ⵉⵥⵍⵉ ⵡⵉⵙⵙ ⵅⴻⵎⵙⴰ - ⵜⴰⵥⴰⴵⵉⵜ ⵉ ⵓⵙⴻⵏⵊⴻⵎ
5
1 ⵄⵇⴻⵍ, ⴰ ⵙⵉⴷⵉ, ⵅ ⵎⵉⵏ ⵉ ⴷ ⴰⵏⴻⵖ ⵉⵎⵙⴰⵔⴻⵏ, ⵅⵥⴰⵔ-ⴷⴷ ⵓ ⵡⴰⵍⴰ ⵍⵃⴻⴳⵔⴰ ⵏⵏⴻⵖ.
2 ⵜⴻⵡⴹⴰ ⵜⴻⵙⵖⴰⵔⵜ ⵏ ⵍⵡⴰⵔⵜ ⵏⵏⴻⵖ ⵉ ⵉⴱⴰⵔⵔⴰⵏⵉⵢⵢⴻⵏ,
ⵓⵍⴰ ⴷ ⵜⵓⴷⵔⵉⵏ ⵏⵏⴻⵖ ⵔⵓⵃⴻⵏⵜ ⵜⵜ ⵖⴰⵔ ⵎⵉⴷⴷⴻⵏ.
3 ⵏⴻⵛⵛⵉⵏ ⵏⴻⴷⵡⴻⵍ ⴷ ⵉⵢⵓⵊⵉⵍⴻⵏ ⴱⵍⴰ ⴱⴰⴱⴰⵜⵏⴻⵖ,
ⵜⵉⵢⴻⵎⵎⴰⵜⵉⵏ ⵏⵏⴻⵖ ⴷⴻⵡⵍⴻⵏⵜ ⴰⵎ ⵜⵉⵊⵊⴰⵍ.
4 ⴰⵎⴰⵏ ⵏⵏⴻⵖ ⵏⵙⴻⵙⵙ ⵉ-ⵜⴻⵏ ⵙ ⵜⵜⵎⴻⵏⵢⴰⵜ,
ⴰⴽⴻⵛⵛⵓⴹ ⵏⵏⴻⵖ ⵏⴻⵜⵜⵅⴻⴵⴰⵚ ⵅⴰⵙ.
5 ⴹⴻⴼⴼⴰⵔⴻⵏ ⴰⵏⴻⵖ ⵅ ⵢⵉⵔⵉ ⵏⵏⴻⵖ,
ⵏⴻⵛⵛⵉⵏ ⵏⴻⵎⵎⵓⵜ ⵙ ⵍⵡⴻⵃⵍⴰⵏ,
ⵎⴰⵛⴰ ⵡⴰⵔ ⴷ ⴰⵏⴻⵖ ⵊⵊⵉⵏ ⴰⵔⵔⴰⵃⴻⵜ.
6 ⴰⵇⴰ ⵏⵙⴰⵔⵔⴻⵃ ⴰⴼⵓⵙ ⵖⴰⵔ ⵎⵉⵚⵔⴰ, ⵓⵍⴰ ⵖⴰⵔ ⴰⵛⵛⵓⵔ,
ⵎⴰⵃⴻⵏⴷ ⴰⴷ ⵏⴻⵊⵊⵉⵡⴻⵏ ⴰⵖⵔⵓⵎ.
7 ⵉⴱⴰⴱⴰⵜⴻⵏ ⵏⵏⴻⵖ ⵅⴹⴰⵏ,
ⵡⴰⵔ ⴵⵉⵏ ⵄⴰⴷ.
ⵓ ⵏⴻⵛⵛⵉⵏ ⵏⴰⵔⴻⴱⴱⵓ ⵍⵎⵓⵄⵚⵉⵢⵢⴻⵜ ⵏⵙⴻⵏ.
8 ⵉⵎⵙⴻⵅⵅⴰⵔⴻⵏ ⴷⴷⴻⴱⴱⴰⵔⴰⵏ ⵅⴰⵏⴻⵖ,
ⵓⵍⴰ ⴷ ⵉⵊⵊ ⵡⴰⵔ ⴷ ⴰⵏⴻⵖ ⵉⵙⵙⴻⵏⴼⴻⴽⴽⵉ ⵥⴻⴳ ⵉⴼⴰⵙⵙⴻⵏ ⵏⵙⴻⵏ.
9 ⵏⴻⵛⵛⵉⵏ ⵏⵙⴻⴱⴱⴻⵍ ⵜⵓⴷⴰⵔⵜ ⵏⵏⴻⵖ ⵎⴰⵃⴻⵏⴷ ⴰⴷ ⴷⴷ-ⵏⴰⵡⵉ ⴰⵖⵔⵓⵎ ⵏⵏⴻⵖ,
ⵥⵉ ⵙⵙⵉⴱⴱⴻⵜ ⵏ ⵙⵙⵉⴼ ⴷⵉ ⵍⴻⵅⵍⴰ.
10 ⵜⵉⵍⵎⴻⵛⵜ ⵏⵏⴻⵖ ⵜᵉⵜⵜⴻⵃⴷⵓⴷⵓⵇ ⴰⵎ ⵜⴻⴼⵇⵓⵏⵜ,
ⵥⵉ ⵍⵃⴰⴷⵓⵇ ⵏ ⵜⵎⴻⵙⵙⵉ ⵏ ⵍⴰⵥ.
11 ⵙⵙⵅⴰⵔⴳⴻⵏ ⵜⵉⵎⵖⴰⵔⵉⵏ ⴷⵉ ⵚⵉⵀⵢⵓⵏ,
ⵓⵍⴰ ⴷ ⵜⵉⵄⵥⴰⵔⵉⵢⵢⵉⵏ ⴷⵉ ⵜⵏⴻⴷⴷⴰⵎ ⵏ ⵢⴰⵀⵓⴷⴰ.
12 ⵍⵃⵓⴽⴽⴰⵎ ⵜⵜⵡⴰⵢⵓⵢⵍⴻⵏ ⵙ ⵉⴼⴰⵙⵙⴻⵏ ⵏⵙⴻⵏ,
ⵓⴷⵎⴰⵡⴻⵏ ⵏ ⵉⵡⴻⵙⵙⵓⵔⴰ ⵉⵜⵜⵡⴰⴽⴽⴻⵙ ⴰⵙⴻⵏ ⵍⵄⴻⵥⵥ.
13 ⵉⵃⵓⴷⵔⵉⵢⵢⴻⵏ ⴰⵔⴻⴱⴱⵓⵏ ⵉⵥⵔⴰ ⵏ ⵜⵙⵉⵔⵜ,
ⵓ ⵉⵃⵔⴰⵎⴻⵏ ⵜⵜⵏⴻⵇⵔⴰⴹⴻⵏ ⵙⴰⴷⵓ ⵍⴻⵃⵎⴻⵍ ⵏ ⵓⴽⴻⵛⵛⵓⴹ.
14 ⵉⵎⵖⴰⵔⴻⵏ ⵙⵙⴱⴻⴷⴷⴻⵏ ⴰⵖⵉⵎⵉ ⴷⵉ ⵜⴻⵡⵡⵓⵔⴰ ⵏ ⵜⴻⵏⴷⵉⵏⵜ,
ⵉⵃⵓⴷⵔⵉⵢⵢⴻⵏ ⵙⵙⴱⴻⴷⴷⴻⵏ ⵥⴻⴳ ⵓⵥⴻⵏⵥⵓⵏ ⵏⵙⴻⵏ ⵅ ⵉⴼⵉⵍⴰⵏ.
15 ⵜⵡⴻⴷⴷⴰⵔ ⵍⴻⴼⵔⴰⵃⴻⵜ ⵏ ⵡⵓⵍ ⵏⵏⴻⵖ,
ⵛⵛⴹⵉⵃ ⵏⵏⴻⵖ ⵙ ⵏⵏⵓⴱⵜⴰⵜ ⵉⴷⵡⴻⵍ ⴷ ⴰⵛⴹⴰⵏ.
16 ⵜⴻⵡⴹⴰ ⴰⵏⴻⵖ ⵜⴰⵊⵊ ⵅ ⵓⵥⴻⴵⵉⴼ ⵏⵏⴻⵖ.
ⵓⵛⵜ ⵅⴰⵏⴻⵖ, ⵎⴰⵖⴰⵔ ⵏⴻⵛⵛⵉⵏ ⵏⴻⵅⴹⴰ.
17 ⵙ ⵓⵢⴻⵏⵏⵉ ⵢⵓⵀⴻⵍ ⵡⵓⵍ ⵏⵏⴻⵖ,
ⵙ ⵓⵢⴻⵏⵏⵉ ⴱⴱⴰⵔⴻⵛⵏⴻⵏⵜ ⵜⵉⵟⵟⴰⵡⵉⵏ ⵏⵏⴻⵖ,
18 ⵥⵉ ⵙⵙⵉⴱⴱⴻⵜ ⵏ ⵡⴻⴷⵔⴰⵔ ⵏ ⵚⵉⵀⵢⵓⵏ ⵏⵏⵉ ⵉⵜⵜⵡⴰⵅⴰⵔⵔⴱⴻⵏ,
ⵎⴰⵏⵉ ⵜⵜⴰⵡⵢⴻⵏ ⵜⵜⴰⵔⵔⴰⵏ ⵉⵛⴻⵄⴱⴰⵡⴻⵏ.
19 ⵛⴻⴽ, ⴰ ⵙⵉⴷⵉ, ⴰⴷ ⵜⴻⵇⵇⵉⵎⴻⴷ ⵉ ⵍⴻⴱⴷⴰ,
ⵍⴽⵓⵔⵙⵉ ⵉⴳⴻⵍⵍⴷⴻⵏ ⵏⵏⴻⴽ ⴰⵇⴰ-ⵜ ⵥⵉ ⵊⵊⵉⵍ ⴰⵍ ⵊⵊⵉⵍ.
20 ⵎⴰⵢⴻⵎⵎⵉ ⵜⴻⵅⵙⴻⴷ ⵛⴻⴽ ⴰⴷ ⴰⵏⴻⵖ ⵜᵉⵜⵜⵓⴷ ⵉ ⵍⴻⴱⴷⴰ?
ⵎⴰⵢⴻⵎⵎⵉ ⵉ ⴷⴰⵢⵏⴻⵖ ⵜⵙⴻⵎⵃⴻⴷ ⵇⴰⵄ ⴰⵏⴻⵛⵜ ⵓⵢⴰ ⵏ ⵡⵓⵙⵙⴰⵏ?
21 ⴰ ⵙⵉⴷⵉ, ⴰⵔⵔ ⴰⵏⴻⵖ-ⴷⴷ ⵖⴰⵔⴻⴽ, ⵃⵉⵎⴰ ⴰⴷ ⵖⴰⵔⴻⴽ ⴷⴷ-ⵏⴻⴷⵡⴻⵍ.
ⴰⵔⵔ ⴰⵏⴻⵖ-ⴷⴷ ⵓⵙⵙⴰⵏ ⵏⵏⴻⵖ ⵏ ⵊⴷⵉⴷ ⴰⵎ ⵥⵉⵛ.
22 ⵎⴰⵖⴰⵔ ⵎⴰ ⵙ ⵜⵉⴷⴻⵜⵜ ⵜⴻⵏⴹⴰⵔⴻⴷ ⴰⵏⴻⵖ ⴽⵓⵍⵛⵉ?
ⵎⴰ ⵜⴻⴼⴼⵓⴳⵎⴻⴷ ⵅⴰⵏⴻⵖ ⴰⵎⵎⵓ ⵇⴰⵄ?