1 “ⴷⵉ ⵟⵟⵡⴻⵄ ⵏ ⵚⵉⵀⵢⵓⵏ ⵡⴰⵔ ⵥⴻⵎⵎⴰⵔⴻⵖ ⴰⴷ ⵙⵙⴻⵖⴷⴻⵖ, ⴷⵉ ⵟⵟⵡⴻⵄ ⵏ ⵓⵔⵛⴰⵍⵉⵎ ⵡⴰⵔ ⵜⵜⴻⵙⵇⵉⵔⵉⵖ, ⵖⴰⵔⴻⵙ ⴰⵍ ⴷⴷ ⵖⴰ ⵜⴻⵏⵇⴰⵔ ⵜⵙⴻⴳⴷⴰ ⵏⵏⴻⵙ ⴰⵎ ⵜⵉⵙⵙⵉⵇⵜ ⵓ ⴰⵙⴻⵏⵊⴻⵎ ⵏⵏⴻⵙ ⴰⵎ ⵡⴻⵙⴼⴻⴹ ⵢⴰⵔⴻⵇⵇⴻⵏ. 2 ⴰⴷ ⵥⴰⵔⴻⵏ ⵍⴻⴳⵏⵓⵙ ⵜⴰⵙⴻⴳⴷⴰ ⵏⵏⴻⵎ ⵓ ⵎⴰⵔⵔⴰ ⵉⵊⴻⴵⵉⴷⴻⵏ ⴰⴷ ⵥⴰⵔⴻⵏ ⴰⵄⵓⴵⵉ ⵏⵏⴻⵎ. ⴰⴷ ⴰⵎ ⵍⴰⵖⴰⵏ ⵙ ⵢⵉⵊⵊ ⵏ ⵢⵉⵙⴻⵎ ⵏ ⵊⴷⵉⴷ ⵏⵏⵉ ⴷ ⴰⵎ ⵉ ⵖⴰ ⵉⴳⴳⴰ ⵓⵇⴻⵎⵎⵓⵎ ⵏ ⵙⵉⴷⵉ. ^■   3 ⴰⴷ ⵜⵉⵍⵉⴷ ⴷ ⵜⵜⴰⵊ ⵉⵛⴻⵡⵡⴰⵔⴻⵏ ⴷⴻⴳ ⵓⴼⵓⵙ ⵏ ⵙⵉⴷⵉ, ⵓⵍⴰ ⴷ ⴰⵔⴻⵥⵥⴻⵜ ⵉⴳⴻⵍⵍⴷⴻⵏ ⴷⴻⴳ ⵓⴼⵓⵙ ⵏ ⴰⵔⴻⴱⴱⵉ ⵏⵏⴻⵎ. 4 ⵡⴰⵔ ⴷ ⴰⵎ ⵇⵇⴰⵔⴻⵏ ⵄⴰⴷ ‘ⵜⴻⵏⵏⵉ ⴷⵉ ⵙⴻⵎⵃⴻⵏ!’, ⵓ ⵡⴰⵔ ⴷ ⴰⵙ ⵇⵇⴰⵔⴻⵏ ⵄⴰⴷ ⵉ ⵜⴻⵎⵎⵓⵔⵜ ⵏⵏⴻⵎ ‘ⵜⴰⵎⵎⵓⵔⵜ ⵉⵅⵍⴰⵏ!’, ⵎⴰⵛⴰ ⴰⴷ ⴰⵎ ⵉⵏⵉⵏ ‘ⵍⵅⴰⴹⴰⵔ ⵉⵏⵓ!’, ⵓ ⵜⴰⵎⵎⵓⵔⵜ ⵏⵏⴻⵎ ‘ⵜⴰⵏⴻⵎⵍⴰⵛⵜ!’, ⵎⴰⵖⴰⵔ ⵜⵓⵙⵉⴷ-ⴷⴷ ⵅ ⵍⵅⴰⴹⴰⵔ ⵏ ⵙⵉⴷⵉ ⵓ ⵜⴰⵎⵎⵓⵔⵜ ⵏⵏⴻⵎ ⴳⴳⵓⵔ ⴰⴷ ⵜᵉⵜⵜⵡⴰⵎⵍⴻⵛ. 5 ⵎⴰⵖⴰⵔ ⴰⵎ ⵓⵄⴻⵥⵔⵉ ⵉⵎⵍⴻⵛ ⵜⴰⵄⵥⴰⵔⴻⵛⵜ, ⴰⵎⵎⵓ ⵉ ⴽⵉⴷⴻⵎ ⵖⴰ ⵎⴻⵍⵛⴻⵏ ⵉⵃⴻⵏⵊⵉⵔⴻⵏ ⵏⵏⴻⵎ, ⵓⵛⴰ ⴰⵎ ⵎⵓⵍⴰⵢ ⵉⴼⴰⵔⵔⴻⵃ ⵉ ⵜⴻⵙⵍⵉⵜ, ⴰⵎⵎⵓ ⵉ ⴷ ⴰⵎ ⵖⴰ ⵉⴼⴰⵔⵃ ⴰⵔⴻⴱⴱⵉ ⵏⵏⴻⵎ.”

6 “ⴰ ⵓⵔⵛⴰⵍⵉⵎ, ⵙⵙⴱⴻⴷⴷⴻⵖ ⵉⵄⴻⵙⵙⴰⵙⴻⵏ ⵅ ⵍⴻⵃⵢⵓⴹ ⵏⵏⴻⵎ ⵏⵏⵉ ⵡⴰⵔ ⵙⵙⵖⵉⴷⵉⵏ ⵍⴻⴱⴷⴰ, ⴷⴻⴳ ⵡⴰⵙⵙ ⴷ ⴵⵉⵍⴻⵜ. ⴰ ⴽⴻⵏⵏⵉⵡ ⵉⵏⵏⵉ ⵉⵄⴻⵇⵇⵍⴻⵏ ⵅ ⵙⵉⴷⵉ, ⵡⴰⵔ ⵜⵜⴰⵔⴻⵢⵢⵃⴻⵎ! 7 ⵡⴰⵔ ⵜⵜⴰⵔⴻⵢⵢⵃⴻⵎ ⴷⵉ ⵟⵟⵡⴻⵄ ⵏⵏⴻⵙ, ⵖⴰⵔⴻⵙ ⴰⵍ ⴷⴷ ⵉⵙⵙⴱⴻⴷⴷ ⵓⵔⵛⴰⵍⵉⵎ ⵓⵛⴰ ⵉⴳⴳⴰ ⵉ-ⵜⵜ ⴷ ⴰⵚⴻⴱⴱⴻⵃ ⵅ ⵜⴻⵎⵎⵓⵔⵜ. 8 ⵙⵉⴷⵉ ⵉⵊⵊⵓⴵ ⵖⴰⵔ ⵓⴼⵓⵙ ⵏⵏⴻⵙ ⴰⴼⵓⵙⵉ ⵓ ⵖⴰⵔ ⵓⵖⵉⵍ ⵏⵏⴻⵙ ⵉⵊⴻⵀⴷⴻⵏ: ‘ⵄⴻⵎⵎⴰⵔⵚ ⵄⴰⴷ ⴰⴷ ⵡⵛⴻⵖ ⵉⵎⴻⵏⴷⵉ ⵏⵏⴻⵎ ⴷ ⵎⴰⵛⵛⴰ ⵉ ⵍⵄⴻⴷⵢⴰⵏ ⵏⵏⴻⵎ, ⵓ ⵄⴻⵎⵎⴰⵔⵚ ⵄⴰⴷ ⴰⴷ ⵙⵙⴻⵙⵡⴻⵖ ⵉⴱⴰⵔⵔⴰⵏⵉⵢⵢⴻⵏ ⴱⵉⵏⵓ ⵏⵏⴻⵎ ⵏ ⵊⴷⵉⴷ ⵉ ⵅ ⵜⴻⴽⵙⵉⴷ ⵜⴰⵎⴰⵔⴰ! 9 ⵎⴰⵖⴰⵔ ⵡⵉ ⵜ ⵖⴰ ⵉⵙⵙⵎⵓⵏⴻⵏ, ⴳⴳⵓⵔ ⴰⴷ ⵥⵥⴰⵢⴻⵙ ⵛⵛⴻⵏ ⵓ ⴰⴷ ⵙⵙⴻⵎⵖⴰⵔⴻⵏ ⵙⵉⴷⵉ, ⵓ ⵡⵉ ⵉ ⵖⴰ ⵉⵍⴻⵇⴹⴻⵏ ⴰⴹⵉⵍ, ⴰⴷ ⵥⵥⴰⵢⴻⵙ ⵙⵡⴻⵏ ⴷⵉ ⵍⴻⵎⵔⴰⵃⴰⵜ ⵏ ⵣⵥⴰⵡⴻⵛⵜ ⵉⵏⵓ ⵉⵇⴻⴷⴷⵙⴻⵏ.’ ”

10 “ⵄⴷⵓⵎ, ⵄⴷⵓⵎ ⵥⵉ ⵜⴻⵡⵡⵓⵔⴰ ⵓⵛⴰ ⵙⵡⴻⵊⴷⴻⵎ ⵉ ⵍⴳⴻⵏⵙ ⴰⴱⵔⵉⴷ. ⵙⴳⴻⵄⵄⴷⴻⵎ, ⵙⴳⴻⵄⵄⴷⴻⵎ ⴰⴱⵔⵉⴷ ⵉⵡⴰⵟⴰⵏ, ⴽⴽⵙⴻⵎ ⵉⵥⵔⴰ, ⵙⴳⴻⵄⵄⴷⴻⵎ ⵜⴰⵄⴻⴵⴰⵏⵜ ⵉ ⵍⴻⴳⵏⵓⵙ! ^■  

11 ⵅⵥⴰⵔ, ⵙⵉⴷⵉ ⵉⴳⴳⴰ ⴰⴷ ⵙⵍⴻⵏ, ⴰⵍ ⵟⵟⴰⵔⴼ ⵏ ⵜⴻⵎⵎⵓⵔⵜ. ⵉⵏⵉⵎ ⵉ ⵢⴻⴵⵉⵙ ⵏ ⵚⵉⵀⵢⵓⵏ: ‘ⵅⵥⴰⵔ, ⴰⵙⴻⵏⵊⴻⵎ ⵏⵏⴻⵎ ⵢⵓⵙⴰ-ⴷⴷ, ⵅⵥⴰⵔ, ⵍⵎⵓⵏⴻⵜ ⵏⵏⴻⵙ ⵖⴰⵔⴻⵙ ⵓⵛⴰ ⵍⴻⵅⵍⴰⵚ ⵏⵏⴻⵙ ⵖⴰⵔ ⵥⵥⴰⵜⴻⵙ.’

12 ⴰⴷ ⴰⵙⴻⵏ ⵇⵇⴰⵔⴻⵏ: ‘ⵍⴳⴻⵏⵙ ⴰⵎⵇⴻⴷⴷⴰⵙ, ⵉⵎⴻⴼⴷⵉⵢⵢⴻⵏ ⵏ ⵙⵉⴷⵉ!’, ⵓⵛⴰ ⴰⴷ ⴰⵎ ⵇⵇⴰⵔⴻⵏ: ‘ⵜⴻⵏⵏⵉ ⵅ ⵜⵓⵖⴰ ⴰⵔⴻⵥⵥⵓⵏ!’ ⴷ ‘ⵜⴰⵏⴷⵉⵏⵜ ⵉ ⵡⴰⵔ ⵉⵜⵜⵡⴰⵊⵊⴻⵏ!’.” ^□