1 “ⴰ, ⵎⴰⵔⵔⴰ ⵉⵏⵏⵉ ⵉⴼⴼⵓⴷⴻⵏ, ⴰⵙⴻⵎ-ⴷⴷ ⵖⴰⵔ ⵡⴰⵎⴰⵏ, ⵡⴻⵏⵏⵉ ⵡⴰⵔ ⵖⴰⵔ ⴵⵉⵏⵜ ⵜⴻⵏⵄⴰⵛⵉⵏ, ⴰⵙⴻⵎ-ⴷⴷ, ⵙⵙⵖⴻⵎ ⵓⵛⴰ ⵛⵛⴻⵎ, ⵡⴰⵀ ⴰⵙⴻⵎ-ⴷⴷ ⵓⵛⴰ ⵙⵖⴻⵎ ⴱⵉⵏⵓ ⴷ ⵓⵖⵉ, ⴱⵍⴰ ⵜⵉⵏⵄⴰⵛⵉⵏ ⵓ ⴱⵍⴰ ⵜⵜⴰⵎⴰⵏ. ^■   2 ⵎⴰⵢⴻⵎⵎⵉ ⵜⵡⴻⵥⵥⵏⴻⵎ ⵏⵏⵓⵇⴰⵔⵜ ⵉ ⵎⵉⵏ ⵡⴰⵔ ⵉⴵⵉⵏ ⴷ ⴰⵖⵔⵓⵎ ⵓ ⵎⴰⵢⴻⵎⵎⵉ ⵜⵊⴻⵀⴷⴻⵎ ⵉ ⵎⵉⵏ ⵡⴰⵔ ⵉⵊⵊⵉⵡⵏⴻⵏ? ⵙⵍⴻⵎ-ⴷⴷ ⵖⴰⵔⵉ ⵎⵍⵉⵃ, ⵛⵛⴻⵎ ⵎⵉⵏ ⵉⵛⵏⴰⵏ ⵓⵛⴰ ⴻⵊⵊ ⵍⴻⵄⵎⴰⵔ ⵏⵡⴻⵎ ⴰⴷ ⵉⵖⴻⴱⴱⴰ ⵜⴰⴷⵓⵏⵜ. 3 ⵡⵛⴻⵎ ⴰⵎⴻⵥⵥⵓⵖ ⵓⵛⴰ ⴰⵙⴻⵎ-ⴷⴷ ⵖⴰⵔⵉ, ⵙⵍⴻⵎ, ⵅⴻⵏⵏⵉ ⴰⴷ ⵉⴷⴷⴰⵔ ⵍⴻⵄⵎⴰⵔ ⵏⵡⴻⵎ, ⵎⴰⵖⴰⵔ ⵏⴻⵛⵛ ⴰⴷ ⴰⴽⵉⴷⵡⴻⵎ ⴳⴳⴻⵖ ⵉⵊⵊ ⵏ ⵍⵄⴰⵀⴷ ⵉ ⵍⴻⴱⴷⴰ, ⵜⵉⵎⴻⴳⴳⴰ ⵏ ⵜⵎⴻⵅⵙⵉⵡⵜ ⵓ ⵏ ⵍⴰⵎⴰⵏ ⵉⵛⴻⵡⵡⴰⵔⴻⵏ ⵉ ⴷⴰⵡⵓⴷ. ^■  

4 ⵅⵥⴰⵔ, ⴳⴳⵉⵖ ⵜ ⴷ ⴰⵛⴻⵀⵀⴰⴷ ⵉ ⵛⵛⵓⵄⵓⴱ, ⴷ ⵍⵃⴰⴽⴻⵎ ⴷ ⴱⴰⴱ ⵏ ⵍⵓⵎⵓⵔ ⵉ ⵛⵛⵓⵄⵓⴱ. 5 ⵅⵥⴰⵔ, ⴰⴷ ⵜⵍⴰⵖⵉⴷ ⵉⵊⵊ ⵏ ⵍⴳⴻⵏⵙ ⵉ ⵡⴰⵔ ⵜⴻⵙⵙⵉⵏⴻⴷ, ⵓ ⵍⴳⴻⵏⵙ ⵉ ⵡⴰⵔ ⵛⴻⴽ ⵉⵙⵙⵉⵏⴻⵏ ⴰⴷ ⵖⴰⵔⴻⴽ ⴷⴷ-ⵢⴰⵙ ⴷⵉ ⵟⵟⵡⴻⵄ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵓ ⴷⵉ ⵟⵟⵡⴻⵄ ⵏ ⵓⵎⵇⴻⴷⴷⴰⵙ ⵏ ⵉⵙⵔⴰⵉⵍ, ⵎⵉⵏⵥⵉ ⵏⴻⵜⵜⴰ ⵉⵙⵙⵄⵓⴵⴰ ⵛⴻⴽ.”

6 “ⴰⵔⵥⵓⵎ ⵅ ⵙⵉⴷⵉ ⵍⴰⵎⵉ ⵏⴻⵜⵜⴰ ⵉⵜⵜⴻⵊⵊⴰ ⵉⵅⴻⴼ ⵏⵏⴻⵙ ⴰⴷ ⵉⵜⵜⵡⴰⴼ, ⵍⴰⵖⴰⵎ ⴰⵙ ⵍⴰⵎⵉ ⴷⴷ-ⵢⵓⴷⴻⵙ ⵏⴻⵜⵜⴰ. 7 ⴻⵊⵊ ⴰⵄⴻⴼⴼⴰⵏ ⴰⴷ ⵉⵙⵎⴻⵃ ⴷⴻⴳ ⵡⴻⴱⵔⵉⴷ ⵏⵏⴻⵙ ⵓⵛⴰ ⴰⵔⵢⴰⵥ ⵏ ⵍⵖⴻⵛⵛ ⴷⴻⴳ ⵉⵅⴰⵔⵔⵉⵚⴻⵏ ⵏⵏⴻⵙ. ⴻⵊⵊ ⵉ-ⵜ ⴰⴷ ⴷⴷ-ⵉⴷⵡⴻⵍ ⵖⴰⵔ ⵙⵉⴷⵉ, ⵅⴻⵏⵏⵉ ⵏⴻⵜⵜⴰ ⴰⴷ ⴰⵙ ⵉⵥⵥⵉⴵⴻⵥ, ⵓ ⵖⴰⵔ ⴰⵔⴻⴱⴱⵉ ⵏⵏⴻⵖ, ⵎⴰⵖⴰⵔ ⵏⴻⵜⵜⴰ ⵉⵖⴻⴼⴼⴰⵔ ⴰⵟⵟⴰⵙ ⵏ ⵜⵡⴰⵍⴰⵡⵉⵏ.

8 ⵎⴰⵖⴰⵔ ⵉⵅⴰⵔⵉⵚⵚⴻⵏ ⵉⵏⵓ ⵡⴰⵔ ⴵⵉⵏ ⴰⵎ ⵉⵅⴰⵔⵉⵚⵚⴻⵏ ⵏⵡⴻⵎ ⵓ ⵉⴱⵔⵉⴷⴻⵏ ⵉⵏⵓ ⵡⴰⵔ ⴵⵉⵏ ⴰⵎ ⵉⴱⵔⵉⴷⴻⵏ ⵏⵡⴻⵎ, ⵉⵏⵏⴰ ⵙⵉⴷⵉ. 9 ⵎⴰⵖⴰⵔ ⴰⵎ ⵎⴰⵎⵎⴻⵛ ⵓⵄⵍⴰⵏ ⵉⵊⴻⵏⵡⴰⵏ ⵅ ⵜⴻⵎⵎⵓⵔⵜ, ⴰⵎⵎⵓ ⵉ ⵢⵓⵄⵍⴰⵏ ⵉⴱⵔⵉⴷⴻⵏ ⵉⵏⵓ ⵅ ⵉⴱⵔⵉⴷⴻⵏ ⵏⵡⴻⵎ ⵓ ⵉⵅⴰⵔⵔⵉⵚⴻⵏ ⵉⵏⵓ ⵅ ⵉⵅⴰⵔⵔⵉⵚⴻⵏ ⵏⵡⴻⵎ.

10 ⵎⴰⵖⴰⵔ ⴰⵎ ⵎⴰⵎⵎⴻⵛ ⵉ ⴷⴷ-ⵉⵀⴻⴽⴽⵡⴰ ⵡⴻⵏⵥⴰⵔ ⴷ ⵡⴻⴷⴼⴻⵍ ⵥⴻⴳ ⵓⵊⴻⵏⵏⴰ ⵓ ⵡⴰⵔ ⵖⴰⵔⴻⵙ ⴷⴷ-ⵉⴷⴷⵉⴽⴽⵡⵉⵍ ⵛⴰ, ⵎⴰⵛⴰ ⵉⵙⵙⵓⴼⴼ ⵜⴰⵎⵎⵓⵔⵜ ⴷ ⴰⵎⴻⵥⵡⴰⵔⵓ ⵓⵛⴰ ⵉⵜⵜⴰⵔⵔⴰ ⵉ-ⵜⵜ ⴰⴷ ⵜⴻⵡⵛ ⵍⵖⵉⴵⴻⵜ, ⴰⴷ ⵜⴰⵡⵉ ⴰⵖⴻⵎⵎⵓⵢ, ⵓⵛⴰ ⴰⵡⴰⵔⵏⵉ ⴰⵙ ⵉⵜⵜⵉⵛ ⵥⵥⴰⵔⵉⵄⴻⵜ ⵉ ⵡⴻⵏⵏⵉ ⵉⵥⴰⵔⵔⵄⴻⵏ ⴷ ⵡⴻⵖⵔⵓⵎ ⵉ ⵡⴻⵏⵏⵉ ⵉⵜⵜⴻⵜⵜⴻⵏ,

11 ⴰⵎⵎⵓ ⵉ ⵖⴰ ⵢⵉⵍⵉ ⵓⵍⴰ ⴷ ⴰⵡⴰⵍ ⵉ ⴷⴷ-ⵉⵜⵜⴻⴼⴼⵖⴻⵏ ⵥⴻⴳ ⵓⵇⴻⵎⵎⵓⵎ ⵉⵏⵓ. ⵡⴰⵔ ⴷⴷ ⵖⴰⵔⵉ ⵉⴷⴷⵉⴽⴽⵡⵉⵍ ⵉⵅⵡⴰ, ⵎⴰⵛⴰ ⴰⴷ ⵢⴻⴳⴳ ⵎⵉⵏ ⵅⵙⴻⵖ ⵓ ⴰⴷ ⵢⴰⵡⴻⴹ ⵎⴰⵔⵔⴰ ⵎⵉⵏ ⵖⴰⵔ ⵜ ⵙⵙⴻⴽⴽⴻⵖ.

12 ⵎⴰⵖⴰⵔ ⴰⴷ ⵜⴻⴼⴼⵖⴻⵎ ⵙ ⵍⴻⴼⵔⴰⵃⴻⵜ ⵓⵛⴰ ⴰⴷ ⴽⴻⵏⵏⵉⵡ ⵙⵙⵇⴻⴱⴱⴹⴻⵏ ⴷⵉ ⵍⴻⵀⵏⴰ. ⵉⴷⵓⵔⴰⵔ ⴷ ⵜⴻⵡⵔⵉⵔⵉⵏ ⴰⴷ ⴷⴷⵓⵇⵇⵥⴻⵏ ⵙ ⵓⵙⵍⵉⵡⵍⴻⵡ ⵥⵥⴰⵜ ⵉ ⵡⵓⴷⴻⵎ ⵏⵡⴻⵎ ⵓ ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏ ⵢⴻⵢⵢⴰⵔ ⴰⴷ ⵡⵜⴻⵏⵜ ⵛⴰⵎⵅⴰ ⵙ ⵉⴼⴰⵙⵙⴻⵏ. ^■  

13 ⴷⴻⴳ ⵡⴻⵎⵛⴰⵏ ⵏ ⵓⵙⴻⵏⵏⴰⵏ ⴰⴷ ⵜⴻⵖⵎⵉ ⵜⵛⴻⵊⵊⴰⵔⵜ ⵏ ⵓⵎⴻⵔⵥⵉ, ⴷⴻⴳ ⵡⴻⵎⵛⴰⵏ ⵏ ⵜⵥⴻⴳⴳⵯⴰⵔⵜ ⴰⴷ ⵜⴻⵖⵎⵉ ⵜⵛⴻⵊⵊⴰⵔⵜ ⵏ ⵜⴰⵔⵉⵃⴰⵏⵜ. ⴰⵢⴰ ⴰⴷ ⵢⵉⵍⵉ ⵉ ⵙⵉⴷⵉ, ⵉ ⵛⵛⴰⵏ ⵏ ⵢⵉⵙⴻⵎ ⵏⵏⴻⵙ, ⵉ ⵍⴻⵄⵍⴰⵎⴻⵜ ⵏ ⵍⴻⴱⴷⴰ ⵉ ⵡⴰⵔ ⵉⵎⴻⵃⵃⵉⵏ ⵄⴻⵎⵎⴰⵔⵚ.” ^□