ⵉⵥⵍⵉ ⵡⵉⵙⵙ ⴰⵔⴻⴱⵄⴰ - ⵍⵎⵓⵄⵚⵉⵢⵢⴻⵜ ⵏ ⵢⴻⴵⵉⵙ ⵏ ⵓⵔⵛⴰⵍⵉⵎ
4
1 ⴰⵍⵉⴼ. ⵎⴰⵎⵎⴻⵛ ⵉⴳⴳⴰ ⵉⴱⴱⴰⵔⵛⴻⵏ ⵡⵓⵔⴻⵖ ⴰⵎⵎⵓ, ⵎⴰⵎⵎⴻⵛ ⵉⴱⴻⴷⴷⴻⵍ ⵡⵓⵔⴻⵖ ⵉⵖⵍⴰⵏ ⵇⴰⵄ ⴰⵎⵎⵓ!
ⵎⴰⵎⵎⴻⵛ ⵜⵜⵡⴰⴱⴻⵥⵥⵄⴻⵏ ⵉⵥⵔⴰ ⵏ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ
ⵅ ⵜⵖⴻⵎⵎⵓⵔⴰ ⵏ ⵉⴱⵔⵉⴷⴻⵏ!
2 ⴱⵉⵜ. ⵉⵃⴻⵏⵊⵉⵔⴻⵏ ⵉⵖⵍⴰⵏ ⵏ ⵚⵉⵀⵢⵓⵏ ⵜⵜⵡⴰⵃⴻⵙⴱⴻⵏ ⴰⵎ ⵡⵓⵔⴻⵖ ⵉⵇⵇⵓⵔⴻⵏ.
ⵎⴰⵎⵎⴻⵛ ⴷ ⴰⵙⴻⵏ ⵜⵜⴻⴳⴳⴻⵏ ⴰⵎ ⵉⵖⴰⵔⵔⴰⴼⴻⵏ ⵏ ⵜⵍⴰⵅⵜ,
ⴰⵎ ⵍⵅⴻⴷⵎⴻⵜ ⵏ ⴱⵓ-ⵜⵍⴰⵅⵜ!
3 ⴳⵉⵎⴻⵍ. ⵄⴰⴷ ⵜⵓⵛⵛⴰⵏⵉⵏ ⵏ ⵍⴻⵅⵍⴰ ⵉ ⴷⴷ-ⵉⵙⵙⵓⴼⴼⵖⴻⵏ ⵜⵉⴱⴱⵉⵛⵉⵏ,
ⵙⵙⵓⵟⵟⵓⴹⴻⵏⵜ ⵉⵎⴻⵥⵢⴰⵏⴻⵏ ⵏⵙⴻⵏⵜ,
ⵎⴰⵛⴰ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ ⵜⴻⴷⵡⴻⵍ ⵜⴻⵡⵄⴰⵔ,
ⴰⵎ ⵏⵏⵄⴰⵎⴰⵜ ⴷⵉ ⵍⴻⵅⵍⴰ.
4 ⴷⴰⵍⵉⵜ. ⵉⵍⴻⵙ ⵏ ⵡⴻⵃⴹⵉⴹ ⵉⵍⵚⴻⵇ ⵖⴰⵔ ⵡⴰⵏⴻⵖ ⵏⵏⴻⵙ ⵙ ⵓⴼⴰⴷⵉ,
ⵉⵃⴻⵏⵊⵉⵔⴻⵏ ⵉⵎⴻⵥⵢⴰⵏⴻⵏ ⵜᵉⵜⵜⴰⵔⴻⵏ ⴰⵖⵔⵓⵎ,
ⵎⴰⵛⴰ ⵓⵍⴰ ⴷ ⵉⵊⵊⴻⵏ ⵡⴰⵔ ⴷ ⴰⵙⴻⵏ ⵜ ⵢⴻⴱⴹⵉ.
5 ⵀⵉ. ⵉⵏⵏⵉ ⵜⵓⵖⴰ ⵉⵜⵜⴻⵜⵜⴻⵏ ⵥⵉⵛ ⵎⴰⵛⵛⴰ ⵉⵍⴻⴷⴷⴻⵏ,
ⵖⴰⵛⴰⵏ ⴷⴻⴳ ⵉⴱⵔⵉⴷⴻⵏ,
ⵉⵏⵏⵉ ⵉⵜⵜⵡⴰⵙⴻⵢⵎⴻⵏ ⵥⵉⵛ ⵅ ⵓⵥⴻⴳⴳⵯⴰⵖ ⵢⵓⵥⵖⴻⵏ,
ⵃⴻⵏⵏⴹⴻⵏ ⵍⴻⵅⵅⵓ ⴷⵉ ⵍⴻⵖⴱⴰⵔ.
6 ⵡⴰⵡ. ⵍⵎⵓⵄⵚⵉⵢⵢⴻⵜ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ ⴷ ⵜⴰⵎⴻⵇⵇⵔⴰⵏⵜ
ⵅ ⴷⴷⵏⵓⴱ ⵏ ⵜⴻⵏⴷⵉⵏⵜ ⵏ ⵙⴰⴷⵓⵎ,
ⵜⴻⵏⵏⵉ ⵉⵏⵇⴻⵍⴱⴻⵏ ⴷⴻⴳ ⵉⵊⵊ ⵏ ⵓⵎⵓⵔ,
ⴱⵍⴰ ⵜⵜⵙⴰⵅⵓⵔ ⵏ ⵉⴼⴰⵙⵙⴻⵏ.
7 ⵣⴰⵢⵉⵏ. ⵉⵏⴻⵖⵔⴰⴼ ⵏⵏⴻⵙ ⵉⵜⵜⵡⴰⵃⵓⵥⴻⵏ ⵜⵓⵖⴰ ⵚⴼⴰⵏ ⵅ ⵡⴻⴷⴼⴻⵍ,
ⴷ ⵉⵛⴻⵎⵍⴰⵍⴻⵏ ⵅ ⵓⵖⵉ,
ⴰⵔⵔⵉⵎⴰⵜ ⵏⵙⴻⵏ ⵥⴻⵡⵖⴻⵏ ⵅ ⵍⵎⴰⵔⵊⴰⵏ,
ⴰⴷⴷⵓⴷ ⵏⵙⴻⵏ ⵢⴰⵔⴻⵇⵇ ⴰⵎ ⵚⴰⴼⴼⵉⵔ ⴰⵥⵉⵥⴰ.
8 ⵅⵉⵜ. ⵍⴻⵅⵅⵓ ⵉⴱⴻⴷⴷⴻⵍ ⵡⴰⴷⴷⵓⴷ ⵏⵙⴻⵏ, ⵉⴷⵡⴻⵍ ⴷ ⴰⴱⴰⵔⵛⴰⵏ ⵅ ⵜⴰⴵⴻⵙⵜ,
ⵡⴰⵔ ⵜⵜⵡⴰⵄⵇⵉⵍⴻⵏ ⴷⴻⴳ ⵉⴱⵔⵉⴷⴻⵏ.
ⵜⵉⵍⵎⴻⵛⵜ ⵏⵙⴻⵏ ⵜⴻⵍⵚⴻⵇ ⵅ ⵢⴻⵅⵙⴰⵏ ⵏⵙⴻⵏ,
ⵜⵓⵥⴻⵖ, ⵜⴻⴷⵡⴻⵍ ⴰⵎ ⵓⴽⴻⵛⵛⵓⴹ.
9 ⵜⵉⵜ. ⵉⵃⵍⴰ ⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ,
ⵅ ⵢⴻⵏⵏⵉ ⵉⵜⵜⵡⴰⵏⵖⴻⵏ ⵙ ⵍⴰⵥ,
ⵎⴰⵖⴰⵔ ⵏⵉⵜⵏⵉ ⴰⴷ ⴼⴻⵙⵢⴻⵏ ⴰⵎ ⵢⴻⵏⵏⵉ ⵉⵜⵜⵡⴰⵙⵏⵓⵇⵇⴱⴻⵏ,
ⵙ ⵡⴻⵏⵇⴰⵙ ⵏ ⵚⵚⴰⴱⴻⵜ ⵏ ⵢⴻⵢⵢⴰⵔ.
10 ⵢⵓⴷ. ⵉⴼⴰⵙⵙⴻⵏ ⵏ ⵜⴻⵎⵖⴰⵔⵉⵏ ⵏⵏⵉ ⵜⵓⵖⴰ ⵉⵜⵜⵃⵉⵏⵏⴰⵏ ⵇⴱⴻⵍ,
ⵙⵙⵏⴻⵏⵏⴰⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ.
ⵏⵉⵜⵏⵉ ⴷⴻⵡⵍⴻⵏ ⴰⵙⴻⵏⵜ ⴷ ⵎⴰⵛⵛⴰ,
ⵥⵉ ⵙⵙⵉⴱⴱⴻⵜ ⵏ ⵜⵔⴻⵥⵥⵉⵜ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ.
11 ⴽⴰⴼ. ⵙⵉⴷⵉ ⵢⴰⵔⵅⵓ ⵉ ⵡⴻⵙⵄⴰⵔ ⵏⵏⴻⵙ,
ⵉⵙⵙⴼⴰⵔⵔⴻⵖ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ.
ⵏⴻⵜⵜⴰ ⵉⵙⵙⴰⵔⵖ ⵜⵉⵎⴻⵙⵙⵉ ⴷⵉ ⵚⵉⵀⵢⵓⵏ,
ⵜⵉⵎⴻⵙⵙⵉ ⵜⴻⵏⵏⵉ ⵉⵛⵛⵉⵏ ⴷⵙⵓⵙⴰ ⵏⵏⴻⵙ.
12 ⵍⴰⵎⵉⴷ. ⵄⴻⵎⵎⴰⵔⵚ ⵡⴰⵔ ⵜᵉⵜⵜⵖⵉⵍ ⵉ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ ⴷ ⵉⵎⴻⵥⴷⴰⵖ ⵏ ⴷⴷⵓⵏⴻⵛⵜ,
ⴰⵇⴰ ⴰⵖⵔⵉⵎ ⴷ ⵍⴻⵄⴷⵓ ⴰⴷ ⴷⴷ-ⴰⴷⴼⴻⵏ ⵖⴰⵔ ⵜⴻⵡⵡⵓⵔⴰ ⵏ ⵓⵔⵛⴰⵍⵉⵎ.
13 ⵎⵉⵎ. ⴷ ⵎⴰⵏ ⴰⵢⴰ ⴷⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵏ ⵉⵏⴰⴱⵉⵢⵢⴻⵏ ⵏⵏⴻⵙ,
ⵓ ⴷⵉ ⵙⵙⵉⴱⴱⴻⵜ ⵏ ⵍⵎⵓⵄⵚⵉⵢⵢⴻⵜ ⵏ ⵉⴽⴻⵀⵀⴰⵏⴻⵏ ⵏⵏⴻⵙ,
ⵉⵏⵏⵉ ⵉⵙⵙⵉⵥⵥⵍⴻⵏ ⵉⴷⴰⵎⵎⴻⵏ ⵏ ⵉⵎⵙⴻⴳⴳⴰⴷⴻⵏ ⴷⵉ ⵍⵡⴻⵙⵜ ⵏⵏⴻⵙ.
14 ⵏⵓⵏ. ⵜⴻⵜⵜⵍⵉⵄⴻⵏ ⴰⵎ ⵉⴷⴰⵔⵖⴰⵍⴻⵏ ⴷⴻⴳ ⵉⴱⵔⵉⴷⴻⵏ,
ⵎⴻⵙⵍⴻⵏ ⵙ ⵉⴷⴰⵎⵎⴻⵏ,
ⴰⵍⴰⵎⵉ ⵡⴰⵔ ⵉⵥⴻⵎⵎⴰⵔ ⵓⵍⴰ ⴷ ⵉⵊⵊⴻⵏ ⴰⴷ ⵉⵃⴰⴷⴰ ⴰⵔⵔⵓⴹ ⵏⵙⴻⵏ.
15 ⵙⴰⵎⵉⵅ. “ⴰⴳⴳⵯⴻⵊⴻⵎ, ⴰⵇⴰ-ⵜ ⵉⵅⵎⴻⵊ!”,
ⵜⵜⵍⴰⵖⴰⵏ ⵅⴰⵙⴻⵏ:
“ⴰⴳⴳⵯⴻⵊⴻⵎ, ⴰⴳⴳⵯⴻⵊⴻⵎ, ⵡⴰⵔ ⵜ ⵜⵜⵃⴰⴷⴰⵎ!”
ⵓⵛⴰ ⵅⴻⵏⵏⵉ ⴰⵔⴻⵡⵍⴻⵏ, ⵇⵇⵉⵎⴻⵏ ⵡⴻⴷⴷⴰⵔⴻⵏ.
ⵉⵜⵜⵡⴰⵏⵏⴰ ⵊⴰⵔ ⵍⴻⴳⵏⵓⵙ:
“ⵏⵉⵜⵏⵉ ⵡⴰⵔ ⵥⴻⵎⵎⴰⵔⴻⵏ ⴰⴷ ⵇⵇⵉⵎⴻⵏ ⴷⵉⵏ ⵄⴰⴷ ⴽⵜⴰⵔ!”
16 ⴱⵉ. ⴰⵖⴻⵎⴱⵓⴱ ⵏ ⵙⵉⴷⵉ ⵢⴰⵔⴻⵢⵢⴻⵛ ⵉ-ⵜⴻⵏ,
ⵡⴰⵔ ⵉⵇⵇⵉⵎ ⴰⴷ ⴷⴰⵢⵙⴻⵏ ⵉⵅⵥⴰⵔ ⵄⴰⴷ.
ⵜⵓⵖⴰ ⵡⴰⵔ ⵖⴰⵔⵙⴻⵏ ⴰⵡⴻⵇⵇⴰⵔ ⵉ ⵉⴽⴻⵀⵀⴰⵏⴻⵏ,
ⵉⵡⴻⵙⵙⵓⵔⴰ ⵡⴰⵔ ⴷ ⴰⵙⴻⵏ ⵙⵙⴻⵛⵏⴻⵏ ⴰⵃⵉⵏⵏⵉ.
17 ⵄⴰⵢⵉⵏ. ⵍⴻⴱⴷⴰ ⵜⵜⴻⴼⵛⵉⵍⴻⵏⵜ ⵜⵉⵟⵟⴰⵡⵉⵏ ⵏⵏⴻⵖ, ⵓⵎⵉ ⵅⵥⴰⵔⴻⵏⵜ ⵖⴰⵔ ⵜⵡⵉⵥⴰ.
ⵜⵓⵖⴰ-ⵜ ⴱⴰⵟⴻⵍ!
ⵖⴰⵔ ⵎⴰⵔⵔⴰ ⵓⵔⴰⵊⵉ ⵏⵏⴻⵖ ⵏⴻⵜⵜⵔⴰⵊⴰ ⵉⵊⵊ ⵏ ⵍⴳⴻⵏⵙ
ⵉ ⵡⴰⵔ ⵉⵥⴻⵎⵎⴰⵔⴻⵏ ⴰⴷ ⵉⵙⵙⴻⵏⵊⴻⵎ. ■
18 ⵜⵙⴰⴷⵉ. ⵏⵉⵜⵏⵉ ⵃⵚⴰⵔⴻⵏ ⴰⵏⴻⵖ,
ⴰⵍⴰⵎⵉ ⵡⴰⵔ ⵏⴻⵇⵇⵉⵎ ⵏⵥⴻⵎⵎⴰⵔ ⴰⴷ ⵏⵓⵢⵓⵔ ⵅ ⵡⴰⵥⵥⴰⵢⴻⵏ ⵏⵏⴻⵖ.
ⵇⴻⵟⵟⵓ ⵏⵏⴻⵖ ⵜⵓⵖⴰ ⵢⵉⵡⴻⴹ-ⴷⴷ,
ⵓⵙⵙⴰⵏ ⵏⵏⴻⵖ ⵇⴹⴰⵏ,
ⵡⴰⵀ, ⵇⴻⵟⵟⵓ ⵏⵏⴻⵖ ⵢⵓⵙⴰ-ⴷⴷ.
19 ⵇⵓⴼ. ⵉⵏⵏⵉ ⴷ ⴰⵏⴻⵖ ⵉⴹⴻⴼⴼⴰⵔⴻⵏ
ⵜⵓⵖⴰ ⴼⵙⵓⵙⴻⵏ ⵅ ⵉⴳⵉⴷⴰⵔⴻⵏ ⴷⴻⴳ ⵓⵊⴻⵏⵏⴰ.
ⵏⵉⵜⵏⵉ ⵓⵥⵥⵍⴻⵏ ⵅⴰⵏⴻⵖ ⵅ ⵉⴷⵓⵔⴰⵔ,
ⴳⴳⵉⵏ ⴰⵏⴻⵖ ⵜⴰⵅⵛⴻⴼⵜ ⴷⵉ ⵍⴻⵅⵍⴰ.
20 ⵔⵉⵅ. ⵏⵏⴻⴼⵙ ⵏ ⵡⴻⵏⵥⴰⵔⴻⵏ ⵏⵏⴻⵖ, ⵍⵎⴰⵙⵉⵃ ⵏ ⵙⵉⴷⵉ,
ⵉⵜⵜⵡⴰⵃⴻⴱⴱⴻⵙ ⴷⵉ ⵜⵅⴻⵛⴼⵉⵏ ⵏⵙⴻⵏ,
ⵡⴻⵏⵏⵉ ⵅ ⵏⴻⵏⵏⴰ:
“ⴰⴷ ⵏⴻⴷⴷⴰⵔ ⵊⴰⵔ ⵍⴻⴳⵏⵓⵙ ⴷⵉ ⵜⵉⵍⵉ ⵏⵏⴻⵙ!”
21 ⵛⵉⵏ. ⵙⵍⵉⵡⵍⴻⵡ ⵓ ⴼⴰⵔⵃ, ⴰ ⵜⴰⵢⴻⴵⵉⵜ ⵏ ⵉⴷⵓⵎ,
ⵜⴻⵏⵏⵉ ⵉⵥⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ ⵏ ⵄⵓⵚ!
ⵎⴰⵛⴰ ⵓⵍⴰ ⴷ ⵛⴻⵎ ⴰⴷ ⵖⴰⵔⴻⵎ ⴷⴷ-ⵢⴰⵙ ⵍⴽⴰⵙ,
ⵛⴻⵎ ⴰⴷ ⵥⵥⴰⵢⴻⵙ ⵜⴻⵙⵙⵛⴰⵔⴻⴷ,
ⵓ ⴰⴷ ⵜᵉⵜⵜⵡⴰⵄⴰⵔⵔⵉⴷ.
22 ⵜⴰⵡ. ⵖⴰⵔ ⵍⵎⵓⵄⵚⵉⵢⵢⴻⵜ ⵏⵏⴻⵎ ⴰⴷ ⵢⵉⵍⵉ ⵓⵏⴻⴳⴳⴰⵔ, ⴰ ⵜⴰⵢⴻⴵⵉⵜ ⵚⵉⵀⵢⵓⵏ!
ⵏⴻⵜⵜⴰ ⵡⴰⵔ ⵉ ⵛⴻⵎ ⵉⵜⵜⵃⴻⵡⵡⵉⵙ ⵄⴰⴷ.
ⵎⴰⵛⴰ ⵏⴻⵜⵜⴰ ⴰⴷ ⵥⵥⴰⵢⴻⵎ ⵉⵅⴻⴵⴻⵚ ⵍⵎⵓⵄⵚⵉⵢⵢⴻⵜ ⵏⵏⴻⵎ, ⴰ ⵜⴰⵢⴻⴵⵉⵜ ⵉⴷⵓⵎ!
ⵏⴻⵜⵜⴰ ⴰⴷ ⵉⵄⴰⵔⵔⴰ ⵅ ⴷⴷⵏⵓⴱ ⵏⵏⴻⵎ.