⵉⴱⴰ ⵏⵉⵖ ⴰⴷ ⵉⴽⵙⵉ ⴰⵔⴱⴻⵃ, ⴰⴼⵓⵙ ⵏⵏⴻⵙ ⵉⵜⵜⴻⴳⴳⵯⴻⵊ ⵅ ⵎⵉⵏ ⵡⴰⵔ ⵉⵙⴻⴳⴳⴷⴻⵏ, ⵏⴻⵜⵜⴰ ⵉⵃⴻⴽⴽⴻⵎ ⵏⵉⵛⴰⵏ ⵊⴰⵔ ⵡⴻⵔⵢⴰⵥ ⴷ ⵉⵊⵊ ⵏ ⵡⴻⵔⵢⴰⵥ ⵏⵏⴻⵖⵏⵉ, ^■   9 ⵉⴳⴳⵓⵔ ⴷⵉ ⵜⵡⴻⵚⵚⴰ ⵉⵏⵓ ⵓⵛⴰ ⵉⵃⴻⵟⵟⴰ ⵍⴼⴰⵔⴰⵢⵉⴹ ⵉⵏⵓ ⵓⵎⵉ ⵖⴰ ⵢⴻⴳⴳ ⵙ ⵍⴰⵎⴰⵏ - , ⵅⴻⵏⵏⵉ ⴰⵇⴰ ⵏⴻⵜⵜⴰ ⴷ ⴰⵎⵙⴻⴳⴳⴻⴷ, ⴰⴷ ⵉⴷⴷⴰⵔ ⵙ ⵜⵉⴷⴻⵜⵜ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”

10 “ⵎⴰⵍⴰ ⵢⴻⵊⵊ-ⴷⴷ ⵎⵎⵉⵙ ⴷ ⴰⵛⴻⴼⴼⴰⵔ, ⵡⴻⵏⵏⵉ ⵉⵙⵙⵉⵥⵥⴰⵍⴻⵏ ⵉⴷⴰⵎⵎⴻⵏ ⴷ ⵡⴻⵏⵏⵉ ⵉⵜⵜⴻⴳⴳⴻⵏ ⵉⵛⵜⴻⵏ ⵥⵉ ⵜⵎⴻⵙⵍⴰⵢⵉⵏ-ⴰ,

11 ⵡⴰⵅⵅⴰ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⴰⵎ ⵜⴱⴰⴱⴰⵜ ⵡⴰⵔ ⵉⵜⵜⴻⴳⴳ ⵜⵉⵎⴻⵙⵍⴰⵢⵉⵏ-ⴰ, - ⵎⴰⵛⴰ ⵡⴰⵏⵉⵜⴰ ⵉⵜⵜⴻⵜⵜ ⵜⵉⵡⵀⵉⴱⵉⵏ ⵅ ⵉⴷⵓⵔⴰⵔ, ⵉⵙⵙⴻⴼⵙⴰⴷ ⵜⴰⵎⵖⴰⵔⵜ ⵏ ⵓⵎⵇⴰⵔⵔⴻⴱ ⵏⵏⴻⵙ,

12 ⵉⵃⴻⵚⵚⴰⵔ ⵍⵎⴻⵙⴽⵉⵏ ⴷ ⵓⵎⴻⵥⵍⵓⴹ, ⵉⵜⵜⴽⴻⵛⵛⴰⴹ, ⵡⴰⵔ ⴷⴷ-ⵢⴰⵔⵔⵉ ⴷⴷⵉⵢⵢⴻⵜ, ⵉⵙⵙⴳⴻⵄⵄⴰⴷ ⵜⵉⵟⵟⴰⵡⵉⵏ ⵏⵏⴻⵙ ⵖⴰⵔ ⵉⵎⴻⵢⴹⴰ ⵏ ⵍ’ⴰⵚⵏⴰⵎ, ⵉⵜⵜⴻⴳⴳ ⵉⵛⵜ ⵏ ⵊⵊⵄⵉⴼⴻⵛⵜ,

13 ⵢⴰⵔⴻⵟⵟⴻⵍ ⵙ ⴰⵔⵔⵉⴱⴰ, ⵉⵜⵜᵉⵟⵟⴻⴼ ⴰⵔⴱⴻⵃ -, ⵎⴰ ⵅⴻⵏⵏⵉ ⴰⴷ ⵉⵇⵇⵉⵎ ⵎⵎⵉⵙ ⵡⴰⵏⵉⵜⴰ ⵉⴷⴷⴰⵔ? ⵡⴰⵔ ⵉⵜⵜⵖⵉⵎⵉ ⵉⴷⴷⴰⵔ, ⵓⵎⵉ ⵉⴳⴳⴰ ⵎⴰⵔⵔⴰ ⵊⵊⵄⴰⵢⴻⴼ ⵏⵏⵉ. ⴰⴷ ⵉⵜⵜⵡⴰⵏⴻⵖ ⵏⵉⵛⴰⵏ, ⵉⴷⴰⵎⵎⴻⵏ ⵏⵏⴻⵙ ⴰⴷ ⵅⴰⵙ ⵉⵍⵉⵏ!”

14 “ⵅⵥⴰⵔ, ⵎⴰⵍⴰ ⵉⵊⵊ-ⴷⴷ ⵉⵊⵊ ⵏ ⵎⵎⵉⵙ ⵏⵏⵉ ⵉⵜⵜⵡⴰⵍⴰ ⵎⴰⵔⵔⴰ ⴷⴷⵏⵓⴱ ⵏⵏⵉ ⵉⵜⵜⴻⴳⴳ ⴱⴰⴱⴰⵙ, ⵓⵛⴰ ⵉⵅⴻⵥⵥⴰⵔ ⵡⴰⵀⴰ ⴰⵎ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵡⴰⵔ ⵉⵜⵜⴻⴳⴳ ⵜⵉⵎⴻⵙⵍⴰⵢⵉⵏ ⵏⵏⵉ,

15 - ⵉⵅⵙ ⴰⴷ ⵢⵉⵏⵉ ⵡⴰⵔ ⵉⵜⵜⴻⵜⵜ ⵅ ⵉⴷⵓⵔⴰⵔ, ⵡⴰⵔ ⵉⵙⵙⴳⵉⵄⵄⵉⴷ ⵜⵉⵟⵟⴰⵡⵉⵏ ⵏⵏⴻⵙ ⵖⴰⵔ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⵡⴰⵔ ⵉⵙⵙⴻⴼⵙⴰⴷ ⵜⴰⵎⵖⴰⵔⵜ ⵏ ⵓⵎⵇⴰⵔⵔⴻⴱ ⵏⵏⴻⵙ,

16 ⵡⴰⵔ ⵉⵃⴻⵚⵚⴰⵔ ⵓⵍⴰ ⴷ ⵉⵊⵊ, ⵡⴰⵔ ⵉⵎⴻⵏⵏⴻⵄ ⴷⴷⵉⵢⵢⴻⵜ, ⵡⴰⵔ ⵉⵜⵜⴽⴻⵛⵛⴰⴹ, ⵉⵜⵜⵉⵛ ⴰⵖⵔⵓⵎ ⵏⵏⴻⵙ ⵉ ⵡⴻⵏⵏⵉ ⵉⴵⵓⵥⴻⵏ, ⵉⵙⵙⴷⵓⵍⵓⵢ ⵉ ⵓⵄⴰⵔⵢⴰⵏ ⵙ ⵡⴰⵔⵔⵓⴹ,

17 ⵉⵜⵜⴰⴳⴳⵯⴻⵊ ⵙ ⵓⴼⵓⵙ ⵏⵏⴻⵙ ⵅ ⵓⵎⴻⵥⵍⵓⴹ, ⵡⴰⵔ ⵉⴽⴻⵙⵙⵉ ⴰⵔⵔⵉⴱⴰ ⴷ ⵡⴰⵔⴱⴻⵃ, ⵉⵜⵜⴻⴳⴳ ⵙ ⵜⵙⴻⴳⴷⴰ ⵓⵛⴰ ⵉⵃⴻⵟⵟⴰ ⵜⵉⵡⴻⵚⵚⴰ ⵉⵏⵓ -, ⴰⵇⴰ ⵎⵎⵉⵙ ⵡⴰⵏⵉⵜⴰ ⵡⴰⵔ ⵉⵜⵜⵎⴻⵜⵜⵉ ⵥⵉ ⵙⵙⵉⴱⴱⴻⵜ ⵏ ⵍⵎⵓⵄⵚⵉⵢⵢⴻⵜ ⵏ ⴱⴰⴱⴰⵙ. ⴰⴷ ⵉⴷⴷⴰⵔ ⵙ ⵜⵉⴷⴻⵜⵜ.

18 ⴱⴰⴱⴰⵙ ⴰⴷ ⵉⵎⵎⴻⵜ ⴷⵉ ⵍⵎⵓⵄⵚⵉⵢⵢⴻⵜ ⵏⵏⴻⵙ, ⵅ ⵓⵎⵉ ⵉⴳⴳⴰ ⴱⴻⵥⵥⴻⵥ ⵅ ⵉⵡⴷⴰⵏ ⵙ ⵍⴻⵅⵛⵓⵏⴻⵛⵜ, ⵉⴽⴻⵛⵛⴻⴹ ⴰⴳⵍⴰ ⵓⵛⴰ ⵉⴳⴳⴰ ⵎⵉⵏ ⵡⴰⵔ ⵉⵃⵍⵉⵏ ⴷⵉ ⵍⵡⴻⵙⵜ ⵏ ⵍⴳⴻⵏⵙ ⵏⵏⴻⵙ.”

19 “ⵎⴰⵛⴰ ⴽⴻⵏⵏⵉⵡ ⵜⴻⵇⵇⴰⵔⴻⵎ: ‘ⵎⴰⵢⴻⵎⵎⵉ ⵎⵎⵉⵙ ⵡⴰⵔ ⵉⴽⴻⵙⵙⵉ ⵍⵎⵓⵄⵚⵉⵢⵢⴻⵜ ⵏ ⴱⴰⴱⴰⵙ?’ ⵎⵉⵏⵥⵉ ⵎⵎⵉⵙ ⵜⵓⵖⴰ ⵉⵜⵜⴻⴳⴳ ⵍⵃⴻⵇⵇ ⴷ ⵜⵙⴻⴳⴷⴰ ⵓⵛⴰ ⵉⵃⴹⴰ ⵎⴰⵔⵔⴰ ⵜⵉⵡⴻⵚⵚⴰ ⵉⵏⵓ ⵓⵛⴰ ⵉⴳⴳⴰ ⵉ-ⵜⴻⵏⵜ, ⵙ ⵓⵢⴰ ⴰⴷ ⵉⵇⵇⵉⵎ ⵉⴷⴷⴰⵔ ⵙ ⵜⵉⴷⴻⵜⵜ. ^■   20 ⵍⴻⵄⵎⴰⵔ ⵏⵏⵉ ⵉⵅⴹⴰⵏ, ⴰⴷ ⵉⵎⵎⴻⵜ. ⵎⵎⵉⵙ ⵡⴰⵔ ⵉⴽⴻⵙⵙⵉ ⵛⴰ ⵍⵎⵓⵄⵚⵉⵢⵢⴻⵜ ⵏ ⴱⴰⴱⴰⵙ ⵓⵛⴰ ⴱⴰⴱⴰⵙ ⵡⴰⵔ ⵉⴽⴻⵙⵙⵉ ⵛⴰ ⵍⵎⵓⵄⵚⵉⵢⵢⴻⵜ ⵏ ⵎⵎⵉⵙ. ⵜⴰⵙⴻⴳⴷⴰ ⵏ ⵓⵎⵙⴻⴳⴳⴻⴷ ⴰⴷ ⵜⵉⵍⵉ ⵅ ⵢⵉⵅⴻⴼ ⵏⵏⴻⵙ ⵓ ⵜⵓⵄⴻⴼⴼⵏⴰ ⵏ ⵓⵄⴻⴼⴼⴰⵏ ⴰⴷ ⵜⵉⵍⵉ ⵅ ⵢⵉⵅⴻⴼ ⵏⵏⴻⵙ.

21 ⵎⴰⵛⴰ ⵎⴰⵍⴰ ⴰⵄⴻⴼⴼⴰⵏ ⵉⴷⵡⴻⵍ-ⴷⴷ ⵥⵉ ⴷⴷⵏⵓⴱ ⵏⵏⵉ ⵉⴳⴳⴰ, ⴰⴷ ⵉⵃⴹⴰ ⵎⴰⵔⵔⴰ ⵜⵉⵡⴻⵚⵚⴰ ⵉⵏⵓ ⵓⵛⴰ ⴰⴷ ⵢⴻⴳⴳ ⵍⵃⴻⵇⵇ ⴷ ⵜⵙⴻⴳⴷⴰ, ⵅⴻⵏⵏⵉ ⴰⴷ ⵉⵇⵇⵉⵎ ⵉⴷⴷⴰⵔ ⵙ ⵜⵉⴷⴻⵜⵜ, ⵡⴰⵔ ⵉⵜⵜⵎⴻⵜⵜⵉ ⵛⴰ. 22 ⵎⴰⵔⵔⴰ ⵉⵄⴻⴷⴷⵉⵢⴻⵏ ⵏⵏⴻⵙ ⵏⵏⵉ ⵉⴳⴳⴰ, ⵡⴰⵔ ⴷ ⴰⵙ ⵜⵜⵡⴰⵃⴻⵙⵙⴱⴻⵏ ⵛⴰ. ⵙ ⵜⵙⴻⴳⴷⴰ ⵏⵏⴻⵙ ⵏⵏⵉ ⵉⴳⴳⴰ, ⴰⴷ ⵉⴷⴷⴰⵔ. 23 ⵎⴰ ⴰⴷ ⴰⵔⴹⵉⵖ ⵙ ⵜⵉⴷⴻⵜⵜ ⵍⵎⴻⵡⵜ ⵏ ⵉⵄⴻⴼⴼⴰⵏⴻⵏ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ? ⵎⴰ ⵏⴻⵜⵜⴰ ⵡⴰⵔ ⵉⵜⵜⵖⵉⵎⵉ ⵉⴷⴷⴰⵔ ⵅⵎⵉ ⴷⴷ ⵖⴰ ⵉⴷⵡⴻⵍ?” ^■  

24 “ⵎⴰⵛⴰ ⵎⴰⵍⴰ ⴰⵎⵙⴻⴳⴳⴻⴷ ⵉⵃⴻⵢⵢⴻⴷ ⵅ ⵜⵙⴻⴳⴷⴰ ⵏⵏⴻⵙ ⵓⵛⴰ ⴰⴷ ⵉⴳⴳ ⴷⴷⴻⴵ ⵄⵍⴰⵃⵙⴰⴱ ⵎⴰⵔⵔⴰ ⵊⵊⵄⴰⵢⴻⴼ ⵏⵏⵉ ⵉⵜⵜⴻⴳⴳ ⵓⵄⴻⴼⴼⴰⵏ, ⴰⴷ ⵉⴳⴳ ⴰⵎⴻⵏⵏⵉ ⵓⵍⴰ ⴷ ⵏⴻⵜⵜⴰ, ⵎⴰ ⵅⴻⵏⵏⵉ ⴰⴷ ⵉⵇⵇⵉⵎ ⵉⴷⴷⴰⵔ? ⵡⴰⵔ ⵜᵉⵜⵜⵡⴰⵄⵇⴰⵍ ⵄⴰⴷ ⵎⴰⵔⵔⴰ ⵜⴰⵙⴻⴳⴷⴰ ⵏⵏⵉ ⵉⴳⴳⴰ. ⵙ ⵍⴻⵖⴷⴰⵔⴻⵜ ⵏⵏⴻⵙ ⵉ ⵥⵉ ⵉⵖⴷⴰⵔ ⵓ ⵙ ⴷⴷⵏⵓⴱ ⵏⵏⴻⵙ ⵉ ⵥⵉ ⵉⴷⴷⴻⵏⴱ, ⵙ ⵢⵉⵏⴰ ⴰⴷ ⵉⵎⵎⴻⵜ.”

25 “ⵜⴻⵇⵇⴰⵔⴻⵎ ⵄⴰⵡⴻⴷ: ‘ⴰⴱⵔⵉⴷ ⵏ ⵙⵉⴷⵉ ⵡⴰⵔ ⵉⴵⵉ ⵛⴰ ⵏⵉⵛⴰⵏ!’. ⵙⵍⴻⵎ , ⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⵎⴰ ⴰⴱⵔⵉⴷ ⵉⵏⵓ ⵡⴰⵔ ⵉⴵⵉ ⵏⵉⵛⴰⵏ? ⵎⴰ ⵡⴰⵔ ⴵⵉⵏ ⵙ ⵜⵉⴷⴻⵜⵜ ⴰⵇⴰ ⵉⴱⵔⵉⴷⴻⵏ ⵏⵡⴻⵎ ⵡⴰⵔ ⵙⴻⴳⴳⵎⴻⵏ? ^■   26 ⵎⴰⵍⴰ ⵉⵃⴻⵢⵢⴻⴷ ⵓⵎⵙⴻⴳⴳⴻⴷ ⵅ ⵜⵙⴻⴳⴷⴰ ⵏⵏⴻⵙ ⵓⵛⴰ ⵉⵜⵜⴻⴳⴳ ⴷⴷⴻⴵ ⵓ ⵙ ⵎⴰⵏ ⴰⵢⴰ ⴰⴷ ⵉⵎⵎⴻⵜ, ⵅⴻⵏⵏⵉ ⴰⴷ ⵉⵎⵎⴻⵜ ⴷⵉ ⴷⴷⴻⴵ ⵏⵏⴻⵙ ⵏⵏⵉ ⵉⴳⴳⴰ. 27 ⵎⴰⵛⴰ ⵎⴰⵍⴰ ⵓⵄⴻⴼⴼⴰⵏ ⵉⴷⵡⴻⵍ-ⴷⴷ ⵥⵉ ⵜⵎⴻⴳⴳⴰ ⵏⵏⴻⵙ ⵜⵉⵄⴻⴼⴼⴰⵏⵉⵏ ⵏⵏⵉ ⵉⴳⴳⴰ, ⵓⵛⴰ ⴰⴷ ⵉⴳⴳ ⵍⵃⴻⵇⵇ ⴷ ⵜⵙⴻⴳⴷⴰ, ⵅⴻⵏⵏⵉ ⴰⴷ ⵢⴰⵔⵔ ⵍⴻⵄⵎⴰⵔ ⵏⵏⴻⵙ ⴰⴷ ⵉⵇⵇⵉⵎ ⵉⴷⴷⴰⵔ. 28 ⵉⴷⵡⴻⵍ ⵉⵜⵜⵡⴰⵍⴰ ⵓⵛⴰ ⵉⴷⵡⴻⵍ-ⴷⴷ ⵥⵉ ⵎⴰⵔⵔⴰ ⵉⵄⴻⴷⴷⵉⵢⴻⵏ ⵏⵏⴻⵙ ⵏⵏⵉ ⵉⴳⴳⴰ. ⴰⴷ ⵉⴷⴷⴰⵔ ⵙ ⵜⵉⴷⴻⵜⵜ, ⵡⴰⵔ ⵉⵜⵜⵎⴻⵜⵜⵉ ⵛⴰ. 29 ⵉⵏⵏⵉ ⵥⵉ ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⵇⵇⴰⵔⴻⵏ: ‘ⴰⴱⵔⵉⴷ ⵏ ⵙⵉⴷⵉ ⵡⴰⵔ ⵉⵙⴻⴳⴳⴻⵎ!’ ⵎⴰ ⵉⴱⵔⵉⴷⴻⵏ ⵉⵏⵓ ⵡⴰⵔ ⵙⴻⴳⴳⵎⴻⵏ, ⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ? ⴷ ⵜⵉⴷⴻⵜⵜ ⵎⴰ ⵡⴰⵔ ⴵⵉⵏ ⵉⴱⵔⵉⴷⴻⵏ ⵏⵡⴻⵎ ⵡⴰⵔ ⵙⴻⴳⴳⵎⴻⵏ? 30 ⵙ ⵓⵢⴰ ⵏⴻⵛⵛ ⴰⴷ ⵅⴰⵡⴻⵎ ⵛⴰⵔⵔⵄⴻⵖ, ⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⴽⵓⵍ ⵉⵊⵊ ⴰⵏⴻⵛⵜ ⵉⴱⵔⵉⴷⴻⵏ ⵏⵏⴻⵙ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ. ⵄⴻⵇⴱⴻⵎ, ⴷⴻⵡⵍⴻⵎ-ⴷⴷ ⵥⵉ ⵎⴰⵔⵔⴰ ⵉⵄⴻⴷⴷⵉⵢⴻⵏ ⵏⵡⴻⵎ, ⵅⴻⵏⵏⵉ ⵡⴰⵔ ⵜᵉⵜⵜⵉⵍⵉ ⵍⵎⵓⵄⵚⵉⵢⵢⴻⵜ ⵏⵡⴻⵎ ⴷ ⵙⵙⵉⴱⴱⴻⵜ ⵄⴰⴷ ⵉ ⴷⴷ-ⵢⵉⵡⵢⴻⵏ ⵍⵎⵓⵄⵚⵉⵢⵢⴻⵜ ⵉ ⴽⴻⵏⵏⵉⵡ. ^■   31 ⵏⴹⴰⵔⴻⵎ ⵍⵎⵓⵄⵚⵉⵢⵢⴻⵜ ⵏⵡⴻⵎ ⵉ ⵥⵉ ⵜⵄⴻⴷⴷⴰⵎ ⵓⵛⴰ ⴳⴳⴻⵎ ⵓⵍ ⵏⵡⴻⵎ ⴷ ⴰⵎⴰⵢⵏⵓ ⵓ ⴱⵓⵃⴱⴻⵍ ⵏⵡⴻⵎ ⴷ ⴰⵎⴰⵢⵏⵓ. ⵎⴰⵖⴰⵔ ⵉ ⵖⴰ ⵜⴻⵎⵎⵜⴻⵎ, ⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ? ^■   32 ⵎⵉⵏⵥⵉ ⵏⴻⵛⵛ ⵡⴰⵔ ⴰⵔⴹⵉⵖ ⴷⵉ ⵍⵎⴻⵡⵜ ⵏ ⵡⵉ ⵉ ⵖⴰ ⵢⴻⵎⵎⵜⴻⵏ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⴷⴻⵡⵍⴻⵎ-ⴷⴷ ⵓⵛⴰ ⴷⴷⴰⵔⴻⵎ.” ^■