1 ⵉⵎⵙⴰⵔ ⵓⵎⵉ ⵉⴽⴻⵎⵎⴻⵍ ⵉⵔⵎⵉⵢⴰ ⵍⵀⴰⵔⴷ ⵏⵏⴻⵙ ⵉ ⵍⴳⴻⵏⵙ ⵎⴰⵔⵔⴰ ⵙ ⵎⴰⵔⵔⴰ ⴰⵡⴰⵍⴻⵏ ⵏ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ, ⵙ ⵎⵉⵏⵥⵉ ⵜⵓⵖⴰ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ, ⵉⵙⵙⴻⴽⴽ ⵉ-ⵜ-ⵉ-ⴷⴷ ⵖⴰⵔⵙⴻⵏ, 2 ⴰⵇⴰ ⵉⵙⵙⵉⵡⴻⵍ ⵄⴰⵥⴰⵔⵢⴰ, ⵎⵎⵉⵙ ⵏ ⵀⵓⵛⴰⵄⵢⴰ, ⵓ ⵏⵏⴰⵏ ⵄⴰⵡⴻⴷ ⵢⵓⵃⴰⵏⴰⵏ, ⵎⵎⵉⵙ ⵏ ⵇⴰⵔⵉⵢⴰⵃ, ⴷ ⵎⴰⵔⵔⴰ ⵢⴻⵔⵢⴰⵥⴻⵏ ⵉⵎⵄⴻⴼⴼⴰⵔⴻⵏ ⵉ ⵉⵔⵎⵉⵢⴰ: “ⵛⴻⴽ ⵜⴻⵙⵙⵅⴰⵔⵔⵉⵇⴻⴷ. ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵡⴰⵔ ⵛⴻⴽ ⵉⵙⴻⴽⴽ ⵎⴰⵃⴻⵏⴷ ⴰⴷ ⵜⵉⵏⵉⴷ: ‘ⵡⴰⵔ ⵉⵄⴻⴷⴷⴻⵍ ⴰⴷ ⵜⵔⴰⵃⴻⵎ ⵖⴰⵔ ⵎⵉⵚⵔⴰ ⵎⴰⵃⴻⵏⴷ ⴰⴷ ⴷⵉⵏⵏⵉ ⵜⴻⵇⵇⵉⵎⴻⵎ ⴰⵎ ⵉⴱⴰⵔⵔⴰⵏⵉⵢⵢⴻⵏ!’ 3 ⵎⴰⵛⴰ ⴱⴰⵔⵓⵅ, ⵎⵎⵉⵙ ⵏ ⵏⵉⵔⵉ-ⵢⴰⵀ, ⵉ ⵛⴻⴽ ⵉ ⴷⴷ-ⵉⵃⴰⵔⵔⵛⴻⵏ ⵅⴰⵏⴻⵖ ⵃⵉⵎⴰ ⴰⴷ ⴰⵏⴻⵖ ⵜⵙⴻⵍⵍⴻⵎ ⵖⴰⵔ ⵉⴼⴰⵙⵙⴻⵏ ⵏ ⵉⴽⴰⵍⴷⴰⵏⵉⵢⵢⴻⵏ, ⵎⴰⵃⴻⵏⴷ ⴰⴷ ⴰⵏⴻⵖ ⵏⵖⴻⵏ ⵓ ⴰⴷ ⴰⵏⴻⵖ ⵏⴻⴷⵀⴻⵏ ⴷⵉ ⵍⵎⴻⵏⴼⴰ ⵖⴰⵔ ⴱⴰⴱⵉⵍ.”

4 ⴰⵎⵎⵓ ⵡⴰⵔ ⵉⵙⵍⵉ ⵢⵓⵃⴰⵏⴰⵏ, ⵎⵎⵉⵙ ⵇⴰⵔⵉⵢⴰⵃ, ⴷ ⵎⴰⵔⵔⴰ ⵉⵎⴻⵇⵇⵔⴰⵏⴻⵏ ⵏ ⵍⵄⴻⵙⴽⴰⵔ ⵓⵍⴰ ⴷ ⵎⴰⵔⵔⴰ ⵍⴳⴻⵏⵙ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ ⵎⴰⵃⴻⵏⴷ ⴰⴷ ⵇⵇⵉⵎⴻⵏ ⴷⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ. 5 ⵢⵓⵃⴰⵏⴰⵏ, ⵎⵎⵉⵙ ⵏ ⵇⴰⵔⵉⵢⴰⵃ, ⴷ ⵎⴰⵔⵔⴰ ⵉⵎⴻⵇⵇⵔⴰⵏⴻⵏ ⵏ ⵍⵄⴻⵙⴽⴰⵔ ⴽⵙⵉⵏ ⵎⴰⵔⵔⴰ ⵎⵉⵏ ⵉⵇⵇⵉⵎⴻⵏ ⵏ ⵢⴰⵀⵓⴷⴰ ⵏⵏⵉ ⵜⵓⵖⴰ ⵉ ⴷⴷ-ⵉⴷⴻⵡⵍⴻⵏ ⵥⵉ ⵎⴰⵔⵔⴰ ⵍⴻⴳⵏⵓⵙ ⵖⴰⵔ ⵎⴰⵏⵉ ⵅⴰⵙⴻⵏ ⵓⵥⵥⵍⴻⵏ, ⵃⵉⵎⴰ ⴰⴷ ⵇⵇⵉⵎⴻⵏ ⴷⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ: 6 ⵉⵔⵢⴰⵥⴻⵏ ⵉⵊⴻⵀⴷⴻⵏ ⴷ ⵜⴻⵎⵖⴰⵔⵉⵏ ⴷ ⵉⵃⴻⵏⵊⵉⵔⴻⵏ ⵉⵎⴻⵥⵢⴰⵏⴻⵏ ⴷ ⵢⴻⵙⵙⵉⵙ ⵏ ⵓⵊⴻⴵⵉⴷ ⴷ ⵎⴰⵔⵔⴰ ⵍⴻⵄⵎⴰⵔ ⵏⵏⵉ ⵜⵓⵖⴰ ⵉⵊⵊⴰ ⵏⴻⴱⵓⵥⴰⵔⴰⴷⴰⵏ, ⵍⵇⴻⴱⵟⴰⵏ ⵏ ⵉⵄⴻⵙⵙⴰⵙⴻⵏ ⵉⴼⴰⵔⵥⴻⵏ ⵏ ⴰⵔⵔⵉⵎⴻⵜ, ⵖⴰⵔ ⵊⴰⴷⴰⵍⵢⴰ, ⵎⵎⵉⵙ ⵏ ⴰⵅⵉⵇⴰⵎ, ⵎⵎⵉⵙ ⵏ ⵛⴰⴼⴰⵏ, ⵓⵍⴰ ⴷ ⴰⵏⴰⴱⵉ ⵉⵔⵎⵉⵢⴰ ⴷ ⴱⴰⵔⵓⵅ, ⵎⵎⵉⵙ ⵏ ⵏⵉⵔⵉ-ⵢⴰⵀ. 7 ⵏⵉⵜⵏⵉ ⵓⵙⵉⵏ-ⴷⴷ ⵖⴰⵔ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵎⵉⵏⵥⵉ ⵏⵉⵜⵏⵉ ⵡⴰⵔ ⵙⵍⵉⵏ ⵛⴰ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ ⵓⵛⴰ ⵓⵙⵉⵏ-ⴷⴷ ⵖⴰⵔⴻⵙ ⴰⵍ ⵜⴰⵃⴼⴰⵏⵉⵙ.

8 ⵅⴻⵏⵏⵉ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵉⵔⵎⵉⵢⴰ ⴷⵉ ⵜⴰⵃⴼⴰⵏⵃⵉⵙ, ⵉⵏⵏⴰ: 9 “ⴽⵙⵉ ⵉⵥⵔⴰ ⵉⵎⴻⵇⵇⵔⴰⵏⴻⵏ ⴷⴻⴳ ⵓⴼⵓⵙ ⵏⵏⴻⴽ ⵓⵛⴰ ⵙⴻⵍⵙⴻⵇ ⵉ-ⵜⴻⵏ ⴷⴻⴳ ⵓⴱⴻⴵⴰⵄ ⵏ ⵜⵉⵙⵉ ⵏ ⵍⵓⵚⴰ ⵖⴰⵔ ⵡⴰⴷⴰⴼ ⵏ ⵜⴰⴷⴷⴰⵔⵜ ⵏ ⴼⵉⵔⵄⵓⵏ ⴷⵉ ⵜⴰⵃⴼⴰⵏⵉⵙ. ⴻⴳⴳ ⵉ-ⵜ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵢⴻⵔⵢⴰⵥⴻⵏ ⵏ ⵢⴰⵀⵓⴷⴰ

10 ⵓⵛⴰ ⵉⵏⵉ ⴰⵙⴻⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏ ⵉⵙⵔⴰⵉⵍ: ⵅⵥⴰⵔ, ⵏⴻⵛⵛ ⴰⴷ ⴰⵡⵢⴻⵖ ⵏⴰⴱⵓⵅⴰⴷⵔⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ, ⴰⵎⵙⴻⵅⵅⴰⵔ ⵉⵏⵓ, ⵓⵛⴰ ⴰⴷ ⴳⴳⴻⵖ ⵍⵄⴰⵔⵛ ⵏⵏⴻⵙ ⵅ ⵢⴻⵥⵔⴰ ⴰⵢⴰ ⵏⵏⵉ ⵙⵙⵏⵓⴼⴼⴰⵔⴻⵖ, ⵓⵛⴰ ⵏⴻⵜⵜⴰ ⴰⴷ ⵉⵡⵡⴻⵜ ⴰⵇⵉⴹⵓⵏ ⵏⵏⴻⵙ ⵉⴳⴻⵍⵍⴷⴻⵏ ⵜⵉⵡⴰ ⵏⵙⴻⵏ. ^■  

11 ⵏⴻⵜⵜⴰ ⴰⴷ ⴷⴷ-ⵢⴰⵙ ⵓⵛⴰ ⴰⴷ ⵉⵡⵡⴻⵜ ⵜⴰⵎⵎⵓⵔⵜ ⵏ ⵎⵉⵚⵔⴰ: ⵡⴻⵏⵏⵉ ⵉⴵⴰⵏ ⵉ ⵍⵎⴻⵡⵜ, ⵙ ⵍⵎⴻⵡⵜ, ⴷ ⵡⴻⵏⵏⵉ ⵉⴵⴰⵏ ⵉ ⵜⵎⴻⵃⴱⴰⵙⵜ, ⵉ ⵓⵃⴻⴱⴱⴻⵙ, ⴷ ⵡⴻⵏⵏⵉ ⵉⴵⴰⵏ ⵉ ⵙⵙⵉⴼ, ⵙ ⵙⵙⵉⴼ. ^■  

12 ⵏⴻⵜⵜⴰ ⴰⴷ ⵙⵙⴰⵔⴻⵖ ⵉⵛⵜ ⵏ ⵜⵎⴻⵙⵙⵉ ⴷⴻⴳ ⵉⵅⵅⴰⵎⴻⵏ ⵏ ⵚⵚⴰⵏⴰⵎ ⵏ ⵎⵉⵚⵔⴰ ⵓⵛⴰ ⴰⴷ ⵜⴻⵏⵜ ⵙⵙⵛⴻⵎⴹⴻⵖ ⵓ ⴰⴷ ⵜⴻⵏ ⴰⵡⵢⴻⵖ ⴷ ⵉⵎⴻⵃⴱⴰⵙ. ⵏⴻⵜⵜⴰ ⴰⴷ ⵢⴰⵔⴹ ⵜⴰⵎⵎⵓⵔⵜ ⵏ ⵎⵉⵚⵔⴰ ⴰⵎⴻⵛⵏⴰⵡ ⴰⵎⴻⴽⵙⴰⵡ ⵢⴰⵔⴹ ⴰⵔⵔⵓⴹ ⵏⵏⴻⵙ ⵓⵛⴰ ⵏⴻⵜⵜⴰ ⴰⴷ ⵥⵥⴰⵢⴻⵙ ⴷⴷ-ⵉⴼⴼⴻⵖ ⴷⵉ ⵍⴻⵀⵏⴰ.

13 ⵏⴻⵜⵜⴰ ⴰⴷ ⵢⴰⵔⵥ ⵉⵎⴰⵢⴹⵓⵜⴻⵏ ⵏⵙⴻⵏ ⵉⵇⴻⴷⴷⵙⴻⵏ, ⵏⵏⵉ ⵉⴵⴰⵏ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵓⵛⴰ ⴰⴷ ⵉⵙⵙⴻⵛⵎⴻⴹ ⵉⵅⵅⴰⵎⴻⵏ ⵏ ⵚⵚⴰⵏⴰⵎ ⵏ ⵎⵉⵚⵔⴰ ⵙ ⵜⵎⴻⵙⵙⵉ.’ ”