1 ⴷⴻⴳ ⵓⵙⴻⴳⴳⵯⴰⵙ ⵏⵏⵉ, ⴷⴻⴳ ⵓⵎⴻⵥⵡⴰⵔⵓ ⵏ ⵜⴳⴻⵍⴷⴰ ⵏ ⵓⵊⴻⴵⵉⴷ ⵚⵉⴷⵇⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⴰⵔⴻⴱⵄⴰ, ⴷⴻⴳ ⵓⵢⵓⵔ ⵡⵉⵙⵙ ⵅⴻⵎⵙⴰ, ⵉⵙⵙⵉⵡⴻⵍ ⴰⴽⵉⴷⵉ ⵃⴰⵏⴰⵏⵢⴰ, ⵎⵎⵉⵙ ⵏ ⵄⴰⵥⵓⵔ, ⴰⵏⴰⴱⵉ ⵥⵉ ⵊⵉⴱⵄⵓⵏ, ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵉⴽⴻⵀⵀⴰⵏⴻⵏ ⴷ ⵍⴳⴻⵏⵙ ⵉⵎⵓⵏ, ⵉⵏⵏⴰ: 2 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵉⵇⵇⴰⵔ: ‘ⵏⴻⵛⵛ ⴰⴷ ⴰⵔⵥⴻⵖ ⴰⵥⴰⵢⵍⵓ ⵏ ⵓⵊⴻⴵⵉⴷ ⵏ ⴱⴰⴱⵉⵍ. 3 ⵄⴰⴷ ⵜⵏⴰⵢⴻⵏ ⵏ ⵉⵙⴻⴳⴳⵯⵓⵙⴰ ⵅⴻⵏⵏⵉ ⵏⴻⵛⵛ ⴰⴷ ⴷⴷ-ⴰⵔⵔⴻⵖ ⵖⴰⵔ ⵜⴻⵎⵎⵓⵔⵜ-ⴰ ⵎⴰⵔⵔⴰ ⵍⴻⵇⵛⵓⵄ ⵏ ⵜⴰⴷⴷⴰⵔⵜ ⵏ ⵙⵉⴷⵉ, ⵉⵏⵏⵉ ⵉⴽⵙⵉ ⵏⴰⴱⵓⵅⴰⴷⵏⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ, ⵥⴻⴳ ⵡⴻⵎⵛⴰⵏ-ⴰ ⵓⵛⴰ ⵢⵉⵡⵢ-ⵉ-ⵜⴻⵏ ⵖⴰⵔ ⴱⴰⴱⵉⵍ. ^■   4 ⵏⴻⵛⵛ ⴰⴷ ⵙⵙⵄⴻⵇⴱⴻⵖ ⵢⴰⴽⵓⵏⵢⴰ, ⵎⵎⵉⵙ ⵏ ⵢⴰⵀⵓⵢⴰⵇⵉⵎ, ⴷ ⵎⴰⵔⵔⴰ ⵉⵎⴻⵏⴼⵉⵢⵢⴻⵏ ⵥⵉ ⵢⴰⵀⵓⴷⴰ ⵉ ⴷⴷ-ⵢⵉⵡⴹⴻⵏ ⵖⴰⵔ ⴱⴰⴱⵉⵍ, ⵖⴰⵔ ⵡⴻⵎⵛⴰⵏ-ⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⵎⵉⵏⵥⵉ ⵏⴻⵛⵛ ⴰⴷ ⴰⵔⵥⴻⵖ ⴰⵥⴰⵢⵍⵓ ⵏ ⵓⵊⴻⴵⵉⴷ ⵏ ⴱⴰⴱⵉⵍ.’ ”

5 ⵅⴻⵏⵏⵉ ⵉⵏⵏⴰ ⵓⵏⴰⴱⵉ ⵉⵔⵎⵉⵢⴰ ⵉ ⵓⵏⴰⴱⵉ ⵃⴰⵏⴰⵏⵢⴰ, ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵉⴽⴻⵀⵀⴰⵏⴻⵏ ⵓ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵍⴳⴻⵏⵙ ⵉⵎⵓⵏ, ⵉⵏⵏⵉ ⵉⴱⴻⴷⴷⴻⵏ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ, 6 ⵉⵏⵏⴰ ⵉⵔⵎⵉⵢⴰ: “ⴰⵎⵉⵏ, ⴰⵎⵎⵓ ⵉ ⵖⴰ ⵢⴻⴳⴳ ⵙⵉⴷⵉ! ⵉⵍⵉ ⴰⴷ ⵉⵙⵙⴻⵇⴼⴻⵍ ⵙⵉⴷⵉ ⴰⵡⴰⵍⴻⵏ ⵏⵏⴻⴽ ⵉ ⵜⵏⴻⴱⴱⵉⴷ ⴰⵍⴰⵎⵉ ⵉ ⵖⴰ ⵢⴰⵔⵔ ⵍⴻⵇⵛⵓⵄ ⵏ ⵜⴰⴷⴷⴰⵔⵜ ⵏ ⵙⵉⴷⵉ ⴷ ⵎⴰⵔⵔⴰ ⵉⵏⵏⵉ ⵉⵜⵜⵡⴰⵏⴻⴷⵀⴻⵏ ⴷⵉ ⵜⵎⴻⵃⴱⴰⵙⵜ, ⵥⵉ ⴱⴰⴱⵉⵍ ⵖⴰⵔ ⵡⴻⵎⵛⴰⵏ-ⴰ! 7 ⵙⴻⵍ ⵎⴰⵛⴰ ⵉ ⵡⴰⵡⴰⵍ-ⴰ ⵉ ⵥⵉ ⵙⵙⴰⵡⴰⵍⴻⵖ ⴷⴻⴳ ⵉⵎⴻⵥⵥⵓⵖⴻⵏ ⵏⵡⴻⵎ ⵓ ⴷⴻⴳ ⵉⵎⴻⵥⵥⵓⵖⴻⵏ ⵏ ⵍⴳⴻⵏⵙ ⵉⵎⵓⵏ: 8 ‘ⵉⵏⴰⴱⵉⵢⵢⴻⵏ ⵏⵏⵉ ⵜⵓⵖⴰ ⴷⵉⵏ ⵉⴵⴰⵏ ⵇⴱⴻⵍ ⵉⵏⵓ ⴷ ⴽⴻⵏⵏⵉⵡ ⵥⴻⴳ ⵡⴻⵛⵃⴰⵍ ⵓⵢⴰ, ⵏⴻⴱⴱⴰⵏ ⵏⵉⵜⵏⵉ ⴹⵉⴷⴷ ⵉ ⵡⴰⵟⵟⴰⵙ ⵏ ⵜⴻⵎⵎⵓⵔⴰ ⵓ ⴹⵉⴷⴷ ⵉ ⵡⴰⵟⵟⴰⵙ ⵏ ⵜⴳⴻⵍⴷⵉⵜⵉⵏ, ⵅ ⴳⴰⵔⵔⴰ, ⵅ ⵉⵛⴻⵍⵡⴰⵡⴻⵏ ⵓ ⵅ ⵟⵟⴰⵄⵓⵏ. 9 ⴰⵏⴰⴱⵉ ⵏⵏⵉ ⵉⵜⵜⵏⴰⴱⴱⴻⵏ ⵅ ⵙⵍⴰⵎ, ⵎⴰⵍⴰ ⴰⵡⴰⵍ ⵏ ⵓⵏⴰⴱⵉ ⵏⵏⵉ ⴰⴷ ⴷⴷ-ⵉⴼⴼⴻⵖ, ⵅⴻⵏⵏⵉ ⴰⴷ ⵢⵉⵍⵉ ⵉⵜⵜⵡⴰⵙⵙⴻⵏ ⴰⵇⴰ ⵙⵉⴷⵉ ⵉⵙⵙⴻⴽⴽ-ⴷⴷ ⴰⵏⴰⴱⵉ ⵏⵏⵉ ⴷ ⵜⵉⴷⴻⵜⵜ.’ ”

10 ⵅⴻⵏⵏⵉ ⵉⴽⵙⵉ ⵓⵏⴰⴱⵉ ⵃⴰⵏⴰⵏⵢⴰ ⴰⵥⴰⵢⵍⵓ ⵏ ⵢⵉⵔⵉ ⵏ ⵓⵏⴰⴱⵉ ⵉⵔⵎⵉⵢⴰ ⵓⵛⴰ ⵢⴰⵔⵥ ⵉ-ⵜ.

11 ⵅⴰⵙ ⵓⵛⴰ ⵉⵙⵙⵉⵡⴻⵍ ⵃⴰⵏⴰⵏⵢⴰ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵍⴳⴻⵏⵙ, ⵉⵏⵏⴰ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵇⴱⴻⵍ ⵎⴰ ⴰⴷ ⵄⴷⵓⵏ ⵜⵏⴰⵢⴻⵏ ⵏ ⵉⵙⴻⴳⴳⵯⵓⵙⴰ ⴽⴻⵎⵎⵍⴻⵏ ⴰⴷ ⴰⵔⵥⴻⵖ ⴰⵥⴰⵢⵍⵓ ⵏ ⵏⴰⴱⵓⵅⴰⴷⵏⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ, ⵉ ⵉⴵⴰⵏ ⵅ ⵢⵉⵍⴰⵡⴻⵏ ⵏ ⵎⴰⵔⵔⴰ ⵍⴻⴳⵏⵓⵙ.” ⵓⵛⴰ ⵉⵔⵎⵉⵢⴰ ⵢⵓⵢⵓⵔ ⴰⴱⵔⵉⴷ ⵏⵏⴻⵙ.

12 ⵅⴻⵏⵏⵉ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵉⵔⵎⵉⵢⴰ ⴰⵡⴰⵔⵏⵉ ⵉ ⵓⵎⵉ ⵢⴰⵔⵥⴰ ⵓⵏⴰⴱⵉ ⵃⴰⵏⴰⵏⵢⴰ ⴰⵥⴰⵢⵍⵓ ⵅ ⵢⵉⵍⴰⵡⴻⵏ ⵏ ⵓⵏⴰⴱⵉ ⵉⵔⵎⵉⵢⴰ ⵓⵛⴰ ⵉⵏⵏⴰ:

13 “ⵓⵢⵓⵔ ⵓⵛⴰ ⵙⵉⵡⴻⵍ ⴰⴽ-ⴷ ⵃⴰⵏⴰⵏⵢⴰ, ⵉⵏⵉ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ⵉⵥⴰⵢⵍⵓⵜⴻⵏ ⵏ ⵓⴽⴻⵛⵛⵓⴹ ⵜⴰⵔⵥⵉⴷ ⵜⴻⵏ ⵓⵛⴰ ⵜⴻⴳⴳⵉⴷ ⵉⵥⴰⵢⵍⵓⵜⴻⵏ ⵏ ⵡⵓⵥⵥⴰⵍ ⴷⴻⴳ ⵡⴻⵎⵛⴰⵏ ⵏⵙⴻⵏ.’

14 ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏ ⵉⵙⵔⴰⵉⵍ: ‘ⵉⵊⵊ ⵏ ⵓⵥⴰⵢⵍⵓ ⵏ ⵡⵓⵥⵥⴰⵍ ⵙⵙⴰⵔⵙⴻⵖ ⵜ ⵅ ⵢⵉⵍⴰⵡⴻⵏ ⵏ ⵎⴰⵔⵔⴰ ⵍⴻⴳⵏⵓⵙ, ⵎⴰⵃⴻⵏⴷ ⴰⴷ ⵙⴻⵅⵅⴰⵔⴻⵏ ⵉ ⵏⴰⴱⵓⵅⴰⴷⵏⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ. ⵏⵉⵜⵏⵉ ⴰⴷ ⴰⵙ ⵙⴻⵅⵅⴰⵔⴻⵏ. ⵓⵍⴰ ⴷ ⵍⵎⴰⵍ ⵡⵛⵉⵖ ⵜⴻⵏ ⴷⴻⴳ ⵓⴼⵓⵙ ⵏⵏⴻⵙ.’ ” ^■  

15 ⵅⴰⵙ ⵓⵛⴰ ⵉⵏⵏⴰ ⵓⵏⴰⴱⵉ ⵉⵔⵎⵉⵢⴰ ⵉ ⵓⵏⴰⴱⵉ ⵃⴰⵏⴰⵏⵢⴰ: “ⵙⴻⵍ, ⵃⴰⵏⴰⵏⵢⴰ, ⵙⵉⴷⵉ ⵡⴰⵔ ⵛⴻⴽ ⴷⴷ ⵉⵙⵙⴻⴽⴽ ⵛⴰ ⵓ ⵛⴻⴽ ⵜⵖⴰⵔⵔⴻⴷ ⵍⴳⴻⵏⵙ-ⴰ ⴰⴷ ⵉⵜⵜⵛⴻⵍ ⵅ ⵉⵅⴰⵔⵔⵉⵇⴻⵏ.

16 ⵙ ⵓⵢⴻⵏⵏⵉ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⵅⵥⴰⵔ, ⵏⴻⵛⵛ ⴰⴷ ⵛⴻⴽ ⵏⴹⴰⵔⴻⵖ. ⵄⴰⴷ ⴷⴻⴳ ⵓⵙⴻⴳⴳⵯⴰⵙ-ⴰ ⴰⴷ ⵜⴻⵎⵎⵜⴻⴷ ⵎⵉⵏⵥⵉ ⵜⴻⵙⵙⵉⵡⵍⴻⴷ ⵅ ⵓⵃⴻⵢⵢⴻⴷ ⵏ ⵙⵉⴷⵉ.’ ” ^■  

17 ⵉⵎⵎⵓⵜ ⵓⵏⴰⴱⵉ ⵃⴰⵏⴰⵏⵢⴰ ⴷⴻⴳ ⵓⵙⴻⴳⴳⵯⴰⵙ ⵏⵏⵉ, ⴷⴻⴳ ⵓⵢⵓⵔ ⵡⵉⵙⵙ ⵙⴻⴱⵄⴰ.