ⵍⴻⵀⵍⴰⵛ ⴷ ⵓⵙⴳⴻⵏⴼⵉ ⵏ ⵃⵉⵥⵇⵉⵢⴰ
38
1 ⴷⴻⴳ ⵡⵓⵙⵙⴰⵏ ⵏⵏⵉ ⵉⵃⵍⴻⵛ ⵃⵉⵥⵇⵉⵢⴰ ⵙ ⵉⵊⵊ ⵏ ⵍⴻⵃⵍⴰⵛ ⵉⵏⴻⵇⵇⴻⵏ. ⵢⵓⵙⴰ-ⴷⴷ ⵖⴰⵔⴻⵙ ⵓⵏⴰⴱⵉ ⵉⵛⴰⵄⵢⴰ, ⵎⵎⵉⵙ ⵏ ⴰⵎⵓⵚ, ⵉⵏⵏⴰ ⴰⵙ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⴻⵡⵛ ⵍⵓⵎⵓⵔⴰⵜ ⵉ ⵜⴰⴷⴷⴰⵔⵜ ⵏⵏⴻⴽ, ⵎⴰⵖⴰⵔ ⴰⴷ ⵜⴻⵎⵎⵜⴻⴷ, ⵡⴰⵔ ⵜᵉⵜⵜⵖⵉⵎⵉⴷ ⵜⴻⴷⴷⴰⵔⴻⴷ ⵄⴰⴷ ⴽⵜⴰⵔ.’ ” 2 ⵅⴻⵏⵏⵉ ⵉⵏⵏⴻⵇⵍⴻⴱ ⵃⵉⵥⵇⵉⵢⴰ ⵙ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵍⵃⵉⴹ ⵓⵛⴰ ⵉⵥⵥⵓⴵ ⵖⴰⵔ ⵙⵉⴷⵉ, 3 ⵉⵏⵏⴰ: “ⴰ, ⵙⵉⴷⵉ, ⵄⵇⴻⵍ ⴰⵇⴰ ⵏⴻⵛⵛ ⵓⵢⵓⵔⴻⵖ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ ⵙ ⵍⴰⵎⴰⵏ ⵓ ⵙ ⵢⵉⵊⵊ ⵏ ⵡⵓⵍ ⵉⴽⴻⵎⵎⵍⴻⵏ ⵓ ⴳⴳⵉⵖ ⵎⵉⵏ ⵉⴵⴰⵏ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⴽ.” ⵓⵛⴰ ⵉⴱⴷⴰ ⵃⵉⵥⵇⵉⵢⴰ ⵉⵜⵜⵔⵓ ⵙ ⵊⵊⵀⴻⴷ. 4 ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵉⵛⴰⵄⵢⴰ, ⵉⵏⵏⴰ:
5 “ⵓⵢⵓⵔ, ⵉⵏⵉ ⵉ ⵃⵉⵥⵇⵉⵢⴰ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⴱⴰⴱⴰⵛ ⴷⴰⵡⵓⴷ: ⵏⴻⵛⵛ ⵙⵍⵉⵖ ⵉ ⵜⵥⴰⴵⵉⵜ ⵏⵏⴻⴽ ⵓ ⵥⵔⵉⵖ ⵉⵎⴻⵟⵟⴰⵡⴻⵏ ⵏⵏⴻⴽ. ⵅⵥⴰⵔ, ⵏⴻⵛⵛ ⴰⴷ ⴰⵔⵏⵉⵖ ⵅⴻⵎⵎⴻⵙⵟⴰⵛ ⵏ ⵉⵙⴻⴳⴳⵯⵓⵙⴰ ⵉ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⴽ. 6 ⵏⴻⵛⵛ ⴰⴷ ⵛⴻⴽ ⵙⵙⵏⴻⵊⵎⴻⵖ ⵥⴻⴳ ⵓⴼⵓⵙ ⵏ ⵓⵊⴻⴵⵉⴷ ⵏ ⴰⵛⵛⵓⵔ, ⵓⵍⴰ ⴷ ⵜⴰⵏⴷⵉⵏⵜ. ⵏⴻⵛⵛ ⴰⴷ ⵙⵙⴻⵍⵇⵉⵖ ⵅ ⵜⴻⵏⴷⵉⵏⵜ-ⴰ. 7 ⴰⵢⴰ ⴰⴷ ⵢⵉⵍⵉ ⴷ ⵍⴻⵄⵍⴰⵎⴻⵜ ⵏ ⵙⵉⴷⵉ ⵉ ⵛⴻⴽ, ⴰⵇⴰ ⵙⵉⴷⵉ ⴰⴷ ⵉⴳⴳ ⴰⵡⴰⵍ-ⴰ ⵏⵏⵉ ⵉⵏⵏⴰ. 8 ⵅⵥⴰⵔ, ⴰⴷ ⵙⵙⵄⴻⵇⴱⴻⵖ ⵜⵉⵍⵉ ⵅ ⵜⵔⴻⴼⴼⵉⴷⵉⵏ ⵏ ⴰⵃⴰⵥ ⵏⵏⵉ ⴷⴷ-ⵉⵀⵡⴰⵏ ⵅ ⵜⵔⴻⴼⴼⵉⴷⵉⵏ ⵏ ⴷⴷⵔⵓⵊ ⵏ ⵜⴼⵓⵛⵜ, ⵄⴻⵛⵔⴰ ⵏ ⵜⵔⴻⴼⴼⵉⴷⵉⵏ.’ ” ⵅⴻⵏⵏⵉ ⵜⴻⵄⵇⴻⴱ-ⴷⴷ ⵜⴼⵓⵛⵜ ⵄⴻⵛⵔⴰ ⵏ ⵜⵔⴻⴼⴼⵉⴷⵉⵏ ⵅ ⵜⵔⴻⴼⴼⵉⴷⵉⵏ ⵏⵏⵉ ⵥⵉ ⴷⴷ-ⵜⴻⵀⵡⴰ.
ⵜⴰⵥⴰⴵⵉⵜ ⵙ ⵓⵇⴰⴷⵉ ⵏ ⵃⵉⵥⵇⵉⵢⴰ
9 ⵜⵉⵔⴰ ⵏ ⵃⵉⵥⵇⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵍⴰⵎⵉ ⵜⵓⵖⴰ ⵉⵃⵍⴻⵛ ⵓⵛⴰ ⵉⴳⴳⴻⵏⴼⴰ ⵥⵉ ⵍⴻⵀⵍⴰⵛ ⵏⵏⴻⵙ.
10 “ⵏⴻⵛⵛ ⵏⵏⵉⵖ: ‘ⵍⴻⵅⵅⵓ ⴷⴻⴳ ⵡⴻⵥⵢⴻⵏ ⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵉⵏⵓ ⵉⵜⵜⵅⴻⵚⵚⴰ ⴰⴷ ⵓⵢⵓⵔⴻⵖ ⵅ ⵜⴻⵡⵡⵓⵔⴰ ⵏ ⵍⴰⵅⴰⵔⵜ. ⵎⵉⵏ ⵉⵇⵇⵉⵎⴻⵏ ⵏ ⵉⵙⴻⴳⴳⵯⵓⵙⴰ ⵉⵏⵓ ⵜⵜⵡⴰⴽⴽⵙⴻⵏ ⵥⵥⴰⵢⵉ.’
11 ⵏⴻⵛⵛ ⵏⵏⵉⵖ: ‘ⵡⴰⵔ ⵥⴰⵔⵔⴻⵖ ⵄⴰⴷ ⵙⵉⴷⵉ, ⵙⵉⴷⵉ, ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ, ⵡⴰⵔ ⵜⵜⵡⵉⵍⵉⵖ ⵄⴰⴷ ⵉⵡⴷⴰⵏ ⴰⴽ-ⴷ ⵉⵎⴻⵥⴷⴰⵖ ⵏ ⵍⴰⵅⴰⵔⵜ.’
12 ⵜⵉⵛⵍⵉ ⵏ ⵜⵓⴷⴰⵔⵜ ⵉⵏⵓ ⴰⴷ ⵜⵜ ⵅⴰⴼⵉ ⴰⵔⵥⴻⵏ, ⴰⴷ ⵥⵥⴰⵢⵉ ⵜⵜ ⴽⴽⵙⴻⵏ ⴰⵎ ⴽⴽⵙⴻⵏ ⴰⵇⵉⴹⵓⵏ ⵏ ⵓⵎⴻⴽⵙⴰⵡ. ⴰⵎ ⴱⵓ-ⵓⵥⴻⵟⵟⴰ ⴹⴻⴼⵙⴻⵖ ⵜⵓⴷⴰⵔⵜ ⵉⵏⵓ. ⴰⴷ ⴰⵢⵉ ⵉⵇⴻⵙⵙ ⵥⵉ ⴷⴷⴻⴱⴱⵓⵥ ⵏ ⵜⵅⴻⵢⵢⴰⴹⵜ: ‘ⴰⴷ ⵜⴻⵇⴹⵉⴷ ⵜⵓⴷⴰⵔⵜ ⵉⵏⵓ ⵊⴰⵔ ⵡⴰⵙⵙ ⴷ ⴵⵉⵍⴻⵜ!’ □
13 ⵔⴰⵊⵉⵖ ⵙ ⵚⵚⴱⴰⵔ ⴰⵍ ⴰⵜⴻⴼⴼⵓ. ⵏⴻⵜⵜⴰ ⴰⴷ ⵢⴰⵔⵥ ⵉⵅⵙⴰⵏ ⵉⵏⵓ ⴰⵎ ⵡⴰⵢⵔⴰⴷ: ‘ⴰⴷ ⵜⴻⵇⴹⵉⴷ ⵜⵓⴷⴰⵔⵜ ⵉⵏⵓ ⵊⴰⵔ ⵓⵜⴻⴼⴼⵓ ⴷ ⴵⵉⵍⴻⵜ!’
14 ⵜⵜⵊⵉⵡⵊⵉⵡⴻⵖ ⴰⵎ ⵜⴼⴰⵍⴵⴻⵙⵜ ⵉⵜⵜⴻⵏⵏⴹⴻⵏ ⴰⵎ ⵜᵉⵟⵟⴰⵡ, ⵜⵜⴳⴻⵔⴳⵓⵔⴻⵖ ⴰⵎ ⵜⴻⴷⴱⵉⵔⵜ. ⵙⵙⴳⴻⵄⵄⴷⴻⵖ ⵜⵉⵟⵟⴰⵡⵉⵏ ⵉⵏⵓ: ‘ⴰ ⵙⵉⴷⵉ ⵉⵏⵓ, ⵏⴻⵛⵛ ⵜⵜⵡⴰⵃⵚⴰⵔⴻⵖ, ⵉⵍⵉ ⴷ ⴰⴹⵎⴰⵏ ⵉ ⵏⴻⵛⵛ!’ ■
15 ⵎⵉⵏ ⵉ ⵖⴰ ⵉⵏⵉⵖ? ⵎⵉⵏ ⴷ ⴰⵢⵉ ⵉⵏⵏⴰ, ⴰⵇⴰ ⵉⴳⴳⴰ ⵉ-ⵜ. ⵎⴰⵔⵔⴰ ⵉⵙⴻⴳⴳⵯⵓⵙⴰ ⵏ ⵜⵓⴷⴰⵔⵜ ⵉⵏⵓ ⴰⴷ ⴽⴽⴻⵖ ⵅ ⵜⴰⵔⵥⵓⴳⵉ ⵏ ⵍⴻⵄⵎⴰⵔ ⵉⵏⵓ.
16 ‘ⴰ ⵙⵉⴷⵉ ⵉⵏⵓ, ⵅ ⵎⴰⵏ ⴰⵢⴰ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⵉⴷⴷⴰⵔ ⵓⵛⴰ ⵙⴻⵏⵏⴻⵊ ⵉ ⵎⴰⵔⵔⴰ ⴰⵢⴰ ⴷⴰⵢⴻⵙ ⵜⴻⴵⴰ ⵜⵓⴷⴰⵔⵜ ⵏ ⴱⵓⵃⴱⴻⵍ ⵉⵏⵓ, ⵎⴰⵖⴰⵔ ⵛⴻⴽ ⴰⴷ ⴰⵢⵉ ⵜⴻⴳⴳⴻⵏⴼⵉⴷ ⵓⵛⴰ ⴰⴷ ⴰⵢⵉ ⵜⴰⵔⵔⵉⴷ ⴰⴷ ⴷⴻⵡⵍⴻⵖ ⵖⴰⵔ ⵜⵓⴷⴰⵔⵜ!
17 ⵅⵥⴰⵔ, ⵎⵉⵏ ⵜⵓⵖⴰ ⴰⵢⵉ ⴷ ⵜⴰⵔⵥⵓⴳⵉ ⵢⴰⵔⴻⵥⴳⴻⵏ, ⵉⴷⵡⴻⵍ ⵉ ⵍⴻⵀⵏⴰ. ⵛⴻⴽ ⵜⵍⴻⵙⵇⴻⴷ ⵖⴰⵔ ⵍⴻⵄⵎⴰⵔ ⵉⵏⵓ ⴰⵟⵟⴰⵙ ⴰⵍⴰⵎⵉ ⴷ ⴰⵢⵉ ⵜⴻⵃⴹⵉⴷ ⵥⴻⴳ ⵡⴻⵃⴼⵓⵔ ⵏ ⵓⵀⴻⵍⵍⴻⴽ, ⵎⴰⵖⴰⵔ ⵜⴻⵏⴹⴰⵔⴻⴷ ⵎⴰⵔⵔⴰ ⴷⴷⵏⵓⴱ ⵉⵏⵓ ⴰⵡⴰⵔⵏⵉ ⵉ ⵡⴻⵄⵔⵓⵔ ⵏⵏⴻⴽ.
18 ⵎⴰⵖⴰⵔ ⵍⴰⵅⴰⵔⵜ ⵡⴰⵔ ⵛⴻⴽ ⵜⵇⴰⴷⴰ ⵛⴰ, ⵍⵎⴻⵡⵜ ⵡⴰⵔ ⵛⴻⴽ ⵉⵙⵙⴻⵎⵖⴰⵔ. ⵡⵉ ⵉ ⵖⴰ ⵉⵀⵡⴰⵏ ⴷⴻⴳ ⵡⴻⵃⴼⵓⵔ, ⵡⴰⵔ ⵜⵜⵔⵉⵊⵉⵏ ⵍⴰⵎⴰⵏ ⵏⵏⴻⴽ.
19 ⵡⴻⵏⵏⵉ ⵉⴷⴷⴰⵔⴻⵏ, ⴰ ⵡⴻⵏⵏⵉ ⵉⴷⴷⴰⵔⴻⵏ, ⴰⵇⴰ ⵏⴻⵜⵜⴰ ⴰⴷ ⵛⴻⴽ ⵉⵇⴰⴷⴰ. ⴱⴰⴱⴰⵜⵙⴻⵏ ⴰⴷ ⵉⵙⵙⵛⴻⵏ ⵍⴰⵎⴰⵏ ⵏⵏⴻⴽ ⵉ ⵉⵃⴻⵏⵊⵉⵔⴻⵏ ⵏⵏⴻⵙ.’ ”
20 “ⵙⵉⴷⵉ ⵢⵓⵙⴰ-ⴷⴷ ⵃⵉⵎⴰ ⴰⴷ ⴰⵢⵉ ⵉⵙⵙⴻⵏⵊⴻⵎ. ⵙ ⵓⵢⴻⵏⵏⵉ ⴰⴷ ⵏⵓⵔⴰⵔ ⵙ ⵓⵥⴻⵏⵥⵓⵏ ⵉⵏⵓ ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵖ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ.”
21 ⴰⵇⴰ ⵉⵏⵏⴰ ⵉⵛⴰⵄⵢⴰ: “ⴻⵊⵊ ⵉ-ⵜⴻⵏ ⴰⴷ ⴰⵡⵢⴻⵏ ⵉⵊⵊ ⵏ ⵡⴻⵖⵔⵓⵎ ⵏ ⵜⴰⵥⴰⵔⵜ ⵓⵛⴰ ⴰⴷ ⵜ ⵍⴻⵜⴼⴻⵏ ⵅ ⵜⵃⴻⴱⴱⵓⵛⵜ, ⵅⴻⵏⵏⵉ ⴰⴷ ⵉⴳⴳⴻⵏⴼⴰ.” ■
22 ⵃⵉⵥⵇⵉⵢⴰ ⴰⵇⴰ ⵉⵏⵏⴰ: “ⵎⴰⵏ ⵉ ⵖⴰ ⵜⵉⵍⵉ ⵍⴻⵄⵍⴰⵎⴻⵜ ⴰⵇⴰ ⵏⴻⵛⵛ ⴰⴷ ⵙⵙⴳⴻⵄⵄⴷⴻⵖ ⵄⴰⵡⴻⴷ ⵖⴰⵔ ⵜⴰⴷⴷⴰⵔⵜ ⵏ ⵙⵉⴷⵉ?”