1 ⴷⵉ ⵍⵡⴻⵇⵜ ⵏⵏⵉ ⵉⵙⵙⴻⴽⴽ ⴱⴰⵔⴰⴷⵓⵅ-ⴱⴰⵍⴰⴷⴰⵏ, ⵎⵎⵉⵙ ⵏ ⴱⴰⵍⴰⴷⴰⵏ, ⴰⵊⴻⴵⵉⴷ ⵏ ⴱⴰⴱⵉⵍ, ⵜⵉⴱⵔⴰⵜⵉⵏ ⴷ ⵉⵛⵜ ⵏ ⵜⴰⵔⵥⴻⴼⵜ ⵖⴰⵔ ⵃⵉⵥⵇⵉⵢⴰ, ⵎⴰⵖⴰⵔ ⵜⵓⵖⴰ ⵉⵙⵍⴰ ⴰⵇⴰ ⵃⵉⵥⵇⵉⵢⴰ ⵉⵀⵍⴻⵛ ⵓⵛⴰ ⵉⴳⴳⴻⵏⴼⴰ. 2 ⵉⴼⴰⵔⵃ ⵥⵥⴰⵢⵙⴻⵏ ⵃⵉⵥⵇⵉⵢⴰ ⵓⵛⴰ ⵉⵙⵙⵛⴻⵏ ⴰⵙⴻⵏ ⵎⴰⵔⵔⴰ ⵜⴰⴷⴷⴰⵔⵜ ⵏ ⵜⵅⵓⴱⴰⵢ ⵏⵏⴻⵙ: ⵏⵏⵓⵇⴰⵔⵜ ⴷ ⵡⵓⵔⴻⵖ ⴷ ⵍⴻⵄⵟⵓⵔ ⴷ ⵥⵥⴻⵛⵜ ⴷ ⵍⴻⵀⵔⵉ ⵏ ⵍⴻⵙⵏⴰⵃ ⵏⵏⴻⵙ ⴷ ⵎⴰⵔⵔⴰ ⵎⵉⵏ ⵉⵜⵜⵡⴰⴼⴻⵏ ⴷⴻⴳ ⵉⵅⵅⴰⵎⴻⵏ ⵏⵏⴻⵙ ⵏ ⵜⵅⵓⴱⴰⵢ. ⵡⴰⵔ ⵉⵇⵇⵉⵎ ⵡⴰⵍⵓ ⴷⵉ ⵜⴰⴷⴷⴰⵔⵜ ⵏⵏⴻⵙ ⵓ ⴷⵉ ⵎⴰⵔⵔⴰ ⵍⴻⵃⴽⴰⵎⴻⵜ ⵏⵏⴻⵙ ⵏⵏⵉ ⵡⴰⵔ ⵜⵓⵖⵉ ⴷ ⴰⵙⴻⵏ ⵜ ⵉⵙⵙⵛⴻⵏ.

3 ⵅⴻⵏⵏⵉ ⵢⵓⵙⴰ-ⴷⴷ ⵓⵏⴰⴱⵉ ⵉⵛⴰⵄⵢⴰ ⵖⴰⵔ ⵓⵊⴻⴵⵉⴷ ⵃⵉⵥⵇⵉⵢⴰ, ⵉⵏⵏⴰ ⴰⵙⴻⵏ: “ⵎⵉⵏ ⵏⵏⴰⵏ ⵉⵔⵢⴰⵥⴻⵏ ⵏⵏⵉ ⵓ ⵎⴰⵏⵉⵙ ⵖⴰⵔⴻⴽ ⴷⴷ-ⵓⵙⵉⵏ?” ⵃⵉⵥⵇⵉⵢⴰ ⵉⵏⵏⴰ: “ⵏⵉⵜⵏⵉ ⵓⵙⵉⵏ-ⴷⴷ ⵥⴻⴳ ⵉⵛⵜ ⵏ ⵜⴻⵎⵎⵓⵔⵜ ⵜⵉⴳⴳⵯⴻⵊ, ⵥⵉ ⴱⴰⴱⵉⵍ.” 4 ⵏⴻⵜⵜⴰ ⵉⵏⵏⴰ: “ⵎⵉⵏ ⵥⵔⵉⵏ ⵏⵉⵜⵏⵉ ⴷⵉ ⵜⴰⴷⴷⴰⵔⵜ ⵏⵏⴻⴽ?” ⵃⵉⵥⵇⵉⵢⴰ ⵉⵏⵏⴰ: “ⵏⵉⵜⵏⵉ ⵥⵔⵉⵏ ⵎⴰⵔⵔⴰ ⵎⵉⵏ ⵉⴵⴰⵏ ⴷⵉ ⵜⴰⴷⴷⴰⵔⵜ ⵉⵏⵓ. ⵡⴰⵔ ⵉⵇⵇⵉⵎ ⵛⴰ ⵥⵉ ⵎⵉⵏ ⵉⴵⴰⵏ ⴷⴻⴳ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵉⵏⵓ, ⵡⴰⵔ ⴷ ⴰⵙⴻⵏ ⵜ ⵙⵙⴻⵛⵏⴻⵖ.” 5 ⵅⴻⵏⵏⵉ ⵉⵏⵏⴰ ⵉⵛⴰⵄⵢⴰ ⵉ ⵃⵉⵥⵇⵉⵢⴰ: “ⵙⴻⵍ ⵉ ⵡⴰⵡⴰⵍ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: 6 ‘ⵅⵥⴰⵔ, ⴰⴷ ⴷⴷ-ⴰⵙⴻⵏ ⵡⵓⵙⵙⴰⵏ ⵎⴻⵍⵎⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷⵉ ⵜⴰⴷⴷⴰⵔⵜ ⵏⵏⴻⴽ ⵓⵍⴰ ⴷ ⵎⵉⵏ ⵢⴰⵔⵡⴻⵏ ⵍⴻⵊⴷⵓⴷ ⵏⵏⴻⴽ ⴰⵍ ⴰⵙⵙ-ⴰ, ⴰⴷ ⵜ ⴰⵡⵢⴻⵏ ⵖⴰⵔ ⴱⴰⴱⵉⵍ. ⵡⴰⵔ ⵉⵜⵜⵖⵉⵎⵉ ⵡⴰⵍⵓ, ⵉⵇⵇⴰⵔ ⵙⵉⴷⵉ. 7 ⴰⴷ ⴰⵡⵢⴻⵏ ⵓⵍⴰ ⵥⴻⴳ ⵉⵃⴻⵏⵊⵉⵔⴻⵏ ⵏⵏⴻⴽ ⵉⵏⵏⵉ ⴷⴷ ⵖⴰ ⵉⴼⴼⵖⴻⵏ ⵥⵥⴰⵢⴻⴽ, ⵉⵏⵏⵉ ⴷⴷ ⵖⴰ ⵜⴻⵊⵊⴻⴷ, ⵃⵉⵎⴰ ⴰⴷ ⵉⵍⵉⵏ ⴷ ⵉⵎⵙⴻⵅⵅⴰⵔⴻⵏ ⵉⵎⵛⴻⵏⵏⵄⴻⵏ ⴷⵉ ⵍⴻⵇⵚⴰⵔ ⵏ ⵓⵊⴻⴵⵉⴷ ⵏ ⴱⴰⴱⵉⵍ.’ ” 8 ⵃⵉⵥⵇⵉⵢⴰ ⵉⵏⵏⴰ ⵉ ⵉⵛⴰⵄⵢⴰ: “ⴰⵡⴰⵍ ⵏ ⵙⵉⴷⵉ ⵉ ⴷ ⴰⵢⵉ ⵜⴻⵏⵏⵉⴷ ⵉⵚⴱⴻⵃ.” ⵏⴻⵜⵜⴰ ⵉⵏⵏⴰ ⵄⴰⵡⴻⴷ: “ⵎⴰⵍⴰ ⵅⴻⵏⵏⵉ ⴷⴻⴳ ⵡⵓⵙⵙⴰⵏ ⵉⵏⵓ ⴰⴷ ⴷⵉⵏ ⵢⵉⵍⵉ ⵍⴻⵀⵏⴰ ⴷ ⵍⴰⵎⴰⵏ!”