1 “ⴷⵉ ⵍⵡⴻⵇⵜ ⵏⵏⵉ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⴷ ⵙⵙⵓⴼⴼⵖⴻⵏ ⵉⵅⵙⴰⵏ ⵏ ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ, ⵉⵅⵙⴰⵏ ⵏ ⵍⵃⵓⴽⴽⴰⵎ ⵏⵙⴻⵏ, ⵉⵅⵙⴰⵏ ⵏ ⵉⴽⴻⵀⵀⴰⵏⴻⵏ ⵏⵙⴻⵏ, ⵉⵅⵙⴰⵏ ⵏ ⵉⵏⴰⴱⵉⵢⵢⴻⵏ ⵏⵙⴻⵏ ⴷ ⵢⴻⵅⵙⴰⵏ ⵏ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ ⵥⴻⴳ ⵉⵎⴻⴹⵍⴰⵏ ⵏⵙⴻⵏ. 2 ⴰⴷ ⴱⴻⵥⵥⵄⴻⵏ ⵉⵅⵙⴰⵏ ⵉ ⵜⴼⵓⵛⵜ ⴷ ⵜⵥⵉⵔⵉ ⵓ ⵉ ⵎⴰⵔⵔⴰ ⵉⵜⵔⴰⵏ ⵏ ⵓⵊⴻⵏⵏⴰ, ⵉⵏⵏⵉ ⵜⵓⵖⴰ ⵜⵜⴻⵅⵙⴻⵏ, ⵉⵏⵏⵉ ⵓⵎⵉ ⵜⵓⵖⴰ ⵜⵜⵙⴻⵅⵅⴰⵔⴻⵏ, ⵉⵏⵏⵉ ⵜⵓⵖⴰ ⵉⴹⴻⴼⴼⴰⵔⴰⵏ ⴷ ⵢⴻⵏⵏⵉ ⵜⵓⵖⴰ ⵥⵥⴰⵢⵙⴻⵏ ⴰⵔⴻⵥⵥⵓⵏ ⵛⵛⵡⴰⵔ ⴷ ⵢⴻⵏⵏⵉ ⵓⵎⵉ ⵜⵓⵖⴰ ⵜⵜⴰⴹⴰⵔⴻⵏ. ⵡⴰⵔ ⵜⴻⵏ ⴷⴷ-ⵢⴰⵔⵔⵡⴻⵏ, ⵡⴰⵔ ⵜⴻⵏ ⵏⴻⵟⵟⵍⴻⵏ, ⵎⴰⵛⴰ ⴰⴷ ⵉⵍⵉⵏ ⴷ ⵍⴻⵖⴱⴰⵔ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ. ^■   3 ⵏⵉⵜⵏⵉ ⴰⴷ ⵅⵙⴻⵏ ⵍⵎⴻⵡⵜ ⵅ ⵜⵓⴷⴰⵔⵜ ⵊⴰⵔ ⵎⴰⵔⵔⴰ ⵉⵏⵏⵉ ⵉⵇⵇⵉⵎⴻⵏ ⵥⴻⴳ ⵢⴻⵏⵏⵉ ⵉⵜⵜⵡⴰⵙⵏⴻⵊⵎⴻⵏ ⵏ ⵜⴻⵇⴱⵉⵞ ⵏ ⵍⴳⴻⵏⵙ-ⴰ ⵜⴰⵄⴻⴼⴼⴰⵏⵜ, ⴷⵉ ⵎⴰⵔⵔⴰ ⵉⵎⵓⵛⴰⵏ ⵎⴰⵏⵉ ⴵⴰⵏ ⵉⵏⵏⵉ ⵉⵜⵜⵡⴰⵙⵏⴻⵊⵎⴻⵏ, ⵎⴰⵏⵉ ⵅⴰⵙⴻⵏ ⵓⵥⵥⵍⴻⵖ ⵏⴻⵛⵛ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.”

4 “ⵉⵏⵉ ⴰⵙⴻⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ⵎⴰ ⴰⴷ ⵡⴹⴰⵏ ⴰⵍ ⵖⴰ ⵇⵇⵉⵎⴻⵏ ⵡⴰⵔ ⵜⵜⴻⴽⴽⴰⵔⴰⵏ ⵄⴰⴷ? ⵎⴰ ⴰⴷ ⵅⴰⴼⵉ ⵃⴻⵢⵢⴷⴻⵏ ⵓ ⵡⴰⵔ ⴷⴷ-ⵜⵜⵄⵉⵇⵇⵉⴱⴻⵏ? 5 ⵎⴰⵢⴻⵎⵎⵉ ⵉⵃⴻⵢⵢⴻⴷ ⵍⴳⴻⵏⵙ-ⴰ, ⵓⵔⵛⴰⵍⵉⵎ ⵜⴰⵏⵉⵜⴰ, ⵍⴻⴱⴷⴰ ⵥⵥⴰⵢⵉ? ⵏⵉⵜⵏⵉ ⵛⴻⴱⴱⴰⵔⴻⵏ ⴷⴻⴳ ⵡⴻⵛⵎⴰⵜ, ⵓⴳⵉⵏ ⴰⴷ ⵖⴰⵔⵉ ⴷⴷ-ⴷⴻⵡⵍⴻⵏ. 6 ⵏⴻⵛⵛ ⵙⵙⵃⴻⵙⵙⴻⵖ, ⵙⵍⵉⵖ: ⵎⵉⵏ ⵙⵙⴰⵡⴰⵍⴻⵏ ⵡⴰⵔ ⵉⴵⵉ ⴰⵎⴻⵏⵏⵉ, ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵏⴷⵉⵎ ⵅ ⵍⵖⴰⵔ ⵏⵏⴻⵙ, ⴰⴷ ⵢⵉⵏⵉ: ⵎⵉⵏ ⴳⴳⵉⵖ? ⴽⵓⵍ ⵉⵊⵊ ⵉⵇⵇⵉⵎ ⵉⵜⵜⴰⵥⵥⴻⵍ ⴰⵎ ⵓⵢⵉⵙ ⵉⵜⵜⴰⵥⵥⵍⴻⵏ ⵖⴰⵔ ⵓⵎⴻⵏⵖⵉ. 7 ⵓⵍⴰ ⴷ ⴰⴱⴻⵍⵍⴰⵔⵊ ⴷⴻⴳ ⵓⵊⴻⵏⵏⴰ ⵉⵙⵙⴻⵏ ⵉⴽⵓⴷⴻⵏ ⵉⵜⵜⵡⴰⴳⴳⴻⵏ ⵏⵏⴻⵙ. ⵜⴰⵊⵍⵉⵍⵍⴻⵃⵜ ⴷ ⵜⴼⴰⵍⴵⴻⵙⵜ ⵏⵏⵉ ⵉⵟⵟⴰⵡⴻⵏ ⴷⴻⴳ ⵡⴻⵏⵏⴻⴹ, ⵃⴹⴰⵏⵜ ⵍⵎⵉⵊⴰⵍ ⵏ ⵡⵓⴼⴼⵓⵖ ⵏⵙⴻⵏⵜ, ⵍⴳⴻⵏⵙ ⵉⵏⵓ ⵎⴰⵛⴰ ⵡⴰⵔ ⵉⵙⵙⵉⵏ ⵍⵃⵓⴽⵎ ⵏ ⵙⵉⴷⵉ. ^■  

8 ⵎⴰⵎⵎⴻⵛ ⵜⴻⵇⵇⴰⵔⴻⵎ: ⵏⴻⵛⵛⵉⵏ ⴷ ⵉⵎⵉⵖⵉⵙⴻⵏ ⴷ ⵛⵛⴰⵔⵉⵄⴰ ⵏ ⵙⵉⴷⵉ ⴰⵇⴰ-ⵜⵜ ⴰⴽⵉⴷⵏⴻⵖ! ⵙ ⵜⵉⴷⴻⵜⵜ, ⵅⵥⴰⵔ, ⵍⴻⵇⵍⴻⵎ ⵏ ⵉⵅⴰⵔⵔⵉⵇⴻⵏ ⵏ ⵉⵎⴰⵔⵉⵔⴻⵏ ⵉⴳⴳⴰ ⵛⵛⴰⵔⵉⵄⴰ ⴷ ⴰⵅⴰⵔⵔⵉⵇ. 9 ⵉⵎⵉⵖⵉⵙⴻⵏ ⵜⵜⵙⴻⴹⵃⴰⵏ, ⵜⵜⴻⴳⴳⵯⴻⴷⴻⵏ ⵓⵛⴰ ⵜⵜⵡⴰⵃⴻⴱⴱⵙⴻⵏ. ⵅⵥⴰⵔ, ⵏⴹⴰⵔⴻⵏ ⴰⵡⴰⵍ ⵏ ⵙⵉⴷⵉ, ⵅⴻⵏⵏⵉ ⵎⴰⵎⵎⴻⵛ ⵉ ⵜⴻⴵⴰ ⵜⵉⵖⵉⵜ ⵉ ⵖⴰⵔⵙⴻⵏ?”

10 “ⵙ ⵓⵢⴻⵏⵏⵉ ⴰⴷ ⵡⵛⴻⵖ ⵜⵉⵎⵖⴰⵔⵉⵏ ⵏⵙⴻⵏ ⵉ ⵉⵏⵏⴻⵖⵏⵉ, ⵉⵢⵢⴰⵔⴻⵏ ⵏⵙⴻⵏ ⵉ ⵢⴻⵏⵏⵉ ⵉ ⵖⴰ ⵉⵃⴻⵡⵡⵙⴻⵏ ⵜⴰⵎⵎⵓⵔⵜ, ⵎⴰⵖⴰⵔ ⵥⴻⴳ ⵓⵎⴻⵥⵢⴰⵏ ⴰⵍ ⴰⵎⴻⵇⵇⵔⴰⵏ ⴰⵔⴻⵥⵥⵓⵏ ⵎⴰⵔⵔⴰ ⵏⵉⵜⵏⵉ ⵜⵉⵥⵉ ⵏⵙⴻⵏ, ⵓⵛⴰ ⵥⴻⴳ ⵓⵏⴰⴱⵉ ⴰⵍ ⴰⴽⴻⵀⵀⴰⵏ ⵎⴰⵔⵔⴰ ⵜⵛⴻⵎⵎⴻⵜ. ^■  

11 ⵜⴰⵔⴻⵥⵥⵉⵜ ⵏ ⵍⴳⴻⵏⵙ ⵉⵏⵓ ⵅⵙⴻⵏ ⴰⴷ ⵜⵜ ⵙⵙⴳⴻⵏⴼⴰⵏ ⵙ ⵍⴻⵀⵡⴻⵏ, ⵇⵇⴰⵔⴻⵏ: ‘ⵍⴻⵀⵏⴰ, ⵍⴻⵀⵏⴰ!’, ⵎⴰⵛⴰ ⵡⴰⵔ ⴷⵉⵏ ⵉⴵⵉ ⵍⴻⵀⵏⴰ.

12 ⵎⴰ ⴰⴷ ⵙⵙⴻⴹⵃⴰⵏ ⵏⵉⵜⵏⵉ, ⵎⵉⵏⵥⵉ ⵜⵜⴻⴳⴳⴻⵏ ⵊⵊⵄⵉⴼⴻⵛⵜ? ⵏⵉⵜⵏⵉ ⵡⴰⵔ ⵜⵜⵙⴻⴹⵃⵉⵏ ⵛⴰ, ⵍⴻⵃⵢⴰ ⵡⴰⵔ ⵜ ⵙⵙⵉⵏⴻⵏ. ⵙ ⵓⵢⴻⵏⵏⵉ ⴰⴷ ⵡⴹⴰⵏ ⵊⴰⵔ ⵉⵏⵏⵉ ⵉⵡⴻⵟⵟⴰⵏ ⴷⵉ ⵍⵡⴻⵇⵜ ⵎⴻⵍⵎⵉ ⵥⵥⴰⵢⵙⴻⵏ ⵉ ⵖⴰ ⵅⴻⵍⴼⴻⵖ ⴰⴷ ⵏⵏⵇⴰⵔⴹⴻⵏ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.”

13 “ⵏⴻⵛⵛ ⴰⴷ ⵜⴻⵏ ⵍⴻⵇⴹⴻⵖ ⵇⴰⵄ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ. ⵡⴰⵔ ⵉⵇⵇⵉⵎ ⵄⴰⴷ ⵓⴹⵉⵍ ⵖⴰⵔ ⵜⵥⴰⵢⴰⵔⵜ ⵓ ⵡⴰⵔ ⵜⴻⵇⵇⵉⵎ ⵄⴰⴷ ⵜⴰⵥⴰⵔⵜ ⵖⴰⵔ ⵜⵛⴻⵊⵊⴰⵔⵜ ⵏ ⵡⴰⵔⵜⵓ, ⵄⴰⴷ ⵜⵉⴼⵔⴰⵢ ⵡⴹⴰⵏⵜ. ⵏⴻⵛⵛ ⴰⴷ ⵖⴰⵔⵙⴻⵏ ⴰⵡⵢⴻⵖ ⵉⵏⵏⵉ ⵅⴰⵙⴻⵏ ⵉ ⵖⴰ ⵉⵄⴻⴼⵙⴻⵏ.”^■  

14 “ⵎⴰⵢⴻⵎⵎⵉ ⴷⴰ ⵏⴻⵇⵇⵉⵎ? ⵙⵎⵓⵏⴻⵎ ⵉⵅⴻⴼ ⵏⵡⴻⵎ, ⴻⵊⵊ ⴰⵏⴻⵖ ⴰⴷ ⵏⴰⴷⴻⴼ ⵖⴰⵔ ⵜⵏⴻⴷⴷⴰⵎ ⵉⴼⴰⵔⵢⴻⵏ ⵓⵛⴰ ⴰⴷ ⴷⵉⵏ ⵏⴻⵙⵇⴰⵔ. ⴰⵇⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵢⴰⵔⵔⴰ ⴰⵏⴻⵖ ⴰⴷ ⵏⴻⵙⵇⴰⵔ ⵓⵛⴰ ⵉⵡⵛⴰ ⴰⵏⴻⵖ ⴰⵎⴰⵏ ⵉⵙⵎⵓⵎⴻⵏ ⵎⴰⵖⴰⵔ ⵏⴻⵅⴹⴰ ⵅ ⵙⵉⴷⵉ. ^■  

15 ⵏⴻⵙⵙⵉⵜⵜⵉⵎ ⴷⵉ ⵍⴻⵀⵏⴰ, ⵎⴰⵛⴰ ⵡⴰⵔ ⴷⵉⵏ ⵎⵉⵏ ⵉⵚⴻⴱⵃⴻⵏ, ⴷⵉ ⵍⵡⴻⵇⵜ ⵏ ⵓⵙⴳⴻⵏⴼⵉ, ⵎⴰⵛⴰ ⵅⵥⴰⵔ, ⵎⵖⵉⵔ ⴰⵙⵏⴻⵅⵍⵉⵄ. ^■  

16 ⵣⵉ ⴷⴰⵏ ⵉⵜⵜⵡⴰⵙⴻⵍ ⵓⵙⴰⵃⴰⵔⵜ ⵏ ⵢⴻⵢⵙⴰⵏ ⵏⵏⴻⵙ, ⵥⴻⴳ ⵡⴻⵙⵏⴻⵃⵏⴻⵃ ⵏ ⵢⴻⵢⵙⴰⵏ ⵏⵏⴻⵙ ⵜⴻⵏⵀⴻⵥⵥⴰ ⵎⴰⵔⵔⴰ ⵜⴰⵎⵎⵓⵔⵜ. ⵏⵉⵜⵏⵉ ⴰⴷ ⴷⴷ-ⴰⵙⴻⵏ ⴰⴷ ⵛⵛⴻⵏ ⵜⴰⵎⵎⵓⵔⵜ ⴷ ⵍⵖⵉⴵⴻⵜ ⵏⵏⴻⵙ, ⵜⴰⵏⴷⵉⵏⵜ ⵙ ⵉⵎⴻⵥⴷⴰⵖ ⵏⵏⴻⵙ. ^■  

17 ⵎⴰⵖⴰⵔ ⵅⵥⴰⵔ, ⵏⴻⵛⵛ ⴰⴷ ⵙⵙⴻⴽⴽⴻⵖ ⵊⴰⵔ ⴰⵡⴻⵎ ⵉⴼⵉⵖⵔⴰⵏ, ⵉⴼⵉⵖⵔⴰⵏ ⵏ ⴰⵔⵔⵀⴰⵊ, ⴰⴽⵉⴷⵙⴻⵏ ⵡⴰⵔ ⵉⵏⴻⴼⴼⴻⵄ ⵓⵄⴻⵥⵥⴻⵎ. ⵉⵏⴰ ⴰⴷ ⴽⴻⵏⵏⵉⵡ ⵥⴻⵄⴼⴻⵏ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.” ^■  

18 “ⴰⵎⵃⴰⴷ ⵉⵏⵓ ⴰⵇⴰ ⵉⴷⵡⴻⵍ ⴷ ⴰⵛⴹⴰⵏ, ⵓⵍ ⵉⵏⵓ ⵢⵓⵃⴻⵍ ⴷⴻⴳ ⵉⵅⴻⴼ ⵉⵏⵓ.

19 ⵅⵥⴰⵔ, ⵍⵃⴻⵙⵙ ⵏ ⵉⵖⵓⵢⵢⴰⵏ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ ⵥⵉ ⵜⴻⵎⵎⵓⵔⵜ ⵜⵉⴳⴳⵯⴻⵊ: ‘ⵎⴰ ⵙⵉⴷⵉ ⵡⴰⵔ ⵉⴵⵉ ⴷⵉ ⵚⵉⵀⵢⵓⵏ, ⵎⴰ ⵡⴰⵔ ⴷⴰⵢⴻⵙ ⵉⴵⵉ ⵓⵊⴻⴵⵉⴷ ⵏⵏⴻⵙ?’ ”

“ⵎⴰⵢⴻⵎⵎⵉ ⵉ ⴷ ⴰⵢⵉ ⵙⵄⴰⵔⴻⵏ ⵙ ⵍⴻⵅⵢⴰⵍⴰⵜ ⵏⵙⴻⵏ ⵉⵏⴻⵇⵛⴻⵏ, ⵙ ⵍ’ⴰⵚⵏⴰⵎ ⵏⵙⴻⵏ ⵉⴼⴻⵏⵏⴰⵏ ⵏ ⵉⴱⴰⵔⵔⴰⵏⵉⵢⵢⴻⵏ?”

20 “ⵜⴻⵄⴷⵓ ⵜⵎⴻⵢⵔⴰ, ⵉⴼⴼⴻⵖ ⵓⵏⴻⴱⴷⵓ, ⵓ ⵏⴻⵛⵛⵉⵏ ⵄⴰⴷ ⵡⴰⵔ ⵏⴻⵏⵊⵉⵎ.”

21 “ⵏⴻⵛⵛ ⵜⵜⵡⴰⵔⵥⵉⵖ ⵥⵉ ⵙⵙⵉⴱⴱⴻⵜ ⵏ ⵜⴰⵔⴻⵥⵥⵉⵜ ⵏ ⵢⴻⵙⵙⵉⵙ ⵏ ⵍⴳⴻⵏⵙ ⵉⵏⵓ. ⵏⴻⵛⵛ ⴰⵔⴹⴻⵖ ⴰⵔⵔⵓⴹ ⴷ ⴰⴱⴰⵔⵛⴰⵏ, ⵉⵛⴻⴱⴱⴰⵔ ⴷⴰⵢⵉ ⵓⵏⴻⵅⵍⵉⵄ. ^□   22 ⵎⴰ ⵡⴰⵔ ⴷⵉⵏ ⵉⴵⵉ ⴱⴰⵍⵙⴰⵎ ⴷⵉ ⵊⵉⵍⵄⴰⴷ? ⵎⴰ ⵡⴰⵔ ⴷⵉⵏⵏⵉ ⵉⴵⵉ ⵓⵎⴻⵙⴳⴻⵏⴼⵓ? ⵎⴰⵢⴻⵎⵎⵉ ⵡⴰⵔ ⵉⵏⵏⵉⴹ ⵓⵢⴻⵥⵥⵉⵎ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ? ^■   23 ⴰⵅ, ⵎⵍⵉ ⴰⵥⴻⴵⵉⴼ ⵉⵏⵓ ⵎⴰⵛⴰ ⴷ ⴰⵎⴰⵏ, ⵜⵉⵟⵟ ⵉⵏⵓ ⴷ ⵍⵄⵓⵏⵚⴰⵔ ⵏ ⵉⵎⴻⵟⵟⴰⵡⴻⵏ, ⵅⴻⵏⵏⵉ ⴰⵥⵉⵍ ⴷ ⴵⵉⵍⴻⵜ ⵉⵍⵉ ⵔⵓⵖ ⵅ ⵢⴻⵏⵏⵉ ⵉⵜⵜⵡⴰⵏⵖⴻⵏ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ.” ^■